Wigalois, le chevalier à la roue

Version originale

Wirnt de Grafenberg

p. 11-250


Texte intégral

1 Wer hât mich guoter ûf getân?

sî ez iemen der mich kan

beidiu lesen und verstên,

der sol genâde an mir begên,

5 ob iht wandels an mir sî,

daz er mich doch lâze vrî

valscher rede: daz êret in.

ich weiz wol daz ich niene bin

geliutert und gerihtet

10 noch sô wol getihtet

michn velsche lîhte ein valscher man,

wan sich niemen vor in kan

behüeten wol, swie rehte er tuot.

dehein rede ist sô guot

15 sine velschen si, daz weiz ich wol.

swaz ich valsches von in dol,

owê, wem sol ich daz klagen?

ich wilz et harte ringe tragen,

mac ich der besten lop bejagen.

20Swer nâch êren sinne,

triuwe und êre minne,

der volge guoter lêre —

daz vürdert in vil sêre —

unde vlîze sich dar zuo

25 wie er nâch den getuo

den diu werlt des besten giht,

und die man doch dar under siht

nâch gotes lône dienen hie;

den volge wir, wan daz sint die

30 den got hie sælde hât gegeben

und dort ein êwiclîchez leben;

dar nâch wir alle sulen streben.

Wær ich ein alsô wîser man

daz ich wol möhte — als ich doch kan —

35 gesprechen nâch des herzen gir!

leider, nû geswîchent mir

beidiu zunge und ouch der sin,

dạz ich der rede niht meister bin

die ich ze sprechen willen hân,

40 wan daz ichz dar ûf hân getân

daz ich mînen willen hie

gerne erzeicte — wesse ich wie —

daz ez die wîsen dûhte guot.

got gebẹ mir sin und in den muot

45 daz si mirz vervâhen wol.

ich bin noch ganzer sinne hol;

des sprich ich nâch kindes sit.

erziuge ich hie iht guotes mit,

ob min geist gevüeget daz,

50 des sol man mir danken baz

dan einem sinne rîchen man,

der meister ist und sprechen kan:

der hât des mêr dan ich getân.

Man sol mir des genâde sagen

55 daz ich her in mînen tagen

mich dar ûf geflizzen hân,

sit ich mich guotes êrst versan,

wie ich mit mîner zungen daz

verdiente daz die wîsen baz

60 mich mit ir gruoze hêten doch;

des bin ich erlâzen noch;

daz machet mîn grôz unheil

und mîn bœser sin ein teil.

waz frumt den rîchen argen man,

65 der al der werlt guotes erban,

ob er tûsent marke

heizet in sîner arke

vil vaste besliezen?

wer mac des geniezen,

70 ern wellez teilen unde geben?

an dem honịge ist mir vergeben,

wand ich durch [minen] bœsen gemach

mînen schaden übersach,

des ist mîn leben immer swach.

75 Si wellent daz ḍạz iht witze sîn,

swer rôtez golt under diu swin

werfe und edel [ge]steine:

des vreuwent sị sich doch kleine:

si wâren ie vür daz golt

80 der vil trüeben lachen holt;

dâ bewellent si sich inne. —

swer guote rede minne

und si gerne hœre sagen,

der sol mit zühten gedagen

85 und merrken sị rehte: daz ịst im guot.

si getiuret [vil] manges mannes muot,

wand er vernimt vil lîhte dâ

des er sich gebezzert sâ;

daz getiuret in oft anderswâ.

90 Sô spricht vil lîhte ein tumber man

eine rede, der si gemerken kan

daz si dem ze staten kumt

und im an sînen siten vrumt.

swâ von dem guoten guot geschiht,

95 daz dunkẹt die bœsen gar enwiht,

wand in vil wênic zẹ herzen gât

guotiu rede und guot getât.

si bietent lîhte d’ôren dar:

ir muot stêt aber anders war:

100 an valsch und an bôsheit.

swaz den von mir wirt geseit,

daz ruofte ich gernẹr in einen walt:

dâ vünde ich doch die tagalt

daz mir mîn ôre würde erschalt.

105 Hie vinde ich anders lônes niht

wan swaz er hœret oder siht,

des spot er gerne swâ er mac;

daz ist des valschen widerslac;

swaz dem von mir wirt geseit

110 êren oder vrümicheit,

des nimt er vil kleine war;

er lât ez durch diu ôren gar,

zem einen în, zem andern ûz.

ezn vrumt in niht umb ein grûz

115 swaz ich im [guotes] gesagen kan,

wand im sîn valschez herze erban

guotes unde êren.

wer mac den guot gelêren

der ein valschez herze treit?

120 er bewillet sich mit [der] bôsheit

als sich daz swîn mit horwe tuot.

zem besten rihtet iuwern muot.

nu volget mir: ez wirt iu guot.

Mîn kunst diu was verborgen ie;

125 die wold ich nu offen hie,

ob ich mit mînem munde

möhte swære stunde

den liuten senfte machen,

und von solhen sachen

130 daz guot ze hœren wære.

nu wil ich iu ein mære

sagen, als ẹz mir ist geseit.

zeiner ganzen wârheit

trûwe ich ez niht bringen;

135 wan eines wil ich dingen:

daz ir durch iuwer hövischeit

dem tihtær des genâde seit

der ditze hât getihtet,

mit rîmen wol berihtet,

140 wan ditz ist sîn êrstez werc.

er heizet Wirnt von Grâvenberc.

der werlte ze minnen

enblient erz sînen sinnen:

ir gruoz wil er gewinnen.

145 Ez was hie bevor, sô man seit,

ein künic, der ie nâch êren streit,

des nam wîten ist erkant;

Britanjâ hiez sîn lant,

selbe hiez er Artûs;

150 ze Karidôl hêt er hûs.

mit solhen vreuden stuont ez dô

daz uns daz nu machet vrô

sô man der herren vrümicheit

uns niwan mit worten seit

155 die dô des hoves pflâgen;

die muosen dicke wâgen

durch lop den lip: daz was ir sit.

dâ muosen si verdienen mit

die stat zer tavelrunde.

160 swer daz verdienen kunde

daz er der taveln reht besaz,

den hêt man immer deste baz.

ouch ist ê oft vil geseit

von der herren vrümicheit

165 und von des küniges milte,

den des niht bevilte

swaz er êren möhte bejagen;

des muoz man von im immer sagen;

beidiu sîn nam und sîn lant

170 diu sint manigem erkant

der ir dewederz nie gesach.

von dem mir nie guot geschach,

dem wil ich doch sprechen guot,

ob er daz beste gerne tuot;

175 daz was von kinde ie mîn muot.

Als ichz vernomen hân,

sô lac daz hûs an einer plân.

ein grôz fôreis dar an stiez.

der künic daz vil selten liez

180 ern rite baneken drin.

ez was der rîter gewin

und ir aller bestez spil

daz si âventiure vil

dâ zallen zîten vunden.

185 daz jagen mit den hunden

was dâ under wîlen grôz.

durch den walt ein wazzer vlôz

vür daz hûs an einer sît;

daz was eben unde wît,

190 besetzet vil hêrlîche

mit mangem vürsten rîche,

die alle gehûset hêten drin.

ez was der geste gewin

daz si alle umb êre striten;

195 deheine vrümcheit si vermiten,

daz beste sị alle tâten.

daz hûs was wol berâten

mit vil grôzer rîcheit,

als uns diu âventiure seit;

200 ir guot was mangem man bereit.

Des künịges hûs enmitten lac.

der, nâch dem alten site, pflac

die rîter alle enpfâhen wol;

er was reiner tugent vol,

205 gewizzen unde stæte;

âne valsche ræte

minnẹt er iegelîchen man;

daz was hêrlîch getân.

als ez von im geschriben stêt,

210 wol tûsent rîter er hêt

ze gesinde tägelîche;

der iegelîcher was sô rîche

an rossẹn und an gewande,

an bürgen und an lande,

215 daz im nihtes gebrast;

dar zuo hêt er mangen gast,

den er von sîner hant beriet;

von im niemẹn ungetrœstet schiet;

er lôstẹ den recken dicke ir pfant;

220 des ist noch sin nam erkant

von sîner milte über älliu lant.

Ein palas hêt diu künigîn

daz was märmelsteinîn

gezieret wol begarwe,

225 von vier hande varwe:

rôt, brûn, weitîn und gel;

daz hûs daz was sinwel,

beliewet umb und umbe wol.

rîcher vrouwen was ez vol;

230 vil manic maget sûberlîch

dienten aller tägelîch

der rîchen küniginne.

ouch hêt si dar inne

rîcheit und vreude vil.

235 aller hande seitspil

die juncvrouwen kunden;

daz hôrtẹ man zallen stunden

in den gewelben schellen;

der kleinen hunde bellen

240 drinne vaste klingen;

mangen vogel singen

in den liewen über al:

galander unde nahtegal

iegelîcher sîne stimme sanc.

245 die vrouwen dûhtẹ diu wîle unlanc;

des sagten si dem künịge danc.

Nu hêt der künic einen sit —

dâ was sîn hof getiuret mit —

daz er ze tische nie gesaz

250 des morgens, ê er eteswaz

von âventiure hêt vernomen.

eins tages was ez alsô komen, —

daz doch selten dâ geschach —

daz man niht âventiure sach

255 unze wol nâch mittem tage;

daz was des ingesindes klage;

si stuonden an der warte hie.

diu edel küniginne gie

von den rîtern ûf ir sal.

260 dô sach si bî der mûr zetal

einen schœnen rîter haben;

der was geriten an den graben.

der vrouwen was er unbekant.

ein sper vuort er in der hant,

265 von scharlachen was er gekleit,

sîn pfärt was rôt daz er reit,

sîn hâr gemischet unde reit.

Als er die küniginne sach,

vil gezogenlîche er dô sprach

270 ‘ûf gnâde bin ich komen her;

nu gewert mich, vrouwe, des ich ger,

durch wîplîche güete:

sô ist mîn gemüete

geprîset immer mêre;

275 nu enpfâhet durch iuwẹr êre

mîn bet genædiclîche,

daz iuch diu Sælde rîche.’

‘nu sprechet, rîter, wes ir gert.’

‘vrouwe, daz ich werde gewert.’

280 ‘nû saget mir doch: wes?’

‘vrouwè, niwan des:

daz ir von mir geruochet nemen

einen gürtel, der wol möhte gezemen

al der werlte vrouwen;

285 den lâz ich iuch schouwen.

behaltet in unz morgen vruo.

trage iuch iuwer muot dar zuo,

sô habẹt iu’n zeigen von mir;

sî ab, vrouwe, daz ir

290 den gürtel niht behalten welt,

sô wil ich in als ein helt

morgen holen hie durch strit

ze rehter âventiure zît;

od ich bin der hie tôt gelît.’

295 Diu vrouwe sprach ‘daz sî getân;

ich wil âne bœsen wân

von iu die gâbe enpfâhen hie;

alsô doch — ich sagiu, wie —

daz ich iuch, rîter, niht entwer:

300 ir sult morgen komen her

und holt den gürtel; daz ịst mîn rât.

ich schaffez wol daz ẹz sô ergât

daz ir behaltet iuwer leben.

nu wizzet, ịch hân iu wol gegeben

305 daz ich d z tuon durch iuwer bet

mit willen hie an dirre stet

daz ich durch man ê nie getet.’

Den gürtel leite er ûf daz sper;

mit guotem willen reicht er

310 der vrouwen sîne gâbe dô;

er neic ir unde sprach alsô

‘nu lât mich iuwer hulde haben;

ich wil rîten von dem graben

wider zuo dem walde.’

315 dô reit er alsô balde

daz sîn dâ niemen war genam

unz er ze sînen knappen kam.

die wârn mit grôzen vreuden dâ;

si sâhen in zuo rîten sâ.

320 nu lâze wir den rîter sîn.

den gürtel hât diu künigîn;

der rieme was alsô getân

daz ich iu niht gesagen kan

welher hande er wære;

325 er was ninder lære

von gesteine noch von golde;

swer einen wünschen solde,

dern würde nimmer alsô guot.

der küniginne riet ir muot

330 daz si den gürtel umbe bant;

dô hêt diu vrouwe sâ zehant

vreude unde wîsheit:

sine truobte deheiner slahte leit,

die sprâche kunde sị alle wol,

335 ir herze daz was vreuden vol,

swaz spils man dâ begunde,

si dûhtẹ des wie siz kunde;

deheiner kunst ir niht gebrast.

si dûhte daz der selbe gast

340 wol möhte sîn ein rîcher künic;

er dûhte sị biderbe unde vrümic,

als ez wol an dem gürtel schein.

si schuof daz ir her Gâwein

würde brâht ûf den sal.

345 von den liewen gie si zetal

wider sitzen an ir stat;

die vrouwen sị alle sitzen bat.

her Gâwein kom als si gebôt,

ern vorhte deheiner slahte nôt;

350 des gelac vil manger von im tôt.

Diu vrouwe in zuo ir sitzen hiez.

si wessẹ wol daz er niht enliez

swes si in bat ern tæte daz;

ir geviel sîn vuore deste baz.

355 si sprach ‘helt, nu râtet mir,

wand ich erkenne wol daz ir

habt sô tugenthaften muot

daz ir nimmer missetuot;

daz hât man ofte an iu gesehen.

360 ein âventiure ist mir geschehen,

die wil ich iuch wizzen lân;

ich bedarf wol iuwers râtes dran.’

waz welt ir der rede mê?

si sagt im als ich iu ê.

365 als er von ir hêt vernomen

wie der rîter dar was komen

und wiez umḅ den gürtel stuont,

dô tet er als die wîsen tuont:

eine wîle er swîgende saz.

370 mit bedâhtem muote sprach er daz

‘nu wizzet, vrouwe hêre,

ez wær wider iuwer êre

und würde ein bœsez mære,

swie guot der gürtel wære,

375 und engæbet ir in im niht wider.

vrouwe, irn sult niht nider

lâzen iuwern hôhen muot

durch deheiner slahte guot:

ir sît dar zuo ze rîche;

380 und wizzet wærlîche:

swie sîn dar nâch werde rât,

kumt er morgen, als er hât

gelobet, daz man in bestât.’

Diu rede hêt ein ende hie.

385 her Gâwein zem gesinde gie

und sagt in die geschiht dô;

des wurdẹn die rîter alle vrô.

des andern morgens kom durch strît

ze rehter âventiure zît

390 der vil tugenthafte gast

gewâfent daz im nihts gebrast.

ern vorhte deheiner slahte nôt.

ein ravît reit er daz was rôt,

daz gie ze sprunge schône.

395 sîn zimier was ein krône;

ein grôz rubîn dar inne lac;

diu krône lûhte als der tac

von golde und von gesteine.

sîn angest diu was kleine.

400 sîn wâfenroc von borten was;

ein samît grüene alsam ein gras

was ze der banier gesniten.

sus kom der rîter dar geriten.

ûf sînem schilte lac ein ar;

405 der was von rôtem golde gar,

daz ander von lazûre.

sus reit er zuo der mûre,

dâ er die küniginne vant.

sînen helm er abe bant

410 und satzte in ûf den satelbogen.

er was höfsch und wol gezogen.

sin houbet daz entwâfent er,

an die mûrẹ leint er sîn sper.

dô er die küniginne ersach,

415 mit grôzen zühten er dô sprach

‘edle vrouwe, hœret mich

durch iuwer güete; des ger ich.

wert mich mit gnædeclîchem sit

eins dinges, des ich iuch bit:

420 daz ir die gâbe behaltet hie.’

si sprach ‘rîter, des enwart mir nie

ze muote, daz geloubet mir;

edel rîter, jâne sult ir

solher dingẹ niht harte gern

425 der man iuch niht mac gewern;

ịch wil der rede von iu enbern.

Herre, nemt den gürtel wider.’

si liez in schône vallen nider

von der mûre ûf sîn knie;

430 mit der hant ern ouch enpfie.

als er die vrouwen zürnen sach,

der rîter offenlîche sprach

‘swer ie durch hövischeit gestreit,

der gewinne in mit manheit

435 an mir: des hât er êre;

od ichn wil nimmer mêre

des hoves wort gesprechen;

sol ich niht zebrechen

mîn sper vor der porte hie,

440 sôn geschach hie âventiure nie.’

der vrouwen neic er sâ zehant.

sînen helm er ûf bant

und reit vermezzenlîche dan

vür daz hûs ûf die plân.

445 die von der tavelrunde

sprâchen mit einem munde

‘wâ nu schilt unde sper!

harnasch und ors her!’

und swer ê bereit wart,

450 der was der êrste an die vart.

Kaiî den schilt ze halse nam;

mit zorne er ûz ze velde kam:

er wolde bejagen den gewin.

mit grôzen schanden vlôs er in,

455 wand in der rîter niderstach —

daz ez diu küniginne sach —

von dem orse ûf daz gras.

Didones der næhste was;

der rief in rîterlîche an;

460 dô kêrte er als ein küene man

und stach in von dem rosse nider.

gegẹn dem walde kêrter wider.

Segremors erreit in dô;

mit dem teilt er den gürtel sô

465 daz er mit leide dẹn langen tac

betoubet ûf dem velde lac.

Miljanz, der tugentrîche man,

der reit in rîterlîche an;

den stach er nider ûf die plân;

470 daz was im selten ê getân.

ichn kan si niht genennen gar,

wan daz diu tugenthafte schar

von der tavelrunde

in vil kurzer stunde

475 wart dâ sigelôs ersehen;

owê, wie mohtẹ daz ie geschehen!

alle die nâch dem rîter riten,

die kunde er des vil wol erbiten

daz si in liezen rîten dan.

480 an dem velde lac manic man

der des ungewon was;

bedecket was daz grüene gras

mit den schilten eteswâ;

diu ros liefen ledic dâ,

485 als ein stuot wær ûz geslagen;

man sach da mangen în tragen

der ê schônẹ was ûz geriten.

si möhtẹn in gerne hân vermiten,

wan si dâ schande von im liten.

490 Nu reit der rîter sâ zehant

dâ er sîne knappen vant.

die wâren sîns gelückes vrô;

mit vreudẹn enpfiengen si in dô.

den helm man im abe bant;

495 selbe schut èr sîn îsengwant

in den schilt zuo im dâ.

zwêne knappen hiez er sâ

an daz fôreis rîten.

er sprach ‘ir sult dâ bîten

500 unz ir daz vil rehte erspehet

daz ir einen rîter sehet

von dem hûse rîten her;

den erkenne ich wol, wan daz ist der

dem an deheinem strîte nie

505 von sîner zagheit missegie;

gegẹn dem wil ich ruowen hie.

Die knappen riten vür den walt.

ir vreude diu was manicvalt.

si warten, als er in gebôt.

510 dô hôrten si vil grôze nôt

von der mässenîe klage.

der hof enwart nie vor dem tage

geletzet alsô sêre.

diu künịgîn Ginovêre

515 saz mit grôzem jâmer hie:

irn geschach dâ vor sô leide nie.

nû wâfent sich her Gâwein,

der ie in rîters êren schein.

ûf sîn ors saz er.

520 man reichte im schilt unde sper.

sus reit er vür daz bürgetor;

dâ sâhen in die knappen vor.

er reit stätelîche dan.

ze strîtẹ was er ein wîse man,

525 wand er hêt ofte vil gestriten,

durch manheit ûf den lîp geriten.

er stapfet sanfte, im was niht gâch.

daz ingesinde sach im nâch

und bat got sînes lîbes pflegen.

530 si hêten sich sîn gar bewegen,

wan daz im nie misselanc.

daz gevilde daz was harte lanc;

daz reit er gegẹn dem walde nider.

die zwêne knappen îlten wider

535 und sagten im er kæme dâ.

der rîter hiez sich wâfen sâ.

den gürtel gurter umbe sich;

wan durch sîn kraft, so dûhte mich

im wær dâ misselungen.

540 diu ors ze samne sprungen

dô si ein ander sâhen.

si begunden vaste gâhen;

diu ors nâmens mit den sporn;

ir ietweder hêt erkorn

545 den andern underz kinnebein;

dô huop sich under in zwein

ein harte schœniu rîterschaft,

wand ir ietweders schaft

brast ze mangen stücken;

550 dô muosen si zücken

diu swert von den sîten;

hie huop sich schœnez strîten

enzwischen in beiden.

wer solde si dâ scheiden,

555 sît dâ niemen bî in was?

sị erbeizten nider ûf daz gras.

diu ors enhêtẹn in niht getân;

si liezẹn über sich selben gân.

si hêten beide ganze kraft

560 und vâhten ouch mit meisterschaft,

wan si kundenz beide wol.

mir ịst leit, daz ichz sagen sol

daz dem herren Gâwein ie

an dem strîte missegie;

565 doch wil ich im des prîses jehen:

im wære dẹs lasters niht geschehen

wan durch den gürtel den er truoc:

der steine kraft in nider sluoc;

dâ von der gast den sic gewan.

570 er wær sîn anders gar erlân.

des wart her Gâwein vil unvrô.

der edel rîter vienc in dô;

in sîn gezelt zôch er in;

daz was ein rîterlîch gewin.

575 owê, daz dem herren Gâwein ie

von deheinem manne missegie:

wan bezzer rîter dern wart nie.

Als diu sicherheit wart getân,

dô reit der gevangen man

580 mit dem herren durch den walt.

diu klage was vil manicvalt

dâ ze hove von der geschiht.

künc Artûs was da heime niht:

er was ûz an daz gejeit.

585 dô er kom, dô was im leit

und truobet sêre sînen muot,

daz sô manic rîter guot

geschendet was von einem man.

ouch was des ingesindes wân

590 daz her Gâwein wære erslagen;

daz begundens alle klagen.

sîn schandẹ was im doch sô geschehen

daz ir deheiner sị hêt ersehen:

dâ von was ez in unkunt.

595 ezn kæme ouch nimmer vür mîn munt,

hêt mirz ein knappe niht geseit

zeiner ganzen wârheit,

wider den ich alle wîle streit.

Nu riten die zwên küene man

600 mit vil grôzen vreuden dan

und kômen in ein wilde lant.

der herre dẹn gürtel abe bant

als er die vreise vor im sach.

zem herren Gâwein er dô sprach

605 ‘herre und lieber [gẹ] selle,

seht ir daz gevelle

und die steinwende?

daz ist âne wende

wirn müezen rîten dar an.

610 nu nemt den gürtel den ich hân;

behalt in unz an iuwern tôt

und sît sicher vor aller nôt:

wan daz ir siglôs sît ersehen

daz ist von sîner kraft geschehen.

615 ichn zel mirz ze dẹheiner vrümicheit,

wand ir habt grôze manheit

begangen allez iuwer leben;

man hât iu ie den prîs gegeben

an rehter rîterschefte.

620 daz mir von mîner krefte

diu êre sî gevallen hie,

den gelouben gẹwan ich nie,

wan daz ist ie âne wân

ezn habe der steine kraft getân.

625 iun mac nû nimmer missegên;

ân angest müget ir bestên

swaz vreise ir in der werlte welt.’

mit triuwen neic im dô der helt;

der gâbe wart er harte vrô.

630 er gnâdet im und gurte dô

den gürtẹl under sîn îsengwant.

dâ von enpfienc er zehant

vil grôze sterke und manheit.

ûf den berc er dô reit

635 nâch dem herren in ein lant.

ich wæn ie iemen würde erkant

ein lant sô vreuden rîche:

ez bluot allez gelîche,

bluomen unde boume.

640 wie er in einem troume

wære, des bedûhte in sâ.

der vogel sanc was michel dâ.

daz lant gar âne liute was:

niwan bluomen unde gras

645 der was daz gevilde vol.

diu ougen weide tet im wol.

swie ichz doch kurzlîche sage,

si wârn geriten zwelf tage.

des drîzehenden morgens vruo

650 kômen si geriten zuo

einem wazzer daz was breit.

der rîter ez zetal reit

durch einen wünniclichen walt;

der was ze vreuden wol gestalt

655 von loube und von gesange.

den riten si unlange

unz er eine strâze vant;

diu wîste in in sîn eigen lant.

die reise hêt er wol bewant.

660 Mit mærẹn vertriben si den tac.

nu sâhen si wâ vor in lac

ein burc harte veste,

diu schœnest und diu beste

die si ie gesâhen;

665 der begundens nâhen.

ein wîtiu stat lac vor dem tor,

dâ wâren tiefe graben vor.

ein boumgart umb daz hûs lac:

den bevridet ein vestez hac.

670 sus riten si durch die stat.

den herren Gâwein dô bat

der künic willekomen sîn.

er sprach ‘ditze lant ist mîn

von dem walde unz an daz mer,

675 und möhte ich ûz komẹn mit her

vür die berge, geloubet daz:

nie dehein künic besaz

sîn lant sô gwalticlîche —

ich betwüngẹ wol älliu rîche.’

680 sus reit er vür daz bürgetor;

dâ stuonden edel knappen vor,

rîter unde knehte,

die in nâch sînem rehte

enpfiengen küniclîche.

685 er nam geselliclîche

den herren Gâwein bî der hant.

den helm man im abe bant

und vuorte in an guot gemach.

ze sînen knappen er dô sprach

690 ‘nu badet ḍẹn rîter schône,

daz ichs iu immer lône.’

abe schut er sîn îsengwant.

si vuorten in enwec zehant

und battẹn in rîterlîche.

695 der wirt der was rîche;

daz wol an dem gesinde schein.

sich kleite der herre Gâwein

mit wîzer lînwæte;

ein juncvrouwe in næte

700 in einen roc pfellîn;

mit einem pelze härmîn

was er gefurrieret;

sus wart er gezieret.

her Gâwein was ein schœne man.

705 des selben pfelles legte er an

einen mantel der was wît.

nu kom ein bot — des was zît, —

der hiez in ûf ezzen gân;

der künic wolde ins niht erlân

710 ern müese sîn gemazze sîn;

ze kemenâten az diu künigîn:

daz schuof der wirt durch sîn gemach.

an disen dingen er wol sach

daz sîn wille und sîn muot

715 was reine unde guot:

er tet im als man vriunden tuot.

Man gap im guote spîse dâ.

dô man gaz, dô fuorte in sâ

der künic zuo den vrouwen;

720 die mohte er gerne schouwen.

als er in den sal gie,

diu küniginne in enpfie,

dar nâch ein sô schœniu maget

daz ninder lebte, sô man saget,

725 ir gelîche bî der zît;

si was benamen âne strît

diu schœnest die er ie gesach;

des prîses ir diu werlt jach.

sị enzunde im herze unde muot.

730 in dûhtẹ daz wesen bî ir guot,

wan dâ was schœne unde jugent,

gewizzen unde ganziu tugent,

geburt unde sinne;

si möhtẹ wol keiserinne

735 von ir tugent sîn gewesen.

wer möhte ouch noch vor ir genesen

diu sô schœne wære?

wir sulen guotiu mære

von den reinen wîben sagen

740 und ir leit mit leide klagen,

die sich mit zühten kunnen tragen.

Als uns diu âventiure seit,

sô was diu juncvrouwe gekleit

nâch ir rehte harte wol,

745 als ein edel maget sol.

si truoc einen roc wîten,

von zwein samîten

gesniten vil gelîche,

eben unde rîche;

750 der einẹ was grüene alsam ein gras,

der ander rôter varwe was,

mit golde wol gezieret.

der was gefurrieret

mit vil grôzem vlîze:

755 herme vil wîze

hêt er bedecket;

der pelz was gestrecket

neben dem rockẹ gelîche.

gerigen meisterlîche

760 ein hemde was dar under;

des nam den rîter wunder

daz ez sô rehte lûter was:

als ein liehtez spiegelglas

was daz selbe hemde;

765 ez dûhte in harte vremde

daz ez sô kleine mohte sîn;

ez was wîz sîdîn

mit guldîner næte.

ouch gezam vil wol der wæte

770 ein gürtel den diu maget truoc;

daz was ein borte guot genuoc

von golde und von gesteine,

grôz unde kleine.

ûz einem smaragde was,

775 rehte grüene alsam ein gras,

diu rinke wol ergraben,

von golde ein ar dar ûf erhaben

mit gesmelze harte wæhe;

daz werc daz was spæhe.

780 daz diu spängel solden sîn,

daz wâren tier guldîn,

geworht mit grôzem vlîze;

dâ enzwischen berle wîze

wâren gestecket.

785 sus was er bedecket

mit edelem gesteine.

ichn gesach ir nie deheine —

geworht âne zungen —

diu sô wol bedrungen

790 mit gezierde wære

als an disem mære.

ouch was ein edele rubîn

durch sînen wünniclîchen schîn

in den gürtel vor geleit;

795 als si dehein swachez leit

truobte in ir gemüete,

sô benam des steines güete

mit süezem schîne ir ungemach,

sô si sîn varwe rehte ersach;

800 an tugende was er niht swach.

Sich hêt diu maget rîche

vil harte hövischlîche

in einen mantel gevangen,

wîten unde langen,

805 genagelt wol mit golde,

bezogen als si wolde

mit einer veder härmîn;

dâ wâren gesniten în

von einer hiute vischîn —

810 der hâr daz was weitîn,

brâht von Îberne —

mâne unde sterne;

daz zierte die veder harte wol;

harmzagel was si vol

815 innen bestecket;

die veder hêt bedecket

ein alsô guot siglât

daz diu werlt niht bezzers hât.

ouch wâren diu tassel

820 beidiu rôt unde gel,

ergraben harte kleine

ûz einem edeln steine

mit heidenischem liste:

der was ein âmatiste,

825 daz ander was ein jâchant.

ein zobel reichte ir ûf die hant,

der was swarz unde breit,

gemischet grâ unde reit,

als noch manic vrouwe treit.

830 An ir houbetloche vor

was der herre Âmor

ergraben meisterlîche,

rehte dem gelîche

als ez leben solde;

835 eine strâle von golde

hêt er in der zeswen hant,

in der andern einen brant;

daz werc was guot und kleine,

ûz eim karfunkelsteine

840 ergraben harte schône;

kleine als ein bône

was der selbe stein.

vor der juncvrouwen er schein

843a des nahtes swâ si gie;

843b dehein vinster er dâ lie

dâ diu juncvrouwẹ inne was;

845 des tages glaster als ein glas.

dâ hafte sị ir buosem mit

nâch der Kärlinge sit.

si was wol grôzer dinge wert;

swes ir lîp zer werlte gert,

850 des hât diu sælde si gewert.

Diu maget truoc ein schapel,

daz was weitîn unde gel,

rôt, brûn unde wîz;

dar an lac vil grôzer vlîz

855 von golde und von sîden.

swer daz nu wolde nîden

daz si sô schône was gekleit,

daz wær ein michel tôrheit,

wand ez ist âne ir aller schaden

860 swaz ich ûf si mac geladen

von sîden und von borten

und von gezierdẹ, mit worten.

ir zöpfe wârn gebunden,

mit golde wol bewunden

865 unz an des hâres ende;

sô keiserlîch gebende

truoc diu maget reine.

ir hâr daz was kleine,

goltvar unde reit;

870 ir scheitel wîz und niht ze breit.

diu stirne was ir sinwel.

ebẹn und lûter was ir vel,

von rôsen varwe wîze

getempert mit vlîze.

875 ir brâ brûn, sleht unde smal.

dâ bî hiengen ir zetal

reide löcke goltvar.

ir ougen lûter unde klâr.

ez wære wîp oder man,

880 swen si güetlîche an

mit lachenden ougen sach,

swaz dem leides ie geschach,

des was zehant vergezzen.

diu Sældẹ hêt si besezzen.

885 ir ôren [wârn] ze rehte gar,

als si wæren erwünschet dar,

von liehtvarwer wîze,

nâch dem gotes vlîze

beidiu krump unde hol.

890 diu nase [was ir] geschaffen alsô wol:

swer si immer solde sehen,

dern möhte niht wandels dran erspehen

sine stüende gevüeclîche

dem antlütz wol gelîche.

895 diu hiufelîn [wârn ir] rôsenvar,

daz antlütze lûter gar

von rœte und von wîze,

als si got mit vlîze

gemischet hêt begarwe.

900 mit alsô liehter varwe

was ir lîp über al

linde und eben hin zetal.

daz was dâ wol erzeiget:

der Wunsch hêt sich geneiget

905 vil gar in ir gewalt.

ir munt der was sô wol gestalt

und sô minniclîche,

und hêt si im gelîche

sîne mâge alle ersterbet,

910 in selben sô verderbet

daz er vil kûme mohte genesen —

und soldez dannoch alsô wesen

daz er si kuste an ir munt,

sô wær vergezzen sâ zestunt

915 aller sîner swære,

als ez nie worden wære.

ir zene wîz, ebèn und kleine,

ûz vil lûterm beine

zesamene gestecket;

920 der munt hêt si bedecket

mit rôsenvarwer rœte. —

daz ich mich nu nœte

der gedanke alsô verre,

ich wæne ez mir niht werre,

925 wan von gedanken kumt der muot

der dem lîbe sanfte tuot. —

ouch was ir diu kel

sleht unde sinwel,

harmwîz, als er jach

930 der die juncvrouwen sach;

ein breiter zobel drumbe gie,

der ir vil lützel sehen lie,

wand er den hals gar umbe vie.

Michn triegen dannẹ die sinne mîn,

935 si möhtẹ wol undẹr ir hemde sîn

ein sô schœne crêatiure,

vil reine und sô gehiure,

von eim sô süezen lîbe

daz ich wæn ie von wîbe

940 reiner lîp würde geborn.

diu Sælde hêt ir gesworn

ze belîben mit ir stæte

immer undẹr ir wæte.

des was ir schœner lîp wol wert,

945 wan swes diu Sældẹ ze[gẹ]sellen gert,

der muoz gar âne wandel sîn;

daz was wol an der mägde schîn,

wan si vor allem valsche was

lûter als ein spiegelglas.

950 des nam der rîter an ir war;

ir grôziu schœne truoc in dar;

des minnẹt er si von herzen gar.

Diu maget diu was rîche.

vil gezogenlîche

955 saz si wider an ir stat.

der wirt den herren Gâwein bat

ze leisten sîne sicherheit;

er sprach ‘herre ich bins bereit,

wand ich alsô gesworen hân.’

960 die maget hiez er ûf stân

und sprach ‘sô nemt ze wîbe

dise maget iuwerm lîbe

ze triuwen und ze rehter ê.’

der herre Gâwein sprach ‘owê,

965 ich wæne es iu niht ernst sî!

ich liezẹ drumb al die werlt vrî,

ob sî mîn eigen wære,

daz ich mîne swære

mit ir vertrîben solde!

970 wan ez got wolde

daz si mîn vrouwe solde sîn,

sô hêt alrêrst diu sælde mîn

mîn vreude gar gekrœnet

und œsterlîch geschœnet,

975 wan swaz ich her gedienet hân,

sît ich mich guotes êrst versan,

allen guoten wîben,

daz muoz nû belîben;

ichn müge es lôn von ir gehaben,

980 mîn vreudẹ ist êwiclîch begraben

mit jâmer unz an mînen tôt.

hêt ich alle mîne nôt

erliten durch die schœnen maget,

sôn würde sị nimmer mê geklaget,

985 wan si erliuht daz herze mîn

rehte alsô der sunnen schîn

tuot den liehten sumertac.

mit lobe ich niht verenden mac

ir schœne und ir gewizzen,

990 wan hêt sich ie gevlizzen

Ôvîdîus mit lobe dar,

ern möhte sị niht volloben gar.’

si bedorftẹ wol schœne unde jugent,

gewizzen unde ganzer tugent,

995 sît si nam ein der tiurste man

der rîters namen ie gewan;

den mohte ouch si mit êren hân.

Dô sînen ernst der wirt ersach,

zem herren Gâwein er dô sprach

1000 ‘sît ez nu got gevüeget hât,

an dem daz dinc allez stât,

daz iu diu magt beschaffen ist,

sô gebe iu unser herre Krist

beiden sælde und êre! ’

1005 der rede enwart niht mêre.

des wart der rîter harte vrô.

ze sînen triuwen nam er sị dô;

sam tet in diu reine maget,

weinende, als mir ist gesaget.

1010 der künic wolds getrœstet hân,

daz si ir weinen hêt verlân,

mit worten; dô nemohter.

des künịges swester tohter

was diu maget wol getân.

1015 dô in der segen wart getân,

küssende er si umbe vie;

der rîter mit ir slâfen gie;

im geschach dâ vor sô liebe nie.

Nû wart im daz reine wîp

1020 liep alsam sîn eigen lìp.

sus ruowet er nâch sîner vart,

unz diu vrouwe swanger wart

bî im eines kindes.

ouch was des gesindes

1025 vreude von dem gaste grôz,

wand in der arbeit niht verdrôz

swâr ẹr in gedienen mohte,

iegelîchem als im tohte.

rîterschefte was dâ vil;

1030 mit hunden und mit vederspil

reit der gast, als im gezam.

er hêt erworben daz sîn nam

von sîner tugent was erkant;

er zierte wol des künịges lant,

1035 wan sîn gelîchen niemen vant.

Ûf des künịges veste

was daz aller beste

werc von rôtem golde

gegozzen, als er wolde:

1040 ein rat, enmitten ûf den sal:

daz gienc ûf und zetal;

dâ wâren bilde gegozzen an,

iegelîchz geschaffen als ein man.

hie sigẹn diu mit dem rade nider,

1045 sô stigen d’andern ûf wider;

sus gienc ez umbe an der stat;

daz was des gelückes rat.

ez hêt ein pfaffe gemeistert dar;

von rôtem golde was ez gar.

1050 ez bezeichent daz dem wirte nie

an deheinem dinge missegie,

wan daz gelücke volgẹt im ie.

Nû was des wol ein halbez jâr

daz der gast was komen dar.

1055 eins tagẹs er trûrende gie.

vil grôzer jâmer in gevie:

in truoc sîn herze und sîn sin

zuo der mässenîe hin

und zuo der tavelrunde.

1060 die strâze er vil wol kunde

wider in sîns herren lant.

her Gâwein gie sâ zehant

ze sînem wîbe; als er die sach,

mit grôzem jâmer er dô sprach

1065 ‘got müez iu den lîp bewarn;

vrouwe, ich wil von hinnen varn

mit urloube drie tage.’

die lüge tet er durch die klage:

er vorhte ir jâmer und ir nôt.

1070 beidiu trüebe unde rôt

wurdẹn ir ougen an der stat.

vil sêre siuftunde sị in bat,

wand ir sagte ir swærre muot,

als er mir selben ofte tuot,

1075 daz er ze lange wolde sîn. —

si sprach ‘lieber herre mîn,

belîbet hie, daz ist mîn rât;

mîn dinc mir angestlîche stât;

daz seht ir, unde wizzet wol

1080 daz ich grôzen kumber dol

von mîner swære die ich hân.

herre, ir sult hie bestân

unz ir beseht wiez mir ergê:

ez kumt vil lîhte daz ir ê

1085 niht wider komt, ichn sî genesen;

des müese ich immer jâmerc wesen.’

dochn trûwet sị der geschiht niht.

owê, waz des noch geschiht

daz man wol verswüere!

1090 daz er alsô gevüere,

dâ hêt er weizgot vür gesworn,

wand er ze stæte hêt erkorn

daz wesen sînem libe

bî sînem reinen wîbe.

1095 im was daz leider unerkant

daz niemen mohte in daz lant

ân ḍẹs küniges geleite komen;

und hêt er daz ie vernomen,

sô hêt er sichs vil wol bewart

1100 daz ez im immer ûf die vart

alsô komen wære.

sus benam er ir ir swære:

er sprach ‘vrouwe, gehabt iuch wol,

wand ich immer mit iu dol

1105 beidiu liep unde leit;

iu ist von mir unverseit

minne unde triuwe;

ich wil iu âne riuwe

immer wesen undertân.

1110 ir sult ez niemen wizzen lân

daz ich hinnen rîten wil;

ich kum iu in vil kurzem zil

michn irres dannẹ der bitter tôt

od sô ungevüegiu nôt

1115 die niemen müge erwenden;

dise reise wil ich enden

daz sîn niemen werde gewar

war ich welle od wie ich var;

daz ist nâch mînem willen gar.’

1120 Diu vrouwe wart des trôstes vrô:

si wânde ez ergienge alsô.

dô kuste er si und schiet dan;

sînen willen wesse dehein man.

ûf sîn ors saz er zehant,

1125 verholn nam er sîn îsengwant

und reit ûz vil balde

die strâze gegẹn dem walde.

ich wil iu ein wunder sagen:

daz er dar reit in zweilf tagen,

1130 daz reit er wider eịn halbez jâr.

alsus kom er geriten dar

ze Karidôl vür daz hûs.

nu was der künic Artûs

gegangen vür daz bürgetor;

1135 dâ hôrte man in klagen vor

sînen neven, den hern Gâwein.

in dirre klage dô erschein

sîn wâfen an dem schilte.

künc Artûs der milte

1140 lief gegẹn im und enpfienc in dô.

daz gesinde wart allez vrô;

rîter unde knehte

enpfiengẹn in wol von rehte,

wand er hêt tugenthaften muot;

1145 er was getriuwe unde guot,

vor allem valsche wol behuot.

Dô vlugen diu mære

daz er komen wære

von hûse ze hûse.

1150 mit dem künige Artûse

gienc er zuo den vrouwen sâ.

diu küniginne enpfienc in dâ

und ir vrouwen über al;

zuo in saz er ûf den sal.

1155 si vrâgetẹn in der mære

wiez im ergangen wære;

des sagte er in genuoc;

sîner geschiht er nie gewuoc,

wand in sîn herzẹ dar wider truoc.

1160 Nu nam er des vil rehte war

daz er die mässenîe gar

dâ vant als er sị gelâzen hêt,

und daz der hof ganzer stêt,

des vreut er sich vil sêre.

1165 diu künịgîn Ginovêre

hiez sîn rîterlîche pflegen.

dône wolde iedoch der degen

niht turnieren als ê,

wand im tet der jâmer wê

1170 nâch sînem schœnen wîbe.

er gedâhte ‘ob ich belîbe

lenger hie, des gwinne ich schaden.’

sîn stæter muot begunde in laden

wider in sîns geswîgen lant.

1175 vil tougenlîch gie er zehant

eine vür daz bürgetor;

dâ vant er sîne knappen vor.

er sprach ‘bringet mir mîn ors her,

harnasch, schilt unde sper,

1180 und saget niemen mîne vart.’

vil snelle ez im brâht wart;

dô saz er ûf und reit zehant;

ouch brâhtens im sîn îsengwant

in den walt, als er gebôt.

1185 in twanc diu minnende nôt

unz si in dar ûf brâhte

daz er dar wider gâhte

dâ er sîn wîp hêt verlân.

die knappen riten mit im dan.

1190 sus reit er umbe ein ganzez jâr

unz er diu lant älliu gar

vor den bergen durch reit.

daz was ein vẹṛlorniu arbeit:

als ichz ofte hân vernomen,

1195 in daz lant moht niemen komen

ern hêt den gürtel den er lie

sînem wîbe, dô er die

aller jungest mit jâmer sach.

sînes herzen ungemach

1200 wart dâ von sô grôz

daz in des lebens gar verdrôz;

des ouch sîn lîp vil wênic gẹnôz.

Dô er mit vrâge daz bevant

daz niemen mohte in daz lant

1205 vor den hôhen bergen komen,

als er die wârheit hêt vernomen,

dô teter als der biderbẹ man,

der sich des wol getrœsten kan

swes er niht gehaben mac.

1210 swer ie guoter sinne pflac,

der habe ouch noch denselben sit:

dâ vristet er sîn êre mit.

sus reit er [wider] zuo des küniges hûs.

nu was der milte Artûs

1215 mit rîterschefte an der plân;

dâ kam ouch her Gâwein an

geriten zuo des künịges schar.

des tages was sîn zwei jâr

daz sîn wîp was genesen.

1220 hie lâze wir den rîter wesen

und sagen wiez dem kinde ergie.

sîn reiniu muoter woldez nie

von ir gelâzen einen tac;

vor liebe si sîn selbe pflac

1225 und ander manic vrouwe hêr.

in einem jâre wuohs ez mêr

dan ein anderz in zwein tuo.

man lêrtez spâte unde vruo

gewizzen unde güete.

1230 ouch was sîn gemüete

zallen dingen veste;

ez tet niwan daz beste;

von rehte muosez sælic sîn.

ez zôch ein rîchiu künigîn

1235 unze zuo zwelf jâren;

die dô die tiursten wâren

und die besten rîter dâ,

die underwunden sich sîn sâ;

si lêrtenz rîten unde gên,

1240 mit zühten sprechen unde stên.

des volgẹt er in, wand er was guot,

zallen dingen wol gemuot.

daz beste ie nâch dem besten tuot.

Nu gap im got in sîner jugent

1245 schœnen lîp und ganze tugent;

die behielt er an sîn ende.

âne missewende

lebt er in sîner kintheit.

sîn dienst was allen den bereit

1250 die sîn von im geruochten;

die gâbe ouch an in suochten,

den gap er als in tohte,

swen erz gewinnen mohte.

aller hande rîter spil

1255 lêrten in die rîter vil:

buhurdieren unde stechen,

diu starken sper zebrechen,

schirmen unde schiezen.

swen in die rîter liezen,

1260 sô nâmen in die vrouwen wider:

man vuorte in ûf unde nider.

von sîner tugent daz geschach

daz man in zallen sîten sach

gerner danne ein andern man.

1265 wol in, der daz verdienen kan

daz in diu werlt gerne siht

und daz man im des besten giht!

dem hât got sælden vil gegeben;

er mac ouch deste gerner leben.

1270 sîn sælde hât ie des gegert

daz er den liuten würde wert;

des wart ouch er von in gewert.

Nu hêt er vordes vil vernomen

wie sîn vater dar was komen,

1275 wand im wart ofte vür geleit

sînes vater vrümicheit,

wie manhaft er wære.

sine wessẹn ab niht der mære

ob er wær in dẹheiner nôt;

1280 weder er lebte od wære tôt,

daz was in allen unbekant.

der juncherre ez sît bevant.

in sînen vreuden truobte in ie

daz er sînen vater nie

1285 gesach bî allen sînen tagen.

daz begunde er tougenlîche klagen

und gie zuo der muoter sîn

und zuo der edeln künigin,

diu hêt in ûz der toufe erhaben.

1290 er sprach ‘vrouwe, lât mich haben

iuwer hulde und iuwern segen.

got müez iuwer beider pflegen

und geruoche iuch vor dem tôde bewarn.

ich wil benamen hinnen varn,

1295 in mîner jugent erwerben daz

daz man mich von rehte baz

erkenne danne ein andern man,

als mîn vater hât getân.

waz sol mir mîn starker lîp,

1300 und sol ich mich nu als ein wîp

verligen in disem lande hie?

ịch wil den suochen von dem mir ie

tugent unde manheit

allez mîn leben ist geseit;

1305 daz ist mîn vater, her Gâwein,

der ie in rîters êren schein,

als ichz von im hân vernomen.

ichn wil nimmer wider komen

ez ensî daz ich in gesehe,

1310 swaz halt mir dar nâch geschehe;

des gunnet mir, wand ez muoz sîn.

vrouwe und liebiu muoter mîn,

mir seit daz mîn gedinge

daz ich in wider bringe;

1315 got gebẹ daz mir gellinge! ’

Dô man sîn ernest rehte ersach,

sîn muoter, vrouwẹ Flôrîe, sprach

‘lieber sun, nu volge mir,

wan du erkennest wol daz wir

1320 sîn hân gebiten [wol] zweinzic jâr.

hie bî mahtu nemen war,

als ichz von im hân vernomen,

lebter, er wære wider komen.

ich erkande sîne triuwe wol;

1325 er was ganzer triuwen vol.

owê, daz ich in ie erkôs

mir ze vriunt, sît i’n verlôs

sô wunderlîche, ichn weiz wie.

sîn gelîche dern wart nic

1330 und wirt ouch nimmer mê geborn.

sol ich in alsô hân verlorn,

sô muoz ich jâmer unde nôt

lîden unz an mînen tôt.

herre got, der mägde kint,

1335 sît dir diu herze offen sint

und alle willen ûf getân,

wie hâstu mich alsô verlân!

keiser, herre, reiner Krist,

sît dir niht verborgen ist

1340 und ân dich niht genesen mac,

lâ mich geleben noch den tac

daz ich gesehe den ich trage

in mînem herzen alle tage

beidiu mit jâmer und mit klage! ’

1345 An ir gebærden daz wol schein

daz ir der herre Gâwein

was liep als ir eigen lîp.

si sprach ‘herre, nû belîp,

lieber sun, bî mir hie.’

1350 er sprach ‘liebiu muoter, wie

sol mîn nam werden erkant

ichn rîte ûz in andriu lant,

als mîn vater her în tet?

ir sult lâzen iuwer bet.

1355 ịch wil verdienen der besten gruoz

und daz man mich erkennen muoz,

od ich verliuse mînen lîp.

swer sînen rât læt an diu wîp,

dern ist niht ein wîser man.

1360 dehein dinc mich des erwenden kan

mîn lîp dern müeze gewâget sîn.’

‘herre und liber sun mîn,

sît ichs dich niht erwenden kan,

sô nim ein kleinôt daz ich hân;

1365 behaltez unz an dînen tôt,

und wis sicher vor aller nôt;

daz ist ein gürtel, den mir lie

dîn vater, dô er jungest gie

von mir und urloup hêt genomen

1370 als er wider solde komen.

an mîne sêle bevalch er mir

daz ich den gürtl gæbe dir, —

als ich dir geseit hân —

ob dụ immer würdest ze man,

1375 swen du woldest hinnen varn.

du solt den gürtel sô bewarn

daz sîn iemen werde gewar.’

vil heize weinde gap sị in dar;

er kuste si und neic ir dô.

1380 die vrouwen wurden alle unvrô.

sus nam er urloup unde reit.

daz gelücke was im ie bereit;

des erziugẹt er grôze manheit.

Sin muoter, vrouwẹ Flôrîe, stuont

1385 mit grôzem jâmer, sô die tuont

den grôz herzeleit geschiht.

ir jâmer hal sich lenger niht

dô si in von ir rîten sach.

mit grôzer klage si dô sprach

1390 ‘owê, ich vil armez wîp!

waz sol mir guot unde lîp?

waz sol mir schœne unde jugent,

gewizzen unde ganziu tugent?

ich hân verlorn den tiursten man

1395 den wîp ze vriunde ie gewan,

dar zuo mîn einigez kint.

herre got, sît dir sint

älliu dinc undertân

und ân dich niht genesen kan,

1400 sô bevilhe ich hiute in dînen segen

mîn kint, daz du sîn ruochest pflegen

an dirre vart, durch dînen tôt.

beschirme in, herre, vor grôzer nôt

und sende in mir gesunden wider!’

1405 in der klage dô reit er nider

von dem hûse durch die stat.

daz liut im allez heiles bat;

daz machet sîn vil reiner muot;

er was gewizen unde guot,

1410 den tumben tump, den wîsen vruot.

Sus reit er verre durch diu lant,

und was im dannoch unbekant

war er kêren wolde;

ern wesse war er solde;

1415 in disen sorgen reit er.

nu kom gegẹn im geloufen her

ûf dem wege ein garzûn.

der truoc einen schaprûn,

gesniten von fritschâle;

1420 mit rôtem zendale

was er gefurrieret.

sîn huot was gezieret

mit bluomen und mit loube.

sus lief er in dem stoube.

1425 des rôten seites von der gran

truoc er einen roc an,

gebrîst mit grôzem vlîze;

hantschuohe wîze

hêt er an den henden.

1430 den stap begunde er wenden

nâch der garzûne sit:

dâ vürdert er sîn loufen mit.

sîne hosen wâren guot genuoc;

zwêne brîsschuoch er an truoc.

1435 und als er im sô nahen kam,

sînen huot er abe nam;

hie mit êrẹt er in alsô.

der juncherre gruozte in dô

und vrâget in der mære

1440 wes garzûn er wære.

er sprach ‘des aller tiursten man

der künicrîche ie gewan:

des künịges von Britanje.

der hât mich zİspanje

1445 nâch rîtern ûz gesant

ẹz hât der künic von Engellant

einen turnei wider in genomen;

dar suln im die rîter komen

ze Karidôl vür sîn hûs;

1450 dâ sol der künic Artûs

wol driu tûsent rîter haben;

durch daz hân ich mich ûz erhaben.’

der juncherre sprach ‘nu sagẹ mir mê

wiez in sînem hove stê.’

1455 er sprach ‘herre, ich sagiu daz:

in nie deheinem hove baz;

dâ ist grôz rîterschaft

und alles des diu überkraft

des man ze vreuden gert.

1460 komt ir dar, ir wert gewert

swes iu der muot erdenken kan.

dâne zwîvelt nîmmer an,

wand ichz wol erkunnet hân.’

‘Nu zeige mir den wec dar.’

1465 er sprach ‘nu nemt der strâze war

die ich her komen bin;

diu treit iuch vil rehte hin

ze Karidôl vür daz hûs;

dâ ist der künic Artûs

1470 mit grôzen hôchzîten.’

zehant begunder rîten

und kom dar an dem niunden tage.

nâch des garzûnes sage

vant er michel vreude dâ.

1475 ûf den hof reit er sâ,

dâ manic âventiure geschach.

bî einer linden er dô sach

ligen einen breiten stein,

des tugent im inz herze schein,

1480 gevieret und niht sinwel;

striemen rôt unde gel

giengen dar durch eteswâ;

daz ander teil daz was blâ,

lûter als ein spiegelglas.

1485 sô grôziu tugent an im was

daz deheiner slahte man

der ie deheinen valsch gewan

die hant niht mohte gelâzen dran.

Zuo der linden reit der gast,

1490 sîn pfärt hafter an einen ast

und saz enmitten ûf den stein.

sîn herze was âne mein

und ledic aller bôsheit;

sîn muot ie nâch dem besten streit.

1495 swer ie dhein untugent begie,

dern mohte dẹm steine nâher nie

komen dan eins klâfters lanc;

si tâten alle widerwanc,

sô si zem steine wolden gên;

1500 si muosen alle hôher stên.

ezn was dâ vor nie geschehen

daz ie iemen würde ersehen

ûf demselben steine,

niwan der künic [al] eine:

1505 der was âne wandel gar.

her Gâwein der reichte dar

mit der hant, und niht baz;

ich sagiu wie ẹr verworhte daz

er zem steine niht moht komen,

1510 als ichz ofte hân vernomen:

eine maget wol getân

die greif er übẹr ir willen an,

sô daz si weinde unde schrê.

deheiner slahte untugent mê

1515 er von sîner kintheit nie

unz an sînen tôt begie;

diu selbe in zuo dem steinẹ niht lie.

Dô man den knappen dar ûf sach,

einem rîter wart vil gâch

1520 vür den künic, und sprach alsô

‘herre, ir sult wesen vrô!

ein âventiure ist hie geschehen:

ich hân ûf dem steine ersehen

sitzen einen jungelinc.’

1525 daz dûhte sị alle samt ein dinc

grôz unde wunderlîch.

der edeln rîter iegelîch

îlte vür den andern dar

und nâmen der geschiht war.

1530 der künic stuont [ûf] von sîner stat;

die vrouwen er dô gên bat

mit im zuo dem steine nider;

des satztẹ sich ir deheiniu wider.

dô daz gesinde in gerne sach,

1535 der künic zuo den vrouwen sprach

‘enpfâhe wir ịn! des ist er wert,

und wizzet, swes er an mich gert

im ze vrumen, daz ịst getân;

und wil er hie bî mir bestân,

1540 ich behalte in nâch sîṇẹm rehte.

rîter unde knehte

die giengen mit im über al

zuo dem steine hin zetal;

mit vreuden rûmten si den sal.

1545 Dem juncherren was unbekant

wiez umḅ den stein was gewant;

hêt erz von iemen ê vernomen,

er wære benamen drûf niht komen.

als er den künic her sach gên,

1550 dô begunde er von dem steine stên.

sîn gebærde diu was sæliclich:

die hende habtẹ er vür sich

vil harte gezogenlîche.

künc Artûs der rîche

1555 der hiez in willekomen sîn,

und diu edel künigîn;

dar nâch diu mässenîe gar.

si nâmen an im beider war

lîbes unde muotes:

1560 dône vundens niht wan guotes,

wand er was alles valsches blôz;

dar zuo was sîn sælde grôz;

der beider er von rehte gẹnôz.

Der künic vrâgẹt in [der] mære

1565 war er wolde od wer er wære.

er sprach ‘herre, niwan her;

ichn kan iu niht gesagen wer

ich von mînem vater bin.’

der [edel] künìc bat aber in

1570 im sagen sînen namen sâ

und mit im belîben dâ.

er sprach ‘herre, daz sî getân;

ich wilz iuch gerne wizzen lân:

Gwî von Gâlois bin ich genant.

1575 beslozzen ist daz selbe lant

von danne ich bin geborn.

ze herren hân ich iuch erkorn,

ob ir geruochet behalten mich;

mit mînem dienest wolde ich

1580 erwerben des ich [ie] hân gegert,

ob ich der êren wære wert,

daz ich rîter würde hie;

des hân ich gedinget ie,

wan diu werlt alsô zergêt

1585 daz nimmer dehein hof gestêt

mit sô ganzer rîterschaft;

aller vreuden überkraft

hân ich in kurzen stunden

in iuwerm hove vunden.

1590 enpfâhẹt mich als ichs hân gegert!’

er sprach ‘juncherre, sît gewert

aller iuwer bete hie.’

in sîn genâde er in enpfie

und bevalch in an der stet,

1595 nâch der küniginne bet,

sînem vater, dẹm herren Gâwein.

dô was under in zwein

diu grôze triuwe unbekant

die kint ie ze vater vant:

1600 ir deweder erkante dẹn andern dâ.

her Gâwein underwant sich sâ

des knabẹn mit sîner lêre;

des gewan er vrum und êre.

den besten was er undertân;

1605 mit redẹ ḥêt er den valschen man;

ir deheinẹn er nie ze vînt gewan.

Dem künịge wart er heimlîch

und diente im aller tägelîch

als er beste kunde.

1610 der von der tavelrunde

was er allen vil bereit:

ze turnein er mit in reit,

und swâ man manheit begie,

dâ versûmte er sich nie

1615 ern wær zevorderst an der schar;

si muosen ẹs alle sîn nemen war.

sîn manheit diu was harte grôz;

gelückes er dar zuo genôz

daz im vil selten missegie,

1620 wand er hêt vor ougen ie

got, der die sînen nie verlie.

Dô dem künige wart geseit

sîn vil grôziu manheit,

des wundert in und wart sîn vrô.

1625 eine hôchzît gebôt er dô;

dar kom manic vürste rîch.

diu hôchzît wart vil lobelîch

dâ der knappe nam daz swert.

er was wol rîterschefte wert;

1630 die enpfienc ouch er mit vreuden dâ.

diu küniginne sande im sâ

sehs rîter kleider;

diu wâren der beider

von scharlach un von pfelle.

1635 her Gâwein, sîn geselle,

gap im ein ravît daz was guot;

daz vreute sêre sînen muot.

der künic im zwelf knappen liez;

dar zuo er im geben hiez

1640 swaz er haben solde,

iegelîchez als er wolde.

daz geschach, als ich iu sage,

an dem heilịgen pfingestage

daz der knappe swert nam.

1645 und als er messe vernam,

die pfaffen gâben im den segen.

dô gurte umbe sich der degen

ein swert, daz dehein man

nie dhein bezzerz gewan.

1650 ez half im sît ûz manger nôt,

er behieltz ouch unz an sînen tôt;

daz gap im her Gâwein dâ.

der milte künic reichte im sâ

den schilt selbe und einen schaft.

1655 sich huop dâ michel rîterschaft

und schœne buhurdieren

mit rîchen banieren.

sus wart her Gwîgâlois ze man

mit rîterschefte ûf der plân;

1660 der künic hêt wol zim getân.

Dô sich der buhurt zerlie,

der künic ûf den sal gie,

mit im der junge swertdegen —

der kunde wol der êren pflegen, —

1665 dar nâch die rîter über al.

sich huop dar inne grôzer schal

und manger hande seitspil;

floiten und tambûren vil

die hullen wider eịn ander dâ.

1670 der milte künic vuorte in sâ

zuo der tavelrunde

und gap im an der stunde

der taveln reht unde stat,

als in diu mässenîe bat.

1675 ouch gap er im ze [gẹ]sellen sâ

den aller tiursten rîter dâ:

daz was mîn herre Gâwein,

der ie gar âne wandel schein;

des wurdens beide harte vrô.

1680 den spilliuten gap man dô

pfärit, silber und gewant;

si wurden alle sâ zehant

von den gâben rîche

und lobten alle gelîche

1685 den rîter und die hôchzît.

si spilten alle en widerstrît

vor der tavelrunde,

iegelîcher als er kunde.

man gap in allen wirtschaft

1690 und alles des die überkraft

des man zem lîbe gerte.

diu hôchzît diu werte

mit vreuden dâ, als ich iu sage,

nâch pfingesten vierzehen tage.

1695 dô diu ende hêt genomen,

die geste die dar wâren komen

die nâmen alle urloup dâ

ze hove und ouch anderswâ.

dô hiez der künic Artûs

1700 tragen in sîn muoshûs

die pfelle ungeschrôten,

mangen samît rôten,

grâ, härmîn unde bunt;

dar zuo gap er manic pfunt

1705 und schœniu ros den gesten;

er kunde wol enbresten

ieglîchem nâch sîner werdicheit;

sîn guot was dô der werlt bereit,

als man noch hiute von im seit.

1710 Mit urloubẹ ritens alle dan,

als ich iu geseit hân,

iegelîcher heim ze lande.

der künic hêt ân schande

die hôchzit gehabẹt alsô

1715 daz sîn daz liut was allez vrô

dô siz alsus verenden.

zen næhsten sunewenden,

dô der künic ze tische saz

und innen des dô er az,

1720 kom ein maget rîche

geriten hövischlîche

mit ir getwerge ûf den sal,

dâ die rîter über al

an dem tische sâzen,

1725 trunken unde âzen.

si reit ein phärit daz was blanc;

ir getwerc huop ûf unde sanc

ein liet sô wünniclîche

daz sị alle gelîche

1730 ir selber vergâzen

die in dem sale sâzen.

als ez ist geseit mir,

ûf dem phärit hinder ir

stuont ez, swar si reit;

1735 ûf ir ahseln hêt ẹz geleit

sîne hende beide.

diu maget vuortẹ ze kleide

ein scharlaches kappen an.

si was sô rehte wol getân

1740 daz ir des prîses jâhen

alle die si gesâhen.

ir houbt was ungebunden,

ir zöpfe wol bewunden

mit golde unz an daz ende;

1745 dheiner slahte gebende

vuortẹ diu maget mêre.

diu juncvrouwe hêre

reit dâ si den künic sach.

vil gezogenlîche si dô sprach

1750 ‘herrẹ ḥer künic, mich hât gesant

mîn vrouwe her in iuwer lant;

ir dienest hât si iu enboten.

bî deheinem andern boten

wolde sị iuz enbieten.

1755 ir vriunde ir daz rieten

daz si helfe suochte hie:

von disem hove sagt man ie

wie vrume rîtẹr ḥie wæren,

und daz si niht verbæren

1760 deheiner slahte manheit.

nu sî iu offenlîch geseit

ein grôziu âventiure;

diu ist vil ungehiure

und bitter, gelîch dem tôde gar.

1765 wer vehten welle, der hebe sich dar

des vindet er dâ vil guot stat.

er wirt sîn âne zwîvel sat,

wan dâ ist manger tôt gelegen.’

Gwîgâlois, der tiure degen,

1770 stuont ûf zer selben stunde

von der tavelrunde —

mit urloube wart daz getân, —

vür den künic gienc er stân.

er sprach ‘lieber herre mîn,

1775 nu lât an mir daz werden schîn

daz ir niemen niht verseit;

iuwer gâbe ist allen den bereit

die ir von iu geruochent,

swâ siz ze rehte suochent:

1780 gewert mich, herre, des ich ger;

sô hât mich diu Sælde her

wol geleitet mîne tage;

mîner swære die ich trage

der wirde ich ledic sâ zehant.

1785 herre künic, nu sît gemant

daz iuwer milte mir werde erkant.’

Dô daz gesinde sîne bet

gehôrte, die ẹr mit vlîze tet,

des nam si michel wunder

1790 und swigen alle besunder.

der künic sprach ‘nu sît gewert

alles des ir an mich gert,

daz mînem namen rehte stê

und mir niht an mîn êre gê.’

1795 er sprach ‘ichn ger niht vürbaz

wan daz mir werde erloubet daz

ich die âventiure hol;

sô habẹt ir mir gegeben wol.

wer weiz ob ichz erwerben sol! ’

1800 Diu rede wart im ungemach.

den jungen rîter er an sach

und was im sîn arbeit

von allen sînen sinnen leit

die er wolde lîden.

1805 er sprach ‘wolt ir vermîden

dise reise durch mînẹ bet,

ich wolde iuch rîchen hie ze stet.’

‘neinâ, herre! ’ sprach er dô,

‘jâne mac ich nimmer werden vrô

1810 irn erloubet mir die selben vart.’

zehant si im erloubet wart.

daz wart der juncvrouwen leit;

mit zorne si von danne reit,

daz si ze niemen niht ensprach.

1815 ich sagiu wâ von daz geschach:

si vorhte daz sị ir arbeit

verlür von sîner kintheit,

durch daz er sô junc was.

si begunde vür daz palas

1820 mit grôzer klage rîten;

sine wolde sin niht bîten,

swie wol er kunde strîten.

Sus reit si gegẹn dem walde.

die knappen brâhtẹn im balde

1825 ors, harnasch unde sper

und einen schœnen schilt her,

der was swarz alsam ein kol;

dâ was enmitten ûffe wol

ein rat von rôtem golde erhaben;

1830 daz wolde er zeinem wâfen haben

dâ man in bî erkande.

diu künigîn im sande

einen wâfenroc ze stiure

zuo der âventiure,

1835 der was mit golde durchslagen;

den solde er durch ir willen tragen;

des begunde er ir genâde sagen.

Nu nam er urloup von in dâ;

dem milten künịge neic er sâ

1840 und der mässenîe gar.

‘herre got, nu bewar

dem rîter sînen schœnen lîp! ’

sprach dâ man unde wîp;

si wunschtẹn im alle helles nâch.

1845 dem rîter was zer vreise gâch,

wand er hêt eins lewen muot:

swaz vreislîch was daz dûhte in guot;

des kom er ofte in grôze nôt.

sîn dienest er in allen bôt;

1850 sus nam er urloup in den tôt.

Her Gâwein dô mit im gie:

von des râte kom er nie.

ir geselleschaft was harte guot:

beidiu ir herze und ir muot

1855 wârn einander heimlîch;

deiswâr, daz was billîch,

sît sị eines lîbes wâren.

ir ougen ẹs niht verbâren

sine lachten ofte ein ander an.

1860 her Gâwein, der küene man,

wâfent in selbẹ mit sîner hant;

einen helm er im ûf bant,

dar ûf ein rat von golde gie.

daz wâfen minnẹt der rîter ie,

1865 wand einez gienc ûf und zetal

mit listen in sîns neven sal:

durch daz truoc er daz rat,

als in des sîn herze bat,

zeiner zimiere.

1870 ein rîchiu baniere

wart im gebunden an sîn sper.

ûf sin ors saz er;

daz was starc unde guot;

des wart der rîter wol gemuot.

1875 schilt und sper reicht man im dar;

dô was er gewâfent gar.

den hern Gâwein bevalch er got;

vil grôzer jâmer âne spot

wart dâ zwischen in beiden

1880 dô si sich muosen scheiden.

sus reit her Gwîgâlois von dan.

im bat dâ guotes manic man;

dâ von muos er gelücke hân.

Der mägde îlte er balde nâch.

1885 vor zorne was ir alsô gâch

daz sị sîn niht wolde bîten;

deste balder muose er rîten.

dô daz getwerc den rîter sach,

ze sîner juncvrouwen ez [dô] sprach

1890 ‘dort kumt der rîter her geriten;

des solde wir dâ hân gebiten:

des hêt er êre und stüende iu wol.

ez kumt vil lîhte daz im sol

dirre prîs gevallen

1895 vor den rîtern allen;

er ist lîhte als manhaft

und hât alsô grôze kraft

sam der aller tiurste dâ.’

diu juncvrouwe sprach ‘nu lâ

1900 die rede, wan diu ist enwiht;

ich erkenne disse rîters niht:

her Gâwein wart mir genant;

den erkennet man übẹr älliu lant

von sîner grôzen manheit.

1905 swaz er strîtes ie gestreit,

daz im dar an nie missegie,

daz hôrte ich von im sagen ie.

der wær mit uns geriten dan,

hêt dirre sîne bet verlân;

1910 dâvon ich im niht êren gan.’

Dô si die rede gar gesprach,

den jungen rîter si dô sach

ennebẹn ir rîten sâ zehant.

den helm vuort er in einer hant,

1915 entwâfent was sîn houbet.

er sprach ‘vrouwe, erloubet

mir daz ich mit iu var.’

daz widersaget si im gar.

dô bat er si sô sêre

1920 unz daz diu maget hêre

in dô mit ir rîten hiez.

dô si ir zorn ein teil verliez

und ir grôziu swære,

dô saget er ir mære

1925 und kurzet ir die stunde,

als er beste kunde,

unz daz der âbent ane gie.

si sprach ‘rîter, râtet wie

od wâ wir hînt belîben

1930 dâ wir die naht vertrîben.’

‘liebiu vrouwe, swâ ir welt.’

si sprach ‘ich weiz einen helt,

des hûs ist hie nâhen bî;

ichn weiz ab wie sîn nam sî,

1935 wan ein dinc ist mir bekant:

ez ist umb in alsô gewant:

er hât wunderlîche sit,

dâ er sîn brôt vristet mit.

desn ist deheiner slahte rât:

1940 swer sô rîters namen hât,

wil er des nahtẹs dâ ruowe hân,

ern müeze in eine bestân

ûf dem veldẹ mit rîterschaft.

und ist er dan sô manhaft

1945 daz er in überwindet,

ich sagiu daz: er vindet

von gemache dâ swes er gert,

wand er wirt von im gewert

sô guoter handelunge dâ

1950 die niemen vünde anderswâ.

stichẹt ab in der wirt nider,

sô muoz er danne blôzer wider

scheiden gar ân sîne habe.

mich dunket guot wir tuon uns abe

1955 der ruowe und rîten anderswâ:

sị ist bœse ze gewinnen dâ.’

diu rede misseviel im sâ.

Er sprach ‘vrouwe, nein, durch got!

ich wil allez iuwẹr gebot

1960 leisten an andern dingen;

mir muoz hie gelingen,

od ich verliuse swaz ich hân.’

er was des muotes gar ein man,

wand er daz nie gevlôch

1965 swaz ze manheit gezôch

dâne wære er starke gerne mit;

daz was von kinde ie sîn sit.

daz hûs was im sô nâhen

daz si dar abe sâhen

1970 den gast gewâfent rîten.

der wirt wolde niht bîten;

sînen harnasch hiez er bringen.

er wânde im solde gelingen

als im ofte ê was getân.

1975 leider, dô trouc in sîn wân!

im was ze gâch an die vart.

zehant als er gewâfent wart,

dô brâhten im die knappen dar

ein ors, daz was bedecket gar

1980 mit einer grôpiere.

der wirt was vil schiere

ûf daz ors gesprungen.

die garzûn nâch im drungen;

die truogen schilt unde sper.

1985 si liefen ûz nâch im her

vaste vür den burcgraben.

si wolden daz gewis haben

si würden alle rîche;

dô geriet ez mislîche.

1990 der gast den helm ûf bant;

von der strâze kêrt er zehant

gegẹn dem wirte ûf die plân.

si liezen zuo einander gân

swaz diu ors mohten gevarn.

1995 si kundẹn sich beide wol bewarn;

iedoch sô stach der junge gast

sîn sper daz ez durch in brast

ander halbe eins klâfters lanc.

ez geschach ein teil ân sînen danc

2000 daz er in alsô hêt erslagen;

daz wil ich iu vür wâr sagen,

wand er begundẹz von herzen klagen.

Sich huop ein jæmerlîchiu nôt

dô si gesâhen daz er tôt

2005 von dem orse viel ûf daz gras.

swaz dâ ingesindes was,

daz huop sich mit klage dar.

diu juncvrouwe sprach ‘ [nu] nemt war

welch ein mort ir habt getân!

2010 wir mugen hie nu niht bestân;

wir sulen vürbaz rîten,

dâ wir des tages bîten,

ê si hie mit uns strîten.’

Der geschiht wâren sị vil unvrô;

2015 von dem tôten îlten sị dô

bî einem wazzer hin ze tal.

dâ hôrten si die nahtegal

singen vaste gegẹn der naht.

daz gevilde was bedaht

2020 mit grase und mit loube dâ.

die gesellẹn enwessen wâ

si möhten bẹlîbẹn unz an den tac.

ein fôreis in dâ nâhen lac;

dâ ẹrbeizte diu juncvrouwe zuo.

2025 si beliben dâ unz morgen vruo

sô si beste mahten.

sine kunden niht betrahten

war si riten vürbaz;

diu ungeschiht vuocte in daz;

2030 doch tâtens als der biderbẹ man:

swenne erz niht gebezzern kan,

sô dunket ez in ein rât

swaz er danne hât,

als ez im an die nôt gât.

2035 Der juncvrouwen schuofen si gemach;

daz getwerc des grüenen loubes brach

und bette ir nider ûf daz gras,

wand ez an einer wisen was.

dô sị eine eine wîle gelâgen

2040 und ir gemaches pflâgen,

dô hôrtens eine stimme

klägelîch und grimme

in dem walde, bî einem sê

ruofen vaste ‘wê! wê! ’

2045 als daz dâ vürhtet den tôt.

der rîter sprach ‘hœrt ir die nôt

und die klage die daz hât?

vrouwe, ist ez iuwer rât,

sô wil ich rîten dar,

2050 daz ich uns rehte ervar

waz daz sî daz dâ klaget.’

des antwurt im diu maget;

si sprach ‘nu tuot als ir welt.’

zehant dô reit der helt

2055 als in lêrte sîn sin.

diu naht was wol halbiu hin

und schein der mâne gegẹn dem tage.

sus reit der rîter nâch der klage,

als diu stimme vor im hal,

2060 den walt ûf und ze tal.

der was rûch und enge;

durch dorne und durch gedrenge

vuor er wol eine mîle.

nu sach er bî der wîle

2065 sitzen zwêne starke risen

bî einem viure ûf den wisen,

die bî dem sêwe lâgen.

einer jucvrouwen sị dâ pflâgen

leider übẹr ir willen.

2070 sine mohten sị niht gestillen

mit deheiner slahte bet:

daz trûten ir unsanfte tet,

wan si was in gar ze kranc.

sus wolden sị über ir danc

2075 ir willẹn mit ir gehabet hân;

des wart ir jâmẹr alsô getân

daz ez in muose erbarmen.

si hêt mit beiden armen

der eine an sich gedrücket.

2080 si hêten si gezücket

dem milten künịge Artûs

ze Karidôl vor sînem hûs;

des was michel klage dâ.

die edeln rîtẹr enwessen wâ

2085 si hin wâren gekêret;

des was ir herze gesêret

und ouch der hof gunêret.

Dô der rîter rehte ersach

der juncvrouwen ungemach,

2090 daz begunde im an sîn herze gân.

ezn sol ouch noch dhein biderbẹ man

nimmer gerne übersehen,

swâ dehein schade mac geschehen

deheinem reinen wîbe,

2095 ern wendez mit sîṇẹm lîbe;

daz ist mîn sit und ouch mîn rât,

wan swaz diu werlt vreude hât,

diu kumt uns von den wîben.

wie möhte wir vertrîben

2100 die langen naht und unser leit

niwan mit ir sælicheit?

unser vreude wære enwiht

und hête wir der wîbe niht.

got müez in genædic wesen!

2105 wirn möhten ân si niht genesen.

daz bedâhte der rîter guot,

wand er was ie vil wol gemuot,

als der biderbe gerne tuot.

Sîn ors nam er mit den sporn;

2110 den einen risen hêt ẹr erkorn

dâ er bî dem viure saz.

mit dem sper stach er daz

ez im durch daz herze brast.

der ander rise zarte einẹn ast

2115 von einem boume, der was grôz;

2116a des er iedoch niht vil genôz.

[wand er sich in die este slôz]

der rîter ouch erbeizet was

zuo zim ûf daz grüene gras

und liefen beide einander an.

2120 si wârn zwêne bereite man

des muotes sam der kraft;

daz schein wol an ir rîterschaft.

der rise mit dem aste

treip in harte vaste

2125 hinder sich in ein dickez hac,

daz dâ nâhen bî im lac;

dâ ẹntweich der edel rîter in.

daz tet er niwan durch den sin

daz er in slüege ân sînen schaden:

2130 sô kunde er in ze hûse laden.

dâ ẹnpfie der rise wunden vil.

sus spilten si des tôdes spil

unz daz der tac ûf gie.

eine wunden dô der rise enpfie

2135 von im, diu nam im sîne kraft;

des wart der rîter sigehaft.

in sîn gewalt muos er sich geben

durch daz er in lieze leben;

dar über swuor er einen eit

2140 daz er die maget âne leit

bræhte dem künịge Artûs

ze Karidôl widẹr in sîn hûs,

unde sîn dar inne bit

unz er dar nâch im rit;

2145 hie was er gevangen mit.

Bî den zîten was der sit: —

dâ behielten si ir triuwe mit —

swer deheinen eit zebrach,

swâ man den immer mê gesach,

2150 der was ungenæme,

den liuten widerzæme,

als der tôtsieche man

der von der werlte wirt getân.

des muosen sị ir sicherheit,

2155 ez wær in liep ode leit,

behalten, als man in gebôt,

od an den êren ligen tôt;

des wær ouch noch der werlte nôt.

Nu hêt sich diu reine maget

2160 beidiu verweinet und verklaget

daz si vil kûme mohte geleben.

dô wart ir ein trôst gegeben

daz si wider solde varn.

den tôten mohtens niht bewarn;

2165 der lac dâ als im gezam.

der rise die juncvrouwen nam,

als der rîter im gebôt.

sîns lieben gesellen tôt

klagte er âne mâze.

2170 sus vuorens âne strâze

unz er die juncvrouwen vant;

diu begunde sâ zehant

ûf ir wec rîten:

sine wolde sîn niht bîten.

2175 der rise nam urloup [von im] dâ;

engegẹn Britanje gienc er sâ

und brâhtẹ die maget hêre

der küniginne Ginovêre

und dem künịge Artûs

2180 ze Karidôl widẹr in sîn hûs.

des wart diu mässenîe vrô;

dem edeln rîter gnâdẹtens dô

der triuwen und der êren.

der [rîter] begunde kêren

2185 sîner juncvrouwen nâch.

der was von im harte gâch,

wand ez was ir vil leit

daz er iender mit ir reit.

swaz er manheit begie,

2190 die wolde si geprîsen nie:

ez dûhte sị allez kleine

wider die al eine

diu im ze tuone sît geschach.

gezogenlîche der rîter sprach

2195 ‘edliu maget, hœret mich!

erloubet mir, vrouwe, daz ich

mit iu rîte disen tac.’

wand er solher zühte pflac

daz er daz bewarte ie

2200 daz er widẹr ir willen nie

deheiner slahte dinc getet

ern erwürbez ê mit sîner bet;

daz bescheinder ir an manger stet.

Daz getwerc begunde mit im biten

2205 unz si si des überstriten

daz sị im sîn gunde.

an derselben stunde

lief vor in ein bräkelîn

daz niht schœners mohte sîn.

2210 daz was blanc über al;

niwan ein ôre was im val,

daz ander rôt alsam ein bluot.

des wart diu maget wol gemuot,

wande si des selbe jach

2215 daz si nie dẹheinez gesach

daz ir z’ihte mære

wider daz selbe wære.

des wart der rîter harte vrô.

daz hündelîn vienc er dô

2220 und legtez vür si ûf ir kleit.

des wart diu maget vil gemeit;

mit grôzen vreuden si dô reit.

Ditz was nâch mittem morgen.

si riten âne sorgen

2225 gegen einem vinstern tan;

dar ûz reit ein michel man,

des hâr was swarz alsam ein kol,

ieslîch loc bewunden wol

mit sîden und mit golde,

2230 gezieret als er wolde.

sîn ros swarz unde guot.

von bluomen vuorte er einen huot;

mit [grüenem] tymît was er gekleit.

zer geselleschefte er reit.

2235 si wârn ein ander unbekant.

einen knüttel vuorte er in der hant,

mit riemen wol bewunden.

ich wæne er mit den hunden

was geriten in den walt.

2240 sîn muot ze zorne wart gestalt

dô er sîn hündelîn ersach.

wider die juncvrouwen er sprach

‘ir sult wizzen, vrouwelîn,

dirre kleine hunt ist mîn.

2245 seit mir, wer hât iu’n gegeben?

benamen ẹz gêt im an sîn leben! ’

si sprach ‘dirre rîter hie.’

er sprach ‘wie getorst ir ie

gevâhen mînen schœnen hunt?

2250 heizẹten lâzẹn an dirre stunt

balde ûf die strâze nider,

oder irn komt nimmer wider

mit dẹheinen iuwern êren

und müezt wider kêren

2255 mit ungesundem lîbe.’

‘diu rede zæme eiṇẹm wîbe’

sprach her Gwîgâlois der degen,

‘und wil unser got pflegen,

sô sul wir êre unde leben

2260 umb sô lîhte sachẹ niht geben.

ich wæn der hunt ist iuwer niht;

muot ir anders von uns iht

nach êren und mit minnen,

daz mugt ir wol gewinnen.

2265 swaz ab uns da von geschiht,

wirn geben iu des hundes niht

durch bœse rede noch durch drô.’

mit zorne kêrte der herre dô

über daz [breite] gevilde

2270 gegen der [grôzen] wilde,

swaz daz ros mohte gevarn.

her Gwîgâlois muose sich bewarn

als er beste kunde,

wand er zer selben stunde

2275 gwâfent dar wider wolde komen;

als hêten siz von im vernomen.

des wart der rîter harte vrô,

wan sîn muot der stuont alsô

ern vorhte deheines mannes drô.

2280 Die strâze riten si als ê.

ir vreude wart dô michels mê

dan ir dâ vor wære.

mit mangem guoten mære

vertriben si die selben zît.

2285 nu kom der rîter her durch strît

gewâfent von der wilde;

über daz [grôze] gevilde

kom er gewalopieret.

sîn helm der was gezieret

2290 mit einem swanen härmîn,

snabẹl und vüeze guldîn:

ditz selbe wâfen vuort er.

mit hôhem muote kêrter her;

daz schein an sîṇẹm geverte wol.

2295 swaz dem manne geschehen sol,

daz geschiht im âne wende;

sînes lîbes ende

wær dâ vürnames niht gewesen,

wan daz er doch niht solde genesen.

2300 nu sach der junge rîter daz.

sînem rosse gurte er baz,

zehant er wider ûf saz;

ze manheit wart er nie laz.

den schilt er an sich gevie,

2305 daz starke sper er sîgen lie,

sîn ors er mit den sporn nam;

mit solher kraft er an in kam

daz er daz sper durch in stach

daz man ez ander halbe sach.

2310 der ander schaft sô gar zebrach

daz dehein schade geschach

dem rîter, als ez solde sîn.

gevrîet was daz hündelîn

von der justiure.

2315 die kirchen wârn dâ tiure;

des belac er ûf dem velde dâ.

der rîter hafte sîn ors sâ

bi dem zoume an einen dorn.

daz wær bî disen zîten vlorn,

2320 als ich michs versinnen kan:

ir ịst nu wênic, sin vuortenz dan,

man züge im nû den harnasch abe,

dar zuo alle sîne habe;

daz was ab dô wider dem sit:

2325 swer ez tet, der vlôs da mit

alsô gar sîn êre

daz er nimmer mêre

ze rîterschefte mohte komen;

im wurdẹ sîn êre gar benomen.

2330 swer hiutẹ daz selbe tæte,

sô belibe vil lîht stæte

allez rîterlîche reht.

swer vil kûme wære kneht,

der wil nu rîter werden;

2335 des müezen die werden

der bœsen engelten.

jâ geniuzet man vil selten

der bœsen gesellen.

got müeze si vellen

2340 die dem immer swert gegeben

der daz rîterlîche leben

niht behalten künne,

und der von sînem künne

niht dar zuo sî geborn!

2345 daz alte reht hab wir verlorn.

daz was ê guot, sô man seit;

mit valsche und mit bôsheit

ist ez nû leider hin geleit.

Dô er den sic dâ genam,

2350 als ez dem helde wol gezam,

dô reit diu maget wol getân

mit ir geselleschefte dan

beidiu berge unde tal,

dâ vil manic stimme hal,

2355 grôz unde kleine.

eine juncvrouwen al eine

sâhen si vür sich rîten.

bî den selben zîten

was daz gewonlîch,

2360 si wære arm ode rîch,

daz si wol mohte durch ir muot

rîten swar si dûhte guot,

unbesprochẹn und âne leit.

daz was dô gewonheit,

2365 swâ man deheine rîten sach,

daz ir niemen niht ensprach.

nu ist diu werlt valschaft

und ist âne meisterschaft

beidiu liute unde lant.

2370 eine vrouwen die man hât erkant

an ir êren stæte,

diu nimmer missetæte

durch deheiner slahte guot, —

sô sint die valschen sô gemuot

2375 daz sị sô stæte niht mac gesîn

sine slahen ịr doch ein kläpfelîn

mit worten und mit vâre.

ezn mac nû zewâre

ein vrouwe vür ir hûs niht komen,

2380 als ichz ofte hân vernomen,

man spreche sị gê durch bôsheit.

reht und zuht ist hin geleit;

man kapfet nû die valschen an!

swer der werlt gespotten kan,

2385 des lache wir und merken daz.

deiswâr, wir tæten michel baz

und vlühe wir si alle tage.

swer immer bœsiu mære gesage

von den guoten wîben,

2390 des vreude müeze belîben

mit jâmẹr unz an sîn ende,

wan si sint âne wende

der werte ein vil süezez spil.

got gebe in sælde und vreuden vil!

2395 des ich in immer wünschen wil.

Als ich iu ê hân geseit,

mit grôzer klage diu maget reit

über die strâze al eine;

ir vreude diu was kleine.

2400 si reit ein pfärit wol getân,

unz ûf sîn knie reicht im diu man,

daz was rôt alsam ein bluot.

ir gereite daz was harte guot

von golde und von gesteine.

2405 ouch vuortẹ diu maget reine

einen roc von plîâte.

von rôtem siglâte

vuorte sị eine kappen an;

ein veder, wîz alsam ein swan,

2410 daz niht edlers mohte sîn,

diu was guot härmîn,

drin gefurrieret,

mit zobeln wol gezieret.

ir zöpfe wârn enpflohten gar;

2415 ûf den satel reichte ir hâr,

daz was goltvar unde reit;

dar ûf ein huot der was breit,

von pfânvedern gestricket wol.

ir herze daz was jâmers vol;

2420 si klaget unde weinde

als siz von herzen meinde;

man mohte vil wol an ir sehen

daz ir leide was geschehen,

wan si vil jæmerliche schrê

2425 ‘owê mir armen wîbe, wê!

ditz leit das klage ich immer mê.’

Vor jâmer si daz übersach

daz si wider si niht sprach,

dô si die strâze vür si reit.

2430 dem edeln riter was vil leit

ir kumber und ir swære.

wer diu maget wære,

daz was den gesellen unbekant.

her Gwîgâlois sprach zehant

2435 ‘vrouwe, ich wil daz besehen

waz der mägde sî geschehen

od waz ir leides werre.’

si sprach ‘lieber herre,

nu tuot als ir gebietet,

2440 wan swaz ir mir gerietet,

sô tæte ich doch nâch mîner kür;

welt ir dar, sô rîtet vür

und ervart dâ swaz ir welt.’

‘ich tuon vil gerne’ sprach der helt.

2445 sîn manheit dûhte sị dannoch kranc;

dâ von er allez übẹr ir danc

nâch der âventiure reit.

mit bet er si des überstreit

daz si in mit ir rîten lie.

2450 dheinen gedingen gwan si nie,

swaz manheit er begienge,

daz in daz iht vervienge

ern hêt den tôt doch an der hant,

wand ir was daz wol bekant

2455 daz diu âventiure

was sô ungehiure,

swer si wolde erwerben,

daz der dâ müese ersterben

ezn wolde got dan understên;

2460 ân den mohtez niht ergên.

si vorhte sîner kintheit;

dâ von was ir sîn arbeit

und sîn rîten mit ir leit.

Her Gwîgâlois, der küene man,

2465 lie sîn ros zesprunge gân

engegẹn der mägde wol getân.

diu was, als ich gesaget hân,

schœne und alsô rîche

daz ich wæn ir gelîche

2470 in dem lande iht wære.

dô si in grôzer swære

was sô rehte sûberlîch,

owê, wem was si gelîch

ê si daz leit gewünne!

2475 daz si von künịges künne

sô rehte schœniu wære geborn,

des möhte ein tôre hân gesworn.

ez schein wol an ir rîchen wât

daz si deheinen unrât

2480 hêt von armuote.

vil sêre si daz muote

daz der rîter zuo ir reit;

daz machẹt ir kumber und ir leit

diu si von gewalte leit.

2485 Dô er ir sô nâhen kam

daz er ir leides war genam

und ir kumber rehte ersach,

vil gezogenlîche er sprach

‘got minne iuch, liebiu vrouwe mîn!

2490 mac daz in iuwern hulden sîn

daz ir mirz geruochet sagen,

sô wil ich mit iu gerne tragen

iuwern kumber und iuwer nôt,

od ich lig ûf der verte tôt.

2495 ich hân daz wol an iu ersehen

daz iu schade ist geschehen;

ouch wolde ichz gerne wizzen baz.’

‘waz möhte mich gehelfen daz?’

sprach diu maget wol getân

2500 ‘irn möht ez doch niht understân;

wan mir daz selbe leit geschach

daz ez vil manic rîter sach

den ez an ir herze gie;

diene mohten ez erwenden nie.

2505 ich sage iuz doch — waz wirret daz? —:

über drî mîle ode baz

dâ lît rîter harte vil,

als ich iu nu sagen wil.

ichn weiz ob irz ê habt vernomen

2510 war umbe sị alle dar sint komen,

iegelîcher mit sîner vriundin:

dâ was ein rîterlîch gewin;

den vẹṛlôs ich; des ich trûric bin.

Ez hêt der künic von Îrlant

2515 durch âventiure dar gesant

daz schœnest pfärt deich ie gesach

und einen sitich, der wol sprach.

swaz er sprechen wolde.

in einem hûse von golde

2520 was er beworht; daz ist mir kunt:

daz koste mê dan tûsent pfunt

von golde und von gesteine.

daz werc daz was kleine,

geworht vil meisterlîche

2525 und was gevuoclîche

gesetzet zwischen die satelbogen.

ir wænt des lîhte ich habe gelogen;

daz ich iu sage daz ist wâr.

ez wârn die satelbogen gar

2530 von wîzem helfenbeine,

mit golde und mit gesteine

wol gefüllet über al.

ein pfelle der was hin zetal

drin gefurrieret,

2535 daz pfärit was gezieret

mit einem zoume, des nam ich war,

der was von rôtem golde gar.

daz der zügel solde sîn,

daz wâren borten guldîn,

2540 geworht mit grôzem vlîze;

von berlen vil wîze

knöpfe wârn geworht daran.

daz pfärt was blanc als ein swan,

wol geschicket, und wol getân.

2545 daz winster ôre und sîn man

diu wâren rôt zinobervar;

daz zeswe ôre was im gar

swarz alsam ein kol.

ein swarziu strieme teilte ez wol

2550 nâch dem rücke hin zetal

unz ûf den zagel, der was [im] val,

beidiu lanc unde breit.

als ich iu ê han geseit,

daz pfärit wart gezogen dar

2555 niwan under der vrouwen schar;

die muosen zeinem ringe stên.

man hiez die rîter dar gên

daz si die vrouwen sæhen.

swelher si des jæhen

2560 daz si diu schœnest wære dâ,

der gæbe ouch man daz pfärit sâ,

wand ez der künic von Îrlant

ûf die rede ḥêt dar gesant.

sus kômens zuo der vrouwen schar

2565 und nâmen der [aller] schœnsten war

diu under in was komen dar.

Dô si si gar besâhen,

die rîter mir des jâhen

ich wær diu schœnest under in,

2570 ich solde ouch haben den gewin.

der rede wart ich harte vrô;

daz pfärt antwurte man mir dô,

den sitich und swaz drûffe lac

und ein getwerc daz sîn pflac;

2575 daz hêt gelebet mangen tac.

Als ich mich sîn underwant,

dô kom ein rîter sâ zehant,

der was michel unde rôt.

daz schœne pfärt er mir verbôt;

2580 er zôch ez mit gewalte hin

und gap ez sîner vriundin.

daz was den rîtern allen leit;

nu pflac er solher manheit

daz in dâ niemen torste bestân

2585 ezn müese im an den lîp gân.

des zôch erz hin ungestriten;

alsô bin ich dan geriten.

daz ist mîn klage und tuot mir wê!

der sitich jæmerlîche schrê

2590 bescheidenlîche als ein man

zehant als er sichs versan

daz in der rôte rîter nam.

den schalt er unde was im gram;

er klaget mich, daz hôrte ich wol.

2595 daz gevilde ist rîter vol

und sîgent ouch iemitten zuo.

si ligent dâ unz morgen vruo;

sô scheidet sich diu rîterschaft.

herre got, durch dîne kraft

2600 nu rihte mir! ’ sprach diu maget;

‘mîn leit daz sî dir gesaget,

wan dir diu werlt älliu klaget.’

‘Vrouwe’, sprach der rîter dô,

‘sît der rede ist alsô,

2605 sô sulen wir mit minnen

daz pfärt wider gewinnen

und swaz er iu genomen hât.’

diu vrouwe sprach ‘die rede lât,

irn wæret dan sô manhaft

2610 daz ir im mit rîterschaft

den sic möht behaben an;

des hân ich abe deheinen wân,

wan niemen lebt bî dirre zît

der wider in deheinen strît

2615 gehaben müge ân den tôt.’

der rîter sprach ‘daz wære ein nôt

sold er uns allen an gesigen;

ich wil dâ tôt von im geligen,

ode er tuot iu, vrouwe, reht.

2620 ist er ein sô guot kneht

als man iu gesaget hât,

ich weiz wol daz er mich bestât.

nu rîtet vür und wîsẹt mich dar! ’

diu vrouwe sprach ‘nu sagt mir: war?’

2625 ‘hin, dâ die rîter sint.’

‘deiswâr, sô dûht ir mich ein kint,

unde wolt ir den bestân

dem sô manic biderbẹ man

an rîterschaft des prîses jach

2630 und als ich selbe an im wol sach.

iu ist sîn manheit unkunt.’

die maget bat ẹr unz an die stunt,

swie ez ir doch wære leit,

daz ers mit guotẹ des überstreit

2635 daz si mit im wider reit.

Sus ritens mit einander dan,

daz getwerc, die mägde und der man.

mit mangem guoten mære

vertreip er in ir swære

2640 und kurzet in die stunde,

als er vil wol kunde,

unz si sô nâhen kâmen

daz si den schal vernâmen

von den rîtern über al.

2645 daz gevilde was ûf und zetal

vollez pavelûne geslagen.

si sâhens schœniu wâfen tragen;

dise turnierten dâ,

sô schirmten die anderswâ;

2650 si sâhen buhurdieren,

die knappen justieren,

tanzen unde singen,

schiezen unde springen;

als ich iu nu sagen wil,

2655 aller hande rîterspil

was dâ âne mâze vil.

Dô daz her Gwîgâlois ersach,

ze sîner juncvrouwen er [dô] sprach

diu in dar gewîset hêt

2660 ‘ichn kan niht wizzen wiez hie stêt

und erkenne ouch ir deheinen;

zeiget mir doch den einen

der iu daz pfärt genomen hât;

des ist deheiner slahte rât

2665 iune müeze reht von im geschehen,

od er mich dâ tôten vor im sehen

ern welle mịr rîterschaft versagen.’

vil ungelîch tet er eiṇẹm zagen.

des wart diu maget harte vrô;

2670 mit willen zeiget si im dô

dâ der rôte rîter lac,

der grôzer hôchverte pflac,

diu dem manne ist gar ein slac.

Si sprach ‘nu seht hin ûf daz velt!

2675 dâ stêt ein harte schœne gezelt

von samît rôt unde blâ;

mit golde ist ez eteswâ

gevüllet meisterlîche.

der rîter der ist rîche;

2680 daz schînẹt sîṇẹm geverte wol.

swaz ich leides von im dol,

daz rihte, herre got, enzît!

mîn niftel im dâ nâhen lît,

des küniges tohter von Persîâ;

2685 in der gezelte was ich dâ;

mit der suln wir belîben:

diu kan uns wol vertrîben

die zît mit vreuden, deist ir sit;

dâ liebet sị sich den liuten mit.

2690 si siht uns gerne, dạz weiz ich wol,

wand ir herze ist tugent vol;

des willen si geniezen sol.’

Mit vreuden ritens über ḍạz velt

vür vil manic schœne gezelt.

2695 dô si die maget sâhen

mit vreuden wider gâhen

der daz pfärit was genomen,

und den rîter mit ir komen

mit sîner juncvrouwen,

2700 dô wart dâ michel schouwen

von den liuten über al

zehant als daz mære erschal

war umḅ der rîter dar was komen.

als irz dâ vor habt vernomen,

2705 er wolde vẹṛliesen dâ sîn leben,

ode man muosẹ wider geben

der mägde ir pfärit und ir guot.

er tet als der biderbe tuot,

dem ie zem besten stêt sîn muot.

2710 Des künịges tohter von Persîâ

diu saz in ir gezelte dâ

mit vreuden, als ir sit was.

ein schœniu maget vor ir las

an einem buoche ein mære

2715 wie Troje zevuort wære

und wie jæmerlîche

Ênêas der rîche

sich danne stal mit sînem her

vor den Kriechen ûf daz mer,

2720 wie ịn vrouwe Didô enpfie

und wiez im dar nâch ergie,

als ez iu ofte ist geseit.

innen des ir niftel reit

mit ir geselleschefte dar;

2725 des nam diu küniginne war.

daz mærẹ man dô belîben lie.

diu vrouwẹ mit ir gesinde gie

und enpfie vil minniclîche

die gesellẹn alle gelîche.

2730 ir nifteln nam si bî der hant;

diu tet ir schiere daz erkant

wie sị der rîter hêt wider brâht,

als ichs dâ vor hân gedâht.

des nam si michel wunder

2735 und gedâhte iedoch darunder

‘wære er niht sộ manhaft,

ern hêt sich dirre rîterschaft

nimmer underwunden.’

die vrouwen im enbunden

2740 die riemen alle sâ zehant.

dô schuter sîn îsengwant

in sînen schilt ûf daz gras.

vil snelle im bereitet was

nach sînem willẹn ein reinez bat,

2745 als es diu küniginne bat,

und harte guotiu kleider;

diu wâren der beider

von pfelle und von rôsâte:

diu vrouwe was mit râte

2750 gevaren von ir lande;

dẹheinen mangel si erkande;

ir milẹ twas âne schande.

Als der rîter wart gekleit,

dô saz er ûf unde reit

2755 dâ er den rôten rîter vant.

die maget nam er bî der hant

der er gewalt hêt getân.

si giengen beidiu vür in stân

in sîn gezelt dâ er lac.

2760 vil grôzer hôchverte er pflac;

er hêt sich hövischlîche

ûf einen kulter rîche

in sînẹr âmîen schôz geleit.

waz touc nu mêr dâ von geseit?

2765 diu was ze wunsche wol gekleit.

Der sitich stuont vor in und sprach

als er die juncvrouwen sach

‘willekomen, liebiu vrouwe mîn!

ich sold et iuwèr zerehte sîn;

2770 mit gewalte bin ich iu benomen.

von swelhem dinge daz sî komen,

daz nider got und rihtez hie,

wand er gestuont dem rehten ie.’

daz gap dem rîter guoten muot.

2775 guot trôst was ie zer nœte guot:

swie manhaft ein herze sî,

ist dâ niht guotes trôstes bî,

ez kumt vil lîhte daz ez verzaget.

swer ouch dem sînen kumber klaget

2780 der im deheines guotes gan

und in ouch niht getrœsten kan,

der dunkẹt mich niht ein wîser man.

Als ir der herre wart gewar,

mit hôhem muote sprach er dar

2785 ‘wen suochẹt ir, junger rîter, hie

mit iuwer âmîen, die

ir dâ leitet bî der hant?’

der rîter sprach ‘wær iu bekant

ir geburt und ir leben,

2790 sô solt ir ir wider geben

daz pfärt daz ir erteilet wart.

mit ir bin ich hie ûf der vart

als ich iuch des biten wil.

swie mir der bet doch sî ze vil

2795 — wand ich iu niht gedienet hân —,

iedoch sô tuon ichz ûf den wân,

gewert ir mich der selben gebe,

daz ichz diene die wîle ich lebe.

ouch sult ir bedenken daz

2800 ir habt darumbe grôzen haz

von den liuten über al.

sô ist iu daz der meiste val

daz ir gewalt an ir begêt,

daz iu doch niht ze tuone stêt,

2805 wan si daz pfärt mit rehte hêt.

Durch got, erkennet ir ir reht! ’

der rîter sprach ‘herre guot kneht,

ich wil iu râten waz ir tuot:

nu lêrt iuch selben, daz ịst iu guot.

2810 ir mugt mich niht gelêren,

wand ich wil mîner êren

an iuch lâzen sô ich minnest mac;

daz was ie der tumben slac

daz si sich durch ir tumpheit

2815 ofte grôzer arbeit

underwindent; waz hilft si daz?’

der rîter sprach ‘nu tuot ir baz,

sît ir sô rehte wîse sît!

deiswâr, daz lâze ich âne nît.

2820 welt ir der juncvrouwen mîn

gnâden und rehtes wider sîn

mit iuwerm gwalte den ir traget,

sô sî iu von mir widersaget;

ich wil iuch mit der gotes kraft

2825 und mit rehter rîterschaft

morgen bestên ûf der plân;

als ich mich vermezzen hân.

vür wâr wil ich iu daz sagen:

mac ich den sic dâ bejagen,

2830 sô volget uns daz pfärit hin;

gevalle ab mir der ungewin,

sô tuot ir dar nâch als ir welt.’

des lachet dô der helt

und wart der rede harte vrô,

2835 wan sîn muot der stuont alsô

er vuor niwan nâch manheit;

swaz er dâ vor ie gestreit

des hêt ẹr ie doch den sic genomen;

daz was von sîner sterke komen.

2840 als hêten siz von im vernomen.’

Im was der bart und daz hâr

beidiu rôt, viurvar.

von den selben hœre ich sagen

daz si valschiu herze tragen;

2845 des gelouben hân ich niht:

swie man den getriuwen siht,

in swelher varwe er schînet,

sîn herze sich doch pînet

ûf triuwe und ûf güete.

2850 ob ein valscher blüete

als ein rôse diu dâ stêt,

ûz im doch niwan valschez gêt.

swie sîn hâr ist getân,

ist et er ein getriuwer man,

2855 diu varwe im niht geschaden kan.

Der herre der was rîche;

an manheit sîn gelîche

der was ninder in der schar.

ez hêt von im, daz ist wâr,

2860 vil manger sînen lîp verlorn;

er was von Mannesvelt geborn,

der grâvẹ Hojir was er genant;

durch manheit in vremdiu lant

was er gevaren mangen tac;

2865 rîterschaft was sîn bejac.

als ich iu nu sagen wil,

êren unde guotes vil

hêt er erworbẹn mit sîner hant;

zİspanje was er wol bekant,

2870 swie er ein Sahse wære;

im was dâ heime unmære

sich ze verligen einen tac,

wan mit gemache niemen mac

grôze êre erwerben.

2875 von rehtẹ sol er verderben

der dâ heime sich verlît

und sich vlîzet zaller zît

daz sînem lîbe sanfte sî,

wan bœse gemach ist êren vrî.

2880 swer sich an êren wil erholn,

der muoz benamen kumber doln

und underwîlen arbeit.

ez wirt vil selten hirz erjeit

mit slâfendem hunde;

2885 træges wolves munde

geschiht von spîse selten guot;

der dinge was er wol behuot:

ern hêt sich heime niht verlegen.

mit sîner kunst wânde der degen

2890 den rîter überwinden;

ern trûwẹt an im niht vinden

alsô grôze meisterschaft.

dâ was kunst unde kraft,

sælde unde manheit;

2895 diu hêt got an in geleit;

dâ mit erz allez überstreit.

Dô man sîn ernest rehte ersach,

der grâve zuo dem rîter sprach

‘herre, bereit iuch dár zuo:

2900 kumt her wider morgen vruo,

als ir messe habt vernomen,

und lâze wir dar zuo komen

rîter unde vrouwen,

die ez wellen schouwen.

2905 sit ir dan sô manhaft,

daz ir mir mit rîterschaft

den sic muget behaben an,

ich wirde iu gerne undertân

swes ir mir gebietet.

2910 ich vürhte ab ir genietet

iuch ê der rîterschefte.

irn habt niht ganzer krefte;

der sinne sît ir gar ein kint;

iuwer kraft diu ist ein wint

2915 wider einen starken man.

ezn welle got dan understân,

ir müezet uns hie lâzẹn ein pfant.’

her Gwîgâlois sprach sâ zehant

‘ez müez under uns beiden

2920 got ze rehte scheiden;

dem wil ichz enpfelhen gar,

wand er nam ie des rehten war;

ân in kan ich niht strîten.

ich wil nu wider rîten

2925 mit urloube zer vrouwen mîn.’

‘got müez iu genædic sîn! ’

sprach diu vrouwe und der man.

sus reit her Gwîgâlois von dan

mit der mägde wol getân.

2930 Diu mære vlugen über ḍạz velt

von der hütte in daz gezelt

wie ein rîter wære komen,

als irz ê habt vernomen,

mit der mägde wol getân:

2935 der woldẹ den grâven bestân

der der rôte rîter hiez,

dar umbe daz er niht enliez

niwan durch sînen übermuot

der mägde ir pfärit und ir guot,

2940 daz ir erteilte manic man;

dar umbe wolde er in bestân

eine ûf der heide

ir einem ze leide,

wand erz mit dẹheinen minnen

2945 mohte wider gwinnen.

dô bat dâ man unde wîp

daz got sînen jungen lîp

vristẹ unde behuote.

si grunden in ir muote

2950 dem jungen rîter glückes wol;

daz doch dem manne helfen sol

ob im diu werlt guotes gan,

wan swer daz verdienen kan

daz im diu werlt sprichet guot,

2955 der sol vor leide sîn behuot,

wand ir ist leider nû niht vil

die diu sælde ûf ir zil

sô gärlîche lâze

daz si mit der mâze

2960 älliu dinc verenden.

got müeze im helfe senden

der ir lop erwerben sol,

wan si ist leider valsches vol.

dâ von muoz er sîn erwelt

2965 der zem besten wirt gezelt;

daz bejagt her Gwîgâlois der helt.

Mit vreuden gie diu naht hin.

des andern morgens wâfent in

diu künigîn von Persîâ

2970 und vil manic vrouwe dâ

mit vlîze in sîn îsengwant

unde vuorten in zehant

dâ ẹr messe vernam,

als ez dem helde wol gezam,

2975 von den drin genenden.

dô si ir bet verenden

und messe wart gesungen,

die rîter zuo im drungen

und trôsten in als einen man

2980 dem diu werlt guotes gan.

sîn ors wart im gezogen dar;

daz was wol bedecket gar

mit einer kovertiure.

im wart dâ ze stiure

2985 gegeben manic reiner segen.

si bâten sîn got alle pflegen

beidiu arme und rîche.

vil vermezzenlîche

spranc er ûf daz ors sîn.

2990 den schilt reicht im diu künigîn,

daz sper diu maget wol getân

der er gewalt hêt getân

mit dem er solde strîten.

nu sach er gegẹn im rîten

2995 den selben rîter sâ zehant.

der was dâ bî wol bekant:

sîn wâfen daz was allez rôt;

an sînem schilte was der Tôt

gemâlet vil griulîche.

3000 ‘wîchâ, herre, wîche!

die garzûn alle riefen

die dâ vor im liefen.

si wârn siges an im gewon.

dô schiet ab in dâ von

3005 sîn unreht und sîn hôchvart.

ein rinc in gemachet wart

daz si zesamne mohten komen.

mit nîde wurden dô genomen

diu ors beidiu mit den sporn.

3010 dâ wart manic sper verlorn

in vil kurzen stunden.

der rôte hêt dâ vunden

alrêrst sînen gestrîten.

si begunden vaste rîten

3015 beide einander ûf daz leben.

dem jungen rîter wart gegeben

ein starkez sper in sîne hant.

dô kêrte er an den wîgant

nâch sînes vater lêre.

3020 dône mohter niht mêre

gewern vor dem kinde:

er stach in alsô swinde

von dem orse ûf daz gras

dạz im der sprâche zerennen was.

3025 daz was im dâ vor nie geschehen.

zesamne begundens alle sehen,

mit worten im des prîses jehen.

Von dem orse erbeizter nider.

der grâve kom ze sinnen wider;

3030 er spranc ûf und lief in an.

wolde er dz erwendet hân,

daz hêt er ê vil wol getân

dô er sich ligendẹ niht versan.

daz liez er durch sîn êre.

3035 des leit er deste mêre

von im slege âne nôt.

er hêt in nâch ûf sînen tôt

gespart, als vil manger tuot

der durch sînen hôhen muot

3040 sînes vîndes schônet,

wand er im des lônet

mit dem tôde, swenne er mac.

dâ gie slac wider slac;

ir deweder ḍẹm andern niht vertruoc.

3045 der grâve doch den rîter sluoc

unz an des kreizes ende.

dô zarten ir gebende

die vrouwen vor leide;

sich huop ûf der heide

3050 von den vrouwen an dem tage

vil grôzer jâmer unde klage.

ez rief diu maget wol getân

mit jâmer unsern herren an

durch die er die nôt bestuont,

3055 als die getriuwen tuont.

si sprach ‘herre, reiner got,

nu ist ez allez in dîm gebot:

der werlte tôt und ir leben;

geruoche mînem kempfen geben

3060 mit dîner helfe ganze kraft

an dirre herten rîterschaft,

wan du, keiser, vil wol weist,

vater, sun, hêrre geist,

daz er gewalt an mir begêt.’

3065 dô die klage dẹr rîter hêt

vernomen von den vrouwen,

dô begunder vaste houwen;

beidiu schilt und îsengwant

sluoc er im allez von der hant

3070 und treip in durch den kreiz wider.

man sach daz bluot vallen nider

von den starken wunden.

sus wart er überwunden

von dem jungen rîter dâ.

3075 dô muos er im sichern sâ

swaz er in tuon hieze,

daz er des hiht enlieze;

dar umbe liez er im sîn leben.

daz pfärit muose er wider geben

3080 und den sitech âne danc.

daz im dâ sô wol gelanc,

des wart daz liut allez vrô.

mit grôzem schalle vuorte in dô

diu künigîn von Persîâ

3085 durch ruowe in ir gezelt sâ.

ouch volget im dar in

sîn vil rîterlîch gewin

und die rîter âne zal.

sich huop dâ vil grôzer schal.

3090 ir vreude was des rôten val.

Dô er den prîs dâ hêt bejaget,

als ich iu nu hân gesaget,

den grâven hiez er sichern des: —

welt irz vernemẹn, ich sagiu wes —

3095 daz er und sîn vriundin

vüeren gegẹn Britanje hin

zem milten künịge Artûs

und dâ wæren in sîṇẹm hûs

unz er dar nâch im kæme;

3100 swer daz gerne vernæme

wer in dar hêt gesant,

daz erz im alsô tæte erkant:

‘daz hât der rîter mit dem rade.’

der grâve sprach ‘daz wær mir schade

3105 soldich iuch niht erkennen baz.’

der rîter sprach ‘wie kæme daz?’

‘dâ vüert vil manic man daz rat

der nimmer kumt an iuwer stat

an geburt und an manheit.

3110 dár umb wære ez mir leit

und wesse gerne iuwern namen.

irn durft iuch nimmer des geschamen

daz iu an mir gelungen ist,

wan daz weiz unser herre Krist

3115 daz ez mir nie mê geschach.

der junge rîtẹr aber dô sprach

‘ich wil mich iu nennen

daz ir mich mügt erkennen,

sît irs sô vlîziclîche gert,

3120 wand ir sît aller êren wert.

ich bin Gwîgâlois genant

und hân gedâht mit mîner hant

der besten lop erwerben

od mänlîch ersterben;

3125 alsô bin ich ûz gevarn.’

‘herre, got müez iuch bewarn.’

sprach der grâve Hojir

‘und gevüege uns noch daz wir

mit vreuden müezẹn ein ander sehen;

3130 swaz mir von iu ist geschehen

des wil ich niht laster hân.’

dô nam er urloup und schiet dan

engegẹn Britanje, als er gebôt.

dâ wurden liehtiu ougen rôt

3135 dô sich diu rîterschaft zerliez;

dem herren Gwîgâlois gehiez

geselleschaft vil manger dâ.

sus schieden sich die rîter sâ

beidiu mit vreuden und mit klage.

3140 ez was wol nâch mittem tage

und hêten zît ze rîten

die dâ niht wolden bîten

unz an den andern morgen.

dâ was unverborgen

3145 triuwe unde minne;

mit worten und mit sinne

erbuten siz ein ander wol,

als ein vriunt dem andern sol

der im dienstes ist bereit

3150 und im ganze triuwe treit

ân aller slahte bôsheit.

Sus schieden si sich alle dâ.

diu künigîn von Persîâ

bat den rîter mit ir varn.

3155 er sprach ‘vrouwe, ich muoz bewarn

daz ich mich iht versûme;

jâ ẹrbat ich des vil kûme

die lieben juncvrouwen mîn

diu mîn geleite dar sol sîn

3160 daz si hie her mit mir reit.’

diu vrouwe sprach ‘herre, seit,

war sol si iuch leiten?’

‘des wil ich iuch bereiten:

zeiner âventiure

3165 diu ist sô ungehiure

daz si niemen mac bestân

ezn müeze im an den lîp gân;

dar an ich mich niht sûmen wil.’

dô wart im genigen vil

3170 von den vrouwen über al;

diu dienest wâren âne zal

diu man den rîter ane bôt.

sus nam er urloup in den tôt

und gnâdet der küniginne

3175 triuwen und minne

die si im bescheinde.

ir niftel sêre weinde

und kustẹ die vrouwen alle.

sus vuor si mit schalle

3180 und mit grôzer rîcheit.

ir spîsẹ was allen den bereit

die si wolden ezzen.

an ir was niht vergezzen

deheiner slahte güete,

3185 wand ir reine [z] gemüete

ie nâch êren blüete.

Her Gwîgâlois und diu maget

von der ich iu nu hân gesaget

der er daz pfärt wider gewan,

3190 die riten mit ein ander dan,

diu juncvrouwe und diu zwei getwerc,

über einen hôhen berc

durch michel waltgevelle nider.

dô kômen sị ze der strâze wider

3195 die diu maget vür si reit,

dô si klagte ir herzeleit.

sînen zoum vie si mit der hant;

si sprach ‘rîter, sît gemant

iuwer güete und iuwer êren,

3200 daz ir geruochet kêren

mit mir heim ze lande

(des sît ir âne schande —

ich bit iuch sîn vil verre —

daz ez iu unser herre

3205 vergelten müez durch sînen tôt!),

dạz ich verdiene die grôzen nôt

die ir durch mich habt erliten

er sprach ‘vrouwe, lât iuwer biten;

ir sult sîn niht ze harte gern,

3210 wand ichn mac iuch [sîn] niht gewern.

ich muoz in kurzer zît bestân,

als ich mich an genomen hân,

die âventiure ze Korntîn;

dar sol ich mit der vrouwen mîn

3215 komen sô ich schierest mac.

ez würde mîner êren slac

ob ich die lieze under wegen.

got müez iuwers lîbes pflegen,

und gebe iu sælde und êre!

3220 wan swaz ich mich nu mêre

sûmte hie, des gwünne ich schaden.’

si mohte in niht sô vil geladen

sin verlür ir vlêhen und ir bet.

dô er niht nâch ir willen tet,

3225 dô klaget si und weinde als ê.

ir jâmers wart dô michels mê

dan sîn dâ vor wære gewesen;

vor leide trûwet sị niht genesen,

und wære ir verre baz geschehen

3230 hêt si den rîter nie gesehen,

wand ir von sîner hinvart

ir reinez herze beswæret wart,

mit jâmer êwiclîch bespart.

Dô si ir bet niht vervie

3235 und ez an ein scheiden gie,

daz si daz gänzlîche ersach,

zem jungen rîter si dô sprach

‘sît ir mich niht mugt gewern,

sô wil ouch ich der gâbe enbern

3240 die ich von iu enpfangen hân.

ir wænt des lîhte ich habẹz getân

ze minnern mîne armuot?

ich hân lant unde guot,

liute und êren alsô vil

3245 daz ich der gâbe niht enwil.

ir sult von rehtẹ iuwern gewin

geben iuwer vriundin,

wand ich sîn guoten rât hân.’

dô muosẹ daz pfärit dâ bestân:

3250 si treipz von ir mit slegen dô;

des wart der rîter vil unvrô,

wand er sis alles widerstreit,

ez wære im liep ode leit.

sus nam si urloup unde reit.

3255 Der rîter sich dô underwant

des schœnen pfärdes sâ zehant

und alles des dar ûffe lac

und eins getwerges daz sîn pflac;

daz gap er der juncvrouwen sîn.

3260 dô hêt ouch si daz hündelîn

daz er dem rîter an gewan,

als ich iu ê gesaget hân.

die zwô gâbe hêt si dô

von im; der wart si harte vrô.

3265 iedoch hêt si deheinen trôst

daz ir vrouwe würde erlôst

mit sîner manheit von ir nôt

und vorhte ouch daz im der tôt

da wære beschert; daz was ir klage

3270 in ir muote alle tage,

wand er dûhte si ze kranc.

dannoch reit er über ir danc

mit ir; si liezz ab âne zorn

wan si die reisẹ niht hêt verlorn:

3275 si hêt erworben an der vart,

als ez dô gahtet wart,

baz dannẹ ze tûsent marken;

des begunde ir herze starken

in vil hôhem muote,

3280 wan von grôzem guote

stîgent diu herze hô;

von armuot wirt niemen vrô.

daz hôrte ich ie die wîsen sagen

daz die rîchen hôhe tragen,

3285 die armen trûren unde klagen.

Mit vreuden rîten si dô dan.

der getwerge einez in began

sagen schœniu mære,

wer sîn herre wære

3290 der ez dar hêt gesant,

und wiez stüende in Îrlant.

hie mit kurztez in den tac,

wan man mit guoten mæren mac

und mit reinen wîben

3295 die zît wol vertrîben;

sus treip ez in die zît hin.

nu sâhen si wâ vor in

verre ûf eiṇẹm gevilde

in einer grôzen wilde

3300 ein schœne gezelt was ûf geslagen.

wie dem wære, daz wil ich iu sagen:

ez was hôch, sinwel und wît,

gel und rôt an einer sît,

diu ander wîz unde blâ;

3305 ein hirzgehürne was dâ

von golde drûf gestecket,

die snüere wârn gestrecket

vaste mit starken kîlen;

ouch wâren ze zwein zîlen

3310 drumbe gestecket vünfzic sper.

nune wessen die gesellen wer

under dem gezelte lac.

innen des entweich der tac

der naht mit sînem glaste.

3315 dô îlten si vil vaste

engegen dem gezelte sâ,

wan die gesellẹn enwessen wâ

si die selben naht vertriben

dâ si sô rîterlîche beliben.

3320 ouch was dem rîter dar vil ger;

dô er ersach sô manic sper

umḅ daz gezelt stecken,

daz begunde an im dô wecken

beidiu manheit unde kraft.

3325 er gedâhtẹ ‘ich vindẹ dâ rîterschaft:

dar nâch ich ie gevaren bin;

ich wil bejagen dâ gewin,

od ich scheide gevangen hin.’

Der des gezeltes herre was,

3330 dem was dar under ûf ein gras

gebettet hövischlîche

mit einem kulter rîche

von zweier hande pfellen.

und als er die gesellen

3335 zuo im sach rîten,

niht lenger wolder bîten:

er gie ẹngegẹn in und enpfie si wol,

als ein wirt den gast sol

der genâden an in gert;

3340 sus wurden si von im gewert

vil guoter handelunge dâ.

wider den rîter sprach er sâ

mit dem diu juncvrouwe reit

‘herre, enwære ez iu niht leit,

3345 ich vrâgẹt iuch gerne mære

war iuwer wille wære

mit dirre juncvrouwen.

iu ist der schilt zehouwen

iuwer wâfenroc verschrôten:

3350 ir habt gemachet tôten

ode vil sêre wunden;

des hât wol enpfunden

der liehte helm mit dem rade.

sî ez iu niht grôzer schade,

3355 sô lât mich wizzen war ir welt.’

dô sprach her Gwîgâlois der helt

‘sit ez mir niht verboten wart,

ich sagiu wol mîne vart:

disiu maget wart gesant

3360 ze Britanje in daz lant

mînem herren, dem künịge Artûs,

ze Karidôl in sîn hûs,

als ir si sehet rîten hie.

der künic sị minniclîche enpfie

3365 und diu mässenîe gar.

ûf der genâde kom si dar

ob iemen wære under in

der einen rîterlîchen gwin

ze Korntîn getorste holn;

3370 er müesẹ dâ grôzen kumber doln

dar under den gewizzen tôt.

dô underwant ich mich der nôt,

als ich iu nu hân geseit.

ez was aber ir vil leit,

3375 wand ich dûhte et si ze kranc.

sus bin ich allez übẹr ir danc

mit ir geriten her.

got gebe mir daz ich mîn sper

dâ sô vertuo als ich des ger!’

3380 Dô der herre dạz hêt vernomen

warumb od wie er dar was komen

und sîne jugent rehte ersach,

des nam in wunder unde sprach

‘mich dunket des: ir sît ze kint;

3385 iuwer kraft diu ist ein wint

zer selben âventiure,

wan sị ist ze holen tiure,

als ich iu nu sagen wil:

ich hân dâ gesellen vil

3390 verloren von der selben nôt;

ez sint dâ gelegen tôt

die tiursten von dem lande,

an den ich wol erkande

ganze manheit unde kraft,

3395 und die ir zît mit rîterschaft

grôzen prîs erwurben.

sît die dâ verdurben,

wie möht iu gelingen?

welt ir den prîs erringen,

3400 sô volget mînem râte:

ich hân vruo und spâte

dar nâch geriten wol zehẹn jâr,

biz ich mîne gesellen gar

hân verlorn und ouch daz guot.

3405 sît wir nu beide einen muot

haben zuo der selben nôt,

sô lâze wir ez hie den tôt

alsô gerne scheiden

enzwischen uns beiden

3410 und sweder unser hie gesige,

ob der ander niht tôt gelige,

der dannẹ den sic habe verlorn,

daz der wider âne zorn

ze lande var, daz ist mîn rât;

3415 swer ab danne gesiget hât,

der vüere den prîs ze Korntîn;

dâ lâze er alrêrst werden schîn

ob er guot rîter künne sîn.’

Her Gwîgâlois was ein man

3420 der nie zagheit gewan

noch nie bôsheit begie;

sîn herze dâ von vreude vie

als im dehein manheit

ze tuone wart vür geleit.

3425 dô er vernam des rîters muot,

des vreute er sich und dûhte in guot,

wand er hêt sich des bewegen

swes iemen wolde mit im pflegen

ze rîterlîcher manheit,

3430 dar ûf was sin lîp bereit,

wand er ie nâch êren ranc.

der rede sagter dẹm herren danc,

wand er wol sach daz sîn muot

was ze rîterschefte guot;

3435 des wart her Gwîgâlois vil vrô.

wider den rîter sprach er dô

‘herrè, welt ir des niht enbern

ichn müeze iuch strîtes hie gewern,

sô teilt mit mir gelîche:

3440 der sper sît ir ze rîche

und habt driu schœniu ros hie

und zwelf vrume knappen, die

wartent iuwer, daz ịst ir reht;

sô hân ab ich deheinen kneht,

3445 niwan mîn ors und min sper;

niht mêr gesindes brâhte ich her

noch helfe zẹ disem strîte;

anders ich niht rîte

niwan mîn ors den langen tac;

3450 dâ von ez niht getûren mac

zer selben rîterschefte.

ouch hân ich lützel krefte

ir seht wol selbe ich bin ein kint.’

dô sprach der herre ‘sît iu [nu] sint

3455 diu ors und knappen tiure,

sô gibe ich iu ze stiure

daz beste ors daz ich hân;

dar zuo sô sîn iu undertân

sehs knappen die ich brâhte her;

3460 und nemt vünf und zweinzic sper

dạz ir des strîtes iht abe gêt.’

dô erz alsus geteilet hêt,

des vreute sich der küene man.

sehs knappen hiez er vür sich stân;

3465 die tâten im des sicherheit

daz im ir dienest wære bereit

an dem selben strîte.

nu was ez an der zîte

daz man solde ezzen;

3470 desn wart niht vergezzen

im engæbe der wirt wirtschaft

und alles des die überkraft

des er haben mohte,

als ez im ze nemen tohte.

3475 dar nâch bettet man in

under daz gezelt hin

beidiu ûf loube und ûf gras;

vil manic guot kulter was

ûf daz loup gedecket;

3480 dar ûf wâren gestrecket

vil wîziu lîlachen.

die knappen hiez man wachen

die naht mit vlîze unz an den tac.

ein walt in dâ nâhen lac,

3485 dar inne manic nahtegal

uobte ir wünniclîchen schal;

diu vreude in in daz herze hal.

nâch der naht erschein der tac

nâch sînem sit, als er ie pflac.

3490 die knappen wârn alle bereit.

si hêten ûf diu ors geleit

satel und kovertiure.

zir zweier justiure

was in allen harte ger.

3495 harnasch, schilt unde sper

wâren bereit in beiden.

dô begunden sich dâ kleiden

die herren an ir slâfstet;

dar nâch sprâchens ir gebet

3500 und bevulhen got beide ir nôt,

wand ir einem was der tôt

beschert von dem andern dâ.

dô hiezen si sich wâfen sâ

ir ietweders knappen; die

3505 dienten ir herren hie

als si geteilet wâren.

dem herren begunde swâren

sîn muot harte sêre;

wan daz er durch sîn êre

3510 den strît niht mohte lân,

er hêt sichs gerne abe getân,

wand im wîssagte sîn muot,

als er den liuten ofte tuot

die vor in wizzen den tôt

3515 und die doch durch der êren nôt

den lîp verliesent, als er dâ.

den schilt hiez er im reichen sâ

und saz ûf daz ors sîn.

zwêne schefte îwîn,

3520 dar an wâren starkiu sper,

die brâhten in die knappen her.

si liezen von ein ander gân

daz sị ir puneiz möhten hân

und kêrten gegẹn ein ander wider;

3525 diu sper druhten si dô nider,

als si truoc ir gelust;

durch die schilte ûf die brust

si sô vaste stâchen

daz die schefte brâchen.

3530 dô nâmen si zwei andriu sper;

zuo ein ander was in ger;

zesamne kêrten si dô dâ

sô vaste daz die schefte sâ

sich zarten von den îsen.

3535 daz golt begunde rîsen

von den schilten ûf daz gras.

an in beiden dannoch was

ganziu manheit unde kraft;

ir deweder dẹheiner rîterschaft

3540 sô starker nie begunde;

in vil kurzer stunde

verstâchen si diu sper gar.

zaller jungest brâhtẹ man dar

zwêne schefte eschîn,

3545 als ez leider solde sîn

des herren tôt an der stat.

her Gwîgâlois den rîter bat

baz ze velde kêren;

des endorfte er in niht lêren,

3550 wand ers im selbe hêt gedâht.

dô wurden si zesamne brâht

von den starken rossen wider.

her Gwîgâlois der druhte nider

daz sper mit beiden handen;

3555 sînen zorn begunde er anden,

als in sîn vater lêrte;

und dô er an in kêrte,

daz starke sper er durch in stach

daz man in dâ tôten sach

3560 vallen nider ûf daz gras.

vil grôziu klage umb in dâ was:

von den liuten ûber al

wart dâ ein jæmerlîcher schal;

si klagten alle dẹs rîters val.

3565 Er was wol grôzer klage wert,

wand er hêt ie des gegert

daz im der êren krône

ze jungest wær ze lône

gevallen umb sîn arbeit.

3570 daz hêt der tôt nu hin geleit,

als er noch vil ofte tuot:

er nidert mangen hôhen muot

und zevüeret die rîcheit

diu langẹ zesamne ist geleit.

3575 er gît ouch ie nâch liebe leit.

Her Gwîgâlois, der küene man

hiez die knappen vür sich stân.

swie ez in doch wære leit,

si tâten im des sicherheit —

3580 als sị ûf den heilịgen swüeren —

daz sị ze Britanje vüeren

zem milten künịge Artûs

und sîn dâ biten in sîṇẹm hûs

biz er nâch in kœme dar.

3585 des swuoren si und liezenz wâr,

swie leide in von im wære geschehen.

doch wolden si daz gerne sehen

wer er wære; dạz was ir muot.

dô nâmen si ir herren guot,

3590 beidiu ros und ouch gewant;

si bunden ûf diu pfärt zehant

swaz si tragen solden.

den tôten si niht wolden

lâzen an der walstat;

3595 her Gwîgâlois die knappen bat

daz sị in ze kirchen bræhten

und sîner sêle gedæhten

mit almuosẹn und mit messen,

swaz si ze tuone wessen

3600 sîner sêlẹ ze trôste

daz sị von der helle erlôste

daz si sich des vlizzen,

und im niht harte wizzen

umb ir lieben herren tôt;

3605 si sæhen wol es gienge im nôt.

dô tâten si als er gebôt.

Si nâmen urloup von im dâ.

der rîter huop sich danne sâ,

als in diu maget lêrte;

3610 mit vreuden er dô kêrte

mit ir heim ze lande.

si mohtẹ wol âne schande

sîn rîten mit ir dô vertragen.

alrêrst begunde si im sagen

3615 ir mære, dô im dâ gelanc,

und sagte im sîner nœte danc.

si sprach ‘herre, geloubet daz

mir geviel nie rîter baz

dan ir an rehter manheit.

3620 nu habt ir iu daz vür geleit

daz ir den lîp verliesen welt

od riterlîche als ein helt

der werlte lop erringen;

under den swein dingen

3625 muoz iu morgen einz geschehen.

wil ez got, sô sul wir sehen

noch hînt daz lant ze Korntîn,

dar ûz diu liebe vrouwe mîn

in ir kintheit wart vertriben.

3630 ir landes ist ir niht beliben

niwan ein burc, diu lît dran,

daz nie dehein künìc gewan

ein hûs sô rehte veste;

ez ist ein berc, der beste

3635 den ie dehein man gesach.

ezn wære dehein wîp sô swach

sine behieltẹz mit lîhter wer

immer vor des künịges her.

dar ûf ist diu vrouwe mîn,

3640 daz niht schœners möhte sîn

in dirre werlte dan si ist.

nu hât ir unser herre Krist

nâch ir ahte ein kleinez leben

in ir kintheit gegeben,

3645 als ich iu nu sagen wil.

ir vater der hêt êren vil

und diu liebe vrouwe mîn:

daz guote lant ze Korntîn

daz was ir eigen beider.

3650 mit grôzer klage leider

sî wir dâ von gescheiden:

daz bûwet nû ein heiden;

Rôaz von Glois ist er genant;

sîn manheit diu ist erkant

3655 als wîte sô diu werlt ist.

er hât durch sînen zouberlist

beidiu sêle unde leben

einem tievel gegeben;

der tuot durch in wunders vil:

3660 er vüegẹt im allez daz er wil;

alsô gevuocter im daz lant.

daz was im ê vil unbekant

ob er dâ künic solde sîn;

nû hât er goldes vollen schrîn;

3665 daz was des lieben herren mîn.

Welt irz vernemẹn, ich sagiu wie

der heiden daz ane gevie

daz er uns von dem lande schiet,

als imz sîn herre der tievel riet.

3670 ez lît enhalp Korntîn

ein rîchiu grâfschaft, diu ist sîn;

die brâhte in sîn vater an.

nu wart der ungetriuwe man

mînem herren heimlîch

3675 und diente im aller tägelîch

als er sîn eigen wære.

mit mangem guten mære

vreut er im ofte sînen muot,

als der ungetriuwe tuot:

3680 swen er dem manne schaden wil,

sô sagt er guoter mære vil

und lachet in valschlîche an;

als tet der ungetriuwe man.

mîn herre der was guot

3685 unde hêt so reinen muot

daz er sichs niht bedâhte

unz ez im den schaden brâhte

dâ von er den lîp verlôs.

owê, daz er ie erkôs

3690 im ze vriunde ein den man

der nie deheine triuwe gewan!

deiswâr, daz was niht wol getân.

Sîn hûs was im bereit

und sîn guot unverseit;

3695 er hêt in in sîner pflege

und beriet in alle wege

durch sîne grôze manheit.

dâ wider gedâht ér im leit

ze tuone aller tägelîch.

3700 daz was iedoch unbillîch

daz er wider minne

sîne valsche sinne

im ze schaden kêrte,

als in sin schande lêrte.

3705 eins morgens dô der tac ûf gie

und daz der wahtær verlie

die huote an der zinne,

als er des wart inne

daz diu porte was ûf getân,

3710 dô kom der ungetriuwe man

daz sîn niemen wart gewar

mit vier hundert rîtern dar;

die wârn ze harnasche gar.

Als er daz bürgetor gevie,

3715 sîn ors er dô stên lie

und îltẹ mit zorne ûf den sal,

dâ die rîter über al

mit grôzen zühten sliefen.

die vînde si an liefen

3720 und sluogen daz gesinde

von kinde ze kinde,

von manne ze manne;

nieman mohte danne

dem gâhen tôde enbresten;

3725 dâ lac von den gesten

vil manic edel rîter tôt.

owê der klägelîchen nôt

daz si alsô verdurben

und âne wer ersturben!

3730 wie möhte ein mort grœzer wesen!

man liez ir einen niht genesen.

dâ wart mîn lieber herre erslagen;

den sol diu werlt immer klagen:

an im was manheit unde jugent,

3735 sterke, wîsheit unde tugent;

mit disen dingen minnẹt er ie

die werlt, und vergaz doch nie

sîn der imz gegeben hêt,

in des gewalt diu werlt stêt;

3740 dem dientẹ mîn lieber herre

und minnẹt in alsô verre

mit almuosẹn und mit messen

daz ims die liute wessen.

ich wil iu sagen wes er pflac:

3745 ern liez nie deheinen tac

ern teilte selbẹ mit sîner hant;

swaz er armer liute vant,

die beriet der tugentrîche man.

des sol in got geniezen lân,

3750 wand er im ie was undertân.

Mîn altvrouwe was gevarn —

als si got wolde bewarn

und ez ir sælde solde sîn —

ûz dem lande ze Korntîn

3755 ûf ir hûs ze Roimunt, —

daz tuon ich iu entiuschen kunt:

Künịgesberc hieze ez hie —

daz ir ir vater z’eigen lie

und allez daz dar umbe lît.

3760 mîn juncvrouwe was zer selben zît

dô ditze mort hie geschach,

als es mîn vrouwe selbe jach,

niwan drîer jâr alt.

nû ist si sô wol gestalt

3765 und hât einen sô schœnen lîp

daz wæn iender lebe ein wîp

in allem disem rîche

diu sich ir gelîche.

si hât schœne unde jugent,

3770 geburt unde ganze tugent.

ich erkenne wol ir reinen muot:

si ist gewizzen unde guot.

mîn vrouwe pfligt ir harte wol,

als ein muotẹr ir tohter sol:

3775 si hât si in ir huote

mit lîbe und mit guote.

durch ir schœne hât manic man

ze Korntîn den lîp verlân

und lît ouch noch vil manger tôt.

3780 owê der klägelîchen nôt!

noch machet sị liehtiu ougen rôt.

Ich sagiu wie daz komen ist:

wir haben vunden einen list

der uns benamen vrumen muoz

3785 und sol uns leides werden buoz.

wirn wellen die juncvrouwen mîn

ân daz lant ze Korntîn

nieman geben ze wîbe,

wan der mit sînem lîbe

3790 daz guote lant erwerben mac;

der hât ouch danne vür den tac

genuoc ze geben swem er wil;

sô wirt im daz beste spil

daz man im gît ze wîbe

3795 eine magt diu sînem lîbe

wirt ein übergulde:

swer die êrsten schulde

von ir lîbe nemen sol,

dem wirt herzenlîche wol,

3800 wand ez hât diu sælicheit

ir wunsch sô gar an si geleit

daz si mit lobe die krône treit.

Ich lâze iuch morgen an ir sehen

daz ir des selbe müezet jehen.

3805 ob diu werlt einem man

älliù wærẹ undertân,

und daz im gelîche

älliu künicrîche

dienten gar vür eigen,

3810 dem enkunde ich niht gezeigen

noch gerâten ze wîbe

dẹheine magt diu sînem lîbe

sô rehte wol gezæme

und diu ouch sô genæme

3815 an allen dingen wære;

si ist unwandelbære

an lîbe und an sinnen.

sol ich die schœnen minnen,

daz ich niht wære ein wîp,

3820 dar umbe wolde ich mînen lîp

immer vüeren veile

und wolde in urteile

mîne sêle setzen.’

sus begunde si in wetzen

3825 unde reizen ûf den tôt.

des was ir weizgot vil unnôt,

wand er pflac solher manheit

daz sîn lîp was bereit

allen [den] die sîn geruochten,

3830 die ez an in suochten

und die sîn wert wâren.

er hêt in sînen jâren

und in sîner kintheit

der werlte lop alsô bejeit

3835 daz man sîn noch gedenken muoz.

swer welle daz im werde buoz

sîner schande die er hât,

der lâze sîne missetât

und volge dẹn besten; deist mîn rât.

3840 Her Gwîgâlois sprach zuo der maget,

dô si im alsô hêt gesaget

‘juncvrouwe, nu sagt mir mê

wiez umb die âventiure stê

und wer mich dar bringe

3845 od mit welhem dinge

ich si vinde; daz tuot mir kunt.’

dô sprach diu maget an der stunt

‘herre, daz wil ich iu sagen

und wil iuch des niht verdagen

3850 daz iu dar zuo gevrumen mac:

nimmer wirt dehein tac

man sehe vür daz hûs gân

ein tier, daz ist sô wol getân,

und wil ich im der wârheit jehen,

3855 daz ich niht schœners hân gesehen;

ich sagiu wiez geschaffen ist:

ez hât unser herre Krist

sînen vlîz dar an geleit.

daz tier ûf sînem houbet treit

3860 eine guldîne krône;

diu ist bewahsen schône

mit zwein swarzen hornen;

mit beiden orten vornen

ist si sô bewunden

3865 daz wir niht enkunden

mit deheinen unsern sinnen

si dâ von gewinnen,

ob ez uns sîn gunde.

ez hât in sînem munde

3870 die hitze, als ichz hân vernomen,

daz niemen mac dar zuo komen

der im iht schaden wil;

vrumer rîter hât ez vil

mit im geleitet in den tôt.

3875 welt ir bestên die selben nôt,

sô merket rehte war ez var.

von sînem houbet ist ez gar

geschaffen als ein lêbart.

ez hât erkorn im eine vart,

3880 diu ist niemen mê bekant:

einen stîc in daz lant,

durch den walt, zuo Korntîn;

dâ sult ir im volgen în.’

er sprach ‘triuwen, daz sol sîn! ’

3885 Dô er daz wort vol sprach,

die schœnen burc er dô sach

bî im ligen nâhen;

dar ûz si gegẹn in sâhen

einen rîter gwâfent rîten,

3890 als er wolde strîten.

er reit ein ors wol getân.

einen wîzen halsberc vuorter an;

den bedahte ein grüener wâfenroc;

dar ûf was ein rêchboc

3895 gesniten von samîte

an ietwederre sîte.

sîn helm der was rîche,

vil harte höveschliche

mit rôten keln bedecket;

3900 dar umbe was gestrecket

ein strieme wîz härmîn;

oben was gestecket drîn

ein schüzzel von golde,

dâ bî man wîzzen solde

3905 daz er dâ truhsæze was.

ein timît grüene alsam ein gras

was gebunden an sîn sper.

einen niuwen schilt vuort er;

dâ was daz tier gemâlet an,

3910 als ich iu gesaget hân,

daz in dâ leiten solde;

von lazûre und von golde

was ez harte rîche

gevüllet meisterlîche;

3915 daz was ir wâfen ze Roimunt.

der rîter sprach ‘nu tuot mir kunt

und sagt mir rehte, wer ist der

der dort kumt geriten her?

ich wæne er prîs welle bejagen.’

3920 si sprach ‘herre, daz wil ich iu sag

ez ist ein der tiurste man

der rîters namen ie gewan

an tugent und an manheit;

iu ist von im vil unverseit

3925 swes ir mit im beginnen welt;

des lîbes ist er gar ein helt

und ist truhsæze hie;

rîterschaft die minnẹt er ie.

vermîde er iuch, sô ist mîn rât

3930 daz ir in gerne rîten lât,

wand iuch dâ misselingen mac.’

der rîter sprach ‘daz wære ein slac

aller mîner êren

und soldich von im kêren,

3935 sît ich nâch rîterschefte var;

des himels keiser mich bewar!

ich wil benamen gegẹn im dar.’

Sus kêrtẹr über die heide.

die herren begunden beide

3940 die schilte vazzen vür diu knie;

ir ietweder sîgen lie

gegẹn dem andern sînen schaft;

sus kômen si mit grôzer kraft

zesamne ûf der heide;

3945 si verstâchen beide

alsô rîterlîche ir sper

daz niemen kunde wizzen wer

daz sîne baz hêt vertân.

der truhsæze reit in wider an;

3950 bi dem zoume vienc ern dô

vil minniclîche und sprach alsô

‘ir sult hie willekomen sîn

und wizzet bî den triuwen mîn

daz iu mîn dienest ist bereit.’

3955 nu sach er wâ dort her reit

diu maget wider in daz lant

die sîn vrouwẹ ḥêt ûz gesant.

vor ir zôch man ir gewin

gegẹn der schœnen bürge hin:

3960 den sitich, daz phärt wol getân

als ez mit manheit gewan

her Gwîgâlois, der wîgant.

der truhsæze nam in bî der hant

und kêrte dâ diu maget reit;

3965 sîn getriuwer gruoz was ir bereit,

wan si hêt grôze nôt erliten.

mit ein ander si dô riten,

die grî gesellen an den berc;

vor in zôch daz getwerc

3970 daz schœne pfärit mit der hant;

sus brâhtẹ diu maget in daz lant

dar nâch si ûz was gesant.

Rîter unde knehte

iegelîcher nâch sînem rehte

3975 enpfienc den rîter und die maget;

in beiden was dâ unversaget

guot gemach und êre,

und kunden si iht mêre

in ze liebe hân erdâht,

3980 daz wære benamen dâ volbrâht,

wand in geviel nie rîter baz.

si sprâchen alle ‘ist er daz

den der künic Artûs

mîner vrouwen her ze hûs

3985 ze helfe hât gesant,

und der uns daz reine lant

erledịgen sol ze Korntîn?

der sol hie willekomen sîn

uns allen ze trôste!

3990 der mange sêle erlôste

ûz der helle mit sîner kraft

und der âne meisterschaft

die werlt alle werden hiez

und der den vâlant verstiez

3995 von dem himelrîche

durch daz er im gelîche

wolde setzen sînen stuol —

er warf in in der helle pfuol:

alsô müez vallen von sîner hant

4000 der heidenische vâlant

der mangen rîter hât erslagen!

got sol im niht mê vertragen

sînen vil grôzen übermuot

und sînen gwalt den er tuot.’

4005 diu rede dûhte den rîter guot.

Ein ende hêt diu klage dô;

si lachten alle und wâren vrô.

diu magt bevalch den wîgant

dem truhsæzen bî der hant

4010 und den besten rîtern dâ.

zuo ir vrouwen gie si sâ;

der brâhte sị liebiu mære

wie mit ir komen wære

der aller besten rîter ein

4015 den diu sunne ie beschein;

den hêt der künic Artûs

ir ze helfe in ir hûs

von sîner mässenîe gesant.

dô neic diu vrouwe in daz lant

4020 dem künịge von Britanje.

diu süeze gamanje

enpfie vil wol die reinen maget.

owî, waz dâ wart gesaget

mære von ir reise!

4025 si zalte mange vreise

die si von vorhten leit

als ir geselle streit.

ouch lie si ir vrouwen

diu kleinôt schouwen

4030 diu ir her Gwîgâlois gewan,

als ich iu gesaget hân,

mit micheler manheit.

ir getwerc daz phärit vür si reit

und vuorte den sitich und den hunt;

4035 dô ahten si vür tûsent pfunt

daz gereite und daz vogelhûs.

dem milten künịge Artûs

gnâdeten sị der êren.

diu magt begunde mêren

4040 dem jungen rîter sînen prîs:

si lobet in en mangen wîs

vor ir juncvrouwen:

wie wol er kunde houwen

helm unde schilte

4045 und daz in niht bevilte

ze tuone durch dehein wîp;

er wolde vẹṛliesen sînen lîp

durch si, des wær im gedâht;

sus hêt si in ûz brâht.

4050 des wart diu wirtinne vrô.

ir juncvrouwen gnâdete si dô

der ängestlîchen arbeit

die si ûf der verte leit,

als si ir selbe hêt geseit.

4055 Nu berieten sich die drîe,

diu schœne Lârîe,

ir muoter und diu selbe maget

diu in diu mære hêt gesaget,

wie man den rîtẹr enpfienge

4060 daz er dâ von gevienge

guoten willen in den tôt.

allen ir vrouwen si gebôt

daz si sich rîche kleiten

und sich dar zuo bereiten,

4065 als er în gienge,

daz man in sô enpfienge

daz er dâ von würde vrô;

daz lobten si mit willen dô.

Nêrejâ diu maget hiez

4070 diu von dem rîter trôst gehiez,

mit der er dar komen was.

in einen garten ûf ein gras

vuort in der truhsæz bî der hant;

dô schutẹr abe sîn îsengwant

4075 undẹr einer linden grüene;

her Gwîgâlois der küene

kuolte sich und ruowet dâ.

dô brâhte im Nêrejâ

von pfelle harte rîch gewant;

4080 daz hêt ze liebe im gesant

diu schœne magt Lârîe;

ez was ir von Syrîe

verre gesant über sê.

noch brâht im diu maget mê:

4085 lînwât, wîz alsam ein snê.

zuo zim saz si ûf den klê.

sus kleite sich der küene man.

zwô scharlaches hosen streich er an

mit grôzem vlîze an diu bein.

4090 ôwî, wie wol et an im schein

geburt unde manheit!

gewizzen unde sælicheit

hêt got mit vlîze an in geleit.

Dô der rîter wart gekleit

4095 und er nâch sîner arbeit

so minniclîche gâbe enphie,

des gnâdeter got unde gie

mit der juncvrouwen hin

vür die edeln künigin

4100 dâ diu ûf ir sal saz.

ôwî, herre got, waz

er dâ schœner vrouwen vant!

die hêten sich in rîch gewant

gekleit manger slahte,

4105 iegelîche nâch ir ahte.

vünfzic was ir über al;

die drîzic lâze ich âne zal

sô daz ich si niht prîse,

wan si niht in der wîse

4110 gelîch den zweinzic wâren

an geburt noch an gebâren,

an schœne noch an rîcheit;

die zweinzic wâren sô gekleit

von pfelle und von samîte

4115 daz ich dâ wider strîte

daz man nu iht vinde

under dẹheinem gesinde

alsô rîche vrouwen.

dô begunder umbe schouwen

4120 und nam ir aller rehte war;

dô wâren si ze lobe gar

und ze wunsche wol gestalt;

ir sælde diu was manicvalt

an lîbe und an gewizzen;

4125 des besten si sich vlizzen

vür ein ander alle dâ.

dô sach er undẹr in sitzen sâ

vrouwen Lârîẹn, die schœnen maget

von der schœne im was gesaget

4130 michel wunder; dạz was ouch wâr;

got hêt sînen vlîz gar

ze wunsche wol an si geleit:

an lîbe und an sælicheit

diu reine vür si alle was

4135 geliutert als ein spiegelglas.

hie vant er sînes herzen bluot.

beidiu lîp unde muot

gap er ir tougenlîche dâ.

vrou Minne vie den rîter sâ

4140 und zôch in in ir hamît

gewalticlîche âne strît,

daz er sich niht mohte erwern;

er muose ir sichern unde swern

ze tuone swaz si dûhte guot;

4145 ze gîsel muose er ir den muot

geben und daz herze sîn,

daz diu beidiu muosen sîn

ir gevangen biz an ir tôt;

swaz man ze tuone im gebot

4150 durch si, daz dûhte in allez swach,

swie im doch sîn herze brach

dô er die schœnen alrêrst sach.

Vrou Minne nam in mit ir kraft

und zôch in in ir meisterschaft

4155 gewalticlîche âne wer;

der ê vlühtic tet ein her

und mangen vrumen rîter vie,

dern kunde sich gevristen nie

mit deheiner sîner kraft

4160 ern müese dulden meisterschaft

von der starken minne.

hie liez er sîne sinne

bî der mägde wol getân;

ir grôziu schœne gesigte im an

4165 daz er ir nimmer mê vergaz,

wan si sîn herze dâ besaz

mit jâmer, sô daz im nie mê

von deheinem wîbe geschach sô wê.

des gwaltes was er ungewon;

4170 ich sagiu daz im dâ von

deste wirs muose sîn.

gegẹn im gie diu künigîn;

ir tohter nam si bî der hant;

diu schœnẹ Lârîẹ was si genant

4175 si enpfiengen in mit triuwen wol,

als man [die] lieben vriunt sol;

dar nâch die vrouwen über al.

vil grôziu vreude âne schal

huop sich mit zühten undẹr in dâ.

4180 diu vrouwe hiez in sitzen sâ

und klaget im ir herzeleit;

der rîter sprach ‘ich bin bereit

durch iuch ze rîten in den tôt;

ezn ist dehein sô grôziu nôt

4185 ichn bestê si gerne und sî ir vrô,

ob der rede ist alsô

als mir Nêrejâ hât gesaget:

daz man daz lant und die maget

mit manheit erwerben sol.

4190 ez tuot mir sanfte unde wol,

swaz leides mir dâ von geschiht.’

diu vrouwe sprach ‘ichn hils iuch niht,

wand ichz alsô gevestent hân —

gesiget ir dem heiden an —

4195 [daz ich gote getrûwe wol

daz ichz vch geben sol],

mit mannen und mit mâgen.

dô begunde in des betrâgen

daz er sich sûmen solde;

4200 mit urloube er dô wolde

gegen dem lande sîn geriten.

dô begunde in diu maget biten

dạz er belibe mit ir die naht;

daz gap im vreude unde maht,

4205 wand er die schœnen gerne sach.

mit grôzen zühten er dô sprach

‘ir sult gebieten über mich,

wan swaz ir welt, daz tuon ich;

und wizzet sicherlîche:

4210 wæren mîn älliu rîche,

sô daz ich keiser wære,

der êren ich enbære

ê ich verliezẹ iuwer gebot.

ir sult ez lâzen âne spot

4215 daz ich iuch, vrouwe, minne,

wand ir habt mîne sinne

gevangen und daz herze mîn;

diu müezen bî iu immer sîn

mit triuwen biz an mînen tôt.’

4220 vür ir vüeze er sich bôt

mit ûf gerahten henden.

er sprach ‘sich muoz verenden

mîn lîp nâch iuwern gnâden gar;

dise reise die ich var

4225 dâ ich den lîp verliesen sol

daz tuot mir herzenlîche wol,

wand ez durch iuch geschehen muoz.’

der mägde kuste er an den vuoz

vor vreuden und ergap sich ir.

4230 er sprach ‘vrouwe, ditz ist mir

diu meiste vreudẹ diech ie gewan

daz ich die vreise sol bestân

dâ mit man iuch erwerben mac;

got lâze mich den selben tac

4235 geleben daz ich in bestê,

swiez halt mir dar nâch ergê,

der iuch des landès verstôzen hât!’

‘got gebe iu helfe unde rât! ’

sprach diu maget wol getân.

4240 den rîter hiez si ûf stân

und erzeicte im mit den ougen

vor ir muoter tougen

daz er ir was alsam der lîp.

des pflegent noch diu reinen wîp

4245 daz si in diu herze sehent,

dar inne suochent unde spehent

durch des mannes ougen,

wan swaz daz herze tougen

wider den vriunt valsches hât,

4250 daz ouge ez nimmer verlât

ezn meldez mit dem blicke;

ez wenket harte dicke

an im ûf unde nider

und zücket sich vil gâhes wider;

4255 ezn siht niht güetlîche dar,

niwan daz ez neme war

ob iht ze merken an im sî;

dâ erkennet die vals chen bî.

als ich mich versinnen kan:

4260 swâ diu ougẹn ein ander an

lange sehent âne wanc,

daz dâ herze und [ir] gedanc

mit triuwen zuo ein ander stât;

swâ ab der blic sô schiere ergât,

4265 dâ enist niht ganzer triuwe bî,

ezn kome alsô daz ez sî

daz sîn die liute werden gwar:

sô lâze er sîn sehen gar,

ern blickẹ dan underwîlen dar.

4270 Als tet im diu reine maget.

waz dâ mære wart gesaget

undẹr in von guoten dingen!

si kundẹn im wol geringen

sînen muot mit süezem spil;

4275 dâ was kurzewîle vil

von süezer ougen weide.

ezn geschach nie man sô leide

und solder undẹr in sîn gewesen,

er wær vor leide gar genesen,

4280 wan dâ was michel rîcheit.

innen des wart in geseit

si solden ûf ezzen gân.

den rîter hiez man ûf stân

von der kurzewîle;

4285 ez dûhte in wol ein mîle

dô er von ir ze tische gie.

grœzer êre erbôt man nie,

wedẹr ê noch sît, deheinem man

als im mit willẹn dâ wart getân.

4290 dô si mit vreuden gâzen

und dar nâch gesâzen,

die vrouwen gâben im guot naht;

sus schieden si sich âne braht.

der tac hêt ein ende hie.

4295 her Gwîgâlois dô slâfen gie

ûf einen wünniclîchen sal.

dâ sach er von der mûrẹ zetal

eine brunst in dem walde;

dô vrâgẹt er alsô balde

4300 wâ diu brunst möhte sîn.

si sprâchen ‘ez ist ze Korntîn,

dâ unser herre nam den tôt.

man hœrẹt dâ jâmer unde nôt

die langen naht unz an den tac.

4305 niemen ez erleschen mac

unz daz der tac ûf gêt;

daz hûs ab dannẹ dâ ganzez stêt,

unverbrunnen alsam ê.

man hœrẹt dâ niwan wê! wê!

4310 schrîen die langen naht;

des tages ist ez âne braht

und alles schalles lære.

ez ist uns ein swære

daz wir ḍẹs niht mugen gesehen

4315 wâ von od wie ez sî geschehen.

ez hâtz getriben wol zehẹn jâr:

des nahtes sô verbrinnẹt ez gar

und stêt iedoch des tages dâ.’

der rîter sprach ‘nu sagt mir wâ

4320 diu strâze durch den walt gê.’

der truhsæze sprach ‘owê!

jâne gêt niht weges leider dar:

ein breitez mos hât ez gar

umbevangen und ein sê.

4325 ichn kom dar in nimmer mê

sît mîn vrouwe vertriben wart.

ouch gêt dar in dehein vart

niwan en zwein enden;

die sint mit steinwenden

4330 beslozzen und mit huote,

sô daz des iemen muote

daz er dar in kêre

er engelte sîn vil sêre,

ezn volgẹ einer dem tiere dar

4335 der nâch der âventiure var:

den leitez âne schadẹn dar in.

der teile ouch danne den gewin

mit swelhem vriunde er welle!

ich wil sîn geselle

4340 nimmer werden, swiez mir ergê;

ichn weiz et wiez dar umbe stê:

wirn gesehẹn ir dẹheinen nimmer mê.’

Der al die werlt geschaffen hât,

der gebẹ mir helfe unde rât

4345 und trôst ze mîner reise,

wand ich die selben vreise

mir ze vreuden hân erwelt, ’

sô sprach her Gwîgâlois der helt;

‘ez wirt mir ein vil süeziu nôt

4350 und sol ich durch si ligen tôt

die ich ze vrouwen hân erkorn;

ich muoz und wil ir sîn geborn

ze dienest swar ich kêre! ’

der rede enwart niht mêre,

4355 wand im was ruowe harte nôt;

guot naht er in dô bôt.

sus ruowet er unz an den tac.

sîns rosses man mit vlîze pflac;

ez wart dâ harte wol beslagen.

4360 sîn îsengwant daz hiez man tragen

balde in ein vegevaz;

mit solhem vlîze vegt man daz

ez wart lûter als ein îs.

si vürdertẹn in en mangen wîs

4365 zer ängestlîchen reise.

sîn muot in in die vreise

und in solhen kumber stiez

dar zuo im niemen trôst gehiez;

an gotes gnâde erz allez liez.

4370 Des morgens dô der tac ûf gie,

sîn sorge in niht slâfen lie

und der jâmer nâch der maget.

sîn herze was vil unverzaget;

des gnôz er an vil manger stat.

4375 eine messe er im dô singen bat

von dem hêren geiste

und bat got aller meiste

siges durch die reinen maget,

wand im vür wâr was gesaget

4380 ob er den sic genæme dâ,

man gæbe im mit stæte sâ

die schœnen magt ze wîbe,

ze vreuden sînem lîbe;

des vreute sich der küene man.

4385 dô daz ambet wart getân

und sich der pfaffe engarte,

dô stuont er unde warte

wen er im gæbe den segen,

als wir zer nœte hiute pflegen.

4390 der priester kom vil schiere wider;

mit grôzem jâmer kniete er nider

vür den alter mit gebet.

eine kefsen nam er an der stet,

diu was heilctuomes vol;

4395 mit rôtem golde was si wol

gezierẹt und mit gesteine;

von wîzem helfenbeine

was der kefsen daz ander teil.

der priester was gar âne meil

4400 und ledic aller bôsheit;

sîn hâr was grâ unde reit,

sîn bart lanc unde breit;

mit rîcher wât was er gekleit:

sîn pelz der was lûter grâ,

4405 mit einem samît der was blâ

bezogen [vil] meisterlîche,

gevidert was er rîche

mit einem zobel spanne breit;

der priester hêt an sich geleit

4410 einen mantel der was luhsîn;

der slaht moht er niht bezzer sîn,

mit einem siglât bedaht.

die liute liezen alle ir braht

und neicte sich der junge degen.

4415 der priester gap im dô den segen

als er beste kunde:

mit kefsen und mit munde

segent er in in den tôt.

dâ wart vil manic ouge rôt

4420 dô im der segen wart gegeben.

‘herre got, vrist im sîn leben

und gip im sige unde kraft

zer ängestlîchen rîterschaft

und behalte im sînen jungen lîp’

4425 sprach dâ man unde wîp,

‘wand er ist alles guotes wert.’

der priester strihte im umb sîn swert

einen brief, der gap im vesten muot:

vür älliu zouber was er guot.

4430 des gnâter ịm und bevalch sich got.

dar nâch schiere kom ein bot,

der hiez in enbîzen gân.

der imbiz wart vil schiere getân;

ringiu spîsẹ was im bereit

4435 ze sîner grôzen arbeit.

von dem tische gienc er zehant

dâ er die vrouwen alle vant

und nam urloup von in sâ.

sîn vestez herze liez er dâ

4440 bî der mägde wol getân;

ir krankez herze vuorte er dan.

nu sprechet wie sîn werde rât

der ein krankez herze hât

als er ze strîte rîten sol?

4445 dâ tuot im der gedinge wol

und der muot den im gît

diu süeze minne zaller zît;

ditz allez reizte in ûf den strît.

Hie neic er dem gesinde

4450 von kinde ze kinde,

von manne ze manne;

dem rîter volget danne

ein segen meiniclîche:

si bâten alle gelîche

4455 got daz er sîn gedæhte

und in wider bræhte

mit sige und mit gesunde.

got enwoldẹ sô mangem munde

sîne gnâde niht versagen:

4460 er liez in an der vart bejagen

solhen prîs der in noch wert;

des hêt der rîter ie gegert.

man brâhte im sîn ors zehant,

sper, schilt und îsengwant;

4465 dô wâfent sich der junge degen.

des lîbes hêt er sich bewegen.

vrouwe Lârîe sande im dô

eine gâbe, der wart er harte vrô:

ez was ein tasche pfellîn;

4470 ein brôt daz was geleit dar în,

geworht mit grôzer meisterschaft:

von wurzen hêt ez solhe kraft

daz in lie diu hungers nôt.

als erz engegẹn dem munde bôt;

4475 ez gap im muot und solhe maht:

er wære gewesen siben naht

in einem walde âne maz

als er sîn ein lützel gaz;

des gnâter ir wol tûsent stunt.

4480 nu kom ein bot, der tet im kunt,

als erz ouch ê hêt vernomen,

daz tier wær vür die burc komen

und gienge gegẹn dem walde.

danne kêrte er balde

4485 mit jâmer vür daz bürgetor;

dâ sach er daz tier vor

gegẹn dem walde kêren;

sîne reise begunde er mêren

wand im was zuo dem tiere gâch.

4490 daz gesinde segent im nâch

und antwurt in in gotes pflege.

her Gwîgâlois kêrt von dem wege

ein engez pfat, daz was niht breit,

unz er daz schœne tier erreit.

4495 als er im sô nâhen kam

daz ez sîn rehte war genam,

dô spiltez gegẹn im als ein hunt;

mit sînem spil tet ez im kunt

daz er im willekomen was;

4500 ez legt sich vür in ûf daz gras

und gnâte im sîner künfte dar.

des wart er an im wol gewar,

wand ez vil güetlîche tet.

nâch im kêrte er von der stet

4505 ein pfat, daz was vil enge;

durch michel gedrenge

reit er in kurzer wîle

baz danne zwelf mîle;

sus vuoren si mit île.

4510 Hie hêt der walt ein ende;

bî einer steinwende

kômen sị vür daz bürgetor;

dâ lâgen wilde graben vor;

die wâren sô vreislîche tief,

4515 als ein man dar în rief,

daz ez vil kûmẹ ḥer ûf hal;

dâ wârẹn pfîlære hin ze tal

geworht mit grôzer krefte,

dar ûf mit meisterschefte

4520 ein brücke was geslihtet,

ein slegetor [was] gerihtet

von den pfîlærẹn enbor;

dâ was geheftet an daz tor.

als daz tier zuo gie,

4525 der portenære ez sîgen lie

und haftez ûf die brücke nider.

in sîn hûs gienc er wider:

er erkande sînen blâst wol;

sô grôzer hitze was ez vol,

4530 an swaz ez in der werlte blies,

daz bran zehant als ein mies,

steine und îsen als ein strô.

nâch dem tiere reit er dô

ze Korntîn in daz lant;

4535 daz was eben als ein hant,

wol gebûwen über al;

dâ lac ûf und zetal

wînwähse harte vil.

dô sach er sîner ougen spil

4540 vor im: einen turnei;

dâ wart vil manic sper enzwei

in kurzer wîle gestochen,

die starken schiltẹ zebrochen

von slegen und von stichen;

4545 si jagten und entwichen

ze rehte als si solden;

daz wart dâ wol vergolden

beidiu mit stichen und mit slegen;

enzwischen zwein breiten wegen

4550 was diu storîe;

hundert unde drîe

was der rîter und niht mê;

man hôrtẹ dâ niwan ‘wê! wê! ’

vor in kreigieren dâ.

4555 her Gwîgâlois bedâhtẹ sich sâ

ezn wæren rehte liute niht;

ir rîterschaft dûht in enwiht

und nam ir aller wâfen war;

daz was in einer varwe gar,

4560 rehte swarz alsam ein kol;

mit zinober wâren wol

rôtiu viur gemâlet drin.

in twanc sîn manheit und sîn sin

daz er sîn sper an der stet

4565 mit einer rîchen jost vertet

durch sîne lieben âmîen,

die schœnen Lârîen.

‘zevalier! ’ begunder schrîen.

Dô er daz sper hêt vertân,

4570 beidiu schaft und îsen bran

swâ ez an si ruorte;

sîn ors in danne vuorte

baz danne rehte reise.

ern kom in solhe vreise

4575 von sô grôzer hitze nie.

er gedâhte ‘herre got, wie

stêt ez umḅ dise rîterschaft

daz beidiu îsen unde schaft

an in sô gar ist verbrant?

4580 und wær mir doch daz nû erkant

wes gesinde ez wære,

sô vrâgẹt ich si der mære

unz ich ervüere ir leben gar.’

von der jæmerlîchen schar

4585 kêrtẹ der edel rîter dô;

ir valschiu vreude tet ịn unvrô,

wand er wol sach daz in daz leben

got ze buoze hêt gegeben.

von den rîtern wart im gâch;

4590 dem tiere kêrte er aber nâch

vür daz hûs ze Korntîn.

an des gezierde was wol schîn

daz daz lant rîche was;

diu mûre glaste alsam ein glas

4595 lûter unde reine,

von edelm märmelsteine

geworht vil meisterlîche;

ein palas harte rîche

lac enmitten drinne

4600 gemûrt mit grôzem sinne

von lûtern kristalien —

daz muose im wol gevallen, —

mit vlîze gewelbet âne dach;

durch die mûre man wol sach

4605 allez daz dar inne was,

wan si was lûter als ein glas;

daz hûs was erbûwen wol

und maniger gezierde vol.

ouch lac ein anger vor dem tor

4610 ûf einem breiten steine enbor

nâhen bî der strâze;

schône âne mâze

ein boum dar ûf gebelzet was

rehte enmitten in daz gras,

4615 des schat den anger gar bevie;

von sînem süezen bluote gie

ein smac reine unde guot;

der gap kraft und guoten muot.

dar engegen daz tier kêrte,

4620 als ez diu gwonheit lêrte,

dâ der schœne anger lac.

nimmer wart dehein tac

ezn kœme dar zer selben stunt;

sîn süezer smac was im wol kunt.

4625 ûf den anger spranc ez sâ;

daz tier wart verwandelt dâ

zehant von sîner wilde

in eines mannes bilde;

der hêt zöpfe alsam ein wîp;

4630 beldiu sîn wât und sîn lîp

diu wâren lieht sunnen var,

lûter und sô rehte klâr

daz ez im in diu ougen schein

als ein lieht karfunkelstein;

4635 sîn houbet daz was schône

gezieret mit der krône

die daz tier hêt dar getragen.

her Gwîgâlois bi sînen tagen

sô vremdes nie niht gesach.

4640 des erkom er sêre unde sprach

‘herre got, waz sol daz sîn?’

zuo dem man wold er dar în

erbeizet sîn sâ zehant;

dô was der anger âne want

4645 beslozzen mit gotes tougen;

swie in doch sîniu ougen

vor im offen sâhen,

ern mohte niht genâhen

dem manne den er bî im sach.

4650 daz muote in sêre unde sprach

‘sag an, sît du mensche bist,

ob du geloubest an Krist

und wiez umb dîn leben stê;

dir ist nû wol, ê was dir wê.

4655 als ich mich versinnen kan,

got hât wunder an dir getân:

ê wærd ein tier, nû bist ein man.’

Er sprach ‘den du mir hâst genant,

der sol mir immer sîn bekant

4660 und geloube daz er wârre Krist

ie was und immer ist,

daz âne in niht genesen mac;

ich hân verdienet sînen slac

leider mir und sînen zorn;

4665 des bin ich armiu sêlẹ verlorn

ern welle mir genædic wesen:

âne in trûwe ich niht genesen.

ditz ist mîn ruowe die ich hân,

als ich von den wîzen gân

4670 des tages ie ze dirre stunt;

niht mê ruowe ist mir kunt

als ich dich nû bewîse:

zeinem paradîse

gap mir got ditz ze lône hie;

4675 daz verdienet ich, ich sagẹ dir wie:

ich was herre über ditze lant

unde stuont gar in mîner hant

beidiu liute unde guot;

dô gap mir got sô guoten muot

4680 daz ich die armẹn an dise stat

zallen zîten komen bat;

ich teilte in selbẹ mit mîner hant,

swaz ich armer liute vant;

die beriet ich mit der spîse.

4685 ditz selbe paradîse

gap mir got ze lône

und dise liehte krône

die ich hie mit vreuden trage.

du solt merken waz ich dir sage.’

4690 ‘daz tuon ich gerne’ sprach der degen.

er sprach ‘ez ist hie bî gelegen

ein wurm nû wol zehen jâr;

der hât ditze lant gar

verwüest unz an daz wilde mos;

4695 beidiu man unde ros

treit er hin âne wer;

von sînem stanke verdürbe ein her

der im ûz dem halse gêt;

und wizze et daz, wer in bestêt,

4700 der hât den tôt an der hant.

nu hât dich got her gesant

daz du uns erledịgen solt;

dâ mit erwirbestu den solt

des du immer vrô maht sîn:

4705 Lârîen, die tohter mîn,

dar zuo ditz lant se Korntîn.

Ouch wil ich dir sagen mê:

diu rîterschaft die du ê

sæhe bî der strâze;

4710 der wîze ist âne mâze

grôz und sô jæmerlîch

daz ir nœte ist niht gelîch;

swie vrœlîch si dâ rîten,

si sint doch zallen zîten

4715 in der helle viure;

ruowe ist in tiure;

daz tuot mir wê und muoz ez klagen:

si wurden alle [bî] mir erslagen

dô mir der ungetriuwe man

4720 an guoten triuwen an gewan

mînen lîp und ditze lant.

Rôaz von Glois ist er genant;

ez ist manic zierre degen

von sîner hant hie tôt gelegen

4725 die nâch der âventiure riten;

si habent hie alsô gestriten

daz si ir êre gar verlurn

und ouch den tôt von im kurn.

sîn hûs daz lît hie nâhen bî.

4730 und wizze iedoch, swie küene er sî,

ern getorste dẹn wurm nie bestân,

swie er im doch habe getân

solhen schaden mangen tac

den er niht überwinden mac

4735 an sînen liuten die er hât.’

der rîter sprach ‘nu gip mir rât

durch die gotes güete

wie ich mich behüete

vor des wurmes stanke,

4740 daz ich dirs immer danke,

die wîl ich lebè, mit mîm gebet.’

der schœne man brach an der stet

von dem boume einen bluot.

er sprach ‘nu nim! ditz ist dir guot,

4745 daz dir dehein bœser smac

von sîner süeze geschaden mac,

und rît vür daz bürgetor;

dâ stecket ein glävîe vor,

die brâhte mir ein engel her;

4750 niht ist daz dâ vor gewer,

horn, stein noch îsengwant,

man stechẹ dâ durch unz an die hant.

si wart genom, ich sagẹ dir wâ:

in der innern Indîâ

4755 dâ ist einer slahte stâl

daz hât von golde rôtiu mâl

und ist sô herte daz ẹz den stein

rehte snîdet als ein zein.

si stecket in der steinwant.

4760 nu nim si, helt, in dîne hant

und rît ûf die heide;

er ist an sîner weide

als der âbent ane gêt;

swaz lentiges dan dâ bestêt,

4765 liute od vihe, dạz treit er hin;

ze vlühte habe niemen sin,

wand er erloufet, swenne er wil,

daz wilde tier als er spil.

man enmac in niht gesêren

4770 mit geschozze noch mit gêren;

ouch ist dehein gesmîde

daz den wurm snîde

wan diu glävîe eine;

in einem holen steine

4775 ist er gelegen mangen tac,

dâ in niht gewinnen mac.

du erslehst den wurm, daz ist wâr;

du verliusest ab von im sô gar

dîne kraft daz dir nie mê

4780 von deheinem strîte geschach sô wê;

die nôt soltu bedenken ê.’

Her Gwîgâlois mit vreuden sprach

‘wol mich, daz ez mir ie geschach

daz ich die magt ervehten sol!

4785 ez tuot mir herzenlîche wol

daz ich hie strîtes vinde stat.’

‘jâ, benamẹn, du wirst sîn sat! ’

sprach der wundern schœne man.

‘nâch dînem willen muoz ergân

4790 allez des dîn herze gert;

des bistu weizgot wol wert;

du solt von rehte sîn ein helt,

wan dîn vater ist erwelt,

der süeze her Gâwein,

4795 zuo dem besten rîter ein

den diu sunne ie beschein.’

Der junge rîtẹr aber dô sprach

‘du erkennest den ich nie gesach.’

‘zwâre, du hâst! ’ er sprach ‘nein.’

4800 ‘ez ist der selbe Gâwein

dem der künic Artûs

ze Karidôl in sînem hûs

sîn êre gar bevolhen hât,

an dem der hof aller stât.’

4805 ‘sô dir got, ist ez wâr?’

‘ [zwâr, ] ichn liuge dir niht umb ein hâr.’

‘her Gâwein wart er mir genant;

mir was ab daz unbekant

ob er mîn vater wære;

4810 nu vreuwe ich mich der mære

daz mir von sîner vrümicheit

sô mangen enden ist geseit;

ouch hân ichz selbe wol gesehen.’

‘sælde und êrẹ müez dir geschehen! ’

4815 sô sprach diu sêle ‘nu gêt mir zuo

diu zît daz ich unz morgen vruo

in dem hûse brinnen sol;

dar nâch ist mir immer wol.

ich hân gebüezet zehen jâr;

4820 dar nâch bin ich ledic gar

mîner sünden die ịch ie getet.

du solt, helt, mit dîm gebet

gedenken der vil armen schar

diu vor mir in daz hûs var,

4825 wan diu ist leider unerlôst;

du bist ir helfe und ir trôst;

als ich dir ê hân gesaget,

dir wirt daz lant und diu maget,

dar zuo rîche dienstman,

4830 wan du gesigèst dem heiden an

des leit ich ie mit leide truoc;

an guoten triuwen er mich sluoc;

durch daz ich im mîn dienest bôt,

dâ von kom ich in dise nôt;

4835 des lît mîn armer lîp nu tôt.

Dô si die rede vol sprach,

her Gwîgâlois dô rîten sach

vür sich dâ, des nam er war,

die vil jæmerlîchen schar

4840 ûf den er sîn sper vertet;

si erbeizten alle an der stet

dô si zem anger kâmen;

ir sper si alle nâmen

ûf ir ahsel und zugen hin,

4845 einer nâch dem andern, in

durch daz schœne bürgetor.

her Gwîgâlois der nam dâ vor

die glävîẹn in sîne hant;

diu stahte in der steinwant

4850 als in einer tanne.

‘rîter, hebt iuch danne!’

sprach der ûf dem anger saz.

‘unser herre got gebe iu daz

ir den sic erwerbet hie! ’

4855 von dem anger er dô gie

in tieres wîs, alsam ê;

sîner rede enwart niht mê;

sus gienc ez in das hûs dan;

von sînem blâste ez dô bran

4860 daz man ez harte wîten sach,

daz sît nimmer mê geschach,

wan got hêt sînen zorn verlân.

der junge rîter huop sich dan

mit grôzem herzeleide

4865 über die wilden heide.

diu liehte sunne under gie.

einen stîc her Gwîgâlois gevie,

der truoc in hin zuo einem sê,

dâ vil jæmerlîche schrê

4870 ein schœne wîp nâch wîbes sit;

dâ si ir leit erzeiget mit.

dar begundẹ der rîter gâhen.

dô er ir kom sô nâhen

daz er ir ungebærde ersach,

4875 daz beswârte in sêre unde sprach

‘owê, ir vil sælic wîp,

warumbe quelt ir iuwern lîp,

waz leides ist iu hie geschehen?’

er mohte vil wol an ir sehen

4880 daz ir von herzen leide was;

si was gevallen ûf daz gras

mit gezartem gebende;

ir vil wîze hende

brach si und ir rîch gewant;

4885 in solhem jâmer er si vant

daz ez in muose erbarmen:

mit nackenden armen,

mit zevuortem hâre;

ez was ir lîp ze wâre,

4890 swâ er blahte, alsam ein snê;

ir grôziu klage tet im wê;

daz erzeigẹt er sît mit werken wol.

ir brust was swarz alsam ein kol,

daz bluot dạrunder geloufen;

4895 mit slegen und mit roufen

hêt si ir lîp verderbet

und vil nâch gar ersterbet.

sus lac diu vrouwe âne maht,

der liehte tac was ir ein naht,

4900 sine gehôrte noch gesach;

von herzeleide ir daz geschach.

der rîter aber zuo ir sprach

Owê, vrouwe, wie tuot ir sô?

gehabt iuch wol und sît vrô;

4905 daz ir sælic müezet sîn!

wand ich durch iuch den lîp mîn

wâgen wil unz in den tôt,

ob ich dâ mit iuwer nôt

erwenden mac und iuwer leit;

4910 liebiu vrouwe mîn, nu seit

waz iu leides werre.’

diu vrouwe sach vil verre

ûf ze got unde sprach,

dô si den rîter bî ir sach,

4915 ‘owê, lieber herre, owê!

jâ muoz ich trûren immer mê;

mîner klage gêt mir nôt.

wolde got wan wære ich tôt,

sô hêt mîn klage ein ende.

4920 herre got, nu sende

mir den tôt, sît ich sîn bit!

dâ hât mîn leit ein ende mit.

herre got, wie tuostu sô?

von dînen gnâden was ich vrô:

4925 mir hêt zer werlte ein süezez leben

dîn reiniu gotheit gegeben;

des bin ich nû beroubet.

mîn vreude diu ịst betoubet

von herzenlîchem leide!

4930 herre got, nu scheide

die sêlẹ von mînem lîbe,

wan mir armen wîbe

nimmer liep mac geschehen

sît ich in tôten hân gesehen

4935 den ich ze vreuden hêt erkorn.

owê daz ich ie wart geborn!

wie jæmerlîche er ist verlorn!’

Nâch der klage si sich sluoc.

der rîter ir daz niht vertruoc;

4940 er erbeizte von dem orse nider.

diu vrouwe begundẹ sich roufen wider,

ir kleit zerren alsam ê.

der rîter sprach ‘desn wirt niht mê.’

ir wîze hende er gevie;

4945 mit bet er si des übergie

daz si im begunde sagen

wie der wurm hêt hin getragen

an der wîle ir lieben man.

si sprach ‘herre, got hât getân

4950 an mir des ich in nie gebat:

wir wârn geritẹn an dise stat,

ich und mîn vriunt, mit vederspil;

dô wart mir mîner vreuden zil

in kurzer wîle geslagen nider,

4955 daz nimmer wirt gerihtet wider.

daz tet der grôze wurm Pfetân,

der micheln schadẹn ḥie hât getân;

er truoc in selbe vierden hin,

diu starken ors under in

4960 als ez ein niht wære.

wie er mich verbære,

des nimt mich michel wunder;

von mînem vriunt besunder

ich an daz velt beizen reit;

4965 dâ von der tôt mich vermeit.

daz sî dir, herre got, gekleit! ’

Der rîter sprach ‘wâ kêrter hin?’

si sprach ‘herre, habt ir den sin

daz ir in bestên welt?’

4970 ‘jâ ich, gerne’ sprach der helt.

‘owê, herre, sô sît ir tôt.’

‘waz darumbe? ich bin durch nôt

von Britanje her gevarn.’

‘herre, got müez iuch bewarn!’

4975 sprach daz vreudelôse wîp.

‘ich weiz wol daz ir iuwern lîp

habt verlorn âne wer.’

‘nu sî got der mich ner’

sprach der rîter ‘swar ich var;

4980 ich wil benamen nâch im dar

dâ er iuwern vriunt hât,

swie sîn dar nâch werde rât.’

si sprach ‘herre, nu seht daz pfat

daz er mit sînen vüezen trat,

4985 und volget im vil rehte nâch;

er gêt vil sanfte, im ist niht gâch,

wand er ist ân angest gar.’

von der vrouwen kêrter dar

nâch dem pfat, durch den walt;

4990 sîn sorge was vil manicvalt.

dô nam er ûz der taschen sîn

daz brôt und daz blüemelîn;

des süeze gap im guoten muot:

vür übeln smac was ez guot.

4995 ab dem brôte beiz er zehant;

sus warnet sich der wîgant

zuo der ängestlîchen nôt;

ez dûhte in ein vil reinez brôt,

wand imz sîn vrouwe hêt gegeben

5000 ze vristen an der nôt sîn leben;

ez gap im alsô grôze maht

daz er vrôlîche vaht.

ditz was vil nâhen bî der naht.

Sus reit er einen berc setal.

5005 dâ hôrte er mangen grôzen val

von den starken esten;

die boume begunden bresten

dâ der wurm hin sleif;

swaz er mit dem zagel begreif,

5010 daz brach er allez nâch im nider;

sîner sterke was niht wider.

vil schiere sach der küene man

den ungevüegen wurm Pfetân

vor im eislîche gên.

5015 er gedâhte ‘und sol ich dich bestên,

daz ịst mir ein ängestlîchiu nôt! —

waz dar umbe, lige ich tôt?’

des hêt er sich vil schiere bewegen;

vür sich tet er den gotes segen

5020 dô er den wurm rehte ersach;

in sînem herzen er des jach

daz sô ungehiure

deheine crêâtiure

ie gesæhe dehein man.

5025 ich sagiu wie er was getân,

als er sît selbe jach

der in bescheidenlîche sach:

sîn houbt was âne mâze grôz,

swarz, rûch; sîn snabel blôz,

5030 eins klâfters lanc, wol ellen breit,

vor gespitzet, unde sneit

als ein niuwesliffen sper;

in sînem giele hêt er

lange zene als ein swîn;

5035 breite schuopen hürnîn

wâren an im über al;

von dem houbet hin ze tal

stuont ûf im ein scharfer grât,

als der kokodrille hât,

5040 dâ er die kiele kliubet mit;

der wurm hêt nâch wurmes sit

einen zagel langen;

dâ mit hêt er bevangen

vier rîter lussam,

5045 die er vor dem walde nam,

als im diu vrouwe hêt geseit

durch die er nâch dem wurme reit.

vil kûme hêten si ir leben;

der zagel was umb si gegeben

5050 wol mit drin valten;

sus hêt er si behalten,

als er si ezzen wolde.

ern trûwẹt niht daz er solde

sterben von deheinem man.

5055 einen kamp hêt ẹr als ein han,

wan daz er ungevüege was;

sîn bûch was grüene alsam ein gras,

diu ougen rôt, sîn sîte gel;

der wurm der was sinwel

5060 als ein kerze hin zetal;

sîn scharfer grât der was val;

zwei ôren hêt er als ein mûl;

sîn âtem stanc, wand er was vûl,

wirs dan ein âs daz lange zît

5065 an der heizen sunnen lît;

ouch hêt er vil unsüeze

als ein grîfe vüeze,

die wâren rûch als ein ber;

zwei schœniu vetichẹ ḥêt er

5070 gelîch eins pfâwen gevider;

sîn hals was im vil nider

gebogen ûf daz grüene gras;

sîn drozze gar von knurren was,

als ein steinbockes horn.

5075 von im was manic lîp verlorn;

ouch muos er den tôt dâ korn.

Als er den wurm rehte ersach,

dô blihter ûf unde sprach

‘nu hilf, keiser, herre got,

5080 daz mich dirre tievels bot

iht scheide von dem lîbe,

daz ich dem süezen wîbe

erledigẹ ir gesellen.

du solt den tievel vellen,

5085 wand er der werlte schaden tuot.’

der segen gap im vesten muot

zuo der ängestlîchen nôt.

sus kêrtẹ der riter in den tôt

gegẹn dem wurme vreissam;

5090 mit beiden handen er dô nam

die glävîẹ, wan si was starc;

dô truoc in sîn schœne marc

ûf den wurm dâ er gie;

die glävîe er sîgen lie

5095 daz sîn der wurm niht ensach;

durch sîn herze er im stach

den schaft unz an die hant gar

ê er des mannes würde gewar:

sô snellîche kom er dar.

5100 Als er des stiches dâ enpfant,

dô begunder lüewen sâ zehant

daz der walt al erhal.

sich huop dâ manic grôzer val

von den starken esten;

5105 die boume begunden bresten

dâ der wurm nâch im sluoc;

sîn snellez ors in danne truoc.

die vier gesellen liez er dâ;

nâch dem rîter kêrter sâ

5110 und hêt in harte schiere ervarn;

sîn kraft moht in des niht bewarn

ern zarte im abe ḍạz îsen;

die ringe begunden rîsen

als ez wære ein dürrez strô;

5115 dem edeln rîter nam er dô

sîne kraft und sînen sin;

alsô töunde druhte er in

daz im daz bluot zer nase dranc

und ouch zen ôren ûz spranc;

5120 sus warf er in als einen bal

eine rise hin zetal;

dâ belac er bî dem breiten sê.

owê, jâmer und owê,

daz er sô jæmerlîche lac

5125 des herzẹ ie niwan tugent pflac!

er hêt daz swert in sîner hant;

beidiu schilt und îsengwant

wâren an im zedrücket.

sîn leben hêt gezücket

5130 der tôt vil nâch mit jâmer hin:

âne maht und âne sin

belac der rîter mit dem rade

ûf des breiten sêwes stade.

ouch was der übel wurm tôt,

5135 von dem daz lant grôze nôt

hêt gehabet mangen tac.

daz schœne ros ouch bî im lac

zezerret und zebrochen;

sus hêt er sich gerochen;

5140 ouch lac er dâ erstochen.

Als ich iu ê gesaget hân,

diu vrouwe diu kâ klagte ir man,

der was ir gesinde komen;

daz hêt ouch si zuo zir genomen

5145 und îltẹ dem pfade balde nâch.

zir gesellen was ir gâch

daz si den tôt mit im dâ kür:

dâ hêt si niht die werlt vür

genomen gar vür eigen;

5150 si mohte lihte erzeigen

got ir herze und ir muot,

wand er übel unde guot

erkennet ê dan ez geschiht;

vor den werken er wol siht

5155 swaz daz mensche tuon wil;

sînem gewalte ist niht ze vil.

er reiner got bekande wol

daz ir herzẹ was triuwen vol,

wand im triuwe liep ist;

5160 dô liez er si in kurzer vrist

vinden ir vil lieben man.

dâ hêt er wunder an getân

daz er sîn leben ie behielt,

sô vaste sô der wurm vielt

5165 umb in sînen starken zagel.

er druhte nider als der hagel

allez daz er begreif,

swâ der wurm hin sleif.

owê der jæmerlîchen nôt!

5170 die drîe gesellen wâren tôt

und lâgen bî im nâhen.

dô si die rîter sâhen

die ir mâge wâren,

dô begundes sô gebâren

5175 daz ez was zerbarmen.

diu vrouwẹ mit beiden armen

ir gesellen umbe vie.

si sprach ‘lieber herre, wie

gehabt ir iuch? mugt ir genesen?’

5180 ‘jâ, wil mir got gnædic wesen, ’

sprach der halptôte man,

‘ân den ich niht genesen kan,

sô trûwe ich wol mîn werde rât.

ein rîter mich erledịget hât

5185 und dise tôten drîe;

mit einer glävîe

sluoc er in daz ichz sach;

grœzer liep mir nie geschach,

wand ich was et vil nâch tôt.’

5190 dô wart [dâ] vil manic ouge rôt

vor vreuden und vor leide,

wan si tâten beide,

si lachten unde weinden, —

mit vreuden si daz meinden —

5195 daz ir herre was genesen;

dâ wider muosens alle wesen

trûric von den tôten;

daz si sô unverschrôten

âne wer verlurn ir lîp,

5200 daz klaget man unde wîp.

deiswâr, si wâren klägelîch;

geburt unde guotes rîch;

des alles wâren si gelîch.

Diu vrouwe ir gesellen nam.

5205 als ez ir êren wol gezam,

die tôten hiez si bâren

die mit ir dâ wâren

ûf diu ros, und vuorte hin

beidiu vlust und gewin:

5210 die rîter hêt si dâ verlorn;

dâ wider hêt si ir erkorn

daz ze gwinne dazs ir man

lendigen wider gwan

den der wurm hêt hin getragen.

5215 vor vreuden wolde si niht klagen.

die rîter kêrten balde

mit jâmer ûz dem walde

gegẹn des herren veste.

dâne was dehein gebreste

5220 êren noch des guotes.

diu vrouwe was ir muotes

rîche alsam der tac

daz daz hûs sô nâhen lac,

in einer halben mîle.

5225 in vil kurzer wîle

kômens vür daz bürgetor;

dâ was michel jâmer vor

und von klage grôzer braht.

innen des hêt diu naht

5230 den tac gar verdrungen.

si dûhte in wære gelungen

daz sị ir herren brâhten wider.

von den rossen huop man nider

die drîe tôten sâ zehant;

5235 vil grôze klage man dâ vant

under dem gesinde;

ir jâmer wart vil swinde

die ir mâge wâren;

die tôten ûf den bâren

5240 truoc man zuo der wahte.

salben manger slahte

hiez ir diu vrouwe gwinnen;

sus vuorte si mit minnen

ir gesellẹn an guot gemach,

5245 dâ im allez guot geschach.

diu vrouwe ersûfte unde sprach

Her [re] geselle, du solt mir sagen

ob der wurm sî erslagen.’

‘jâ, benamen, wand ich ḍạz sach

5250 daz ein rîter durch in stach

und daz sîn lût sô vaste schal

daz ez durch den walt hal.

ouch liez er uns vallen dâ;

nâch dem rîter kêrter sâ;

5255 ich weiz wol si sint beidiu tôt.’

‘owê danne! sô wær mîn nôt

und mîn klage geniuwet;

sîn lîp mich immer riuwet,

wand er iuch erlôste,

5260 herre, mir ze trôste.’

si sprach ‘herre, hât er den lîp

verloren umḅ mich armez wîp,

sô wær ich bezzer ungeborn.

der herre sprach ‘lâ dînen zorn

5265 und dîn ungemüete:

waz ob diu gotes güete

in durch sîne triuwe ernert?’

diu vrouwe sprach ‘der mir ervert

ob der selbe rîter lebe,

5270 der hât immer mîne gebe! ’

si hêt an guote grôze kraft,

wande sị eine grâfschaft

hêt in dem lande;

ir namen man erkande

5275 in dem lande verre.

Morâl hiez der herre;

an sîner [gẹ]bürte was er grôz,

vil wol der vürsten genôz;

guoter bürge hêt er drî.

5280 disiu lac sô nâhen bî

dem sêwe daz er rehte vür

der vrouwen kemenâten tür

sluoc, als ez wint was.

dar ûz wâren an daz gras

5285 gegangen sehs vrouwen

zuo dem sêwe schouwen.

der mâne lûterlîche schein.

nu sâhen si wâ vor in ein

schiffelîn vlôz ûf dem sê;

5290 dar an was niht liute mê

niwan ein wîp und ir man;

den lac grôziu armuot an;

si hêten sehs kindelîn;

deste spâter muosens sîn

5295 nâch ir gewerfte ûf den sê;

geltes hêten si niht mê

niwan ein schif daz si truoc;

als in ir dinc ze heile sluoc,

sô bejagten si vil kûme ir brôt;

5300 der hunger tet in grôze nôt;

ditze was gar ir genist.

nu lie si unser herre Krist

ze trôste dẹn armen kinden

des selben nahtes vinden

5305 dâ von ir armuot zergie.

got der was erbarmic ie;

daz erzeiget er an manger stet,

wan swer mit lûterm gebet

an in genâde suochet,

5310 sîn barmunge in beruochet,

als wirz an den buochen lesen;

ern welle uns genædic wesen,

unsẹr einer möhte niht genesen.

Sus liez er sich erbarmen

5315 die selben gotes armen

und wîste sị zuo des sêwes stade,

dâ der rîter mit dem rade

lac als ein tôter man;

nâch grase wolde er ûz gân,

5320 und vant in alsô ligen dâ;

sînem wîbe wincter sâ.

er sprach ‘hœre her ze mir:

ein wunder wil ich zeigen dir;

nu sich, hie lît ein tôter man;

5325 der hât den besten harnasch an

den ich ie mê gesach.’

daz wîp zuo dem manne sprach

‘geselle, lâ dîn grasen sîn;

hie mit suln unser kindelîn

5330 werden wol berâten.’

ich sagiu wie sim tâten:

sin houbt daz was gekêret nider;

daz rihten si ze berge wider;

von bluote wârn die riemen

5335 sô herte daz si niemen

wol entstricken mohte;

dô in daz niene tohte,

dô begunden sị si snîden.

daz er daz muose lîden

5340 daz im ein man und ein wîp

alsô entnacten sînen lîp,

daz möhte got erbarmen.

si zugẹn im von den armen

harnasch unde wâfenroc.

5345 sus lac er stille alsam ein stoc

mit bluote gar berunnen;

und hêt er sich versunnen,

sô wære ez im beliben dâ.

daz wîp ersach den gürtel sâ;

5350 der vreute harte sêre ir muot,

wand er dûhte et si vil guot;

vor dem manne si in stal;

zesamne want sin als ein bal

daz si ins niht sehen liez;

5355 in ir biutel si in stiez.

owê, daz ez ie geschach

daz dehein wîp sô swach

den gürtel in ir hant genam!

dem andern tâten si alsam;

5360 sus entnacten si in gar.

nu nemt, ir guoten liute, war

wie jæmerlîch der rîter lac:

im was naht unde tac

allez ungemeine;

5365 sîn leben daz was kleine;

iedoch was im der lîp warm.

innen des zôch er den arm

nâher zuo dem lîbe baz;

daz übel wîp ervorhte daz.

5370 si sprach ‘nu sich, lieber man,

got hât wol zuns getân

mit dirre grôzen richeit;

nu sî dir daz vür wâr geseit

und lebt er unz an den tac,

5375 daz ez uns wol geschaden mac;

wir suln in baz tœten.’

‘des soltu mich niht nœten’

sprach der vil getriuwe man,

‘wand er doch niht genesen kan.’

5380 ‘zwâre er tuot! ’ er sprach ‘niht! ’

‘woch, ez dûhtẹ dich ie enwiht

swaz ich guotes ie getet.’

den rîter nam si an der stet

bî dem hâre und zôch in

5385 gegẹn dem breiten sêwe hin

als sị in wolde ertrenken.

er sprach ‘mahtu gedenken,

sælic wîp, hin ze got?

nu was doch daz von sîm gebot

5390 daz daz schiffelin hie her stiez.’

daz übel wîp er niht enliez

dem rîter nemen sînen lîp.

ez ist ouch noch ein übel wîp

wirser danne dehein man,

5395 wan si niht bedenken kan

waz ir dar nâch kümftic sî.

diu edeln wîp diu sint vrî

alles übels, daz weiz ich wol:

ir reiniu herzẹ sint güete vol.

5400 wol in der daz verdienen kan

daz in ein edliu vrouwe an

niwan güetlîche siht;

erwirbet er dâ anders niht,

sô vreut ez in doch verre baz

5405 danne ob er verdienet daz,

daz im ein unedel wîp

gæbe guot unde lîp:

swem si vreude wellent geben

der mac wol deste gerner leben;

5410 dâ von man die vrouwen sol

âne mâze haben wol;

ir lôn daz gît vil süezen zol.

Ditz was dem hûs sô nâhen

daz die vrouwen sâhen

5415 den halsberc wîzen

und den helm glîzen

gegẹn dem mânen dâ er schein.

nu was der sehs vrouwen ein

gegangen dar dâ si wol sach

5420 swaz man dâ tet unde sprach.

ich hân oft vernomen daz,

daz man ûf dem wazzer baz

verrer hœrẹ dan anderswâ;

alsô tet diu vrouwe dâ.

5425 si sach wol daz daz übel wîp

dem rîtẹr entnacte sînen lîp

alsô gar daz dehein

vadem an sîm lîbe schein;

sus lac er sinne und guotes blôz;

5430 ern schamte sich niht hâres grôz,

wand ern hôrte noch ensach

swaz im leides dâ geschach.

nu sach daz herze übel wîp

daz sîn wünniclîcher lîp

5435 sûberlîch und süeze was;

vür in kniete sị ûf daz gras

und nam sînes lîbes war;

dô was er ze wunsche gar

wol geschicket über al;

5440 sîn hâr was reit unde val,

sîn lîp wîz alsam ein snê.

dô ersûfte si und sprach ‘owê,

ditz ist der aller schœnste man

des ich künde ie gewan!

5445 mich wundert waz im sî geschehen;

in hât niwan der wurm ersehen;

an des weide ist er komen;

der hât ouch im den lîp benomen,

wan swaz dem lendes widervert,

5450 daz ist benamen unernert.

ditz möhte wol ein vürste sîn;

daz ist an sînem wâfen schîn,

wan daz ist von golde gar.’

mit ir goufen truoc si dar

5455 des wazzers unde gôz im in;

vil lützel maht âne sin

enpfie der edel rîter dâ.

der gebûr rief dem wîbe sâ;

er sprach ‘nu trac den harnasch an:

5460 wir suln von dem walde dan

balde varn ê ez tage.’

dô schiet daz wîp mit grôzer klage

von dem schœnen lîbe.

dem vil übeln wîbe

5465 gap diu minne guoten muot,

als si noch vil mangem tuot,

wan si dem kucte sîn leben

dem si den tôt ê wolde geben;

daz machet sîn vil süezer lîp.

5470 ich hœre sagen daz diu wîp

nâch grôzer ungüete

vil snelle guot gemüete

gevâhent von der minne;

als ich mich versinne,

5475 sô ist mit in daz beste leben

daz got der werlte hât gegeben.

diu reinen wîp sint alle guot;

si gebent ofte guoten muot

dem der nâch ir willen tuot.

5480 In disen sorgen vuorens dan,

daz übel wîp und ir man,

wie si ir vunt sô bræhten dar

daz sîn niemen würde gewar

vür daz hûs in sînen glêt,

5485 den er dâ geziunet hêt

mit rôre und mit rîse.

sus vluzzen si vil lîse

unz si ze stade kâmen.

den harnasch si dô nâmen

5490 und truogen in in ir gemach.

der vrouwen einiu daz ersach,

wand ez was bî ir nâhen.

si begunde dar gâhen

und luoget durch den zûn dar in;

5495 dô sach si allen ir gewin:

helm, schilt und îsengwant;

ein vackel wart ûf gebrant;

dâ bî kosten si ir vunt,

der was bezzer danne tûsent pfunt,

5500 von golde und von gesteine.

ir angest diu was kleine:

si wândenz hân verborgen;

dô kom ez in ze sorgen

daz ez diu vrouwe hêt ersehen.

5505 ein man sol ê vil rehte erspehen

daz sîn iemen werde gewar,

ê er mit tougen dingen dar

komẹ dâz im geschaden mac;

ditz ist mîn sit des ich ie pflac.

5510 diu vrouwe nam sîn rehte war

unz si ersach diu wâfen gar.

dô kom ein hunt und bal si an;

zir gespiln vlôch si dan.

ditz was wol umbe mitte naht.

5515 der vrouwen einiu sprach ‘nu maht

dụ uns sagen: wâ wær du hin?

dunkẹt dich daz ein guot sin

daz du eine von uns gêst?

ez kumt vil lîhtẹ daz du bestêst

5520 alle dîne unêre dâ.’

si sprach ‘vrouwe, die rede lâ:

ich was niwan zuo dem sê.’

‘nu sich, daz ez dir immer mê

geschehe! dạz wil ich râten dir.

5525 ir vrouwen, ez ist zît daz wir

gên ze kemenâten.’

vil lîse si dô trâten

und giengen zuo ir vrouwen sâ.

diu saz mit grôzer klage dâ

5530 bî ịr vriunde; dér gehabt sich wol;

ir herze was ab leides vol

umb den rîter, der sîn leben

durch si dem tôde hêt gegeben.

si sprach ‘ich sol den rîter klagen,

5535 wand er durch mich hât erslagen

und durch sîne manheit

den wurm, der vil grôziu leit

disem lande hât getân.

beidiu wîp unde man

5540 die sîn des tages immer vrô

daz si unser herre alsô

von dem wurme erledịget hât;

ez ist mîn bet und ouch mîn rât,

als man sich des tagẹs enstê,

5545 daz daz lantvolc allez gê

mit ir kriuze in den walt

und loben in des gewalt

unde des vil süezer trôst

si von dem tievel hât erlôst;

5550 sô wil ouch ich den selben man

mit allen den die ich hân

suochen der ez hât getân.

Sîn ors was guot daz er reit;

sîn schœner lîp [der] was gekleit

5555 mit einem halsbergẹ der was wîz;

an sînem helmẹ lac grôzer vlîz

von gesteine und von golde

geworht als er wolde;

enmitten ûf dem helme ein rat;

5560 daz lief umbe an der stat

als er buhurdierte;

ein rîcher zobel [der] zierte

den liehten helm über al;

von golde ein lîste niht ze smal

5565 lac im ob den ougen;

dar under was vil tougen

der helm lûter als ein glas;

von genageltem pfelle was

sîn wâfenroc, daz marhte ich wol;

5570 sîn schilt [was] swarz alsam ein kol,

dar ûffe ein rat von golde.

ob ich wünschen solde

einen rîter im gelîchen,

alsô tugentrîchen,

5575 daz enmöhte weizgot niht geschehen;

dâ von wil ich im jehen

[des] prîses vür allẹ diech ie gesach:

er was ein krône und ein dach

rehter rîterschefte,

5580 wand er mit sîner krefte

und mit sîner manheit

allez disse landes leit

ze vreuden hât gemachet,

daz manic herze lachet

5585 dem der übel wurm Pfetân

ofte leide hât getân

an vriunden und an guote.

nu haben in ir huote

alle die mich minnen

5590 daz si mir gewinnen

doch den lîp, ob er nicht lebe;

dar umb enpfâhet ir die gebe

daz iu nie deheiner vart

alsô wol gelônet wart.

5595 michn triegen dannẹ die sinne mîn,

sô mohtez wol ein rîter sîn

von der tavelrunde,

wand ich zeiner stunde

der selben rîter einen sach

5600 daz er wol hundert sper zebrach

und zwelf vrume rîter vie;

bezzer rîter wurden nie

dan die selben rîter sint;

bî den zîten was ich ein kint

5605 dô ich den selben rîter sach,

wan diu rîterschaft geschach

vor mînes vater hûse;

von dem künịge Artûse

kom er dar durch rîterschaft;

5610 er hêt ellen unde kraft

und hiez der herre Gâwein;

an sînem schilte was ein

guldîn tavelrunde

geworht daz niemen kunde

5615 ein gewæfen dem gelîche

vinden alsô rîche;

dar inne was, geloubet mirz,

von krîden gemâlt ein wîzer hirz

ûf einem berge guldîn:

5620 daz selbe wâfen daz was sîn

der die rîter alle vie;

diu tavel diu dar umbe gie

die nevuorte dehein man,

als ichz vernomen hân,

5625 wan der mit grôzer arbeit

und mit sîner manheit

die stat hêt errungen;

swem sô was gelungen,

der vuortẹ die tavelrunde

5630 daz man dâ bî kunde

sehen unde wizzen daz

er zer tavelrunde saz;

daz selbe wâfen ich wol sach,

dô mir daz herzeleit geschach,

5635 an des rîters schilte,

den des niht bevilte

ern rit durch mich in den tôt.

ob ich den klage, des gêt mir nôt,

wand er iuch, herre, erlôste

5640 uns allen ze trôste.

ich hêt mich iuwer gar bewegen;

niwan durch den selben degen

ir wært benamẹn dâ tôt gelegen.’

Daz diu vrouwe hêt gesaget,

5645 daz marhte diu vil schœne maget,

wan si daz ersehen hêt

dâ man ez truoc in den glêt,

helm, schilt und isengwant.

ûf stuont diu maget sâ zehant;

5650 vür ir vrouwen kniete sị dô

vil gezogenlîche und sprach alsô

‘genâde, liebiu vrouwe mîn!

sol daz in iuwern hulden sîn

und mac ich sîn geniezen,

5655 sô wil ich iu entsliezen

ein verholnez mære,

dâ mit sich iuwer swære

vil lîhte verendet.

vrouwe, nu sendet

5660 mit mir einen boten dar.’

diu vrouwe sprach ‘nu sage, war?’

si sprach ‘vrouwe, an eine stat

dâ den helm und daz rat

hât verborgẹn ein armer man.

5665 als ichz von iu vernomen hân,

sô ist ez rehte’ sprach diu maget

‘als ir uns allen hât gesaget.’

‘sô dir got, hâst du wâr?’

‘zwâre, vrouwe, ich sach ez gar,

5670 helm, schilt und îsengwant.’

diu vrouwe sprach ‘ist dir bekant

ob der rîter ouch dâ sî?’

‘vrouwe, ich sach dâ niemen bî,

niwan ein wîp und ir man.’

5675 diu vrouwe sprach ‘nû wol dan,

rîter unde vrouwen!

ich wil die wârheit schouwen

wâ der harnasch sî genomen.’

si sprach ‘vrouwe, ich sach si komen

5680 in einem schiffe über ḍẹn sê.

ichn kan iu niht gesagen mê

wan daz sin truogen in den glêt

der bî uns hie nâhen stêt;

des nam ich alles rehte war.’

5685 diu vrouwe sprach ‘nu wîsẹ mich dar.’

sus stuont si ûf und gie dan.

dô vunden si den armen man

sitzen bî sînem viure.

gnâde was im tiure,

5690 dar zuo sælde unde guot;

ez hêt diu grôze armuot

zuo im gehûset in den glêt,

dâ selten vreude bî bestêt:

diu armuot mit jâmer lît,

5695 diu rîcheit niwan vreude gît.

dô saz er und betrahte

wie er sô manger slahte

gezierde von golde

sô verkoufen solde

5700 daz sîn niemen würde gewar.

innen des dô kômen dar

die vrouwen alle vür den glêt,

den er vil vaste beslozzen hêt.

diu vrouwe sprach ‘tuo ûf die tür!’

5705 der arme man sprach her vür

‘herre got, waz sol daz sîn?’

diu vrouwe sprach ‘lâ mich dar în,

od du verliust dînen lîp.’

nu erkande sị wol daz arme wîp.

5710 si sprach ‘ez ist mîn vrouwe.

lieber man, nu schouwe

wie wir sîn verrâten.’

die tür si ûf tâten

und erschrihten hârte sêrẹ dâ von,

5715 wan si wârn des ungewon

daz si sô spâte iht gienge dâ.

diu vrouwe sprach zem manne sâ

‘lieber man, nu tuo durch mich,

dar umbe wil ich rîchen dich,

5720 eine sache der ich dich bit;

dâ verdienstu benamen mit

daz dir immer vrumen muoz.’

der vrouwen viel er vür den vuoz

und sprach ‘gebietet über mich:

5725 swaz ir gebietet daz tuon ich.’

diu vrouwe hiez in ûf stân.

si sprach ‘du solt mich sehen lân

den schilt und daz îsengwant;

dar umbe wil ich dir zehant

5730 beidiu lîhen unde geben

daz du mit vreuden wol maht leben.’

des begunde er ir genâde sagen.

daz îsengwant wart getragen

vür die edeln vrouwen dô.

5735 si sprach ‘nu wolde ich wesen vrô

der mir saget mære

wâ der rîter wære

des der harnasch ist gewesen;

wesse ich ob er wære genesen,

5740 sô wær mîn leit verendet.’

er sprach ‘vrouwe, nu sendet

mit mir iuwern boten dan,

und welt ir michs geniezen lân,

sô zeige ich iu den selben man.’

5745 Diu vrouwe sprach ‘entriuwen, jâ.’

dô gap sị im mit vreuden dâ

drîzic huobe zeigen

und hiez im ûz zeigen

daz beste hûs, als er si bat,

5750 daz inder stuont in der stat.

sus gwan der arme rîchen muot,

sælde, sin unde guot.

dô vrâget mich mîn kranker sin, —

des ich gar âne zwivel bin —

5755 ‘sag an, Wirnt, ist daz wâr:

mac iemen âne guot gar

al der werlt genæme sîn?’

des antwurt ich dem sinne mîn

‘zwâre, jâ! des dunket mich.’

5760 ‘entriuwen, anders wæne ab ich;

waz vrumt dir lîp unde muot,

bistu gar âne guot?’

‘nu hœre, daz wil ich dir sagen

wie ich ir minne wil bejagen:

5765 ich wil zuo den besten gên

und wil mit mîner kunst begên

und mit mînen zühten daz,

daz ich in gevalle baz

danne ein guotes rîcher man

5770 der deheiner slahte vuoge kan.’

‘daz lâ sîn’ sprach der sin.

‘sît ich dir sô nütze bin,

ich vrum dir als ich beste kan;

dân gezwivel nimmer an.’

5775 der rede wart ich harte vrô

und behabte iedoch den strît alsô

daz werder ist ein sinnic man

dem der in erkennen kan

danne ein man der allen rât

5780 âne ganze sinne hât;

die rede ir mich niht liegen lât.

Der vrouwen was zer verte ger.

si sprach ‘nu brinc balde her

ein schif daz uns alle trage.’

5785 diu naht entweich dem liehten tage,

wand er schône ûf gie.

den harnasch si zem hûse lie

ir rîtern und ir vrouwen;

dô begunden si in schouwen.

5790 sus vuor si von dem hûse dan.

Gwîgâlois, der arme man,

der hêt sich ûf gerihtet.

sîn hâr was ungeslihtet,

bluotic und zeworren.

5795 an einen dürren storren

leinẹt er sich biz er bekam.

michel wunder in des nam

wie er dar komen wære

gewandes alsô lære.

5800 dô er sich alsô nacket sach,

wider sich selben er dô sprach

Gwîgâlois, mahtu mir sagen:

waz wunders hât dich her getragen

od wie stêt dîn dinc alsô?

5805 deiswâr, gestuont dîn herze ie hô

von minnen, ode wurd ie rîch,

dem bistu leider ungelîch.

allez mîn leben ist ein troum.

ich bin gesetzẹt an disen boum

5810 rehte als ich wilde sî.

herre got, nu wis mir bî!

des bit ich dich durch dînen tôt:

ichn kom nie in sô grôze nôt!

ob ich mich reht versinne,

5815 sô was diu küniginne

min muoter, von Syrîe

diu süeze Flôrîe.

mîn œheim hiez Jôram,

der ze Karidôl nam

5820 den rîtern allen dâ ir prîs;

er was starc unde wîs.

mîn vater hiez her Gâwein

und was der besten rîter ein,

als mir der schœne man jach

5825 den ich zer âventiure sach.

Lârîe hiez diu vrouwe mîn;

durch der schœne woldich sîn

und durch ir lant tôt gelegen;

des hêt ich mich vil gar bewegen

5830 zer grôzen âventiure.

nû bin ich ungehiure.

waz touc diu rede? si ịst enwiht.

Gwîgâlois heize ich niht;

ich bin et sus ein armman

5835 und sol bûwen disen tan

als mîn vater hât getân.’

Sus hêt er verzwîvelt gar

daz sîner [gẹ]tæte iht wære wâr

od daz er ie würde rîch,

5840 wan dem saz er ungelîch.

vil schône schein der liehte tac.

nu sach er wâ bî im lac

diu tiure tasche pfellîn

die im diu liebe vrouwe sîn

5845 gap ze stiure in den tôt;

dar inne lac daz reine brôt

verborgen und der süeze bluot.

des wart er vrô und dûhte in guot

daz im iht beliben was;

5850 nider greif er ûf daz gras

und nam die taschen in die hant.

mit jâmer wart er dô ermant

der schœnen magt Lârien.

‘owê’ begunder schrîen

5855 ‘daz ich ie wart geborn!

nu hân ich guot und sin verlorn;

dar zuo lîd ich den gotes zorn.’

Ditz jæmerlîche wort ‘owê’

erhôrtẹ diu vrouwe ûf dem sê,

5860 wand ẹz nâhen bî ir geschach.

zuo dem manne si dô sprach

‘lieber man, du solt mir sagen,

eine stimme hœre ich hie klagen,

ob du wizzest wâ ez sî.’

5865 ‘vrouwe, ẹz ist hie nâhen bî,

dâ ich den tôten rîter liez.’

daz schif dô zuo dem stade stiez

in eine grôze wilde.

dâ was dehein gevilde

5870 niwan berge unde tal,

mit starken boumen über al

bewahsen und vervallen.

mit ir gesellen allen

diu vrouwe ûz dem schiffe gie.

5875 vil grôzer jâmer si gevie

daz si den rîter alsô vant.

diu scham hiez in sâ zehant

von den liuten vliehen.

dô begunde in nider ziehen

5880 sînes lîbes siecheit.

diu scham in dô des überstreit

daz er von den liuten lief.

diu vrouwe im dô nâch rief.

si sprach ‘herre, wâ welt ir hin?

5885 gewunnet ir ie guoten sin,

deiswâr, dem tuot ir ungelîch.

nu kêret widèr: ich mache iuch rîch;

alles des ir an mich gert

des sît benamen von mir gewert.

5890 ich sihe wol daz iu wê tuot

diu scham [und] iuwer armuot

und iuwers lîbes siecheit.

ich wil mit triuwen iuwer leit

wenden, swâ ich mac, zehant.

5895 iuwer schœne îsengwant

daz ist gevüeret von dem wege;

ich hân ez allez in mîner pflege,

als ich iuz behalten hân.

sît got sô wol hât getân

5900 daz ir, herre, genesen sît,

ir sult ez haben âne strit.

nu kêret wider, rîter guot,

wand iuwer tugenthafter muot

und iuwer grôziu manheit

5905 die nâmen mir min herzeleit

und gâben mir vreude wider.

dô ich mit grôzem jâmer nider

was gevallen ûf daz gras,

als mir mîn vriunt gezücket was,

5910 dô kômet ir und trôstẹt mich.

diu selbe vrouwe bin ich

dịẹ ir dâ vundet mit grôzer klage.

ir sult gelouben daz ich iu sage:

ich tuon allez daz ir welt.’

5915 alrêrst bekande sich der helt

und gedâhte ir leides harte wol.

diu scham treip in in ein hol

dâ vor grôz gerüne was;

beidiu mies unde gras

5920 brach er vür sînen lîp.

dô rief im aber daz reine wîp,

wan der walt was sô grôz

daz si ir suochens niht genôz

si sprach ‘herre, sît ir guot

5925 od gwunnet ir ie guoten muot

von deheinem reinen wîbe,

sô lât iuwerm lîbe

bieten gemach und êre.’

dône barc er sich niht mêre;

5930 er lie sich alsô nacket sehen.

daz wære weizgot niht geschehen,

wan durch sîne vrouwen.

alsus liez er sich schouwen:

die sîte kêrte er gegẹn ir dar,

5935 daz si dâ bî næme war

daz im diu scham wê tet.

einen pelz zôch si an der stet

ab ir, der was lûter grâ;

den sande si dem rîter dâ;

5940 hie mit kleite er sich sâ.

Als er bedahte sînen lîp,

dô gie gegẹn im daz reine wîp.

vil minniclîch enpfie si in

und leite in an daz schif hin.

5945 si sprach ‘lieber herre mîn,

ir sult mir willekomen sîn

hie in disem lande.

ich weiz wol iu ist ande

iuwer grôziu armuot;

5950 gehabt iuch wol: ich gibiu guot

und schaffe iu solhen gemach

daz iu nie baz geschach,

ob irz von mir nemen welt.’

‘vil gerne, vrouwe’ sprach der helt.

5955 im was gemaches harte nôt.

in hêt vil nâch der bitter tôt

mit sîner kraft gezücket hin.

dô hêt er maht unde sin,

sô daz er sich wol versan.

5960 mit der vrouwen vuor er dan

ûf ir hûs an guot gemach,

dâ im allez guot geschach.

der wirt selbe gegẹn im gie.

vil minniclîche er in enpfie,

5965 dar nâch daz liut über al.

sich huop dâ ein vil grôzer schal

und gedranc von dem gesinde.

diu wîp mit ir kinde

diu liefen ûz der stat dar

5970 und nâmen des rîters war,

der den wurm hêt erslagen.

si begunden im genâde sagen

und danken sîner manheit.

dô badet man ịn, und wart gekleit

5975 dar nâch mit sô rîcher wât

daz diu werlt niht bezzers hât.

diu vrouwe hiez in mit ir gân

in eine kemenâten dan,

dâ im allez guot geschach.

5980 an disen dingen er wol sach

daz si ịn mit triuwen meinde

als si im wol bescheinde,

wan si ịn mit willen werte

swes er an si gerte.

5985 ouch was er sô bescheiden daz

er niht gerte vürbaz

noch von niemen niht des nam

des im ze nemen niht gezam;

des was geprîset ie sîn nam.

5990 Dô er guot gemach dâ vant

und sînen siechtuom überwant,

des begunde er got genâde sagen,

dar under tougenlîche klagen

den gürtel und sîn îsengwant.

5995 er gedâhte ‘nû sol ich zehant

gegẹn der âventiure varn;

wâ mit sol ich mich bewarn

sît ich den gürtel han verlorn

den ich ze trôste hêt erkorn

6000 zallen mînen dingen?

noch muoz mir gelingen

zer selben âventiure;

sin ist nie sô ungehiure

ichn welle dâ tôt geligen,

6005 od mit der gotes kraft gesigen.

noch mac sîn alles werden rât.

ich weiz wol, swer den gürtel hât,

daz er mirs niht wider gît;

dâ von sol ich ze dirre zît

6010 niht vil dar nâch gevrâgen.

den lîp wil ich dâ wâgen

durch si, der mîn herze gert;

und gît man mir mîn schœnez swert,

ein ors und mîn îsengwant,

6015 sô wil ich rîten zehant

zer âventiure, swâ diu ist.’

nu kom diu vrouwe an der vrist

zuo im gegangen unde sprach, —

wande si wol an im sach

6020 daz sîn guot gemüete

vil grôziu swære müete;

daz siht ouch noch ein ieslîch man

mit lîhter kunst dem andern an

daz sîn herze swære treit,

6025 swen er in sîne hant leit

daz houbet und ẹz geneiget hât;

dar nâch gap si im rât

und trôst ze sîner swære —

si sprach ‘herre, wære

6030 iuwer herze und iuwer muot

dem gelîch als ir tuot,

daz wær mir inniclîche leit.

lieber herre mîn, nu seit

mir war umb ir trûric sît.’

6035 er sprach ‘vrouwe, dâ hân ich zît

zer âventiurẹ ze rîten.’

si sprach ‘welt ir da strîten?’

‘jâ, vrouwe, ich hâns gesworn.’

‘owê, sô sît ir verlorn.’

6040 ‘zwâre, vrouwe, nein ich,

und welt ir berâten mich,

sô wirt er strîtes von mir gwert.

wirt mir mîn harnasch und mîn swert

und ein guot ors gegeben,

6045 deiswâr, sô mac ich mîn leben

gerne wâgen ûf den trôst

daz daz lant werde erlôst,

ob ich dem heiden an gesige;

ist abe dạz ich dâ tôt gelige,

6050 sô ịst manic tiurre rîter tôt.

nu helft mir, vrouwe, zuo der nôt,

daz ich die âventiure

iht gar ân iuwer stiure

alsô vehten müeze;

6055 des suoche ich iuwer vüeze.

ir seht wol ich bin nacket gar,

iedoch wil ich benamen dar;

alsô bin ich ûz gevarn.’

‘herre, got müez iuch bewarn!

6060 des ist iu benamen nôt:

ir welt in den gewissen tôt.

sît ich iuch niht erwenden kan,

sô nemt ein ors daz ich hân,

bezzer danne hundert marc;

6065 daz ist schœne unde starc.

dar zuo gibe ich iu zehant

daz aller beste îsengwant

daz ie dẹhein keiser getruoc,

dar umbe Brîẹn Lâmêren sluoc

6070 an guoten triuwen dâ er lac.

des ist nû vil manic tac

daz ez mîn herre, [der] künc Jorêl,

mîṇẹm wirtẹ bevalch an sînẹ sêl

daz erz behielte unz an die zît

6075 swen sîn tohter würde gehît

zeinem biderben manne,

daz er den harnasch danne

im gæbe zẹ sînem lîbe.

er wart von einem wîbe

6080 verstoln einem getwerge

alrêrst ûz einem berge,

dâ ẹz in mit listen gar

hêt geworht wol drîzic jâr.

er ịst als ein hemde ringe,

6085 mit deheiner slahte dinge

mac man in zebrechen

noch dar durch gestechen.

welher handẹ der harnasch sî,

und wære er al der werlte bî,

6090 daz ẹz iemẹn errâte, des ịst er vrî.

Ich sagiu wie ịn Lâmêr gewan,

als ichz ê vernomen hân.

dô man im saget mære

daz der harnasch wære

6095 in dem lande ze Lîbîâ,

dar vuor er mit here sâ

und beroubet die stat und daz lant,

unz daz man im daz îsengwant

in sîn gezelt muose tragen.

6100 sît wart er darumb erslagen.

daz tet Brîẹn, der bruoder sîn.

dér brâht ez zuo Korntîn

Jorêl, dem lieben herren mîn.

Er bevalch ez mînem wirte hie.

6105 sît wart ez gezeiget nie

deheinem manne, geloubet daz.

nu hête wir michel reht, swaz

wir iuch möhten gêren

und iuwer liep gemêren,

6110 daz wir des niht enliezen.’

diu vrouwe hiez entsliezen

den sarbalc dâ er inne lac.

dô schut man ịn ûz an den tac.

als er den harnasch rehte ersach,

6115 zem reinen wîbe er dô sprach —

diu was ein bluome der güete,

ir herze in tugent blüete —

‘genâde, vrouwe, dirre gebe,

und wizzet, [daz] die wîle ich lebe,

6120 daz ich ez immer dienen wil;

dirre gebe ist mir ze vil.’

sînen harnasch truoc man dar.

der was zebrochen alsô gar

daz er im ze nihte entouc.

6125 daz reine wîp in niht betrouc

an disem, wan dehein man

bezzern harnasch nie gewan.

sînen halsberc liez er dâ;

in disen begunde in wâfen sâ

6130 der wirt und diu wirtin.

er sprach ‘herre, nu vüert ir hin

wæn ich in den gewissen tôt,

wan daz ir alle iuwer nôt

sô wol habt überwunden.’

6135 die vrouwen im dô bunden

die îsenhosen an diu bein.

sîn herzẹ was herte als ein stein,

wand ez nie dâ von erkam

swaz er untrôstes ie vernam.

6140 die zît hêt er dâ wol vertriben,

wand er die naht was dâ beliben.

nû was ditz an dem andern tage.

ob ir welt daz ich iu sage

wie ẹr zuo der âventiure rit,

6145 sô swîgẹt und hœrẹtz mit guotem sit.

als er wart gewâfent gar,

dô brâhtẹ man im den helm dar

mit dem rade guldîn;

den bant im ûf daz houbet sîn

6150 der wirt selbẹ mit sîner hant.

an ein sper man im dô bant

einen samît der was rôt;

daz bezeichent daz er in den tôt

des tages rîten solde.

6155 der wirt im dô wolde

gegeben hân ze stiure

zuo der âventiure

einen schilt von eines grîfen klâ.

den hiez er im behalten dâ;

6160 sînen schilt brâht man im sâ.

Den vuorte er durch diu mære

daz er ein rîter wære

von der tavelrunde,

daz man dâ bî kunde

6165 sehen unde wizzen daz

er zer tavelrunde saz.

sînen wâfenroc legte er an;

der was rîche und wol getân,

wan daz er was durchstochen

6170 und mangen endẹ zebrochen;

den vuorte der helt mêre

durch sîner vrouwen êre

danne durch sîn armuot;

er dûhte in bezzer danne guot.

6175 sîn swert striht im daz süeze wîp

vil heize weinde umḅ den lîp

und vlêget got vil tiure

daz er die âventiure

in dâ lieze erwerben,

6180 und daz in niht verderben

lieze diu gotes güete.

dehein ungeloube in müete

in dem hûsẹ noch ûf dem wege;

er liez ẹz allez an gotes pflege.

6185 swaz im des morgens wider lief

od swie vil diu krâ gerief,

swie vil der mûsære umbe gevlouc,

der ungeloube in niht betrouc,

wand er dâ niht ûf ahte

6190 wir hân nu manger slahte

bôsheit und gelouben,

dâ mit wir uns rouben

aller unser sælicheit:

ez ist vil mangem manne leit

6195 swen im ein wîp daz swert gît;

daz lie der rîter âne nît;

ern ahte dar ûf niht ein hâr,

ez wære gelogen ode wâr;

er hêt in gotes gnâde ergeben

6200 beidiu sêle unde leben.

swaz im des morgens wider gie,

dazn gevlôch der rîter nie,

wan guoten glouben hêt er ie.

Dô nam er urloup von in dâ.

6205 wirt und vrouwen neic er sâ

und gnâḍẹt in alles guotes,

der werke und ir muotes,

dar nâch dem [gẹ]sinde über al.

vil manic guot wunsch âne zal

6210 wart im gegeben an der stat.

daz liut im allez heiles bat

und segenten in in den tôt.

sîn dienst er dô in allen bôt

und bat den reinen wirt sâ

6215 daz er die glävîen dâ

bî dem wurme suochte

und sị im behalten ruochte

unz er dar wider kæme,

ob er den sic genæme

6220 zer selben âventiure.

dô gelobt der wirt vil tiure

daz er gerne tæte

swes er in gebæte.

diu vrouwe sprach ‘herre mîn,

6225 wir suln iu beidiu immer sîn

bereit unsers muotes,

lîbes unde guotes,

wand iuwer grôziu manheit

diu benam mir mîn herzeleit.

6230 dô ich in grôzem jâmer lac

und deheiner slahte vreude pflac,

dô kômet ir und trôstẹt mich;

dâ von ist michel reht daz ich

iu dienstes wes undertân

6235 swâ ich mac unde kan.

ouch bit wir iuch vil verre,

ob iuch unser herre

den sic lâze erwerben dâ,

daz ir dannẹ ḥer wider sâ

6240 an guot gemach rîtet

als ir dâ gestrîtet.’

er sprach ‘vrouwe, daz sî getân!

iuwer bet bin ich undertân

ob mir got des lîbes gan.’

6245 Sîn ors wart im gezogen dar;

daz was in einer varwe gar

rehte rôt als ein bluot;

dar ûf saz der rîter guot.

man reichte im schilt unde sper.

6250 von dem hûse kêrt er

eine strâze, diu was wol gebant;

diu solde in tragen in daz lant

ze Glois, dâ der heiden saz.

sîn manic [gẹ]müete vuocte im daz

6255 er die strâze übersach

einem stîge volgẹt er nâch

ûz gegen der linken hant,

der was grasic unde ungebant.

er truoc in verre in den walt,

6260 dâ manic boum was gevalt

und grôze ronen lâgen.

dô begunde in des betrâgen

daz er sîn ors allez zôch.

ze stîgen er die ronen vlôch.

6265 an ein wazzer er dô reit,

daz was tief und sô breit

daz niht vurtes dạrüber gie.

er gedâhte ‘herre got, wie

kum ich über ḍạz wazzer hie?’

6270 Sîn ors hafter vaste

zeinem starken aste,

wand ern mohtẹ niht vürbaz.

swie snel er wære, sîn gên was laz,

wand er muose sliefen dâ.

6275 nu sach er ûf dem wazzer sâ

vliezen einen kleinen vlôz,

den ein starkiu wide slôz

bî einem stecken zuo dem stade;

dar kom der rîter mit dem rade

6280 von des waldes enge

gesloffen durch gedrenge.

er nam den vlôz un zôch in dan

dâ er sîn ors hêt lâzen stân.

nu was bî im ein holer stein.

6285 ûz dem hole sach er ein

wîp gegẹn im loufen dar,

diu was in einer varwe gar

swarz, rûch als ein ber.

vil grôziu schœne was der

6290 und guot gebærde tiure,

wan si was ungehiure:

ir hâr enpflohten unde lanc,

zetal in ir buoc ez swanc.

daz houbet grôz, ir nase vlach.

6295 daz wîp ûz grôzer riuhe sach

als zwô kerzen brünnen dâ.

ir brâ lanc unde grâ,

grôze zene, wîten munt;

zwei ôren hêt si als ein hunt,

6300 diu hiengen nider spanne breit.

als uns diu âventiure seit,

sô was diu schœne Lârîe

schœner danne ir drîe.

der rücke was ir ûf gebogen,

6305 dâ engegẹn ein hover ûz gezogen

ob dem herzen als ein huot.

hêt iemen von ir hôhen muot,

dern sach der vrouwẹn Ênîten niht,

wan der herre Hartman giht,

6310 daz wær gar ûz dem strîte

ezn wære vrouwe Ênîte

ze Karidôl diu schœnste maget,

als im sîn meister hêt gesaget.

ir brüste nider hiengen;

6315 die sîten si beviengen

gelîch zwein grôzen taschen dâ.

als ein grîfe hêt si klâ

an den vingern allen.

rôt und linde ballen

6320 die man an schœnen vrouwen siht,

ich wæne wol dern hêt si niht:

si wârn ir herte als einem bern.

swen si ir minne solde wern,

daz wær ein sûrez trûten.

6325 ir lîp der vrouwẹn Jeschûten,

diu dâ was sô sælden rîch,

was des tages ungelîch

dô si in ir gezelte slief

und si Parzivâl an lief.

6330 als in lêrtẹ diu muoter sîn,

er zôch ir abe ein vingerlîn

und nam ir vürspan âne ir danc.

ein lützel er mit ir geranc

und kuste sị an ir rôten munt

6335 âne sin: im was unkunt

waz ez dem herzen vreude gît;

dar umbe leit si kumber sît.

si wârn gelîch, als ich ẹz weiz,

reht als ein bin einer geiz.

6340 disiu was ungehiure;

sô was Jeschûten tiure

swaz vrouwen lîbe ie missezam.

daz lop gît ir her Wolfram,

ein wîse man von Eschenbach;

6345 sîn herze ist ganzes sinnes dach;

leien munt nie baz gesprach.

Daz wîp dûht in unsüeze:

starkiu bein, krumbe vüeze

hêt si, sus was si gestalt.

6350 ein kurziu naht diu machẹt in alt

swer bî ir solde sîn gelegen;

sô süezer minne kunde sị pflegen.

si hiez diu starke Rûel

und was so vreislîche snel

6355 daz ir dehein tier entran.

Ferôz geheizen was ir man.

den sluoc Flojîr von Belamunt;

den zôch er an des sêwes grunt

mit im töunde in sîner nôt;

6360 dâ lâgens bî ein ander tôt.

sus verlôs sị ir lieben man;

des wolde sị in engelten lân.

si lief zuo im âne wer;

ir einer sterkẹ was im ein her.

6365 desn trûwẹt der junge rîter niht.

von missetriuwẹ vil ofte geschiht

daz den liuten missegêt.

swer daz gerne understêt,

der sî gewarnet zaller zît:

6370 vil lîhte erz anders missegît.

alsô übergap erz dâ.

daz starke wîp begreif in sâ,

wan sị endûhte in des niht wert

daz er gegen ir sîn swert

6375 immer gevuorte,

wan grôziu tugent ruorte

sîn herze zallen stunden.

als er wære gebunden,

sô truoc in diu tiuvelin

6380 under ir starken armen hin.

swie starc der rîter wære

und swie wîten mære

wær sîn grôziu manheit,

diu selbe vrouwe ungemeit

6385 truoc in hin als einen sac.

‘owê, daz ich disen tac

ie gelebte! ’ sprach der degen.

‘nû ịst mîn kraft gar gelegen;

waz touc mir mîn manheit?

6390 ditz ist ein jæmerlîchez leit!

sol ich alsô verderben

und âne wer ersterben

von dirre crêatiure?’

si tet imz allez tiure

6395 beidiu sprechen unde regen.

vrouwe Lûnetẹ kunde pflegen

des rîters mit dem lewen baz,

dô er gevangen bî ir saz.

disiu tet als ir gezam:

6400 dem jungen rîter si dô nam

die kraft und sîne sinne;

guotes wîbes minne

was ir trûten ungelîch;

sus sint die minne mislîch:

6405 diu eine ist arm, diu ander rîch.

Rûel diu ungehiure

ergatzt in der âventiure

und swaz im liebes ie geschach.

daz swert sị im von der sîten brach

6410 und zôch im abez îsengwant;

mit einer wide si im bant

beide hende hinder sich.

owê leider, nu dunket mich

daz er mit sînem lîbe

6415 iht kœmẹ von disem wîbe,

des wær er weizgot unwert!

si zôch im ûz sîn eigen swert;

bî dem hâre vuortẹ sin hin;

über ein ronen druhte in

6420 daz wîp bî sînem hâre, owê!

nu sprechet, wiez im dâ ergê.

daz swert swanc si gegẹn im her.

in dirre nôt gedâht er

der schœnen magt Lârîen.

6425 sîn ors begunde schrîen

und ze weien sêre.

dem wîbe enwart niht mêre

wan daz sin alsô ligen liez;

daz swert sị in die scheide stiez

6430 und vlôch ûz dem hol zehant

ûf ein ander steinwant

ein pfat, daz was vil enge,

durch michel gedrenge.

waz dem wîbe wære,

6435 welt ir daz selbe mære

hœren, daz wil ich iu sagen:

der wurm den dâ hêt erslagen

der rîter mit sîner hant,

der kom zuo der steinwant

6440 vil oft mit solhem schalle

daz die berge alle

schullen von sînem lûte

nâch des tievels trûte;

der wurm wesse si dâ wol.

6445 sị entran im ofte ûz dem hol

ûf ein ander steinwant

als ir der zagel wær verbrant.

si vorhte ir sêre; des gienc ir nôt:

swaz er begreif, daz was tôt;

6450 niemen mohtẹ sich sîn erwern

noch vor sînem stanke ernern;

dâ von vlôch des tievels trût.

dô si erhôrtẹ des rosses lût,

dô wânde si er kæme dâ;

6455 von dem rîter vlôch si sâ,

wan sị entrûwet niht genesen,

als ez sîn sælde solde wesen

der dâ vor ir gebunden lac;

vür den trôst sîn zwîvel wac.

6460 ditz was wol umbe mitten tac.

Wem kom der tôt sô nâhen ie?

âne den tôt gevreischt ich nie

angestlîcher iemen ligen;

des lebens was im gar verzigen.

6465 dô si daz swert gegẹn im swanc,

dôn hêt er des deheinen [gẹ]danc

daz er iht lenger solde leben,

hêt imz got niht gegeben.

des genâde ist niht gelîch;

6470 daz erzeigẹt er aller tägelîch.

er nidert hôch gemüete

und hœhet alle güete;

er ermet unde rîchet,

den rîchen er gelîchet

6475 dem armen, swenne er wil.

ditz was sînes gwaltes spil,

daz er disem küenen man

sînen trôst an gewan,

den sîn herze ungerne liez;

6480 in ganzen zwîvel er in stiez,

dâ von er sîne vreude lie.

got der was genædic ie;

daz erzeigtẹr an disem rîter hie.

Dô er sus an dem tôde lac

6485 und daz sîn leben zem tôde wac,

dô kom er im ze trôste;

sîn barmunge in erlôste

daz im dehein schade geschach

wan daz er vreise vor im sach.

6490 dô daz wîp von im dan

gevlôch und der gebunden man

in dem hole niemen sach,

dô stuont er ûf unde sprach

‘nu hilf mir, herre, süezer got!

6495 lâ dîn genâde und dîn gebot

an mir schînen: daz êret dich.

mit dîner kraft enbinde mich,

daz mir mînen jungen lîp

iht beneme ein solich wîp

6500 diu der helle zæme.

wær si doch sô genæme

daz ich si möhte an gesehen,

sô wær mir deste baz geschehen.

herre got, erhœre mich! ’

6505 in dirre bet sô lôste sich

diu starke wide dâ er mit

gebunden was nâch diebes sit.

dô sich diu starke wide enbant

und im enbunden wart sîn hant,

6510 sînen êrsten grif den tet er nider

nâch sînem swert dạz nam er wider

dâ erz bî im ligen sach.

er kuste dạran unde sprach

‘ô wol mich, swert, daz ich dich hân!

6515 nûn ist weder wîp noch man

der mich binde âne wer;

ûf dînem knopfe ich des swer

die wîle ich swert tragen wil:

ez sî ernest ode ein spil,

6520 daz ez mir nimmer mê geschiht,

swâ mîn ouge iht des siht

daz mînem lîbe geschaden mac,

ichn slahe ie doch den êrsten slac

dem daz ungehiure sî.

6525 ditz was aller triuwen vrî,

ez hêt mir anders widersaget.

ezn wirt hie nû niht mê geklaget

sît ich mîn swert wider hân.’

sînen harnasch schutter an

6530 und gie von dem steine nider

balde zẹ sînem orse wider.

von dem aste erz enbant

und zôch ez an den vlôz zehant;

mit einem aste schielt er in

6535 über ḍạz breite wazzer hin

anderhalbe an daz stat;

vil snelle er dâ abe trat

und zôch daz ors nâch im dan.

sus was genesẹn der küene man

6540 von dirre crêatiure.

gegẹn der âventiure

kêrtẹ der edel rîter sâ.

einen stîc den vant er dâ,

der truoc in an die strâze wider.

6545 gegen Glois reit er nider.

von der brücke stahten her

gegẹn im sehzic starkiu sper

eine mîle ûf dem wege.

diu hêt ein rîtẹr in sîner pflege,

6550 der was ze harnasche wol,

als ze strîte ein rîter sol.

er reit ein ors swarz gevar,

mit einer kovertiure gar

bedecket von samîte;

6555 an der zeswen sîte

was si grüene alsam ein gras;

dâ zer winstern hant si was

tunkel rôt als ein bluot.

sin schilt was niuwe unde guot;

6560 daz diu buckel solde sîn,

daz was ein bluome guldîn,

geworht mit grôzem vlîze;

von liehter varwe wîze

was der schilt über al;

6565 von rôtem golde ein lîste smal

was geleit ûf den rant;

drinné — dâ bî daz was bekant

daz er von Glois ein rîter was —

ein sûl, diu glaste als ein glas

6570 von lâzûre und von golde;

als er leben solde,

Machmêt dar ûffe saz;

dâ bî man solde wizzen daz

sich niht erwerte sîm gebot;

6575 durch daz vuort er der heiden got.

daz wâfen was des rîters spot.

Ouch vuortẹ der selbe tievels trût

an im eines lewen hût

ob einem halsberge wîz.

6580 an sînem helmẹ lac grôzer vlîz

von golde und von gesteine,

grôz unde kleine;

daz was mit vlîze geleit dar în;

zaller obrist ein rubîn,

6585 der was grœzer danne ein ei;

den liehten helm teilte enzwei

von rôtem golde ein lîste smal.

von dem rubîn hin ze tal

[vil] lützel sîn ob dem satel schein:

6590 grôze arme und kurziu bein

hêt er nâch der getwerge sit

ich wæn ie iemen baz gestrit

danne der vil kurze man

dâ vil ofte hêt getân.

6595 der âventiure huot er

vil mangen tac, daz diu sper

niemen gar widẹr in vertet;

ez hêt gesiget an der stet

sîn hant an mangem rîter guot,

6600 dem vil hôhe stuont sîn muot.

swie kurz er wære, sîn kraft was grôz

er hiez der küene Karriôz.

sîn muoter was ein wildez wîp;

dâ von was im sîn kurzer lîp

6605 aller rûch unde starc.

sîn gebeine was âne marc

nâch dem geslähtẹ der muoter sîn;

deste sterker muose er sîn.

einem man was er ein her.

6610 den lewen vienc er âne wer

und sluoc in mit nacter hant;

bî der hût was daz bekant

die er dâ ze kleide truoc,

daz er den lewen eine sluoc.

6615 Karriôz leisierte dort

gegẹn den speren an sîn ort

und was im daz vil ungemach

daz er disen rîter sach

sô vrävelîch dâ rîten.

6620 daz er wolde strîten

mit im, des gedâht er.

mit zorne nam er ḍạz êrste sper,

wand ez stahte bî im dâ.

gegẹn dem gaste kêrte er sâ

6625 mit hôhem muote, mit ganzer kraft.

er vreute sich der rîterschaft

und der jost die er dâ nam;

her Gwîgâlois der tet alsam;

in beiden was zesamne ger.

6630 mit ganzer kunst si diu sper

under die arme sluogen;

zesamne si dô truogen

diu ors sô krefticlîche

daz si verstâchen glîche

6635 mit einer rîchen jost diu sper.

ir ietweder gâhte her

nâch einem sper an sîn ort,

daz ir dẹweder dehein wort

zuo dem andern nie gesprach;

6640 von hôhem muote daz geschach.

Karriôz dem was unwert

daz er die jost hêt gewert

âne vallen wider in.

nâch ganzem strîtẹ ranc ie sîn sin.

6645 gegẹn dem gaste kêrte er hin.

Her Gwîgâlois was bereit;

mit sînem sper er gegẹn im reit;

an manheit verzagt er nie.

Karriôz in dô enpfie

6650 mit einem sper daz was starc.

zesamne truogen si diu marc

mit gelîcher gir, mit solher kraft

daz ir ietweders schaft

zebrochen in die lüfte spranc

6655 und daz diu ros gelîchen wanc

an die hahsen tâten nider.

ir ietweder gâhte wider

dâ er daz næhste sper vant.

sus verstâchen si zehant

6660 diu sper mit solhem nide gar

daz die schilte goltvar

vür stiche wâren dehein guot.

dannoch was ir beider muot

unverschert an manheit;

6665 ir ganziu kraft diu was bereit;

ir einẹn der tôt doch dâ versneit.

Dô in der sper gar zeran

und Karriôz sich des versan,

einen kolben er gevienc,

6670 der im an dem arme hienc;

der was von stâle harte grôz.

in beide hende er in slôz

und reit den jungen riter an.

Gwîgâlois, der küene man,

6675 von im nie einen trit gevlôch.

sîn swert er ûz der scheide zôch

und sluoc in ûf den rubîn,

daz vil manic liehter schîn

von viure gegẹn im glaste.

6680 Karriôz ouch vaste

mit sînem kolben ûf in sluoc.

ir dweder ḍẹm andern niht vertruoc.

dem jungen rîter vrumte daz

er ze orse kunde baz

6685 strîten dannẹ der kurze man.

des kraft was ab sô getân

und sîn grôziu manheit:

hêt er sich im niht entseit,

als er den slac gegẹn im bôt,

6690 er wær von sînen slegen tôt.

her Gwîgâlois mit kündicheit

wider disen rîter streit

unz daz der âbent ane gie.

sîn kunst in dô dâ vervie

6695 und sîn swert, wan daz was guot,

daz er im durch den stâlhuot

sluoc eine tiefe wunden.

als er der hêt enpfunden,

dô was im zuo dem gaste ger.

6700 mit beiden handen reicht er

nâch im mit grimmem muote.

her Gwîgâlois mit huote

allez vor im wancte dan

unz er im aber an gewan

6705 einen slac alsam ê;

der tet im herzenlîche wê,

als er dâ zehant jach,

wand er im durch die brust stach

mit des schœnen swertes ort.

6710 der kurze man der schrei mort

und oymê, des gienc im nôt:

derselbe slac gap im den tôt,

des gwalt dô über in gebôt.

Als er des tôdes rehte enpfant,

6715 gegen Glois vlôch er zehant

und schrei sô lûte daz erschal

beidiu bergẹ unde tal

und daz der luft sich gegẹn im kloup.

von sîner vluht wart der stoup

6720 alsô grôz ûf dem wege

daz er ûz sîner ougen pflege

kom in kurzer wîle,

swie er im doch mit île

ûf dem wege volget nâch.

6725 her Gwîgâlois dò vor im sach

einen nebel der was swarz,

alse swebel unde harz

ensamet brunnen beide

über al ûf der heide.

6730 dar în vlôch der kurze man;

dâ gesigt ouch im der tôt an.

der nebẹl ûz einem mose gie;

die âventiure er bevie

umbe und umbe als ein rinc.

6735 ditz was ein harte vremdez dinc

daz nieman her ûz noch drin,

als ichs bewîset bin,

weder reit noch engie

unz daz diu sunne ir schîn verlie,

6740 sô daz si entweich der naht;

sô was niwan daz mos bedaht;

dar ûf legt sich der nebel nider;

mit der naht steic er ie wider.

ditz was ein vil kurziu sît.

6745 an der wîlẹ ḥêt sich der strît

verendet zwischẹn in beiden;

der tôt hêt si gescheiden,

als ich iu ê gesaget hân.

Karriôz sich niht versan

6750 und wolde durch den nebel dan

gevlohen sîn; dô was er an

in gevallen als ein harz.

sîn wâfen daz was allez swarz,

daz ê in liehter varwe schein;

6755 sîn ros was als ein bechstein

erstarret und bestecket;

der nebẹl ḥêt in bedecket

dicker danne eins mannes hant;

alsô tôten er in vant.

6760 swenne der nebel nider gie,

swaz er under im bevie,

daz lîmte er zesamne gar.

dô des der rîter wart gewar

der nâch der âventiure reit,

6765 sîn rîten er dar în vermeit

unz er sich ûf daz mos gelie.

eine strâze er dô gevie,

diu was gebrücket über ḍạz mos;

dar an truoc in sîn schœnez ros.

6770 nu was diu selbe strâze

wol eines schuzzes mâze

gebrücket meisterlîche;

dar ûf harte rîche

von marmẹl ein tor gemûret lac,

6775 des ein rat von êre pflac;

daz lief umbe vor dem tor

ûf îsenînen siulẹn enbor.

ez treip ein wazzer daz was grôz;

durch daz vûle mos ez vlôz.

6780 daz rat mit kreften umbe gie;

durch daz tor ez niemen lie.

daz hêt Rôaz gemeistert dar.

mit scharfen swerten was ez gar

und mit kolben wol beslagen.

6785 wer möht solhes iht an getragen

daz in beschirmet vor den slegen?

gegẹn dem tor hielt der degen,

wand ern mohtẹ niht vürbaz.

vil vliziclîch versuohte er daz

6790 bî dem tore al umbe dâ;

dône mohte er ninder anderswâ

vür komen wan zem tor;

dâ lief abe ḍạz rat vor

und huote wol der porte

6795 mit mangem scharfen orte.

dâ von sîn herze jâmer vie.

er gedâhte ‘herre got, wie

sol ich nu komen in daz lant?

du hâst mich allez her gesant

6800 durch vil mange vreise;

hilf mir, daz ich die reise

volbringe als ich hân gedâht,

sô hâstuz allez zende brâht

mit gnædiclîcher güete.

6805 herre got, nu hüete

mîn mit dîner krefte hie!

ichn kom in solhe vreise nie.’

der nebel dô widẹr ûf gie.

Des wart der rîter niht gewar

6810 unz daz er sich versûmte gar

daz der nebel disẹhalp sîn

mit des liehten mânen schîn

gesteic wol zweier schefte hôch.

zuo der porte er dô vlôch.

6815 dône mohter vür noch hinder sich;

diu vancnüs diu was jæmerlîch,

wand in da niemen lôste.

nu sprecht wer im ze trôste

dâ mohte komen an der stat!

6820 vor im umbe lief daz rat,

hinder im der nebel stoup,

des tropfe velwet grüenez loup.

nûne mohte er vür noch wider.

von sînem orse erbeizter nider

6825 und want sîne hende.

hie was der ellende

gevangen âne mannes hant!

alrêrst wart im untrôst erkant.

owê der nôt die er dâ vant!

6830 Dô der rîter daz ersach

daz im leit und ungemach

sô ofte an sîner vart geschach,

wider sich selben er dô sprach

‘noch mac mîn wol werden rât:

6835 wes got mit mir gedâht hât,

daz muoz benamen doch geschehen;

ich wil ouch im des siges jehen.

war umḅ gehabe ich mich niht wol?

wan swaz mir geschehen sol,

6840 dazn mac doch niemen understên.’

diu müede begunde in ane gên

und der slâf nâch sîner nôt.

ûf sînen arm er sich bôt

an einen stein der dâ lac.

6845 sîns rosses er bî ḍẹm zoume pflac,

des swertes mit der zeswen hant.

er sprach ‘herre, dir ist bekant

des mannes herze und sîn muot.

du maht wol übel unde guot

6850 an mir begên, swederz du wil.

nu soltu dînes gwaltes spil,

herre, an mir erzeigen hie,

wand ich dich mit herzen ie

in mîner jugent geminnet hân,

6855 sît ich mich guotes êrst versan.

herre got, dir sî gegeben

mîn vil zwîvellîchez leben

in dîne grôze erbarmicheit,

wan du erkennest wol herzeleit.’

6860 hie mit der slâf im an gestreit.

In dirre nôt entslief er.

nû habt iu ze râten wer

im dâ kœmẹ ze trôste

od wer in erlôste.

6865 daz tet der süezen mâgde kint.

von des krefte wæte ein wint;

der sluoc den nebel vaste nider

in daz vûle wazzer wider,

daz zer selben stunde

6870 daz wazzer begunde

dicken von des nebels kraft

als vaste daz wol ein schaft

dạr inne bestecket wære.

got ist niht ze swære

6875 noch ze grôz sîner kraft.

er hât in sîner meisterschaft

alle crêatiure,

bœse unde tiure.

die himel stênt in sîm gebot;

6880 aller dinge ist er got

und diu oberiste krône.

swer nâch sînem lône

gedienet, der ịst der sælden kint.

ze trôste sande er im den wint.

6885 den nebel er in ḍạz wazzer treip,

daz sîn niht vil dar obe beleip;

dâ von ez sîn vliezen lie.

daz rat dô nie mêr umbe gie;

ez gestuont under dem bürgetor.

6890 vil michel schal huop sich dâ vor:

von sînem kerren daz ez tet

der rîter spranc ûf an der stet

von einem herten troume.

daz ors an dem zoume

6895 begunde snarchen unde streben,

wand ez entrûwẹt niht lenger leben.

dô der rîter hêt ersehen

daz diu geschiht dâ was geschehen,

des wart er herzenlîche vrô.

6900 einen laden nam er dô,

der lac bî im nâhen dâ.

in daz rat leit er in sâ

und zôch sîn ors drüber zehant.

got hêt in durch daz rat gesant

6905 nâch sînem willen, als er ịn bat.

dô er von dem rade getrat

und sîn ors zuo im gespranc,

des sagte er im vil grôzen danc

von des genâde ez was geschehen.

6910 dô er wolde umbe sehen

nâch der âventiure,

dô hôrter ungehiure

eine stimme gegẹn im schrîen

‘owê, dîner âmîen!

6915 diu mac wol klagen: du lîst hie tôt!

von dînem bluote werdent rôt

und missevar die bluomen hie.’

diu stimme dô ir schrîen lie.

vür den mânen ein wolken gie.

6920 Dô der starke wint gelac,

der nebel steic, als er ê pflac,

ûf gegẹn dem wolken wider.

daz wazzer vlôz zem rade nider

und treip ez umbe nâch sîm sit

6925 hie was diu âventiure mit

beslozzen, als mir ist geseit.

her Gwîgâlois mit sorgen reit

dô er ûf sîn ors gesaz.

diu naht wart sô vinster daz

6930 er den wec niht mohte hân.

in dirre vinster lief in an

ein vremdiu crêatiure;

diu bestuont in mit viure.

si hêt ein houbet als ein hunt,

6935 lange zene, wîten munt,

diu ougen tief, viurvar;

niderhalp der gürtel gar

hêt si eines rosses lîp.

weder ẹz man ode wîp

6940 wære, des enweiz ich niht.

als uns diu âventiure giht, —

ob iemen daz geloubet —

enzwischen gürtẹl und houbet

was sî geschaffen als ein man;

6945 breite schuopen wâren dran

gewahsen herter danne ein stein;

die selben schuopen mohte dehein

wâfen wol gesnîden.

des muosẹ der rîter lîden

6950 von ir grôze swære.

waz geschepfte ez wære,

desn kan ich iu niht gesagen.

er sach si einen haven tragen,

der was grôz, êrîn;

6955 mit listen was ein viuwer drîn

gemachet, sô daz bran

swaz ez wart geworfen an:

bein, îsen unde stein.

daz selbe viur mohte dehein

6960 wazzer niht erleschen sô

ezn brünne drinne als ein strô;

daz selbe viur warf si in an.

nu begunde ḍạz ors von ir dan

sêre vlieḥẹn; des gienc im nôt,

6965 wandez vorhtẹ den grimmen tôt.

dô si im mangen wurf getet,

daz ors sich an einer stet

niht mohte enthalten, wandez bran

sô sêre daz daz bluot ran

6970 von im ûf daz grüene gras.

dô des dehein rât was

sîn ors müese verbrinnen dâ,

ûf die erde erbeizter sâ

und klaget got sîne nôt.

6975 den schilt er gegẹn dem wurfe bôt

den der vâlant ûf in tet.

zehant enzunde sich daz bret

und verbran im von der hant;

sîn wâfenroc ouch gar verswant

6980 von dem selben viure.

nu seht, welch âventiure

durch sînen muot er muose doln!

übẹr einen schrit wold ich niht holn

den kumber und die arbeit

6985 die er von sînem muote leit!

daz sî iu vür wâr geseit.

Her Gwîgâlois hie blôzer stêt;

niht mê er ze schirme hêt

niwan sîn barez îsengwant.

6990 vil schiere wart im daz bekant

daz sînem halsberge lieht

daz selbe listviuwer nieht

mohtẹ geschaden; des wart er vrô.

an die geschepfte lief er dô.

6995 ouch was ir sô ger an in

daz si von dem slage hin

niht entweich den er tet.

des wart ir an der selben stet

daz vierde bein abe geslagen;

7000 dazn sol niemen guoter klagen.

dô dirre tievel daz hêt ersehen

daz im der schade was geschehen,

dô warf er den haven dar

mit dem viure ûf in gar,

7005 daz beidiu helm und swert bran.

von dem rîter woldez dan

gevlohen sin sâ zehant.

dô wart im mit voller hant

geslagẹn ein tiefiu wunde.

7010 von sînem bluote begunde

daz viur erleschen dâ ez bran

swâ ez kom gesprungen an.

dô des der rîter wart gewar,

nâch dem bluote greif er dar

7015 dâ ez bî im swebte;

swâ daz viuwer klebte,

daz bluot er dar an streich;

zehant daz viur dâ von entweich.

sus ernerte sich der degen:

7020 und hêt sîn got niht gepflegen,

er wær ze tôde dâ verbrant.

von im vlôch der vâlant,

beidiu man unde ros,

gegẹn dem nebel ûf daz mos

7025 und gal sô vreislîche

daz daz ertrîche

nâch im hal dâ er lief.

ûf Glois dô ein stimme rief

‘wâ nû, Rôaz! dîn êre ist tôt.

7030 hœrst du niht Marrîên nôt,

der mit sînem viure

pflac der âventiure

alle naht? den hœre ich klagen;

ich wæne wol er ist erslagen.

7035 diu âventiure diu ịst entrant,

wan dir ist komen in daz lant

der dich ganzes strîtes wert,

des du ie hâst gegert.

sît Marrîên erslagen ist,

7040 daz in aller sîn list

vor dem tôdẹ niht mohte ernern,

sô muostu dich vil kecke wern,

od du verliusest dîn schœne wîp,

êre, guot und ouch den lîp.

7045 ez mac dir wol ze schaden komen

daz du den strît dir hâst genomen

ze vehten wider in eine.

wir müezen alle gemeine

im dienstes wesen undertân,

7050 gesigt er dînen listen an,

wan des hâstu ie gesworn.

helt, nu rich dînen zorn,

od du hâst guot und lîp verlorn!’

Nâch dirre rede diu stimme sweic.

7055 der mâne ûz von dem wolken steic

und wart sîn schîn lûter gar.

dô nam der rîter umb sich war

wie daz lant wære getân;

dô sach er Glois vor im stân.

7060 daz was ein schœne kastel

hôch, wît und sinwel,

gemûrt mit grôzem vlîze wol,

von marmel swarz als ein kol

wâren gepfîlært dâ vor

7065 in die burc zwei wîtiu tor;

daz ander teil der mûre was

rôt, grüene als ein gras,

von marmelsteine gezieret,

mit golde geparrieret,

7070 gelûtert als ein agstein.

swâ der mâne dar an schein,

dâ glaste sị als ein spiegelglas.

vür daz tor gesetzet was

ein grôziu sûl von êre;

7075 dien vint man ninder mêre

in der werlte anderswâ

niwan in Korinthîâ:

der êre ist rehte lûter gar

als der regenboge gevar,

7080 daz man sich drinne möhte ersehen;

des muoz man den heiden jehen

grôzes listes ze Korntîn.

oben was ein rubîn

dạrinne beworht als ein huot;

7085 des schîn was ze sehen guot

und gap dem herzen wünne.

als ein stern dâ brünne,

sô breḥẹnde er zallen stunden;

mit goldẹ was er gebunden.

7090 des huoten zwêne rîter dâ,

die wârẹn beide von alter grâ,

baz danne hundert jâr alt;

ir berte wâren wol gestalt,

lanc, dic, ze mâze breit,

7095 ir hâr gevlohten unde reit,

mit borten wol bewunden.

die huoten zallen stunden

der siule undẹr einer linden;

sine mohte niemen vinden

7100 âne wer ze dẹheiner zît;

si wâren ie bereit ûf strît

und huoten ouch der porte

mit ir scharfem orte

beidiu naht unde tac.

7105 dô im diu burc sô nâhen lac

und er die zwêne rîter sach

wider sich selben er dô sprach

‘wes sol ich hie nu lenger stên?

ich wil gegẹn der bürge gên

7110 sît ich mîn ors nu hân verlorn;

daz ist unwendic, nu sîz verkorn! ’

sus gienc er gegẹn dem bürgetor.

sîne hende habter enbor

und sach vil tiure hin ze got.

7115 er sprach ‘herre, nâch dîm gebot

wil ich sêle unde leben

in dîne erbarmunge geben,

daz du mir ruochest ze helfen hie;

swaz ich hân gestriten ie,

7120 daz tet ich âne meisterschaft,

bärlîch mit dîner kraft;

nu hilf mir, herre, des ist mir nôt,

daz die liehten bluomen rôt

mîn bluot iht rœter mache;

7125 daz mînes tôdẹs iht lache

diu ungetriuwe heidenschaft.

nu hilf mir, herre, mit dîner kraft,

daz ich gesige dem heiden an;

sô hâstu wol ze mir getân

7130 und ouch volendet mîne gir.

herre got, des hilf du mir;

sô wil ich immer dienen dir.’

Zuo den alten er dô gie.

die hêten sich gewâfent hie

7135 und sâzẹn ûf einer grêde.

der herren schilte bêde

die hiengen an der mûre enbor

an zwein nageln vor dem tor.

sus kom der junge rîter dar,

7140 daz ir dẹweder des wart gewar,

unz er den næhsten schilt gevienc,

der an der mûre bî im hienc.

zehant als er den schilt begreif,

sîn sorge im ein teil entsleif

7145 und gewan ze strîte vesten muot;

der schilt was im ze schirmen guot.

des wurdẹn die rîter vil unvrô;

mit grôzem nîde liefen dô

dise zwêne küene man

7150 mit ganzer kunst den einen an

und tribẹn in von der porte nider.

her Gwîgâlois der sluoc wider

under wîlen nâch sîner maht.

mit listen er sus mit in vaht:

7155 er schirmet mange wîle;

dar nâch sluoc er mit île,

daz sîn swert vil ofte erklanc

und daz ûz den helmen spranc

daz viuwer zallen stunden.

7160 der eine im eine wunden

durch den liehten helm sluoc.

den slac er im dô niht vertruoc:

den schilt begunder vazzen baz

und trat sô nâhen zuo im daz

7165 er in wol mohte erreichen;

daz swert begunder sleichen

under sînem schilte hin

und stach im dâ zem gêren in

eine wunden diu was wît,

7170 daz er dar nâch in kurzer zît

tôter viel ûf daz gras.

der ander des vil vlîzic was

daz er geræche sînen tôt:

den schilt er allez vür sich bôt

7175 und sluoc ûf in sô vaste

daz daz viuwer glaste

gegẹn des liehten mânen schîn

und daz daz rat guldîn

vil mange scharten dâ enpfie.

7180 mit slegen er dô ûf in gie,

als in sîn ellen lêrte;

daz bluot vil vaste rêrte

der jungẹ mit starken wunden.

als er der hêt enpfunden,

7185 der alte sprach ‘nu lât mich leben!

ich wil iu sichern unde geben

mînen lîp in iuwẹr gebot

und swer iu bî ḍẹm oberisten got

daz ich iu diene die wîle ich lebe;

7190 und lât ir mir daz zeiner gebe,

edel rîter, von iu hân,

sô wil ich werden iuwer man

und wil iu leisten triuwe

immer âne riuwe.’

7195 der rîter sprach ‘daz sî getân!’

vür in begunde der alte man

vallen balde ûf sîniu knie.

in sîne gnâde er in enpfie

und kustẹn ein ander beide.

7200 diu swert si in die scheide

mit ganzem vride stiezen;

mit triuwen si gehiezen

ein ander rehte geselleschaft.

diu hêt stæte und ganze kraft

7205 under in beidẹn unz an ir tôt.

der alte sprach ‘iuwer nôt

diu ist noch unverendet;

gît got daz hie geschendet

den heiden iuwer manheit,

7210 sô habt ir âne arbeit

daz lant immer mêre,

liute, guot und êre;

dar zuo gît man iu die maget,

von der schœne man wunder saget,

7215 der disiu lant solden sîn,

Glois unde Korntîn.

mit gewalte ez ir benomen ist;

habt ir nu kraft und guoten list,

des wirt iu benamen nôt;

7220 ir sult iuch wern, od ir sît tôt.’

des volgẹt er im sît erz gebôt.

Er sprach ‘herre, nu sît gemant,

welt ir die maget und daz lant

erwerben hie, daz ir iuch wert.

7225 ist daz iuch got hie ernert,

sô habt ir iuwer arbeit

vil sæliclîche an geleit.

ich sagiu daz vür dise stat

dehein rîter nie getrat

7230 nâch strîte durch daz bürgetor:

man vant ie strîtes gnuoc dâ vor

von uns unz an dise stunt.

nu ist er tôt und bin ich wunt;

daz ist uns von iu geschehen.

7235 ich wil iu gerne siges jehen,

wand ir sît aller êren wert,

der iuch got wol hât gewert,

ob ir in der burc gesiget.

ist ab daz ir dâ tôt geliget,

7240 sô habt ir michel arbeit

verlorn in iuwer kintheit.’

sus sâzen si dâ bêde

durch ruowe ûf einer grêde

unz si gewunnen niuwe maht.

7245 ditzwas wol nâch mitter naht

her Gwîgâlois zem alten sprach,

dô er die burc beslozzen sach

‘wer entsliuzet mir daz tor?

mich dunkẹt, ich sî ze langẹ ḥie vor;

7250 mîner vreude wil ich ende geben,

od mit vreuden lenger leben;

des helfet mir, sô sît ir guot.’

er sprach ‘ich sagiu waz ir tuot:

nu rüerẹt den rinc mit der hant;

7255 sâ sô wirt iu daz bekant

waz innerhalp der porte ist.’

dô sûmte er sich unlange vrist;

urloup nam er von im dâ.

den rinc begunder rüeren sâ

7260 sô vaste daz diu burc erhal.

zehant huop sich sô grôzer schal

als al diu werlt dâ brünne;

ez was dehein wünne

in dem hûse noch dâ vor;

7265 mit zorne slôz man ûf daz tor,

dô daz her Gwîgâlois ersach,

vil herzenlîche er dô sprach

und tet daz kriuze dâ vür sich

‘herre got, behüete mich

7270 und wis mîn geleite hie! ’

in die burc er dô gie;

baz gezierde gesach er nie.

In sîner nôt nam er des war

daz diu mûre innen gar

7275 gegẹn im von rôtem golde schein

und daz vil manic edel stein

gegẹn dem andern glaste;

sus gleiz ez allez vaste:

die steine gegẹn in wider.

7280 und daz golt gegẹn in weide;

daz was guot ougen weide;

in allem sînem leide

die gezierde er gerne sach.

zehant ein blic vor im geschach,

7285 der lûhte rehte alsam der tac;

nâch dem blicke kom ein slac

als diu burc in einer var

zesamne wolde bresten gar,

und wart sô vinster umḅ die want

7290 daz er vor im sîne hant

niht wol mohte geklesen.

den lîp wânder verliesen

in dem selben schalle dâ.

sîn schœnez swert vuorter sâ

7295 und stuont ze wer als ein ber.

dar nâch giengen gegẹn im her

zwelf mägde sûberlîch;

der selben mägde ieslîch

truoc ein kerzen, diu vaste bran;

7300 vil guotiu kleider hêtens an

von bunt und von samîte,

an ietwederre sîte

getellet gel unde rôt.

ir gruoz im dâ deheiniu bôt;

7305 si stuonden nebẹn ein ander dâ.

von den liehten gesach er sâ.

ein palas wart dâ ûf getân,

dar în die mägde begunden gân,

daz was schœne und sô wît

7310 daz er vordes noch sît

schœner palas nie gesach;

dar în gienc in der rîter nâch

und als er zuo in wolde gân,

eine porte sach er offen stân

7315 von im wol eines wurfes lanc;

dar ûz Rôaz gewâfent dranc.

vor im mit zoubẹr ein wolken gie;

daz wolken sâhen alle die

vor im giengen unde nâch;

7320 her Gwîgâlois sîn niht ensach.

dar inne vuor er der sîn pflac

beidiu naht unde tac

und dem er sêle unde leben

in sîn gebot hêt gegeben.

7325 daz was ein tievel, der im ie

half unde riet wie

er im verlür die sêle gar.

ûf den gedingen kom er dar

daz si im würde âne strît,

7330 wan des dûhte in michel zît.

dô wândẹ Rôaz er wolde im dâ

helfen als er anderswâ

mit sînen listen hêt getân:

dô was gewarnẹt der junge man

7335 mit einem brieve, der im wart

gestricket an sîner vart

umb sîn swert mit gebet,

und mit dem kriuze, daz er tet

vür sich dô er zem tor în gie.

7340 dâ von getorstẹ der tievel nie

zuo im komen nâher baz

vil sêre schûhtẹ der heiden daz;

iedoch was er sô manhaft

daz er wol mit sîner kraft

7345 vor in beiden trûwẹt genesen,

ob ir zwêne wærn gewesen.

dâ überdâhte er sich an,

wand ez gesigt ein kurzer man

vil oft mit kunst an einem der

7350 spannen lenger ist dan er.

ze strîte was in belden ger.

Beslozzen wurden dô die tür

Rôaz der gie gewâfent vür,

michel als ein gîgant.

7355 ein swert truoc er in der hant

des ecke nâch dem tôde sneit;

daz was wol einer spannen breit.

einen schilt er ze schirme [n] truoc,

dâ hêt ein man an genuoc

7360 ze tragen übern rücke;

er wære zeiner brücke

gnuoc starc gewesẹn übẹr einen bach;

dạr an er gemâlet sach,

als der wirt wolde,

7365 von lâzûre und von golde

einen tracken vreislîch;

von gulde was ein buckel rîch

und von gesteine drûf geslagen.

den moht er mit êren tragen;

7370 ze strîte was er wol bereit.

eine brünje hêt er an geleit

übẹr einen wîzen halsberc,

daz was heidenischez werc

von breiten blechen hürnîn;

7375 mit golde wârn geleit dar în

rubîn und manic edel stein,

der glast dâ wider eịn ander schein,

saphîre und berillen.

er hêt nâch sînem willen

7380 einen helm herter danne ein glas,

der ouch des selben stâles was

ûz der innern Indîâ,

als diu glävîe die er dâ

in dem wurme stecken lie.

7385 umḅ den helm ein lîste gie

von golde zweier vinger breit;

oben was dạr in geleit

mit gesmelze ein adamas;

von golde drûf gemeistert was

7390 ein tracke als er lebte

und ob dem helme swebte.

sîn îsenhosen die wârn guot.

sîn herze hêt eins lewen muot

ze mänlîchem strîte.

7395 sîn wîp, diu vrouwẹ Japhîte,

nâch im mit hôhem muote gie;

vor ir zwelf mägde, die

wâren sûberlîch genuoc.

eine kerzen ir ieslîchiu truoc,

7400 grôz, gwunden, diu vaste bran.

guotiu kleider hêtens an

von pfelle, roc unde dach;

gefurrieret man darunder sach

lûter veder die wârn bunt.

7405 grôziu swærẹ was in unkunt

und der wunsch geteilet sô

daz si von schulde wâren vrô.

ir zobel wâren rîche;

ie zwô und zwô gelîche

7410 nebẹn ein ander giengen.

über die mäntel hiengen

ir zöpfe verre hin zetal,

wol bewunden über al

mit borten und mit sîden.

7415 swer von in solde lîden

trûten unde minne,

dem wæren sîne sinne

wol getiuret dâ von.

armuot wârens ungewon:

7420 ez schein wol an ir rîchen wât

daz dehein unrât

ir deheiniu nie gewan.

ie neben zwein ein spilman

vil süeze videlunde gie,

7425 der dẹheiner dem andern nie

einen grif übersach.

zaller jungest gie dar nâch

diu schœne vrouwẹ Japhîte.

daz was gar ûz dem strîte

7430 sine wær diu schœnest under in.

einen mantel truoc si zobelîn,

bedaht mit einem pfelle,

den hêt ir ir geselle

verre brâht über sê;

7435 die würme Salamandrê

worhtẹn in in dem viure;

dâ von was er tiure

und müelîch ze gwinnen

andern küniginnen.

7440 ir muoter was der selbe berc

dâ noch daz sîdîne werc

die würme Salamandrê

inne würkent alsam ê.

der berc ist hol unde wît,

7445 mit kreften brinnẹt er zaller zît

in der grôzen Asîâ.

dem wurme Salamandrâ

durch sîn wunder hât got gegeben

in dem viure ein vremdez leben,

7450 als wirz an den buochen lesen.

niht leḅẹndes drinne mac genesen,

ezn verbrinne ze pulver gar;

des habt ir ofte genomen war.

ditz mære sage ich iu vür wâr.

7455 Sus kom diu vrouwẹ Japhîte

zuo ir vriundes strîte

gegangen harte schône.

eine guldîne krône

truoc diu vrouwe hêre.

7460 an ir was vrouwen êre

und ganziu triuwe veste.

deheiner slahte gebreste,

der ie an dẹheinem wîbe wart,

des was ir lîp vil wol bewart,

7465 wan daz sị ungetoufet was;

lûter als ein spiegelglas

was si vor anderm meine.

vrouwẹ Japhîte diu reine

ûf eine hôhe brücke saz,

7470 daz nie dehein brücke saz,

von betten wart geslihtet,

mit tepten wol berihtet,

und mit liehten pfellen.

dô sach si ir gesellen

7475 gewâfent gegẹn dem gaste gên.

die mägde hiez si hôher stên

alle nebẹn ein ander dâ.

sus huop sich der strît sâ

under den herren beiden.

7480 geboten hêt der heiden

allen den sînen daz

benamen bî ir lîbe, swaz

im geschaden möhte ein man,

swâ si daz möhten understân

7485 mit werken od mit ræten,

daz si des niht entæten.

ouch was diu vrouwẹ Japhîte

niht strenge an dem strîte

swaz er ze lâzen ir gebôt:

7490 ê wær si gelegen tôt,

swaz er si lâzen hieze,

ê si daz niht enlieze.

daz wær ouch noch guot wîbes sit,

daz si iht harte wider strit

7495 und daz mit willen tæte

swes si ir vriunt gebæte,

sô belibe ir minne stæte.

Rôaz mit zorne zuo im gie;

unminniclîche er in enpfie

7500 ûf den schilt mit starken slegen.

dô ẹntweich im der werde degen

mit scherme allez ûf den sal.

ouch sluoc er daz der helm erschal

under wîlen, als er mohte.

7505 swen im sîn slahen tohte,

sô sluoc er, daz der schiltes rant

sich vil vaste unz ûf die hant

kloup engegẹn der buckel nider.

sô treip in abe dẹr heiden wider

7510 mit starken slegen gegẹn der tür.

sus entweich er wider unde vür

mit listen vür die vrouwen.

die schilte wurdẹn zehouwen

vil sêre von in beiden.

7515 sin getorste niemen scheiden,

noch dar zuo gesprechẹn ein wort,

wan der wære gewesen mort

von im, des hêt er gesworn.

den selben strît hêt er erkorn

7520 im ze vehten eine.

vrouwẹ Japhîte diu reine

klagtẹ des jungen rîters nôt.

si was gewis daz im der tôt

dâ von ir vriunde wære beschert.

7525 und ist daz er sich des erwert,

sô hât ir huotẹ diu sælicheit

mit vlîze wol an in geleit,

wan sô hât der rîter gar

swaz im leides ie gewar

7530 mit liebe überwunden

und ganze vreude vunden.

des was ab si gar âne wân,

wan der künic Rôaz, ir man,

was ein helt ze sîner hant;

7535 sînen gelîchen niemen vant

über al die heidenschaft;

er hêt mänlîche kraft

und ganze kunst ze strîte;

des sluoc er wunden wîte;

7540 dâ von wart manger sigelôs

der sînen lîp von im verlôs.

er was gar âne triuwe;

sîn herze dâ von riuwe

und vil grôze swære gevie,

7545 swen er ze guote iht begie;

grimmes muotes was er vol.

daz erzeigẹt er disem rîter wol,

wand er mit slegen ûf in gie.

er sluoc in daz er an diu knie

7550 kom vor vrouwẹn Japhîten.

ditz was ein hertez strîten,

wandez muose gelten gar,

swaz si beide brâhten dar:

den lîp, guot und êre.

7555 her Gwîgâlois vil sêre

sich schamen des begunde

und spranc ûf an der stunde,

als ez im nie wære geschehen.

die vrouwen begunder an sehen;

7560 der schœne gap im solhe maht

daz er abèr mit kreften vaht.

dâ von wil ich den vrouwen jehen,

daz ir minniclîchez sehen

des mannes herze enzündet;

7565 ir grôziu schœne schündet

ûf aller slahte vrümicheit,

ze tugent und ze manheit.

daz hœre ich die vrumen sagen,

die von in dicke müezen tragen

7570 grôze liebe und herzeleit.

mîn lop wær in baz bereit,

wær mir ir heimlîche bekant;

sus schrîb ich mit vremder hant

als der mit golde umbe gêt

7575 des in niht grûzwert bestêt.

wær ich ein sô werder kneht

daz mir ir güete und ir reht

baz kunt würde getân,

sô schribe ich baz dan ich noch hân;

7580 des sint si sus von mir erlân.

Nâch vrouwen minne lît manger tôt;

si vüegent jâmer unde nôt,

herzeliche und herzeleit.

dise rîter wârn bereit

7585 ze dienen nâch ir hulden.

der heiden tet ẹz von schulden,

wand er hêt ein schœne wîp;

dirre liez ab sînen lîp

bliuwen und zehouwen

7590 durch sîne liebe vrouwen,

die schœnen magt Lârîen,

die er zeiner âmîen

sînem lîbe hêt erkorn

ist daz ez dâ niht wirt verlorn.

7595 daz bewarte ouch er vil vaste.

der heiden von dem gaste

eine wunden in ein bein enpfie

diu im an daz herze gie,

dâ von er an der stunde

7600 vil sêre hinken begunde.

dô daz sîn schœne wîp ersach,

von grôzem leide ir herze brach;

ir swære begunde stîgen

und ir vreude sîgen;

7605 ir schœnẹ verwandelt sich dâ gar;

ir antlütze wart missevar,

daz ê in hôhem [gẹ]müete

baz danne ein rôse blüete.

ir swære daz bescheinde

7610 daz sị in mit triuwen meinde;

diu ougẹn ir über liefen;

vil mangen siuften tiefen

den nam si ûf von herzen

umb ir gesellen smerzen;

7615 der tet ir inniclîche wê.

dise zwêne rîtẹr als ê

ein ander vaste umbe triben,

unz daz in niht was beliben

der schilte wan die riemen.

7620 dô schiet si leider niemen,

vrouwen, rîter noch kneht;

ir gir was zesamne sleht

beiden ûf des tôdes wân;

dazn getorste niemen understân.

7625 valsches sloz, untriuwen zil

daz was der heiden, der daz spil

sînem muote hêt erkorn,

dar inne der tôt als ein dorn

in dem meien blüete.

7630 zorn und ungemüete,

daz uns tuot wê, daz tet im wol.

sîn barmunge alsam ein kol

was, daz gar erloschen ist.

des leben hêt deheine vrist,

7635 swen sîn mortgirigiu hant

an deheinem strîte überwant:

des leben wart des tôdes pfant.

Dô vâhten si unz an die zît

daz ir rîterlîcher strît

7640 mit grôzem jâmer ende nam.

ir ietweder âne scham

vil grôze slege dâ enpfie.

geselleschaft diu was hie

under in beiden tiure.

7645 ir helme mit viure

vil ofte wurden bedaht;

sus vâhten si die langer naht.

si muosen sich vil vaste wern

und mit starken slegen nern,

7650 wand ez galt lîp unde guot.

si hêten beide mannes muot,

beidiu kunst unde kraft;

dâ von was diu rîterschaft

hertẹ under in beiden.

7655 her Gwîgâlois den heiden

mit des swertes orte nam.

dô er im sô nâhen kam,

er kloup im brünje und îsengwant;

durch die brust er im zehant

7660 sluoc eine starke wunden,

dâ von er überwunden

sich dem tôde muose ergeben.

sus endet sich der werlte leben;

vreude, guot und êre

7665 des wirt in niht mêre

dan mir des keisers krône;

wan swer nâch gotes lône

in dirre werlt gedienet hât,

swen ez im an die zît gât

7670 daz er niht lenger leben sol,

der vert sæliclîche wol;

alsô müeze ouch uns geschehen.

dô vrouwẹ Japhîte hêt ersehen

daz ir man dâ tôter lac,

7675 ir süezen sit si verpflac

und zarte ir sîdîn gewant;

mit grôzem jâmer si zehant

über in lief dâ er lac.

von sînem tôde si erschrac

7680 sô sêre daz ir herze brast

lûte als ein dürrer ast,

swâ man den bricht enzwei.

si viel über in und schrei

ein sô jæmerlîche stimme,

7685 dehein man wær sô grimme

des muotes noch des herzen,

hêt er ir jâmers smerzen

und ir grôze klage ersehen,

im wær ze weinen geschehen.

7690 den helm bant si im abe

mit sô grôzer ungehabe

daz ez was zerbarmen;

mit ir wîzen armen

druhte sị in alsô tôten

7695 an sich; er was verschrôten,

mit bluote berunnen gar;

des nam si vil lützel war;

si kuste in, als er wære gesunt,

vil dicke an sînen tôten munt

7700 und weinde in jæmerlîche an.

si sprach ‘owê, lieber man,

nu hâstu dînen schœnen lîp

verloren umḅ mich armez wîp;

daz tuot mir herzenlîche wê;

7705 ouch sol ich mich niht sûmen mê

ichn werde dîn geselle

ze himel od zer helle,

swederhalp wir müezen sîn;

owê, lieber herre mîn,

7710 daz ich dich tôten ie gesach! ’

ir hâr si ûz der swarten brach;

daz was minniclîch gevar,

reit unde lanc gar.

si sprach ‘wâ nu Machmêt?

7715 dîne helfe ich ie hêt

ze ganzem trôste und dîn gebot;

Machmêt, vil süezer got,

ich hân dich geminnet ie;

wem hâstu mich nu lâzen hie?

7720 er lît tôter hie vor mir,

den ich bevalch mit dienest dir,

sît ich sîn kunde alrêrst gewan.

owê, Rôaz, vil lieber man,

ich muoz dich klagen, des gêt mir nôt;

7725 von dînem tôde bin ich tôt;

du wærẹ mîn herze und mîn lîp,

ich dîn herze und dîn wîp;

wir hêten beidiu einen muot:

swaz ich wolde, daz dûht dich guot;

7730 swaz du woldest, daz wolde ouch ich;

nu hât der ganze wille sich

von dînem tôde gescheiden

enzwischen uns beiden;

sît dîn herze ie was mîn

7735 und aller mîn wille dîn,

sô sol dîn tôt mîn tôt ouch sîn! ’

Si huop in in ir schôze hie;

mit beiden armen sị in umbvie

mit sô jæmerlîcher klage,

7740 swie truckenlîche ichz dâ sage,

dâ von ir herze dürkel wart.

owê der klägelîchen vart

und der jæmerlîchen nôt!

sus lac si klagendẹ ob im tôt.

7745 swie si wær ein heidenin,

ganze triuwe und stæten sin

mit liebe sị an in kêrte,

als si diu minne lêrte.

herzeliebe ist arbeit;

7750 ir ende bringet herzeleit.

daz wart wol an der vrouwen schîn;

wær si niht ein heidenîn,

sô müese ich klagẹn ir jâmers nôt.

hie lâgen samet vieriu tôt:

7755 zwô sêle und zwêne lîbe;

dem manne und sînem wîbe,

der sêle vor got sint erslagen;

solhen tót sol man klagen.

wol in, der dem entrinnen mac

7760 und der den êwiclîchen tac

verdienet; der hât wol gevarn.

er ist ein sælic muoterbarn,

swer dise werlt gebuwet alsô

daz sînes tôdes sîn sêle ist vrô;

7765 des leider nû niht vil ergêt.

her Gwîgâlois gestriten hêt,

daz er des bluotes was ersigen;

er hêt sich alsô gar erwigen

daz er vür tôt ouch lac aldâ.

7770 sich huop vil grôziu klage sâ;

in dem hûse über al

wart ein jæmerlîcher schal

von dem gesinde daz dâ was.

si liefen ûf den palas

7775 schrîunde owê, und rouften sich;

ir klage diu was jæmerlich

umb ir herrẹn der was erslagen.

ouch muosen si von schulden klagen

des reinen wîbes triuwe,

7780 diu von herzenriuwe

durch ir gesellen lac dâ tôt,

als ir der minne kraft gebôt.

diu twinget manic herze;

ir ende ist jâmers smerze,

7785 als ich iu hie bescheide;

liep zergêt mit leide.

alsô zergienc ir vreude gar,

die si mit ganzer liebe dar

hêten brâht vil manic jâr.

7790 Owê dir, tôt! du bist ein hagel;

vil bitter riuwe treit dîn zagel

und jæmerlîchez ende;

dîn sloz und dîn gebende

bindet und besliuzet daz

7795 dâ von diu ougen werdent naz:

daz ist jâmer unde leit.

ein rîter hie dîn wâfen treit,

der ez ie vil gerne gap.

sîn hant vil mangen in daz grap

7800 mit rîters were hât geleit.

sold ich von sîner manheit

nu sagen und von sîner kraft,

die er begie mit rîterschaft,

und wie er muose strîten,

7805 dô er die vrouwẹn Japhîten

mit dem hœhsten prîse erwarp,

dâ manic edel vürste starp

vor Babylôn von sîner hant —

âvoy, wie wol dâ wart bekant

7810 sîn kraft und sîn manheit!

mit rîterlîcher were er reit

durch die poinder mit slegen wider.

von sîner jost viel dâ nider

vil manic stolzer Babylôn

7815 dô den künic von Ascalôn

valte dâ sîn lanze;

der tet im fîanze:

daz spricht entiuschen sicherheit.

Rôaz sô rîterlîche streit

7820 daz er den prîs dâ gewan,

als er ê oft hêt getân:

in einem strîte vor Dômas,

dâ manic rîcher vürste was,

künịge, grâven, herzogen,

7825 sîn prîs sô hôhẹ dâ wart gezogen

daz in niemen mohte erlangen.

erslagen und gevangen

vuort er die vürsten in die stat.

sîn prîs sagt in dâ allen mat;

7830 sus steic er ie daz hœhste pfat.

Swaz er mit sîner manheit

ganzes lobes hêt bejeit

vil rîterlîche sîne tage,

daz wirt ze lanc, ob ich daz sage;

7835 dâ von wil ichz nû verdagen.

hie was grôz weinen unde klagen

von den mägden wol getân.

der tac begunde ouch ûf gân;

entslozzen wurdẹn diu bürgetor.

7840 dâ saz ein alter vürste vor,

der grâvẹ Adân von Âlârîe.

sîner bruoder drîe

sluoc Rôaz mit sîner hant.

sînen lîp und ouch sîn lant

7845 muos er in sînen gwalt geben.

alsô liez er in dô leben

daz er sîn portenære

unz an sîn ende wære;

des hêt er sîne sicherheit.

7850 ditz was ein jæmerlîchez leit

daz ouch bî im dâ lac erslagen

der gwalticlîche solde tragen

in dem lande zẹ Mirmidône

beidiu zepter unde krône.

7855 den vie Rôaz vor Dômas,

wand er im dâ vor lange was

herzenlîche vînt gewesen.

durch vrouwen bet liez er genesen

den selben vürsten, dô ern vie;

7860 er muose ouch dirre porte hie

hüeten unz an sînen tôt,

als im diu sicherheit gebôt

die er Rôaz hêt getân.

nu ẹrhôrte ir klagẹ der grâve Adân

7865 und ir jæmerlîchen schal,

der sich dâ huop ûf dem sal

von den mägden wol getân,

und daz daz tor wart ûf getân.

des nam in wunder und gie dar.

7870 dô vant er daz gesinde gar

in jæmerlîcher riuwe.

ir klage diu was niuwe

umb den wirt der was erslagen.

ouch muosen si mit triuwen klagen

7875 die reinen wirtinne,

diu guotes wîbes sinne

brâhte unz an ir ende.

âne missewende

lac diu vrouwẹ Japhîte tôt;

7880 des twanc si ganzer triuwe nôt

und herzenlîchiu minne.

sêle, lîp und sinne

schiet diu herzeleide.

nu seht wer si dâ scheide,

7885 herzeliep od herzeleit,

wie wirt daz gänzlîch geseit?

sît ich sîn niht gesagen kan,

wâ ist nû ein wîser man,

der mir den strît bescheide?

7890 starp si von herzeleide,

daz muosẹ von herzeliebe sîn;

diu gap ir herzen solhen pîn

dâ von ir schœner lîp verdarp.

ich wæns et von in beiden starp;

7895 anders ich mich niht verstên.

sold ich dem strîte nâch gên,

sô würde der rede lîhtẹ ze vil;

dâ von ich mich niht sûmen wil

an der âventiure.

7900 ist dehein crêatiure

diu ganzer triuwe geniezen sol,

so genist mîn vrouwẹ Japhîte wol,

wan si was ganzer triuwe vol.

Hie ist diu âventiure geholt.

7905 wâ ist nu der minne solt,

des wunsches âmîe,

diu schœne Lârîe?

hie lît ir vriunt, her Gwîgâlois,

den der milte Britanois,

7910 der künic Artûs, hât gesant

zer âventiurẹ, daz er daz lant

solde erwerben und die maget.

owê, daz den niemen klaget!

er lît hie leider âne kraft,

7915 der mit rehter rîterschaft

und mit ganzer manheit,

als uns diu âventiure seit,

vil mangen hôhen prîs gewan.

er lac dâ als ein tôter man

7920 âne kraft und âne sin.

die juncvrouwen hêten in

von dem houbte entwâfent gar

und nâmen des vil rehte war

ob er lebte od wære tôt.

7925 dô wâren im diu hiufel rôt

und allez lebelîch getân.

dô wolde in erslagen hân

vor leide diu vil süeze schar.

des wart der grâve Adân gewar;

7930 vil sêrẹ muot in sîn ungemach.

er lief über in und sprach

‘ey, guoten vrouwẹn! habt ir den muot

daz ir disem rîter guot

sînen lîp nemen welt,

7935 der rîterlîche als ein helt

die âventiure erstriten hât?

daz ist ein grôziu missetât,

wand er durch vrouwen minne

lîp, guot und sinne

7940 hât verloren vil nâch gar.

nu nemt, ir edeln vrouwen, war,

swâ ein sô guot rîter lebe,

wie mangem herzẹn er vreude gebe.

lât mich in neren ob ich müge;

7945 jâ wæn ie wîbes brust gesüge

bezzer rîter dan er ist.

nu gebet sînem leben vrist

unz erz verliese als ers ger;

jâ kan er wol mit sînem sper

7950 rîterlîchen tôt bejagen.

würd er von wîbes hant erslagen,

des leben âne missetât

sîne zît behalten hât

und der von sîner manheit

7955 den aller hœhsten prîs nu treit,

daz würde ein jæmerlîchez leit.

Ir mugt in gerne lâzen leben.

iun mac sîn tôt doch niht gegeben

die vrouwen noch den wirt wider.

7960 sîn übermuot der valte in nider

und sîn gewalt den er begie

an dirre juncvrouwen hie,

vrouwen Lârîẹn, der schœnen maget.

der sluoc er, als mir ist gesaget

7965 ir vater, der hie schône

truoc zepter unde krône

nâch küniclîcher werdecheit.

nu hât errochen dạz selbe leit

dirre helt mit sîner hant!

7970 dem erteile ich maget unde lant.

ouch wil ich im vür disen tac,

swâ ich kan unde mac,

mit lîbe und mit guote

dienen nâch sînem muote;

7975 daz ist mîn reht: ich bin sîn man;

swaz man im tuot od hât getân,

daz hilfe ich rechen swâ er wil.

ich bin komen ûf daz zil

daz mînes leides wirdet rât;

7980 mîn sicherheit ein ende hât

die ich dem künịge hêt getân

ich solde nimmer komen dan,

die wîle er lebte, von dem tor;

dâ hüete ouch nû ein ander vor!

7985 der mich dâ von enbunden hât,

dem sol mîn helfe und mîn rât

immer undertænic sîn.

nu stêt ûf, lieber herre mîn!

ich tuon iu helfe mit triuwen schîn.’

7990 Er rihte in ûf und sach in an.

sîn härsenier daz was im dan

von dem houbte enbunden gar.

von bluotẹ diu wangen und sîn hâr

diu wâren jæmerlîch getân.

7995 ‘owê’, sprach der grâve Adân

‘dîner lieben âmîen,

der schœnen magt Lârîen!

diu muoz immer sîn unvrô,

verdirbt dîn schœner lîp alsô

8000 in ir minne dienest hie.’

von dem namen dô gevie

kraft der halptôte man;

er sûfte sêre und sach si an

die bî im dâ wâren dô.

8005 des wart der grâve Adân vil vrô;

er sprach ‘herre, gehabt iuch wol!

iuwer leit sich hie enden sol.

ez hât erstriten iuwer hant

eine schœne maget und ein lant

8010 dem sich niht gelîchen mac.’

nu was ez alsô hôher tac

daz diu sunne erzeicte ir schîn.

dô weinde manic heidenîn

von hôher [gẹ]burt ûz Asîâ

8015 ir vil lieben vrouwen dâ,

die getriuwen vrouwẹn Japhîten.

ezn lebte bî den zîten

dehein vrouwe mit sô reinen siten.

owê, wan solde ich guotes biten

8020 ir sêlẹ der lîp alsô verdarp!

diu vrouwẹ von herzeleide starp.

ich geloube daz si sül genesen;

diu wâre riuwe ist gewesen

ir touf an ir ende.

8025 herre got, nu sende

ze schirme ir dîne barmicheit,

diu manger sêle ist bereit.

herre, getürre es iemen gern,

sô soltu si genâden wern,

8030 daz si genieze ir triuwe:

ir touf was diu riuwe

die si dolte umb ir liep.

dô kom der tôt als ein diep

und stal dem reinen wîbe

8035 daz leben ûz ir lîbe

als ich iu ê hân geseit,

herzeliebe ist arbeit;

ir ende bringet herzeleit.

Diu burc glaste als ein glas.

8040 niht rîter mêr dạr ûffe was,

niwan dise zwêne man,

her Gwîgâlois und grâve Adân.

ich sagiu wâ von daz geschach

daz man niht rîter drûffe sach:

8045 der künic was ân angest gar

daz durch daz tor iemen dar

möhte komen vor dem rade;

ouch was sîn angestẹịn ander schade:

er vorhte daz ir minne

8050 vil lîhtẹ diu küniginne

gewante an einen andern man.

deiswâr, desn hêt si niht getân, —

daz erzeiget sị an ir tôde sît —

wan daz diu liebe zaller zît

8055 ir liep vil gernẹ mit huote hât.

an ir was aller huote rât,

wan si was âne missetât.

Vierzic was der vrouwen;

dar under mohtẹ man schouwen

8060 vil grôzen jâmer unde klage.

vür wâr ich iu ein mære sage:

ich wil gelîchen dirre nôt

eines vil edeln vürsten tôt

von Merân, dâ ịch jâmer sach

8065 und von klage dẹn ungemach

von der werlte wunne,

ez möhtẹ diu liehte sunne

ir schîn dâ von verlorn hân.

daz tâten vrouwen wol getân,

8070 geboren von der hœhsten art

diu ie in der werlte wart.

dâ was solch jâmer unde klage,

ob ich mîn herziẹ ḥie ganzez trage,

daz ich des niht gelouben mac.

8075 ich hôrtẹ dâ mangen grôzen krac

von reiner vrouwen herzen;

diu truogen jâmers smerzen

umḅ des edeln vürsten tôt.

sî sîn sêle in deheiner nôt,

8080 dâ nim si ûz, vil reiner Krist!

wan du sô bescheiden bist

daz du der reinen wîbe klagen

und sîne nôt niht solt vertragen.

gedenkẹ bî dîner menschei

8085 wie brœde süeze ir leben treit,

und gip daz wir verdienen hie

die vreude die dhein ôre nie

gehôrte noch nie ouge ersach

noch nie munt dâ von gesprach

8090 daz sich iht gelîche dar.

herre, nim dîner [gẹ]schefte war

ê dan si verzwîvelẹ gar.

Got müeze im dort genædic sîn!

nu wil ich an die rede mîn

8095 wider grîfen dâ ịch si lie.

her Gwîgâlois der lac hie

under der trûrigen schar.

ein reiner muot erkucte im gar

daz herze und sîne sinne.

8100 er sprach ‘owê, minne,

gêret sî dîn süezer nam!

dir solde niemen wesen gram;

du bist ze sprechẹn ein lindez wort

und treist iedoch vil scharfen ort

8105 und eine herte snîde.

waz ich von dir lîde

kumbers und hân erliten!

du hâst ze nâhen mir gesniten

enmitten durch daz herze mîn!

8110 vrouwe Minne, ich muoz sîn

dîn gevangen; du hâst mich gar

mit dîner kraft gezogen dar

dâ von ich niht gewenken mac.

jâ ist si mînes herzen tac

8115 und der wunsch mîner sinne.

vrouwẹ Lârîe, küniginne,

wenne sol ich dich gesehen!

mîniu ougen kunden rehte spehen

dô si dir prîses jâhen!

8120 wenne kum ich dir sô nâhen

daz sich mîn herze erküele an dir!

du solt von rehte werden mir,

wand ich dich, vrouwe, erstriten han.’

sîn gebærde wart alsô getân

8125 sam si bî im wære dâ.

grâve Adân der vienc in sâ;

bî dem arme zôch er ịn dan.

er sprach ‘herre, gedenket dar an

daz iu nû daz wægest sî

8130 und lât solhe gedanke vrî.

iuwer leit daz sol nu ende haben.

die tôten lâze wir begraben

und habẹn uns an der vreuden vart.’

der rede im dô gevolget wart

8135 dô sich her Gwîgâlois versan.

Rôaz der wart verstolen dan

zehant von der tievel schar

daz sîn dâ niemen wart gewar

unz daz man in ûz solde tragen;

8140 dô huop sich alrêrst grôzez klagen

und weinen von den vrouwen.

‘hie bî mugt ir schouwen’

sprach her Gwîgâlois der degen

‘daz unser toufe und unser segen

8145 ein schirm vür den tievel ist.

wolt ir gelouben an Krist,

nâch dem wir kristen sîn genant,

sô enpfienget ir zehant

der engel genôzschaft

8150 und enmöhte iu niht des tievels kraft

geschaden noch sîn arger list

vor dem der uns dâ schirmẹṇde ist,

wan daz ist der wâre got.

wir gelouben daz in sîṇẹm gebot

8155 ist swaz ie geschaffen wart

und daz er schirmet und bewart

swaz sîn genâde erkennet.

unser gloube in alsô nennet:

vater, sun hêrre geist.

8160 sô ịst daz unser volleist,

der gotes sun, der mägde kint.

die an disem glouben sint

und behaltent kristen ê,

die sint ze gnâden immer mê.

8165 nu schaffẹt daz ẹz iu alsam ergê! ’

Mit triuwen sprach der grâve Adân

‘ich wirde im gerne undertân

swer vor dem tievel mich bewart.

ez ist ein jæmerlîchiu vart

8170 sol nu der mensche zẹ helle varn.

mac iuwer segen mich bewarn

vor der helle und kristen ê,

sône wil ich mich niht sûmen mê

ich enpfâhẹ der kristen ê zehant.

8175 solde mîn sêlẹ des wesen pfant

des der lîp hie begât,

und daz ir nimmer würde rât,

sône hêt ich hie niht wol gevarn;

den selben tôt sol ich bewarn.

8180 vervluochet sî diu heidenschaft,

sît an ir des tievels kraft

sînem gwalt mac erzeigen.

ich wil mich dâ hin neigen

dâ sîn gewalt ende hât

8185 und mîner sêle wirdet rât.

wâ nû der touf? ich bin bereit,

sît ûz unser ê hin treit

der tievel einẹn sô werden man.

mîner sêle ich niemen gan

8190 wan dem der si geschaffen hât,

in des gewalt diu werlt stât,

der ie was und immer ist.

den nennet ir den wâren Krist;

der ist den ich dâ meine;

8195 er ist got alters eine

und iedoch endriu genamt;

sîn gotheit diu ist ensamt

und immer ungescheiden.

swie gar ich sî ein heiden,

8200 von dem gedanke kom ich nie

ichn minnẹt iedoch den got ie

der uns geschuof von nihte.

nu bin ich an die rihte

alrêrst des gelouben komen;

8205 dâ von ich wunder hân vernomen,

dem wil ouch ich nu volgen nâch;

zer toufe wart dem grâven gâch.

dône was niht pfaffen bî im dâ.

her Gwîgâlois der sprach sâ

8210 ‘wir sulen bîten, grâve Adân,

got hât wol zuo uns getân:

er hât mir den sic gegeben

und iu daz êwige leben

gẹoffent gẹnædiclîche;

8215 sus sî wir beide rîche

von gotes gnâden worden.

ir sult in Kristes orden

die toufe enpfâhẹn und kristen ê;

ich wil benamen nû niht mê

8220 mîn leit mit solhem jâmer klagen.

wir sulen got genâde sagen

und unser liep mit vreuden tragen.’

Des volget im der grâve Adân.

ir klage wart dô hin getân;

8225 ze vreuden rihten si ir leben.

guot trôst den vrouwen wart gegeben

von dem jungen wirte dâ.

vrouw ẹn Japhîten truoc man sâ

mit grôzer klage vür daz tor;

8230 dâ legt man die reinen vor

in einen rôten jâchant.

den sarc man dâ stênde vant

ûf zwein siulen êrîn.

zwei glas gesetzet wâren dạr în

8235 zir vüezen und zir houbet, —

ichn weiz ob irz geloubet —

diu wârn gefult mit balsamô;

den zunde man, und brinnẹt alsô

noch hiute, als mir ist geseit.

8240 ûf den sarc wart geleit

ein saphir lâzûrvar.

den sarc hêt gemeistert dar

Rôaz dô er gewaltes pflac.

wart Gahmuret ze Baldac

8245 von dem bâruc bestatet baz,

deiswâr, daz lâze ich âne haz,

wand er hêt grôze rîcheit.

umḅ disen sarc wart geleit

von golde ein grôzez vingerlîn: —

8250 dar an was ir triuwe schîn —

zwô hende nâch der triuwe.

mit herzenlîcher riuwe

vrouwe Japhîte wart begraben.

mit guldînen buochstaben

8255 gesmelzet ûf den jâchant

ein êpitâfîum man vant

gebrievet von ir tôde hie,

heidenisch und franzois, wie

si starp von herzeleide.

8260 die schrift sagten beide

‘hie lît in disem steine

vrouwẹ Japhîte diu reine,

der ganzer tugent niht gebrast.

ir kiusche truoc der êren last.

8265 an stæte gewancte nie ir muot;

si was gewizzen unde guot

und truoc die wâren minne.

mit zühticlîchem sinne

lebt si nâch wîplîchem sit;

8270 dem volget ganze triuwe mit.

si was geborn von hôher art.

getriuwer wîp niene wart

geborn noch sô valschlôs.

ir schœnen lîp si verlôs

8275 von herzenlîcher riuwe;

den tôt gap ir diu triuwe

die si Rôaz, dem heiden, truoc,

den Gwîgâlois, der kristen, sluoc.

diu vrouwe was ein heidenin;

8280 von disem lîbe schiet si hin

leider ungetoufet

im selbẹn er sælde koufet

swer umḅ den andern vrumt gebet.

nu wünschet gnâdẹn an dirre stet

8285 der sêle, swer die schrift hie lese,

daz ir got genædic wese

durch sîne grôze erbarmicheit,

wan si den tôt von triuwen leit;

diu riuwe ir abe ḍạz herze sneit.’

8290 Beslozzen wart der edel stein.

an ietwederm orte schein

von golde ein rinc spanne wît;

dâ mit was zer selben zît

der saphir ûf den sarc gehaben.

8295 von golde ein rouchvaz was ergraben

besigelt ûf den jâchant,

dar innẹ man zallen zîten vant

mit süezem smacke brinnen dâ

diu reinen thymlâmatâ.

8300 sus wart der sarc gehêret,

grôz rîcheit dran gekêret,

undẹr einem [gẹ]welbe märmelîn;

der gap wider eịn ander schîn,

rôt, grüenẹ, weitîn und gel.

8305 daz gewelbe daz was sinwel,

mit gemælde wol gezieret,

von golde geparrieret.

ditz was der heiden bethûs.

der rîche künic Artûs

8310 möhte mit aller sîner habe

die gezierde an dem grabe

niht hân erziuget und den stein,

dô er aller rîchest schein,

dar innẹ diu vrouwe bestatet was.

8315 der estrich was als ein glas

lûter, grüene, spiegelvar.

daz gewelbe hêt gemeistert dar

Rôaz durch sînen hôhen muot.

er hêt âne mâze guot;

8320 daz schein an der gezierde wol.

nu was sîn hôchvart als ein kol

mit dem lîbe erloschen gar.

sus wârn verendet sîniu jâr,

als ich iu gesaget hân.

8325 dô diu bivilde wart getân,

[dô] giengen die vrouwen wol getân

und daz gesindẹ mit klage dan

dâ her Gwîgâlois dô stuont.

si tâten als die wîsen tuont,

8330 die âne helfẹ mit leide lebent

und sich dem zwîvel gar ergebent:

sị ergâben sich in sîn gebot

und mantẹn in bî dem wâren got

daz er bedæhte ir swære

8335 und in genædic wære;

si woldẹn im wesen undertân.

des antwurt in der grâve Adân

an der selben stunde,

wand er die sprâche kunde,

8340 heidenisch und franzois.

er sprach ‘mîn herrẹ, ḥer Gwîgâlois

der wil iu gerne wesen guot,

ob ir nâch sînem willen tuot;

daz ist sîn rede und ouch sîn muot.’

8345 Si sprâchen ‘herre, wir sîn bereit

im nâch sîner werdicheit

ze dienen als sîn wille gert.

er ist sô biderbe und sô wert

daz er uns niht verderben lât.

8350 swaz mîn herrẹ ḥie [ge]lâzen hât,

daz nem er gar in sîne pflege.’

sus wîsten si in von dem wege

und zeictẹn im silber unde golt.

si wurden im von herzen holt

8355 durch sîne tugent reine.

golt und edel[gẹ]steine

des vant er âne mâzen vil;

dô was ab sîner vreuden zil

von im ze verre; dạz tet im wê.

8360 geltes engerte er niht mê

wan daz er sîne âmîen,

die schœnen Lârîen,

dâ bî im hêt nâch sîner nôt.

dem grâven Adân er gebôt,

8365 swaz er dâ guotes vünde,

daz er sichs underwünde

und ẹz im behielte durch sîn bet;

sus underwant sich an der stet

der grâve alles des dâ was.

8370 dô giengens ûf den palas.

dâ vunden si den halsberc

und daz heidenische werc

dar innẹ Rôaz wart erslagen;

daz hiez der alte grâve tragen

8375 in ein kemenâten von dem wege.

dô hêt er gar in sîner pflege

daz hûs und allẹ die rîcheit

diu dâ zesamne was geleit,

und swaz diu mûre umbe vie.

8380 mit dem grâven er dô gie

in eine kemenâten dan;

dâ ẹntwâfent in der grâve Adân

und wuosch im sîne wunden;

dar nâch wart er gebunden

8385 mit vil grôzem vlîze wol.

sîn herze wart dâ vreuden vol,

wand er hêt überwunden gar

swaz im leides ie gewar;

diu sældẹ was sîn geleite dar.

8390 Dô gebunden wart der degen

und eine wîle was gelegen

durch ruowe und einen slâf getet,

dô entwachte er und sprach sîn gebet.

er genâdet got vil tougen

8395 mit wazzerrîchen ougen

der genâden die ẹr an im begie.

dar nâch er mit dem grâven gie

dâ er den tisch gerihtet vant;

dô saz er und enbeiz zehant.

8400 der grâvẹ truoc im die spîse dar

vil williclîch; dô nam er war

daz sîn triuwe und sîn muot

wider in was ganz unde guot;

dône hêt er dẹheinen zwîvel mê.

8405 im tet niwan der jâmer wê

nâch der mägde wol getân;

der was sîn lîp undertân

mit herzen und mit sinne;

er truoc die wâren minne

8410 ir mit ganzer stæticheit.

ouch was si dar an verzeit

daz er iht lebte; daz was ir klage

in ir muote alle tage,

wan si im guoten willen truoc;

8415 sîn leit ir an daz herze sluoc,

des si doch niemen zuo gewuoc.

Als der helt enbizzen was,

dô gienc er von dem palas

durch schouwen vür daz bürgetor;

8420 dâ vant er gesatelt vor

ein harte schœne kastelân.

dô bat in der grâve Adân

dar ûffe erringen sînen muot;

des volgẹt er im und dûhte in guot.

8425 dô er ûf daz ros gesaz,

sîns jâmers er ein teil vergaz

und vie ze vreuden niuwen muot,

als der guote rîter tuot

wen er ze velde kumt geriten

8430 und er nâch rîterlîchen siten

sîn ros ze rehte ersprenget

und im daz wol verhenget

nâch sînem willen als er wil.

dâ hebet sich reht rîterspil

8435 swâ der vil zesamne kumt

den beidiu kunst und ellen vrumt;

dâ wirt gehurt unde geslagen,

dâ von si mâl müezen tragen

grôzẹ wunden unde biulen

8440 von swerten und von kiulen;

ouch wirt verstochen lîhte ein sper

sô dort kumt gevaren her

ein poinder der niht vrides gert.

ein kranker zügẹl unlange wert

8445 ern brestẹ von zügen lîhte enzwei.

würde genomen ein turnei

von den ôsterherren ûf daz Sant,

dâ würde gevaterschaft entrant

sô sich die poinder vlæhten

8450 und nâch gewinne dæhten.

ich hân ir sliche wol ersehen,

wie si nâch guote kunnen spehen

sô sich der poinder wirret

und si diu stat niht irret.

8455 dâ mac verliesen wol ein man

der niht mit rîterschefte kan

swaz er ze velde bringet.

nu hêt vil wol geringet

der junge rîter sînen muot.

8460 daz ros was im vür trûren guot;

sîn geverte im niuwe vreude gap.

er reit ez in den walap

dar nâch in die rabîne;

er liez die schenkel sîne

8465 ze rehte vliegen gegẹn der man.

swer nu rîter prüeven kan

und an in rehten prîs erspehen,

hêt er den rîter dô gesehen,

er müese im ganzes prîses jehen.

8470 Sus reit er gegẹn der burc wider;

von dem rosse erbeizter nider

und haftez vür daz bürgetor

an einer linden ast enbor.

sînen willen hêt ez wol getân.

8475 dô gie gegẹn im der grâve Adân,

mit im sehs videlære:

die woldẹn im sîne swære

mit videlen vertrîben.

dô begunden si ẹz rîben

8480 mit künsticlîchen griffen,

unz im was gar entsliffen

diu swære von dem herzen sîn,

wan daz ein grôzer jâmers pîn

versigelt [en] mitten drinne lac

8485 des er zallen zîten pflac.

swie manger hande vreude er sach,

sîn herze iedoch des einen jach

‘mirn wirt nimmer jâmers buoz

ich enpfâhe ir minne und ir gruoz

8490 der güete mir sô nâhen lît.’

ditz was sîn stæticlîcher strît.

dô die herren sâhen

daz diu sunne nâhen

ir louf hêt verendet gar,

8495 dô nâmen si des nebels war

den man dâ nider sîgen sach.

her Gwîgâlois zem grâven sprach

‘heizet den harnasch bringen her,

iuwern schilt und iuwer sper,

8500 und rît [et] ouch selbe mit mir dar.

ich wil der zît nemen war

wenne der nebel nider gê.

wir suln daz rat stellen ê.

ich wil ûz ze Joraphas,

8505 dâ ich gester morgen was,

zem grâven Môrâle.’

dô nam er dẹheine twâle;

er wâfent sich und reit von dan.

dô volget im der grâve Adân

8510 zuo dem rade dâ ez gie.

daz wazzer er dô ûf vie;

zehant gestuont daz selbe rat.

den getriuwen grâven er dô bat

daz er des landes huote;

8515 des wolde er im mit guote

gerne lônen; daz lobt ouch er.

er sprach ‘herre, iuwer gewer

wil ich des landes gerne sîn.

ich nim daz ûf die triuwe mîn

8520 daz ichz iu behalte,

wan mich mac mit gewalte

nieman dâ von gescheiden.

swie ich sî ein heiden,

ich gestên iu zaller iuwer nôt

8525 michn irre es dannẹ der bitter tôt.’

des gnâdeter ịm und wart sîn vrô.

durch daz tor reit er dô.

gẹoffent wart diu selbe vart

diu mit dem rade was bespart

8530 an der selben stunde.

der grâve dẹm herren gunde

mit triuwen grôzer êren.

dannen begunder kêren

die strâze gegen Joraphas.

8535 dô kom er dâ erbeizet was

grâvẹ Môrâl mit den sînen.

sîne triuwe liez er schînen

dô er den rîter komen sach.

wîder die sînen er dô sprach

8540 ‘dort kumt ein rîter geriten her!

ich wæne wol daz ist der

gester morgen von uns schiet.’

ieslîcher dô besunder riet

‘nein! der schilt ist im ze glanz,

8545 unverhouwen unde ganz.’

‘dâ ịst ein boie geslagen an

von golde; den vüert der grâve Adân

anders niht wan durch den list

daz er ein gevangen ist.’

8550 ‘ditz ors ist blanc, daz sîn was rôt.’

‘waz ob er lebet?’ ‘nein, er ịst tôt!’

‘wer weiz daz?’ — nû vuort er daz rat

verhouwen, des sîn herze ie bat;

dô ẹrkanden sị in an der stat.

8555 Zen orsen si dô sprungen.

dô wart sêre gedrungen,

gehurt durch sîne liebe dar.

vil schierẹ der rîter wart gewar

daz ez vriunde wâren;

8560 dône wolde er ir niht vâren.

sîn sper hêt er gesenket nider;

daz zuhte er ûf vil gâhes wider.

der grâvẹ Môrâl enpfienc in dô,

dar nâch die rîter; si wâren vrô

8565 daz er sô sigelîche reit.

der grâve sprach ‘herre, seit

ob ir ze Glois habt gestriten?’

er sprach mit zühticlîchen siten

‘jâ, des ist unlougen.’

8570 des getriuwen grâven ougen

vor vreuden über liefen dô.

er sprach ‘lieber herre, sô

sult ir uns wærlîche sagen

ob der heiden sî erslagen.’

8575 ‘jâ, benamen! ’ sprach der degen.

‘sîn hôher muot der ist gelegen

und sîn gewalt den er begie.’

vor liebe er in dô umbe vie

und kuste in an die hende sîn.

8580 er sprach ‘lieber herre mîn,

nû ịst ergangen des ich bat.

ouch sol ich hie an dirre stat

mîniu lêhen von iu hân.

ich wil werden iuwer man

8585 und leisten swes ir, herre, gert,

wand ir sît aller êren wert.

iu hât verdienet iuwer hant

eine schœne maget und zwei lant;

dâ von ir mugt nâch wunsche leben;

8590 diu Sælde hât iu wol gegeben.

ouch wil ich iu vür wâr sagen:

iuwer houbet sol zwô krône tragen:

diu einẹ hœret ze Korntîn,

diu ander ze Jeraphîn;

8595 daz lant lît an dem lebermer

si sint gwesen mit solher wer

sît Rôaz der lande pflac

daz sîn gewalt dâ ringe wac.

si wârn dem künịge undertân

8600 dâ von ich ê gesprochen hân,

den Rôaz der heiden sluoc;

die krône er gwalticlîche truoc.

si dienent gerne iuwer hant

swen in diu wârheit wirt bekant

8605 daz Rôaz erslagen ist.

herre, nu tuot niht lenger vrist;

enpfâhẹt mich, als ich hân gegert! ’

er sprach ‘herre, des sît gewert.’

dô wart gevolget sîner bet:

8610 er ẹnpfie ịn und lêch hin an der stet

dạz im sîn vater niht lâzen hêt;

diu êrẹ die zagen gar vergêt!

dô diu rede vẹrendet wart,

der grâve huop sich an die vart,

8615 er und ein sîn dienestman,

gegen Glois ûf die plân.

den herren bat er bîten dâ.

vür daz tor rante er sâ;

dâ bî habt der grâve Adân;

8620 den bat er sich wizzen lân

ob der heiden wære erslagen.

er sprach ‘jâ! ouch sult ir klagen

mîner vrouwẹn Japhîten nôt,

diu lac vor leide nâch im tôt.

8625 ouch muoz ich von schulden klagen

einen künic der lît hie erslagen,

Gârel von Mirmidône.

in dem selben lône

lît Karrîôz und Marrîên.

8630 in des gebot ich hie stên

der daz allez hât getân.

swâ ich im gedienen kan,

deiswâr, des ist er unbehert:

sîn manheit mit sælden vert.

8635 er rîtet gegen Joraphas

zẹ iuwerm hûse, dâ ẹr ê was;

ir sult in wol enpfâhen dâ.’

er sprach ‘ich tuon.’ dô kêrter sâ

von der hôhen brücke nider

8640 ze sînem lieben herren wider.

den helm er im abe bant;

sper, schilt und îsengwant

hiez er die knappen vüeren dô.

si lobten got und wurden vrô

8645 daz im sô wol gelungen was.

sus kômen si ze Joraphas

geriten vür daz bürgetor.

dâ was michel vreude vor

von manger hande seitspil;

8650 man hôrte dâ busûnen vil

blâsen nâch der heiden sit;

dâ sluogens unde wurfen mit

die tambûr mit behendicheit;

der galm dâ wider eịn ander streit

8655 sô daz diu burc al erhal.

von dem tor gie her zetal

engegen im diu wirtîn.

si hiez in willekomen sîn

und kuste in an sînen munt.

8660 die andern vrouwen tâtẹn im kunt

ir gruoz nâch wîplichem sit.

ob er zuo den vrouwen rit?

nein, er was erbeizet vor.

si truogẹn in mit gedrange enbor

8665 die in dâ gerne sâhen.

dâ was grôz enpfâhen

von dem wirte und von den sînen;

si liezen an im schînen

daz er in liep ze herren was.

8670 sus ruowẹt er dâ ze Joraphas

unz daz man sîne âmîen,

die schœnen magt Lârîen,

brâhte dar von Roimunt.

den vürsten allen tet man kunt

8675 mit den boten in diu lant,

die âventiure hêt entrant

von hôher art eins heldes hant.

Den vürsten allen wart enboten,

beidiu mit brieven und mit boten,

8680 daz si kæmen ze Korntîn:

dâ solden sị ze dem hove sîn

über sehs wochen.

sus wart der hof gesprochen

über diu lant wîten.

8685 loufen unde rîten

hiez man die boten sâ zehant

mit den brieven in diu lant.

der grâve bereite sich dar zuo

daz er des andern morgens vruo

8690 rit gegen Roimunt.

diu mære wurden wîten kunt

daz Rôaz wære erslagen;

daz hôrtẹman lützel iemen klagen.

des andern morgẹns der grâvẹ gie

8695 vür sînen herren, dâ ẹr enpfie

einen brief und sîne botschaft

als ez sînes herzen kraft

und rehtiu liebe meinde;

daz er sît wol bescheinde.

8700 der selbe brief besigelt was

under einem adamas

in ein guldin vingerlîn;

der stein solde ein zeichen sîn

sîner stæten minne.

8705 mit worten und mit sinne

enbôt er sînẹr âmîen,

der schœnen magt Lârîen,

sînen gruoz und allez guot,

als noch vil dicke ein rîter tuot

8710 dar er herzeliebe treit

und der sîn dienest ist bereit.

der grâvẹ nam urloup und schiet dan;

mit im sîner dienestman

driu hundert und ein sîn genôz;

8715 der was von gebürte grôz,

des grâven sun von Lêodarz;

der was geheizen Bejolarz,

sîn muoter Bejolâre,

diu süeze und diu klâre;

8720 der bruoder was der grâvẹ Môrâl.

dô nâmen si niht lenger twâl;

ûz dem lande si dô riten

nâch der vrouwen; diu hêt erliten

vil jâmers nâch dem rîter guot;

8725 des was getrüebet ir der muot

und ir herze an vreuden wunt.

sus kâmen si ze Roimunt

geriten an dem næhsten tage.

ir grôzen jâmer und ir klage

8730 die boten in benâmen;

dô si zem hûse kâmen,

si wurden wol enpfangen.

der grâve kom gegangen

vür sîne vrouwẹn Lârîen,

8735 des wunsches amîen.

sînen mantel er von im gap.

ditz was der rede urhap:

‘vrouwẹ, iu enbiut mîn herre

sînen dienest alsô verre,

8740 der den helden hât erslagen,

daz ichz sô wol niht kan gesagen

als ez sîn herze meinet;

daz er iu wol bescheinet

ob ir des, vrouwe, geruochet

8745 sîn dienest gnâde suochet —

und ob er rehtes gẹniezen sol.

sîn hant diu hât verdienet wol

daz iuwer minne im lône:

iuwer lant und iuwer krône

8750 hât mîn her Gwîgâlois erstriten

und kumbers vil durch iuch erliten.

er sendet iu ditz vingerlîn;

der stein sol ein zeichen sîn

sîner stæten minne.’

8755 dô sach si dạrinne

gebrievet durch den adamas

daz diu maget gerne las.

der brief alsus geschriben was:

Trôst in mînem leide,

8760 des wunsches ougen weide

sît ir und der sælden spil.

mit liebe ich immer grüezen wil

iuwern minniclîchen lîp.

ich hân iuch vür älliu wîp

8765 erwelt mir ze lône.

mîner vreuden krône,

vrouwe Lârîe, daz sît ir.

nu komet und enpfâhẹt von mir

iuwer krône und iuwer lant;

8770 daz hât mîn sælde und mîn hant

erledigẹt und diu gotes kraft.

triuwe und rehte geselleschaft

die leiste ich iu mit stæticheit.

mîn herze iu wâre minne treit.

8775 ich bin als iuwer wille gert.

sî ich sô biderbe und sô wert,

sô komet unde heilet mich.

iuwer gevangen bin ich;

an mir ligent iuwẹriu bant.’

8780 niht mê si dâ geschriben vant.

daz golt leit si an die hant.

Ûf stuont diu maget rîche.

vil gezogenlîche

neic si des herren botschaft

8785 und antwurt ir vil endehaft.

si sprach ‘gnâde mînes herren;

im sol unlange werren

der kumber den er von mir hât;

ich gibe im helfe unde rât

8790 und mînen lîp ze lône.

hêt ich tûsent krône,

die soldẹn im wesen undertân.

er hât sô vil durch mich getân

daz ichs im gerne lônen wil,

8795 beidiu mit ernste und mit spil,

swie er sîn geruochet.

swaz sîn wille suochet

an mir, daz hât er vunden;

ich heile im sîne wunden

8800 und gibe im solher minne teil

dâ von sîn herze wirdet geil.

ich wilz nu sprechen überlût:

er was doch mînes herzen trût;

ich hêt in mir ze liebe erkorn;

8805 er wart ze trôste mir geborn;

wol der muoter diu in [ge] bar;

nâch sînem willẹn ich gerne var

durch sîne liebe swar er wil;

des gibe ich iu niht lenger zil.

8810 wil mîn vrouwe, ich bin bereit!

swaz mîn munt iht anders seit,

daz ist niht mînes herzen wort,

wan daz hât er bî im dort

und ich daz sîne bî mir hie;

8815 der selbe wehsel ergie

enzwischen uns beiden

dô wir uns muosen scheiden.’

vor vreuden si dô weinde.

diu wârheit daz bescheinde

8820 daz ir der helt liep was.

si sprach ‘ist er ze Joraphas?’

der grâve sprach ‘vrouwe, jâ.

alsô wunder ruowẹt er dâ

und hât uns her nâch iu gesant.’

8825 diu schœne maget gie zehant

vür ir muoter, die künigîn.

si sprach ‘vrouwe und muoter mîn,

sît uns got erhœret hât,

sô ist mîn bet unde mîn rât

8830 daz wir hie niht lenger sîn;

wir sulen varn zuo Korntîn

in daz künicrîche.’

daz lobten dô gelîche

die dâ gesinde wâren,

8835 wan si in zehen jâren

daz lant nie gesâhen.

si begunden alle gâhen

und bereiten sich zer heimvart.

vil manger sprach ‘ô wol mich wart,

8840 daz ich sol ze lande varn!

got müeze sînen lîp bewarn

der uns daz lant gẹoffent hât! ’

schœne pfärt, und rîchiu wât

den vrouwen wart zer reise brâht.

8845 belîbens was in ungedâht;

der verte wârens alle vrô.

ûf die soumærẹ luot man dô

manger hande rîcheit:

golt, gesteine, pfelle breit,

8850 vil gezierde wart darûf geleit.

Diu altvrouwe Amênâ hiez.

die burc si mit gedinge liez

ir truhsæzen Azzadac,

der manheit unde triuwen pflac.

8855 sus vuoren si mit vreuden dan.

die vart ich niht geprüeven kan

sô wol als si geschicket was.

von Roimunt ze Joraphas

die köche riten vür enwec.

8860 der vrouwen garzûn, Schandalec,

der hêt sich nâch in ûz erhaben;

sîne gesellen und die knaben

die man zer küchen ouch bedarf

die truogen kröul die wâren scharf.

8865 den treip man die soume nâch.

die knappen man dô ziehen sach

diu ors dar nâch in einer schar;

den volget daz gesinde gar.

dar nâch die stolzen vrouwen riten;

8870 die vuorten kappen wol gesniten

von brûnem scharlachen.

mit schimpfe und mit lachen

die rîter kurzten in die vart.

ie zwein ein vrouwe bevolhen wart

8875 der si mit vlîze pflâgen.

sîne dorfte niht betrâgen

der schimpflîchen mære;

verswunden was ir swære

und ir vreude ûf gestigen.

8880 zwô busûne selten swigen;

die blies man daz engegen hal

beidiu berge unde tal.

sus vuoren si mit rîcheit.

nâch der schar hinden reit

8885 des wunsches âventiure,

der sælden krêatiure,

vrouwe Lârîe, der vreuden kranz.

ir gereite was von golde glanz

und von gesteine lieht gevar;

8890 sus glast ez wider eịnander gar.

den sitich man ir ze næhist zôch

diu wîbes missewende vlôch.

daz schœne pfärt diu maget reit

als ez her Gwîgâlois erstreit

8895 mit rîterschefte ûf einer plân,

dâ von er grôzen prîs gewan.

eine kappen vuortẹ diu maget guot

von pfelle; rôt als ein bluot

was daz golt drîn geweben;

8900 die hêt ir grâvẹ Môrâl gegeben

ze stiure zuo ir heimvart,

diu im sît wol vergolten wart;

dâ was gefurrieret în

ein veder wîz härmîn;

8905 dâ vor ein zobel zẹ rehte breit;

ûf die kappen wârn geleit

borten mit gesteine.

ouch vuortẹ diu maget reine

ûf ir houbet einen huot;

8910 der was von pfâvedern guot

mit rôtem golde wol durchleit.

ir muoter nâhen bî ir reit;

die zoumte hovelîche

Bejolarz der rîche.

8915 ir pfärt was swarz und ir gewant;

dâ bî der jâmer was bekant

den si nâch ir gesellen truoc,

den Rôaz der heiden sluoc;

aller vreuden si verpflac

8920 sît daz ir vreude an im gelac.

Môrâl der grâve zoumte dô

vrouwen Lârîẹn und was des vrô

daz si sô rehte schœne was.

sus brâhte er si ze Joraphas

8925 mit vreuden in ir eigen lant,

dâ si den helt mit vreuden vant;

des twanc in grôzer liebe kraft.

er was mit sîner [ge] selleschaft

ûz ze velde gegẹn in komen,

8930 wand er die botschaft hêt vernomen

von ir garzûne Schandalec.

der was an loufe alsô quec

daz er vor in daz botenbrôt

enpfie, dâ mit er sîne nôt

8935 überwant mit rîcheit.

her Gwîgâlois mit vreuden reit

von Joraphas ûf die plân

engegẹn der mägde wol getân;

der was sîn lîp undertân.

8940 Mit im vil stolzer rîter riten,

die ouch des vil kûme erbiten

daz si ir vrouwen solden sehen.

der schœne muose er prîses jehen

swer ir lîp ie gesach;

8945 dar zuo was ir herzen dach

gewizzen, scham und güete;

ir antlütze daz blüete

als ein rôse wol gevar;

ir lîp was âne wandel gar.

8950 diu sælde ir ouch mit vlîze pflac.

ir beider jâmer dâ gelac

dô si her Gwîgâlois ersach

sîn munt ûz grôzen vreuden sprach

‘ô wol mich wart, vil lieber got!

8955 mir hât dîn helfe und dîn gebot

dise magt ze vreuden brâht.

des ich mir selbẹ niht hêt gedâht,

daz hâstu mir gevüeget.

der êren mich genüeget

8960 die du mir, herre, hâst gegeben,

und læstu mir ze vreuden leben

dise maget wol getân,

die ich mir ze trôste hân

erkoren und ze vreuden gar.’

8965 vor liebe wart er missevar

dô er zuo ir kam geriten;

diu minnẹ sîn herze hêt versniten.

ir schœniu varwe ouch wandel nam;

ir wîplîch kiusche und ir scham

8970 machte si rôt und dar nâch bleich.

ir ganziu varwe ir entweich

dô si den helt bî ir sach,

der vil minniclîche sprach

Lârîe, liebiu vrouwe mîn,

8975 ir sult mir willekomen sîn

ze trôstẹ nâch mînem leide.

mîns herzen ougen weide

sît ir und mîner vreuden kraft.

stæte und rehte geselleschaft

8980 die sult ir mir erzeigen.

ich wil mit dienest neigen

mînen lîp in iuwẹr gebot,

wandich hân iuch mir nâch got

zeiner gebieterinne erkorn.

8985 mîn arbeit ist niht verlorn

ob iuwer minnẹ mir lônen wil.’

dô wart im gedanket vil

von der mägde wol getân.

si sach in guetlîche an,

8990 wan si truoc im holden muot.

si sprach ‘mîn lîp und ouch mîn guot

daz sol iu, lieber herre mîn,

immer undertænic sîn.

krône, zepter und mîn lant

8995 daz hât erledigẹt iuwer hant;

des ich iu gerne lônen wil

beidiu mit ernest und mit spil

nach iuwerm willen als ir gert;

iuwẹr werder prîs ist lônes wert.

9000 ir sult iuch underwinden mîn;

in iuwer pflege wil ich sîn,

ich und mîn gesinde gar;’

vrouwe Amênâ reichte im dar

ir tohter zoum mit der hant;

9005 her Gwîgâlois sich underwant

alrêrst sîner amîen,

der schœnen magt Lârîen;

des wart er herzenlîche vrô.

gegẹn der burc reit er dô

9010 mit vrœlîchem schalle.

die rîter begunden alle

vor ir buhurdieren

mit rîchen banieren.

von hurtẹ die schilte gâben schal

9015 sô daz manic knie geswal

von hurte und von gedrenge.

diu strâze wart vil enge

von der edeln rîterschaft.

dâ wart zebrochen manic schaft

9020 von slegen und von hurte enzwei.

ez wære worden ein turnei,

hêten sị ir harnasch gehabet.

desn wirt iu dehein eit gestabet:

dâ was vil manic rîter guot,

9025 dem sô hôhe stuont sin muot

von den vrouwen die dâ riten

daz si nach rîterlîchen siten

diu ors mit hurte umbe triben,

unz in niht vil was beliben

9030 der schilte ganz an dem spil.

ouch was dâ spilliute vil,

die ir kunst [ouch] uobten dâ.

zwô busûne blies man sâ

vil krefticlîche vor dem tor.

9035 man vant dâ michel vreude vor

von dem liute daz dâ was.

sus brâhtẹ der helt ze Joraphas

die magt mit grôzer hêrschaft.

aller vreuden überkraft

9040 vunden sị nâch ir willen dâ.

ir juncvrouwen enpfie dô sâ

vrou Bêlêârẹ, diu wirtîn,

dar nâch die zwô künigîn.

die vrouwen vuorte sị von dem wege

9045 in ir heimlîche pflege,

dâ in allez guot geschach

und nâch ir willen guot gemach;

der handelungẹ man prîses jach.

Her Gwîgâlois durch sîne zuht

9050 vermeit der wâren minne vruht,

daz er ir minne niene pflac

noch bî der schœnen nie gelac

unz daz er si ze stæte nam.

dô diu zît des hoves kam,

9055 die vürsten riten in daz lant

nâch den der helt hêt gesant.

Rîâl, der kunic von Jeraphîn,

kom mit den gesellen sîn

gevaren vrümiclîche;

9060 er woldẹ sîn künicrîche

enpfâhen von des heldes hant

der den heiden überwant.

vür Korntîn ûf daz velt

wart vil manic hôch gezelt

9065 von pfelle geslagen ûf daz gras.

swaz volkes mit dem künịge was

gevarn von sînem lande,

die riten helfande,

als uns diu âventiure giht.

9070 daz selbe lant hât rosse niht,

niwan helfande;

die ziehents in dem lande.

der brâhtẹ der künic zweinzic dar.

die truogen sîn gesinde gar,

9075 dar zuo grôze rîcheit:

zobelbelge und pfelle breit,

härmîn, bunt unde grâ;

niht ander kleider vint man dâ;

des brâhtẹ der künic wunder dar.

9080 ouch kom geriten eịn ander schar

vür daz hûs ze Korntîn: —

an den was grôz [er] jâmer schîn —

drî vürsten rîche und wol bekant.

Medârîe hiez ir lant;

9085 von danne wâren si geborn.

ir herren hêten si verlorn

ûf dem gevilde bî Roimunt;

er wart von einer joste wunt

mit einem sper von Angran

9090 sô sêre daz der werde man

sich dem tôde muose ergeben.

ich sagiu wer im nam daz leben:

her Gwîgâlois, der wîgant.

der herre wart mir sus genant:

9095 der werde künic Schaffilûn;

Medârîe und Belakûn,

diu lant wârẹn im undertân.

sus verlôs der werde man

an rîterschefte sînen lîp.

9100 den solden klagen älliu wîp:

sîn dienst in allen was bereit.

durch [die] vrouwen Lârîẹn er reit

die âventiure erwerben;

ein jost diu lêrte in sterben

9105 ûf dem gevilde bî Roimunt.

den selben vürsten was unkunt

daz ir herre wart erslagen,

wan diez in wider solden sagen,

die muosẹn ir sicherheit bewarn;

9110 ze Britanje wâren si gevarn,

als in her Gwîgâlois gebôt.

die vürsten klagtẹn ir herren tôt

offenlîche und tougen,

mit vliezenden ougen.

9115 si riten pfärt diu wâren kranc.

ir hâr und ir berte lanc,

ungeschorn und ungetwagen.

ûf ir schilte wârn geslagen

bâre von rôtem golde,

9120 dâ bî man sehen solde

daz ir herre was erslagen;

sus sach man si den künic klagen

mit herzenlîcher riuwe.

daz schuof ir grôziu triuwe;

9125 ir klage diu was niuwe.

Dar kom vrouwẹ Êlamîe geriten,

durch die der helt hêt gestriten,

her Gwîgâlois, der werde man,

der er daz pfärt wider gewan,

9130 als ich dâ vor hân geseit.

diu kom mit grôzer rîcheit

gevaren und mit grôzer kraft.

vil werde geselleschaft

vuorte diu maget rîche:

9135 zwelf mägde sûberlîche,

wol gekleit unde geriten;

niht nâch wîplîchen siten:

si vuorten mannes kleider an

und hêtenz ofte guot getân

9140 an manger rîterschefte

mit wîplîcher krefte.

vil schœniu ors zôch man vor in.

vrouwẹ Êlamîẹ, diu künigin,

brâhtẹdie wünniclîchen schar

9145 in ir geselleschefte dar.

si wârn von Âlârîe geborn

und hêten ir wîpheit verkorn

und rîterschaft an sich genomen.

ich sagiu wâ von daz was komen:

9150 diu ir aller vrouwe was,

der en wart vor Dômas

gevangen an eiṇẹm strîte.

nâch dem selben zîte

nam si an sich rîters leben;

9155 des wart ir hôher prîs gegeben.

si was ein maget wol getân.

ir en hiez der grâve Adân,

den Rôaz der heiden vie

dâ schœniu rîterschaft ergie.

9160 an einer schumpfentiure

valt in der ungehiure

hinder ḍạz ors; daz was im leit;

und nam dâ sîne sicherheit

als ich iu dâ vor hân geseit.

9165 Diu schœne magt Marîne hiez.

deheine rîterschaft sị enliez

dâ man prîs solde bejagen,

man müesẹ von ir getât dâ sagen

und von ir gesellen.

9170 si kunde wol gevellen

mit rehter jost die rîter nider.

beidiu vor des und ouch sider

an rîterschefte ir magetuom

bejaget rîterlîchen ruom.

9175 si was ir guotes milte.

ûf kleidern und ûf schilte

truoc si lewen guldîn.

vrouwẹ Êlamîẹ, diu künigîn,

vuor nâch wîplîchem sit;

9180 dem volgten rîche vürsten mit,

grâven unde herzogen.

si was dar an niht betrogen

sine hêt rîcheit genuoc.

ze Tŷô si [die] krône truoc;

9185 üb ẹr al daz künicrîche

gebôt si gwalticlîche.

si was ein maget, niht ein wîp,

und wolde des rîters lîp

mit ir schœne erworben hân

9190 der ir daz pfärt wider gewan.

dô was mîn vrouwẹ Lârîe,

des wunsches âmîe,

an wîbes schœne wandels bar;

ir grôziu schœne erlaschte gar

9195 aller wîbe schœne.

die schellẹn gâben gedœne

an vrouwẹn Êlamîẹn gereite,

geworht mit arbeite

von goldẹ vil meisterlîche.

9200 diu küniginne rîche

erbeizte an einer wisen dâ

vür daz hûs; dô vant si sâ

ir gezelte ûf geslagen

von samîte, dạz hêt getragen

9205 ein starkiu olbende dar:

die snüere wârn von sìden gar;

dạrûffe stuont ein guldìn gar;

Dar kômen von der heidenschaft

geriten mit grôzer kraft

9210 zwêne künịge ûz Asîâ;

die wolden ir swester dâ,

die getriuwen Japhîten, holn,

die in der tôt hêt verstoln.

dô ditz jæmerlîche leit

9215 den edeln künịgen wart geseit,

si huoben sich mit klage dar.

ir herze wurden vreuden bar;

daz si wol bescheinden:

si klagten unde weinden,

9220 als ir triuwe in gebôt,

des vil reinen wîbes tôt.

die künịge hiezen beide,

als ich iu hie bescheide,

Zaradech und Panschavar.

9225 ûf die rede kômen sị dar

daz si daz vil getriuwe wîp,

der süezen vrouwẹn Japhîten lîp,

mit in gevüeret wolden haben.

dô was ir reiner lîp begraben

9230 und mit gezierde bestatet sô

daz sis ze sehen wâren vrô.

vür wâr wil ich iu sagen daz:

wart ie dehein wîp bestatet baz,

daz wil ich lâzen âne haz.

9235 Ouch kâmen ûz der heidenschaft

durch vreude und durch rîterschaft

herzogen unde grâven vil.

Korntîn, der vreuden zil,

wart daz hûs dâ genant,

9240 wan man dâ zallen zîten vant

vreude nâch des herzen gir —

sus sagt diu âventiure mir —

sit daz sîn begunde pflegen

Gwîgâlois, der werde degen,

9245 und mîn vrouwẹ Lârîe.

der zweier kurtosîe

sich zem wunsche hêt geweten;

si wâren nider ûz getreten;

ir zuht stuont an der mâzen zil;

9250 des wurden si geprîset vil.

dô si zem hove wâren komen,

der namen ir wol habt vernomen,

und der ich niht genennen kan,

dô mohtẹ man schouwen ûf der plân

9255 vil manic hêrlîch gezelt;

dâ was rîcheite gelt

wider eịnander gekêret.

diu velt wârn gehêret

mit banieren und mit schilten.

9260 die edeln rîter spilten

aller hande rîterspil.

man vant dâ kurzewîle vil,

als des mannes muot was.

her Gwîgâlois von Joraphas

9265 mit schalle küniclîche reit

und manic rîter gemeit,

wol gekleit unde geriten.

ob rîterschaft dâ würdẹ vermiten?

nein, deiswâr! si tâtenz dâ

9270 verre baz dan anderswâ,

wan dâ reit der sælden spil,

der schœne ich niht gelîchen wil,

diu süeze magt Lârîe,

des wunsches âmîe.

9275 âvoy, wie stolzlîch si reit!

mit rôtem samît gekleit

was diu maget wol getân;

dâ ẹngegẹn ir munt von rœte bran

als ein vil edel rubîn.

9280 an ir schœne was wol schîn

daz ir der wunsch gedâhte:

got si zer werlte brâhte

dô ze vreuden stuont sîn muot.

ezn gebluotẹ nie schœner bluot

9285 dan ir antlütze lieht.

mîn herze kan erdenken nicht

noch si mîn munt geprîsen sô

sine wære verre schœner dô

si zem hove kom geriten;

9290 zwô liehte varwe an ir striten:

rôt und wîz alsam ein snê;

doch behabtẹ diu rœte ir strîtes mê,

wand ez was in der sumerzît

sô diu hitze rœte gît.

9295 bî ir reit der werde degen,

des pflac der wâre gotes segen,

her Gwîgâlois, der triuwen stam.

von sîner manheit was sîn nam

gebreitet als der sunnen schîn.

9300 sîn herze truoc vil hôhen pîn

nâch der mägde wol getân,

daz er si muose sehen an

und doch ir minne niene pflac.

vil gelîch ir beider minne wac;

9305 diu herzeliebẹ under in zwein

alsô gesamet wart enein;

daz sît wol an ir stæte schein.

Die vürsten und ir dienestman

die in wâren undertân

9310 enpfiengen wol den werden degen,

der des landes solde pflegen,

und ir rehte vrouwen.

man mohte wunder schouwen

von der vreude die man dâ vant.

9315 dâ was mit vreuden gar daz lant,

iegelîch volc nâch sînem sit.

dâ bliesen busûnære mit

in vier enden ûf der plân.

dâ wart diu rîterschaft getân

9320 die man wol prîsen mohte;

dehein zage niht entohte

under der tugenthaften schar,

wan dâ wârn die besten gar

von allem dem rîche.

9325 die enpfiengen rîterlîche

den herren und die künigîn.

sus brâhtẹ man si ze Korntîn

mit rîterlîchem schalle.

des vreuten si sich alle

9330 die zem lande hôrten;

mit vreuden si dô stôrten

ir vil jæmerlîche tage,

die si mit riuwiclîcher klage

hêten gehabt wol zehen jâr;

9335 die verkêrten sich nu gar

ze vreuden von ir zweier ê.

dône wart dâ niht gebiten mê,

diu vrouwe vuor an ir gemach.

her Gwîgâlois zen gesten sprach

9340 sînen gruoz vil minniclîche

und bat si alle gelîche

im dâ willekomen sîn.

sus besaz dô Korntîn

her Gwîgâlois mit rîcheit.

9345 dâ was solch wirtschaft bereit

die ich niht wol kan gesagen.

nach sînem willen zuo zwelf tagen

beliben die vürsten dâ.

zwei herhorn blies man sâ

9350 vil krefticlîche vor dem tor.

alle die dâ wâren vor,

die kômen ûf den palas.

vrouwe Lârîe ouch komen was,

gekrœnet als ein keiserîn.

9355 ein ander krône guldîn

truoc vor ir vrouwẹ Marîne,

diu in rîters schîne

hêt vil reinen magetuom,

wan daz diu vrouwe durch ir ruom

9360 wolde versuochen rîters leben.

si kunde wol nâch êren geben

und mit zühten wesen vrô.

ir kiusche behielt sị alsô

daz diu nie besprochen wart;

9365 sus was ir wîpheit bewart

âne valsch unz an die zît

daz si zer ê sich habte sît;

des was ir ganzez lop vil wît.

Rîâl, der künic von Jeraphîn,

9370 sît ez sîn reht solde sîn,

nam des jungen rîters swert,

des eckẹ der êren hêt gegert

daz manz sô werdiclîche truoc,

dô ez den starken heiden sluoc,

9375 daz ez von sînen slegen nie

deheiner slahte mal enpfie;

daz truoger vor der vrouwen bar.

und die glavîe bluotvar

der grâve Môrâl vor ir truoc

9380 dâ mit er den wurm sluoc

der grôzen mort hêt getân

an vil mangem werden man

und sô verwuost hêt daz lant

daz man da wênic liute vant;

9385 des wart der helt geprîset vil.

vrouwe Lârîe, der sælden spil,

gegẹn im mit hôhem muote gie.

bî der hant si in gevie

dem man sô hôhes prîses jach.

9390 widẹr in si minniclîche sprach

‘her Gwîgâlois, mîn amîs,

sît ir nu tragt den hœhsten prîs

von iuwer ellenthafter hant,

sô nemt die krône und mîn lant

9395 und mînen lîp in iuwẹr gebot.

herre, ich hân iuch mir nâch got

ze trôste mînem lîbe erkorn;

swaz ich vreuden hân verlorn,

der mugt ir wol ergetzen mich.

9400 herre, nu tuot alsô daz ich

und ir mit triuwen sîn enein

sô daz diu herzẹ under uns zwein

stæte liebe einander tragen.

des leit ich wil mit leide klagen

9405 und des vreude ich vrô wil sîn,

daz sît ir; ich tuon iu schîn

daz iuwer minnẹ mir nâhen gêt.

in iuwẹrm gebot mîn lîp hie stêt;

swaz ir welt, daz wil ouch ich.’

9410 der rede vreutẹ der rîter sich

und genâḍẹt ir an der stunde

als er beste kunde

mit worten und mit herzen,

wand er des jâmers smerzen

9415 dannoch unverendet truoc,

des er doch niemen zuo gewuoc.

herzeliebe ist ein schûr,

dem lîbe ein herter nâchgebûr;

ir süeze wirt vil ofte sûr.

9420 Rîâl, der künic von Jeraphîn,

gap die lieben vrouwen sîn

im ze stæte nâch ir bet;

mit rehter ê wart an der stet

diu stæte gevestent undẹr in dâ.

9425 ein vingerlîn daz legte er sâ

der juncvrouwen an ir hant;

dâ wider gap si im daz lant

und vrâgẹt die helde mære

ob daz ir wille wære.

9430 dô wart ein vrœlîcher schal

von dem liute über al

daz si sîn alle wæren vrô.

vrouwe Lârîe satzte im dô

ûf sîn houbet schône

9435 die guldînen krône

und bevalch in sîne hant

ir lîp, ir liute und ir lant

mit einem zepter guldîn.

dô kuste er die künigîn

9440 und nam si in sînen gwalt.

mit ir minne si im galt

sîne nôt dô mê dan tûsentvalt.

Dô disiu rede vẹrendet was,

dô huop sich ûf dem palas

9445 von vreuden harte grôzer schal.

die tische wâren über al

geriht nâch küniclîchem sit.

den truhsæzen giengen mit

busûner die in bliesen vor.

9450 man warf die tambûr enbor

mit slegen daz der wîte sal

dem gedœne engegen hal.

man gap dâ grôze wirtschaft

und aller vreuden überkraft

9455 sâhen si die wîlẹ man az.

her Gwîgâlois der künịc vergaz

alles sînes leides hie.

dô er von dem tische gie,

die maget nam er bî der hant.

9460 mit vreuden giengen si zehant

von den liutẹn an ir gemach.

ob ie rîter baz geschach

von wîbe, dạz liez er âne haz;

geschach ouch ie vrouwen baz

9465 von manne, dạz lie si âne nît;

daz erzeicten si einander sît

mit herzenlîcher minne,

wand ir zweier sinne

mit ganzen triuwen wurdẹn enein

9470 sô daz diu herzẹ under in zwein

hêten beidiu einen muot;

swaz si wolde, daz dûhte in guot;

ouch was sîn wille der vrouwen jâ.

sus versigèlt diu minne dâ

9475 mit herzeliebe ir herze enein

sô daz diu liebẹ under in zwein

eines willen pflâgen.

niemen darf des vrâgen

ob si die naht iht wæren vrô.

9480 jâ si, deiswâr, ir vreudẹ was sô

daz ich der niht gelîchen mac.

mit herzeliebe unz an den tac

si sich underviengen.

dar nâch si beidiu giengen

9485 wol nâch mittem morgen

mit vreuden âne sorgen

dâ man in eine messe sanc.

sich huop dâ harte grôz gedranc

dô si gekrœnet giengen vür.

9490 die kamerære bî der tür

wielken ez mit starken slegen.

nu hêt her Gwîgâlois der degen

ze Glois in die burc gesant

dâ man die juncvrouwen vant

9495 und den getriuwen grâvẹn Adân.

die vuortẹ man mit einander dan

bî der naht ze Korntîn;

si wolden ouch zer messe sîn

dâ der helt gekrœnet gie.

9500 ein bischof die bredịge vie

mit sô süezen worten an

daz der getriuwe grâve Adân

sîne sünde begunde klagen.

er entslôz in die wîssagen

9505 und die ewangêlisten

unz er mit gotes listen

und mit der rehten wârheit

ir gelouben überstreit

daz si der toufe wâren vrô.

9510 nâch ir bet toufte man dô

vrouwen Marînẹn und grâvẹn Adân,

dar nâch die mägde wol getân

die vrouwẹ Marîne brâhte dar.

dô si getoufet wâren gar

9515 und kristen ê enpfiengen,

mit vreuden si dô giengen

vür den künic ûf den sal

dâ die vürsten über al

sâzen und die künigîn.

9520 Rîâl, der künic von Jeraphîn,

sîn lant aldâ von im enpfie;

dar nâch vil manic vürste gie,

die sînes ortes wâren geil.

iedoch bleip im der bezzer teil:

9525 dise vrouwen und diu lant

bejagt sîn ellenthaftiu hant

und sînes herzen manheit.

swer ie sô grôze nôt erleit

durch vrouwen, dem erteile ich daz

9530 er si habẹ mit vlîze baz

dan einer der da heime lît

unz man im eine vrouwen gît

der eigen er wol möhte sîn.

daz nim ich ûf die triuwe mîn

9535 daz der sô wol niht wirt gepflegen

noch sô süeze bî gelegen

als der durch die man kumber hât

und diu ze hôhem gwinne stât;

ich wæn der minne nâhen gât.

9540 Dar umb enweiz ich anders niht

wan als diu âventiure giht

diu mirz kunt hât getân:

diu sagt uns daz der werde man

vrouwen Lârîen pflæge alsô

9545 daz si der pflege wære vrô.

er volzôch ir muote

mit lîbe und mit guote;

des was ir schœner lîp wol wert.

dô er die vürsten hêt gewert

9550 ir lêhen, als si an gezôch,

ir deheines muot dâ von envlôch

sine swüerẹn im alle hulde dâ.

dô gebôt er den vürsten sâ

daz si behielten Karles reht

9555 und diu gerihte machten sleht

übẹr allez sîn rîche.

daz wart dô stæticlîche

gevestent, als er in gebôt.

sus hêt daz lant sîne nôt

9560 mit vreuden überwunden.

an den selben stunden

kom mîn her Gâwein geriten

vür die burc nâch sînen siten;

die wâren harte rîterlîch,

9565 wand er was wert unde rîch,

als ez an sîṇẹm geverte schein.

sus kom mîn her Gâwein

selbe vierde in daz lant: —

die vuorten werlîche hant —

9570 Êrec und mîn her Gâwein,

Lanzelet und her Îwein.

ir geselleschaft und ir muot

was âne valsch mit triuwen guot.

si kâmen dar mit rîcheit,

9575 wol geriten und gekleit,

als ez ir êren wol gezam;

ir geverte daz was âne scham.

si vuorten ingesindes vil.

busûnen unde seitspil

9580 vor in ûf der strâze hal.

von vreuden was dâ grôzer schal

ûf dem hûse und dâ vor.

die rîter giengen vür daz tor

und enpfiengen wol die geste.

9585 dâne was dehein gebreste

des guotes noch der êren;

daz begundẹ man allez kêren

in ze liebe und ze guote

mit herzen und mit muote.

9590 ir harnasch man vor in zôch.

aht ors starc und hôch

zôch man den soumen nâch,

diu man vil wol verdecket sach

mit samîte der was rôt,

9595 der ouch den schilten decke bôt

daz si dâ bî iht wærn bekant

swâ si riten durch diu lant.

sus kâmen si ze Korntîn.

der künic und diu künigîn

9600 enpfiengen si mit triuwen wol,

als sun sînen vater sol.

her Gâwein in umbe vie;

vor vreuden er die zäher lie

ûf sîne wât vallen.

9605 mit triuwen âne gallen

si sich underkusten;

des mohte si wol lusten:

si wârn ze sehen eịnander vrô.

vrouwe Lârîe kuste dô

9610 die gestẹ, als si der künic bat.

die vürsten giengen von ir stat

und enpfiengen sị alle besunder.

daz was niht ein wunder

war umb si kômen in daz lant:

9615 her Gwîgâlois der hêt gesant

einen brief dem herren Gâwein,

dạran ein ingesigel schein

daz er sîner muoter lie

dô er mit jâmer von ir gie

9620 und si sît nimmer mê gesach;

dar an im doch ein leit geschach

daz sînes herzen vreude brach.

Der brief sagt im diu mære

wie er worden wære

9625 künic über zwei lant

und wie sîn ellenthaftiu hant

die âventiure hêt erstriten.

derselbe brief begunde in biten

und manen herzenlîche

9630 daz er die väterlîche

triuwe an im behielte

und kæme dâ er wielte

zweir lande und ir krône;

die wæren im ze lône

9635 gegeben umb sîn arbeit

und ein künigîn gemeit

der schœnẹ man niht gelîches vant.

sus kam her Gâwein in daz lant

ze sînes sunes hôchvart,

9640 dâ er vil wol enpfangen wart.

dar nâch er den wirt gevie

bî der hant unde gie

an eine heimlîche stat,

dâ er in mit jâmer bat

9645 von sîner lieben muoter sagen.

dô huop sich êrste grôzez klagen

und herzenlîchiu swære

dô ẹr diu gewissen mære

vernam von der muoter sîn.

9650 er sprach ‘owê, künigîn,

dạz ich dîner minne enbern muot!

dîn handelungẹ unde dîn gruoz

was mîner vreuden ôstertac!

swen ich an dînem arme lac

9655 und dînen lîp umbe vie,

owê, sô was mir rehte wie

ich wær in dem pardîse!

dîner minne spîse

nam mir dicke mînen sin.

9660 der jâmer gît mir ungewin.

wol der wünniclîchen zît

der ich mit grôzem jâmer sît

vil herzenlîche hân gedâht,

sô diu winterlange naht

9665 mîner swære was ze lanc

und mich diu grôze liebe twanc

diu nâhen in mîṇẹm herzen saz;

dâ von ich nimmer mê vergaz

dîner reinen güete

9670 irn gedæhte mîn gemüete.

sus hân ich immer jâmers vil.

durch mîner vrouwen êre ich wil

allen wîben wesen holt

und si liutern als ein golt

9675 mit worten swâ ich immer kan.

ich wil ir aller dienestman

und ir kempfe immer wesen,

wan niemen mac ân si genesen

der ir güete erkennen kan;

9680 in solden wesen undertân

von rehte alle krône,

wan sich ir süezem lône

nimmer niht gelîchen mac.

owê, gelebte ich noch den tac

9685 daz ich mîn trût müese sehen,

sône möhtẹ mir lieber niht geschehen!

daz wizze, lieber sun mîn,

nu solt ab dû mîn vreude sîn,

sît dich mir got hât gegeben;

9690 dîn werdicheit ist gar mîn leben.

des lobe ich unsern herren Krist

daz dir sô wol gelungen ist

und wil sîn immer wesen vrô.’

nâch der rede giengen sị dô

9695 wider zir geselleschaft.

dâ was von vreuden grôziu kraft

und minniclîcher vrouwen vil,

der schœne ist gar der vreuden zil

und werltlîchiu wünne.

9700 der in niht guotes günne,

der müez von in gescheiden sîn.

si gebent vreude und hôhen pîn,

dem herzen senlîche nôt.

wan ir gnâde, wir wæren tôt

9705 an vreuden und an muote.

ze liebe und ze guote

geschuof si got der werlte gar.

ô wol der wünniclîchen schar

die got alsô gekrœnet hât

9710 daz gar der werlte vreude stât

an ir vil reinen güete!

si nidernt hôch gemüete

und hœhent dicke nidern muot.

wol im der nâch ir willen tuot!

9715 ir trôst der ist nâch ir willen tuot!

Dô dem herren Gâwein

vrouwen Lârîen schœne erschein

und ir lîp rehte ersach,

wider sî er güetlîche sprach

9720 ‘ô wol dir, minniclîcher lîp!

gebar dînẹ schœne ie dẹhein wîp?

daz ist doch ungeloublich.

ich wæn got selbe worhte dich

mit sîner gotlîchen hant.

9725 swaz ich vrouwen hân erkant

od mit den ougen ie gesach,

der schœne macht dîn schœne swach.

du bist ir aller spiegel.

ich hân noch her den ziegel

9730 vür lûter glas an gesehen;

dîner schœne muoz ich prîses jehen;

du solt ir aller krône tragen.

dîn schœne mangen hât erslagen

der noch wol lebte sîne zît.

9735 ich wæn dîn süeziu minne gît

dem herzen jâmers stimme.

du bist diu wâre gimme

senlîcher minne

des herzen und der sinne.

9740 ichn gan dîn niemen alsô wol

als dem der dich dâ haben sol,

mit dem du, vrouwe, solt genesen.

ir sult mîn vreude beidiu wesen

swar ich in der werlte var.

9745 got hât sînen vlîz gar

ze wunsche wol an iuch geleit;

und læt er iuch âne leit

alsô mit vreuden alten,

und welt ir danne behalten

9750 die sêlẹ, sô wirt daz ende guot.

nu gebe er iu den selben muot

der iuwer minne gesamnet hât;

dar zuo habt ir mînen rât

und mîne helfẹ die wîlẹ ich lebe.

9755 ich zel mirz zeiner grôzen gebe

von unsers herren barmicheit

daz er mir mîn herzeleit

mit iu beiden hât benomen.

ze vreuden bin ich wider komen

9760 sît ich iuch bî einander weiz.’

vrouwe Lârîe sich dô vleiz

mit gebærden und mit munde

als si beste kunde

daz sị in mit triuwen meinde;

9765 mit wortẹn sị im bescheinde

daz si sîn tohter wolde sîn;

hern Gâwein hiez si väterlîn.

sus gwan diu triuwe und ir sin

einen muot under in,

9770 der was gescheiden ê mit drin.

Des künịges hôchzît diu was grôz.

ir deheinen ḍẹs wesens dâ verdrôz.

man gap in grôze wirtschaft;

dar zuo si vreuden überkraft

9775 sâhen alle tage dâ.

niemen dorfte vrâgen ‘wâ?’

wan dâ was manger hande spil

und rîterlîcher vreuden vil;

alsô vertriben si die zît.

9780 der sal was schœne unde wît,

lûter, eben als ein glas.

vil grôzer tanz dạrûffe was

von rîtern und von vrouwen.

ouch stuonden in den ouwen

9785 vil manic hêrlîch gezelt.

beidiu wisen unde velt

vollez rîterschefte lac,

dâ man buhurdierens pflac

alle tage unz an die naht.

9790 sus was mit vreuden bedaht

daz lant, daz ê jâmers pflac

vil riuwiclîche mangen tac.

Êrec und mîn her Gâwein,

Lanzelet und her Îwein

9795 die buhurdierten ouch dâ vil.

sus wertẹ daz rîterlîche spil

volleclîche zwelf tage

nâch der âventiure sage.

alsô diu hôchzît ende nam,

9800 dô kom ein garzûn âne scham

ûf den sal geloufen.

der begunde sich roufen

und gebâren jæmerlîche,

wand er was jâmers rîche.

9805 ich wæn sîn swære diu was grôz.

er lief nacket unde blôz

aller hande kleider,

niwan dirre beider:

zweir schuohe und einer niderwât;

9810 im was aller hande rât

anders vil tiure.

der brâht âventiure:

ein bluotic sper zebrochen;

dâ mit was erstochen

9815 der künịc Âmîrẹ von Lîbîâ.

daz kunt er den rîtern dâ

mit vil jæmerlîcher klage.

dâ vor an dem dritten tage

was er erslagen vor Nâmûr.

9820 daz hêt getân der vreuden schûr,

Lîôn, der ungehiure,

mit einer jostiure.

ditz klagte er offenlîche

und rief vil jæmerlîche

9825 ‘wâfẹn über den helt balt

der grôzen mort und gewalt

an mînem herren hât getân! ’

er sprach ‘swer ie liep gewan

und herzenlîche trûtschaft,

9830 habe er dar zuo ganze kraft

der triuwen und der manheit,

sô sî im daz unbilde leit

daz der ungetriuwe man

an mînem herren hât getân.

9835 er nam im sîne vriundin

und vuorte sị mit gewalte hin,

dô er den helt hêt erslagen.

ditz leit sol der künic klagen,

von Korntîn her Gwîgâlois;

9840 und ist er alsô kurtois

und pfligt sô grôzer manheit

alsô diu werlt von im seit,

sô sol er rechen ditze leit.

Mîn vrouwe und mîn herre

9845 die wâren harte verre

durch den künic gevaren her.

nu hât geletzet in daz sper

des lebens und der hôchzît.

owê, wie jæmerlîch er lît

9850 noch ûf dem velde unbegraben!

swelhe nu rîters namen haben,

den si daz unbilde leit.

vor leide hân ich mîniu kleit

von dem lîbe gerizzen.

9855 der künic sol daz wizzen,

die vürsten und ir dienestman,

daz ditz laster ist getân

benamen ûf ir êre.

mîner vrouwen Lîamêre,

9860 der werden küniginne,

ist ir stætiu minne

mit gewalte entschumpfieret.

swen daz laster zieret,

dern kan niht leit mit leide klagen.

9865 Lîôn der vürste hât erslagen

an mînem herren einen man

daz ich iu niht gesagen kan

wie hôhes werdes was sîn lîp.

vrouwe Lârîe und sîn wîp,

9870 mîn vrouwe Lîamêre,

ir ietwedriu sêre

der andern leit solde klagen

mit triuwen, als ich iu wil sagen.

ir väter zweier bruoder kint

9875 wâren, die erslagen sint

leider nû vor mangem tage.’ —

der zweier namen ich iu sage:

der ein Gârez von Lîbîâ;

ouch nant er den andern sâ:

9880 Lâr, der künic von Korntîn. —

‘nu sehet waz sị einander sîn

und helfet mîner vrouwen wider! ’

vor leide vrouwẹ Lârîe nider

umb ir nifteln laster seic.

9885 her Gwîgâlois niht lenger sweic.

er sprach ‘vrouwe, gehabt iuch wol!

ich erledige sị, oder ich dol

swaz ze lîden mir geschiht.

vrouwe Lârîẹ, enweinet niht!

9890 ich wil im widerbieten.’

die vürsten im dô rieten

daz er sich besande baz.

si sprâchen ‘herre, wizzet, daz

im helfent die Särvîe;

9895 dar zuo von Turkîe

kumt im vil manic rîter guot.

ouch tragent im vil holden muot

die Valwen und die Kriechen.

wir müezen mangen siechen

9900 vor der stat gewinnen.

ûzẹn an der mûre und innen

lît dâ hôher türne vil.

dâ wirt benamen ḍẹs tôdes spil.

nu dar, swer prîs bejagen wil! ’

9905 Êrec und sîn geselleschaft

sprâchen ‘swer nu zwîvelhaft

durch dise vreise wil bestên,

dem kan ḍạz laster niht nâhen gên

daz sînem herrẹn und im geschiht.’

9910 ‘her Gwîgâlois, nu ẹnsûmt iuch niht, ’

sprach her Gâwein der degen,

‘und wil got des rehten pflegen,

als er ie hât getân,

sô wæn uns niht geschaden kan.

9915 ir habt vil guote rîterschaft,

und wellent die ir triuwen kraft

iu mit helfe erzeigen hie,

sône gẹwan dehein künic nie

in disem landẹ sô mangen helt.

9920 dise rîter sint erwelt

ûz mangem künicrîche.’

dô lobten im gelîche

helfe an der stunde

mit gemeinem munde

9925 die sîne und ouch die geste.

diu sicherheit wart veste

über den ungetriuwen man

der disen mort hêt getân

und in daz laster hêt erboten.

9930 her Gwîgâlois dô sînen boten

mit dem garzûn sande dar.

von im und von den vürsten gar

widerbôt er in die stat

Lîôn dem vürsten würde mat,

9935 möht er, nâch sînem schâche getân.

sus schiet der bot von im dan.

dem garzûn wolder kleider geben.

dô sprach er ‘nein! ich wil leben

mit herzeleide unz an die zît

9940 daz gotes [gẹ]rihte râche gît

nâch sînen werken über in

der mir vreude und gewin

âne schulde genomen hât.

owê der grôzen meintât,

9945 daz si noch ungerochen stât! ’

Sus nam er urloup und schiet dan

wider zuo dem tôten man,

der dannoch ûf dem velde lac;

des got mit sîner huote pflac

9950 vor vogeln und vor hunden.

sîn ors daz was gebunden

vil vaste an einer linden ast.

alsô gewâfent lac der gast:

sîn schilt was über in geleit

9955 nâch des landes gwonheit;

daz swert under sîṇẹm houbet lac.

ditz was der sibende tac

daz der helt was erslagen.

man sach in jæmerlîche klagen

9960 zwêne windẹ die bî im lâgen.

des heldes si dâ pflâgen

vor vogeln und vor wilde.

ungâz ûf dem gevilde

dolten si die hungers nôt

9965 unz si dâ lagen bî im tôt,

daz ors und sîne winde.

den schat gap in diu linde

mit ir loube daz was breit.

mîn vrouwe Lîamêre erleit

9970 nâch dem helde grôze pîne.

im wâren die sîne

gar gevangen und erslagen.

daz begunde sị herzenlîche klagen

mît wîplîcher swære;

9975 ir wart der lîp unmære

daz si ir trût hêt verlorn.

dô hêt ab si Lîôn erkorn

ze vreuden sînem lîbe.

disem reinem wîbe

9980 ersluoc er ir lieben man

mit einem sper von Angran.

ir grôziu schœnẹ gap im den tôt.

der jâmer ir nâch im gebôt

vil pînlîche swære.

9985 swie schœne ir varwe ê wære,

diu ẹrlasch nu gar und wart bleich.

ir vreude ir sô gar gesweich

daz si niwan jâmers pflac

beidiu naht unde tac.

9990 des lîbes si sich gar bewac.

Als ir der triuwen jâmer riet,

ir schœne zöpfe sị abe schriet,

die wâren lanc, ze rehte grôz;

der regen von ir ougen vlôz

9995 an diu wange und ûf ir brust.

der bitter tôt was ir gelust;

daz erzeiget si der werlte sît.

si zarte von ir den samît,

der von golde gap liehten schîn,

10000 und einen belz härmîn

von ir schœnem lîbe.

dem vil reinem wîbe

wart von herzen leide,

daz si ir ougen weide

10005 âne schulde slahen sach.

von disem leide ir herze brach,

dâ von ouch si den lîp verlôs.

ir ganze sinne si verkôs

mit jæmerlîcher tobeheit;

10010 sine dolte an ir deheiniu kleit,

unz man ir huote muose haben.

‘owê, wan wær ich begraben

mit mînem süezen trûte!’

daz rief si vil lûte;

10015 dise rede begap si nie.

swaz si ir schœnen lîbẹs gevie,

dâ [z] beiz si jæmerlîche abe.

von dirre grôzen ungehabe

vlôch si wîp unde man,

10020 wan si was sô wol getân,

swer ir jâmer rehte ersach

daz dem ze weinen geschach.

ditz treip si alsô siben tage,

daz ir jâmer und ir klage

10025 was zallen zîten niuwe;

si truoc die wâren riuwe

umbẹ ir gesellen tôt.

Lîôn der vürste ir dicke enbôt

sînen lîp und ouch sîn lant.

10030 daz gienc ir allez zeiner hant;

sîn trôst der was ir ungehabe.

sus tet si sich der werlte abe

mit herzenlîchem sêre.

den lîp, guot und êre

10035 verlôs sị umb ir gesellen tôt;

des wart vil manic ouge rôt;

ir triuwe wac vür Karles lôt.

Dô si der vürste tôte sach,

wider sich selben er dô sprach

10040 ‘owê, waz hân ich getân!

ich hân erslagẹn ir lieben man

âne schuldẹ mit mîner hant.

owê dir, untriuwen bant,

wie mich dîn gir verleitet hât!

10045 du gæbẹ mir disen bœsen rât

daz ich den helt erslagen hân

niwan ûf des heiles wân

daz mir sîn schœne wîp belibe

und ich die zît mit ir vertribe.

10050 nu lît si hie vor leide tôt

umb ir gesellen; deist ein nôt

die ich immer klagen muoz.

ô wol dir, reines wîbes gruoz

und herzenlîchiu trûtschaft!

10055 du treist et gar der triuwen kraft

mit vil jæmerlîchen siten.’

innen des dô kam geriten

des künịges bot von Korntîn.

waz sîn gewerp möhte sîn,

10060 daz was in allen unbekant.

er erbeizte und gie zehant

dâ er Lîôn den vürsten sach.

wider in er vrävelîche sprach

‘herre, dir widerbietent die

10065 die ich dir benenne hie

ir dienest und ir vriuntschaft:

mîn herrẹ der künic mit sîner kraft,

her Gwîgâlois von Korntîn,

Rîâl, der künic von Jeraphîn,

10070 Êrec, fil de roi Lac

und Lanzelet der Arlac,

mîns herren vater, her Gâwein,

und von dem brunnen her Îwein,

Zaradech und Panschafar, —

10075 die sint von der heiden schar

zwêne künịge ûz Asîâ, —

die wellent ir sper dâ

durch dînen schilt verstechen

und daz laster rechen

10080 mit swerten an dîṇẹm lîbe,

daz du dem reinen wîbe

hâst erslagẹn ir lieben man,

der dir niht leides hêt getân.

zes künịges hôchzît wolder sîn;

10085 nu hât diu untriuwe dîn

ir gewalt an im erzeiget.

dîn hôchvart wirt geneiget

und dîn gewalt verkêret.

dîn vreude wirt gesêret

10090 mit herzenlîcher swære.

owê der leiden mære

daz mîn vrouwe Lîamêre ist tôt,

diu nie wart von schanden rôt!

ir lîp hât si von dir verlorn.

10095 dar umbẹ hât ûf dich gesworn

der grâvẹ Adân von Âlarîe,

und dise vürsten drîe:

Darêl, Gamêr und Arîûn;

Medarîe und Belacûn,

10100 von danne sint si geborn.

ir herren habent si verlorn

ûf dem gevilde bî Roimunt.

von disen vürsten tuon ich dir kunt

daz si dir schade wellent sîn.

10105 vrouwẹ Êlamîẹ diu künigîn

widerbiutẹṭ dir ir vriuntschaft,

si und ir geselleschaft.

vrouwe Marîne und ir gespiln

die wellent hie mit dir spiln

10110 dâ von manic ouge wirdet rôt.

daz spil wirt manges mannes tôt.

dir widerbiutẹṭ ouch Bejolarz,

des grâven sun von Lêodarz

und sîn neve, der grâvẹ Môrâl;

10115 Ursîn und Ambigâl,

zwêne grâven von Sâlîe;

dar nâch diu mässenîe

widerbiutẹṭ dir ir vriuntschaft.

mîn herrẹ der künic, mit siner kraft

10120 wil dich besitzen vor der stat.

dâ wirt dîn untriuwe sat

mortlîcher dinge.

dîner vreuden klinge

muoz bresten von der meintât

10125 die dîn hant begangen hât

an dem vürsten wol geborn.

von sînem tôde hât verlorn

ir lîp vrouwẹ Lîamêre,

diu mit herzen sêre

10130 vil jæmerlîche ende kôs

vor leide, daz sị ir trût verlôs.

waz mac ich nu sprechen mê?

ir lîp der ist ein junger rê

und lît hie jæmerlîche.

10135 nu wizze et sicherlîche

daz got den mort niht übersiht.

swaz leides dir dâ von geschiht,

dazn sol niemen guoter klagen.

nâch disen zwelf tagen

10140 sihestu mînen herren hie,

dem reiner wîbe jâmer ie

vîl nâhen an daz herze gie.’

Dô Lîôn hêt vernomen

die botschaft diu im was komen,

10145 und disen jâmer vor im sach,

daz beswârte in sêre unde sprach

‘der rede wirt vil guot rât.

swer mir widerboten hât

dem entwîche ich nimmer einen vuoz.

10150 ir vriuntschaft und ir gruoz

ist mir als in diu mîne.

vor der stat ich schîne

swen si komen, mit rîters wer.

sine bringent nie so grôzez her

10155 ichn gebe in rîterschaft genuoc.

ôwoch! daz ich den vürsten sluoc,

des trûwe ich harte wol genesen.

die mir schade wellent wesen

die komen her, swer si sîn!

10160 ich nim daz ûf die triuwe mîn

daz si den prîs hie bejagent

den ir wîp da heime klagent.

si wænent des ich sî ẹz Rôaz.

deiswâr, ich trûwe verre baz

10165 mîn lant erweren und die stat.

der rede wil ich dehein blat

legen vür mînen munt.

daz weiz ich wol und ist mir kunt

daz er den helt mit zouber sluoc

10170 des hant vil mänlich ellen truoc.

durch daz im dâ sô wol gelanc,

sô wolder über mînen danc

mîn lant mir an erstrîten.

er sol noch lenger bîten

10175 mich dunket des, er sûme sich.

sîn zorn unde sîn gerich

ist mir als daz bœste hâr

daz ie man von im geschar.

daz soltu dînem herren sagen.

10180 swaz er prîsẹṣ hie wil bejagen,

den muoz er koufen tiure;

hie ẹnist niht âventiure!

die sol er suochen anderswâ.

ich weiz wol, — im gelinge et dâ

10185 als im tet ze Korntîn, —

sol ich leben, ich tuon im schîn

daz er mîn lant und mich verbirt.

ich wil hie selbe wesen wirt.

ern hât niht rehte an mir ersehen;

10190 ander liute sol er ịm spehen

die sîn ze herren wellen jehen! ’

Der bot sprach zem wirte sân

‘hie ẹnwirt mit rede niht getân;

die sul wir beide lâzen sîn;

10195 bistu vrum, daz wirt wol schîn.

ich wil mit urloube varn.’

er sprach ‘got müeze dich bewarn!

nu sagẹ der mässenîẹ von mir:

und tragen sị rîterlîche gir,

10200 daz si die hie erzeigen;

ez sterben [ni] wan die veigen, —

die lægen doch dâ heime tôt, —

daz si niht schiuhen dise nôt.’

er sprach ‘herre, daz tuon ich.’

10205 mit der rede schiedens sich.

sus vuor der bot ze Korntîn.

den künic und die künigîn

vant er und die vürsten dâ.

disiu mære begunder sâ

10210 al der mässenîe sagen:

wie der künic wære erslagen,

Âmîre, durch sîn schœne wîp,

und wie dar nâch vor leide ir lîp

diu schœne Lîamêre

10215 mit herzenlîchem sêre

vil jæmerlîch verkôs,

dô si ir gesellen vlôs

der ir herzen bluome was.

noch stæter danne ein adamas

10220 was der reinen triuwe.

daz erzeicte ir grôziu riuwe

die si nâch dem helde truoc

den ir grôziu schœne sluoc.

owê und wol dir, Minne!

10225 du twingest die küniginne

gelîch der vil armen diet.

dîn kraft nie niht underschiet

dune zügest ẹz gar in dîn gebot.

du kanst in ernest und in spot

10230 twingen allez daz du wil.

dîn ende daz treit jâmers vil:

den tôt er nâch im ziuhet.

swer dînem gẹwalte enpfliuhet,

der dunket mich ein sinnic man.

10235 dîn kraft vil wol gemachen kan

mit leide liehtiu ougen rôt.

dâ wart vil ofte ‘owê dir, tôt! ’

gerüefet jæmerlîche,

dô si klägelîche

10240 klagten daz vil reine wîp,

diu von herzeleide ir lîp

verlôs umb ir lieben man.

als ich mich versinnen kan,

daz wirt vil selten nû getân.

10245 Welt ir, ich sagiu wâ von:

wîlen was man ungewon

valschlîcher minne;

mit einvaltigem sinne

minten si ein ander dô.

10250 nû sî wir valschlîche vrô

und minnen [ni] wan mit kündicheit.

swer nû wâre minne treit

und triuwe, der ịst vil manges spot.

wîlen dô minten si got,

10255 dô hêt ouch ers in sîner pflege.

nu kêrẹ wir alle von dem wege

sîner gebot, diu er uns lie.

dâ von solt wir bedenken wie

diu werlt sich verkêret hât;

10260 ir vreude jæmerlîche stât;

diu reht sint gevlœhet;

ir gewalt der ist gehœhet;

diu triuwe ist verschertet;

untriuwẹ mit nîde hertet.

10265 diu zît hât sich verwandelt gar;

ie lanc lenger bœsent diu jâr.

ezn lebt nu niemen sîne zît;

diu gîticheit bœsẹ ende gît;

sus hât si sich verkêret.

10270 ir vreude ist gesêret

mit tœtlîcher sünde.

ditz ist ir urkünde:

si stêt nû, als wîlen sach

Jôhannes, dâ von er sprach

10275 in dem hêren geiste.

mit gotes volleiste

sach er die himel offen stên;

dar inne solhiu dinc begên

daz im ze schrîben wart verboten.

10280 er sach des wâren lambes boten

in sînen tougen umbe varn

und durch den himel einen arn

vliegen krefticlîche.

der rief vil jæmerlîche

10285 ‘owê ir, aller muoter barn!

ir solt nâch sînem willen varn

der anegenges niene hât

und des gewalt ân ende stât

und der in sîner hende

10290 besliuzet der werlt ende,

ân des genâdẹ niht mac gesîn;

des tuot er alle tage schîn.

sîn gebot habt ir übersehen;

des muoz iu leide geschehen.

10295 von im sît ir vervluochet

iuwẹrs lebens er niht ruochet.’

daz ịst über uns ergangen.

mit des tôdes zangen

sî wir leider hin gezogen.

10300 diu gîticheit hât uns betrogen

und werltlîcher rîchtuom.

owê dir, rîcheit unde ruom!

dîn zierlîch gebende

wirt vil ellende

10305 nach des lîbes ende.

Ichn mac ez allẹz errecken niht

swaz dô geschach und noch geschiht:

der mære würde gar ze vil;

dâ von ich mich niht sûmen wil

10310 mit sô manger umbesage.

dâ was grôz weinen unde klage

von der mässenîe.

diu künigîn Lârîe

klaget vil sêre ir nifteln tôt.

10315 dâ wart vil manic ouge rôt

von klägelîchem sêre.

der bot sagt in noch mêre

von Lîôn, dem vürsten balt:

daz er umb ir aller gwalt

10320 niht engæbe ḍạz bœste hâr

daz ie man von im geschar,

und daz ir aller widerbot

wær sîn tägelîcher spot;

ern vörhte si ze nihte

10325 und woldẹ zir angesihte

gegen in ligen mit sîṇẹm her.

si vünden rîterlîche wer,

strenge jost und herten strît,

ob si kœmen im enzît

10330 mit mänlîchem muote.

her Gâwein der guote

und sîn gesellen [die] wurden vrô.

diu mässenîẹ bereit sich dô

vil snelle zuo der hervart,

10335 dâ manic schilt verhouwen wart.

ouch bereite man der künigîn

dâ si inne solde sîn

die vart durch des künịges bet,

daz ouch si vil gerne tet,

10340 wand ez ir beider minne riet,

diu si nimmer mê geschiet.

swar mîn her Gwîgâlois nu rit,

vrouwe Lârîe im volget mit,

wand er die schœnen gerne sach.

10345 er hiez bereiten durch ir gemach

ein harte schœne kastel,

ze mâze hôch und sinwel,

geriht ûf einen helfant,

daz man vil wol bedecket vant

10350 mit pfellẹ von Alẹxandrîe.

drinne mîn vrouwẹ Lârîe

mit zwelf juncvrouwen reit,

die wâren rîch und gemeit.

vil grôz gezierde truoc man drîn;

10355 mit rîchen tepten sîdîn

bestreuwet man daz kastel.

ein pfelle rôt unde gel

die wende al umbe gar bevienc.

enmitten dar inne hienc

10360 ein mückennetze sîdîn.

mit golde was gehangen drîn

ein kristalle, lûterr danne ein glas,

daz vil wol gefüllet was

mit balsam der gap guoten smac;

10365 des süeze enstrîte gegen wac

bisem und spicâ nardî.

welt ir wizzen waz daz sî?

umḅ den smac stêt ez sô:

nie niemen wart sô unvrô,

10370 gesmeckẹt er sîn, sîn leit zergê.

nu hœrt von sîner tugent mê:

dehein suht ist sô getân

und wirt diu salbe gestrichen dran,

sine müeze deste semfter sîn.

10375 besigelt in eiṇẹm rubîn

was si; dâ von mans gesach.

der was der kristallen dach

und brehendẹ als ein kerzen lieht

dâ man des nahtes bi gesieht.

10380 diu salbe ist tiure und unbekant;

man bringet sị von des Alten lant

vil verre ûz der heidenschaft.

von solhen wurzen hât si kraft

die man mit golde wider wiget.

10385 dâ von ir sûezer smac gesiget

von rehte allen wurzen an.

als ichz vernomen hân,

ir süezẹ sich niht gelîchen kan.

Daz netze was gestricket wol;

10390 guldîner schellen hienc ez vol

niden an dem ende;

ouch wâren die wende

mit betten umbe und umbẹ beleit.

von rîchen pfellen kulter breit

10395 wâren drûf gestrecket,

die wende gar bestecket

mit bluomen, und daz hûs bestreut.

der tac, des schîn diu herze vreut,

schein al umbe durch diu glas,

10400 swen ez an sînem zîte was.

sus was gezieret schône

drinne der vreuden krône,

des wunsches âmîe,

diu künigîn Lârîe

10405 durch gemach solde rîten.

in vil kurzen zîten

nâch ir willẹn was ez bereit,

gezierẹt mît grôzer rîcheit.

swenne diu vrouwe solde varn,

10410 sô hiez her Gwîgâlois bewarn

mit grôzer huote daz kastel

vier grâven; die wâren snel

ze triuwen und ze manheit;

ouch was in ganzer sin bereit.

10415 der eine hiez grâve Môrâl;

Ursîn und Ambigâl;

der vierde hiez grâvẹ Adân.

der gebot wârn undertân

hundert rîter gêrte.

10420 swar der helfant kêrte

ûf dem velde od an dem wege,

dâ hêten si in in ir pflege,

alsô diu vrouwe drûffe was.

nu kômen ûf den palas

10425 die vürsten durch des künịges bet

und swuoren alle an der stet

ze warten dem herrẹn Gâwein,

des kunst an rîterschefte schein.

er dûhte si sô wîse

10430 daz si von sînem prîse

nimmer möhten missevarn,

sît er daz her solde bewarn

mit sinnen und mit manheit.

des kom er in die arbeit

10435 die er vil kûme überwant.

wan daz im vreise was bekant,

ez wær verzagẹt des heldes hant.

Dô diu hervart was bereit,

als uns diu âventiure seit,

10440 und iegelîch rîter zuo der vart

an der zal gẹahtet wart,

dô hêt der künic von Korntîn, —

an dem was grôz manheit schîn, —

sehs tûsent rîter ode mêr.

10445 nie dẹhein künic wart sô hêr

im zæme solhiu rîterschaft.

er hêt wol heres grœzer kraft

gevüeret, ob er wolde.

dehein rîter nâch solde

10450 diente dâ mit sîner wer:

im was sô willic gar daz her

durch sîne grôze manheit,

daz im ir dienest was bereit

mit ganzem willen, âne guot;

10455 si truogẹn im alle holden muot.

ouch tâten si der künigîn

sît wol an dem strîte schîn

daz si rou ir nifteln tôt.

man sol reiner wîbe nôt

10460 dankes nimmer übersehen.

swâ in schade mac geschehen

daz sol wendẹn ein ieglîch man,

wan dem herzen niemen kan

sô herzenlîche vreude geben

10465 als der reinen wîbe leben.

ir gewizzen und ir güete

hœhent daz gemüete

daz immer wære an vreuden tôt.

sus wendent si des herzen nôt

10470 mit guoter hạndelunge.

vervluochet sî diu zunge

dâ von dehein rede gê,

diu ir lobe widerstê!

Nu hœret wie diu hervart

10475 gẹordent und geprüevet wart

ûz dem lande ze Korntîn.

Rîâl der künic von Jeraphîn

vuor ie vor mit sîner schar.

sîn banier was alsus gevar:

10480 geteilet wîz unde rôt.

enmitten dar inne bôt

ein tier von golde liehten schîn;

daz muose wol gezieret sîn,

geschicket als ein helfant:

10485 dâ bî sîn wâfen was bekant,

swar der edel rîter vuor.

diu volge im mänlich ellen swuor.

er was ein helt, âne wân;

sîn hant vil dicke hêt getân

10490 dâ von man im prîses jach.

die galiôtẹ man vlühtic sach

vor im vil dicke ûf dem mer:

er hêt entschumpfiert ir wer.

ouch lâgen im gelîche

10495 zwei rîchiu künicrîche;

der gewaltes hêt er sich erwert.

nu hœret wie der künic vert!

sehs helfande vuort er;

die truogen nâch des heldes ger

10500 wîchûs unde bercvrit.

dâ riten tûsent rîter mit

und vünf tûsent sarjant;

die truogen lanzen in der hant,

buckeler, swert unde bogen.

10505 uns enhabe dịụ âventiure betrogen,

si zogẹten ûz dem lande dar

mit manger banier lieht gevar.

dar nâch reit diu künigîn;

an der geverte was wol schîn

10510 daz ir des wunsches niht gebrast.

si vuortẹ mit ir der sælden last

ûf dem helfande, —

geprüevet âne schande: —

zwelf mägde wünniclîche,

10515 edel unde rîche,

gekleit in grüenen samît;

roc unde mantel wît

mit lûtern vedern gefurriert.

ir houbet wâren geziert

10520 mit schapeln bluomîn.

ir schœne gap den andern schîn

enstrîte gegẹn dem liehten tage.

swie in jâmer unde klage

gæbe vrouwẹn Lîamêren tôt,

10525 iedoch wârn in di münde rôt

unde ir antlütze lieht.

ouchn sol ich vergezzen nieht

wie vrouwẹ Lârîe was gekleit.

als uns diu âventiure seit,

10530 ir schœne gegẹn der sunnen streit.

Ein hemde wîz als ein swan

truoc diu gespil der sælden an;

daz was von sîden kleine.

an ietwederm beine

10535 zwêne schuohẹ von borten guot.

si jehent allẹ daz hôhen muot

diu rîcheit dem herzen gît.

daz mac wol sîn, doch ist mîn strît

daz nie grôze hôchvart

10540 dehein herze von reiner art

gewan von grôzer rîcheit.

daz sî iu allen samt geseit:

daz ungeslähtẹ treit übermuot.

ein pfelle, gelpfer danne ein gluot

10545 vrouwen Lârîen was gesniten;

dem was furrieren niht vermiten

von hermen die wâren blanc.

ir roc und ir mantel lanc,

wol bezogen und gesniten

10550 nâch der Franzoiser siten,

[der mantel] mit offener snüere.

nâch rîcheit gevüere

ein zobel umbe und umbe gie, —

beidiu orte er bevie, —

10555 swarz, grâ unde breit.

diu vrouwe hêt umb sich geleit

einen riemen von Îberne;

als die liehten sterne

daz edel[gẹ]steine dạrûffe lac.

10560 ein rubîn, lieht alsam der tac,

was zuo der rinken wol ergraben,

von golde ein tracke dạrûf erhaben.

diu vrouwe truoc ein vürspan

dâne was niht mê gesmîdes an

10565 niwan ein dorn guldîn;

dâ mit hafte sị ir buosem în.

daz vürspan was ein edel stein,

der doch drîer varwe schein.

daz ein teil ein smâragde was

10570 grüener danne dehein gras;

ein saphir was des andern schîn;

daz dritte ein edele rubîn:

zwêne lewen und ein ar.

alsus hât gemeistert dar

10575 nâch dem wunsche ditze werc

mit worten Wirnt von Grâvenberc.

der pfelle den si an truoc

der was von golde guot genuoc,

geworht in der heidenschaft;

10580 dâ ist der sinne hœhstiu kraft

dâ lâgen vor den vrouwen fier

wurfzabel und kurrier

geworht von helfenbeine

mit edelem gesteine

10585 spilten si, mit holze niht,

als man nû vrouwen spilen siht.

si hêten kurzewîle vil

von manger hande seitspil

daz die vrouwen kunden;

10590 dâ mit si überwunden

ir jâmer und ir herzeleit.

alsus was in der wunsch bereit;

ir gespile was diu sælicheit.

Êrec und sîn geselleschaft

10595 swenne die wolden grôze kraft

herzenlîcher vreude spehen

und minniclîche schœne sehen,

sô giengen si zer künigîn;

dâ vunden si der sælden schîn

10600 und schœner kurzewîle vil

von zabel und von seitspil

und süeze ougen weide.

nie niemen wart sô leide,

und solder zuo den vrouwen gên,

10605 ern müese leides âne gestên.

die von gebürte wâren grôz,

vürsten oder vürsten gẹnôz,

die lie man ûf daz kastel.

dâ was diu wîle harte snel

10610 mit vreuden schierẹ zergangen

wen moht dâ erlangen

dâ der wunsch gẹordent was?

niuwe bluomen, grüenez gras

was ie töuwigez drîn gestreut.

10615 dâ von sich lîp und herze vreut

und daz diu beidiu twinget,

dâ mit diu sælde ringet —

daz ist der edeln vrouwen gruoz,

den diu volge jehen muoz

10620 daz niht dem herzen nâher gê,

dem tuont si wol unde wê, —

die sâzen hie nâch prîses kür.

ir ougen wider unde vür

sâhen in diu herze;

10625 dâ von vil lîhte ein smerze

moht etelîchem widervarn,

dâ vor sich niemen kan bewarn.

sus vuor diu vrouwẹ Lârîe,

des wunsches âmîe.

10630 ob ir kastel vlouc ein van;

dâ was von golde gebildet an

ein tier, als daz von Roimunt

ir vriunde tet die strâze kunt

in daz lant zuo Korntîn.

10635 sus was des selben tieres schîn

in einen swarzen samît

gesniten lanc unde wît;

daz was ir wâfen zaller stunt;

dâ bî was ir der jâmer kunt

10640 mit leide umb ir vater tôt,

als diu triuwe ir gebôt.

daz tier mant si der selben nôt.

Als ez ist geseit mir,

zwêne künịge pflâgen ir:

10645 der herre Îwein und Êrec;

die riten mit ir ûf den wec.

driu tûsent rîter vor und nâch,

dâ man under vüeren sach

vil liehtiu baniere.

10650 mit golde harte ziere

vil schilte sach man glîzen,

mangen helm wîzen

gebunden ûf die soume;

rîche ptärdes zoume

10655 mit guldînen schellen;

die hôrtẹ man verre hellen,

die busûn blâsen in dem her.

iegelîch man mit sîner wer

reit als er kunde strîten.

10660 vil knappen sach man rîten,

die schœniu ors mit in zugen;

habichẹ unde valken vlugen

und aller hande vederspil.

als in kom des âbendẹs zil

10665 und si diu hitze ein teil verlie,

iegelîchez sînen vogel vie

den ez vâhen solde.

als her Gâwein wolde

drî künịge riten nâch dem her;

10670 die vuorten tœtlîche wer:

starkiu sper von Angran.

man vuorte mit den vürsten dan

wol zweinzic vuoder oder mêr;

gabilôt und atigêr

10675 truogen die sarjande.

sus vuor ûz sînem lande

her Gwîgâlois, der werde helt.

zwei tûsent rîter ûz erwelt

huoten hinden nâch dem her;

10680 die vuorten vreislîche wer:

tûsent schützen mit starken bogen.

swenne die wurden ûf gezogen

und man die vînde komen sach,

sô wær mîn lîp dâ ze swach

10685 ze rîten under in gewesen;

ich wæn unlange wære genesen.

einen helfant zôch ein knappe kluoc

der des künịges kamer truoc

und sînen vanen vor der schar;

10690 des muosens alle nemen war.

ez was ein swarzer samît,

gesniten lanc unde wît;

von golde ein rat darinne schein;

daz zieret manic edel stein.

10695 der samît gevlüemet was

mit dem goldẹ von Kaukasas.

daz brehent als ein queckiu gluot

geviuret ûz der vinster tuot.

die zwêne künịge ûz Asîâ

10700 zwei rîchiu banier vuorten dâ,

Zaradech und Panschavar.

ir wâfen was ein härmîn ar

in einem pfellẹ von Ninivê;

der was grüene als ein klê,

10705 gebildẹt mit rôtem golde gar;

dâ mit si pflâgen einer schar.

diu banier vlugen über velt.

vil mange hütte und gezelt

diu starken mûle truogen.

10710 vil olbenden sluogen

die koufliute vor in hin;

die truogen rîcheit gewin,

spîse und alsô rîch gewant

daz man ninder bezzerz vant

10715 ze Kriechẹn und in der heidenschaft.

sus vuor der künic mit sîner kraft

vil rîterlîche vür Namûr

ze leide Liôn, der vreuden schûr;

diu vart wart mangem manne sûr.

10720 Si kômen an dem zwelften tage

nâch des boten widersage.

den künịc Amîren brâhtens dar.

des rê wart, gebalsamt gar,

geleit in einen edeln stein

10725 ûf eine sûl, dâ durch er schein

vor der stat übẹr al daz her.

si vunden rîterlîche wer

al umbe und umbe ûf dem graben;

dâ wart vil manic strît erhaben.

10730 diu stat lac einhalp an dem mer;

dâ was si sicher vor dem her.

ein starkiu mûrẹ si gar bevie;

vil tief ein grabe drumbe gie,

dâ durch ein lûter wazzer vlôz;

10735 daz was ze guoter mâze grôz,

geleit durch ein gebirge dar.

her Gwîgâlois mit sîner schar

belegt die stat unz an daz mer.

diu was berüstet wol mit wer:

10740 türne, bercvrit, ärker

vil âne mâze stuont der

ûf der mûre ob dem graben.

dâ man den tôt mit solde laben

und dâ mit manger wart erslagen,

10745 des was vil ûf die wer getragen:

guot geschoz, steine vil.

ein dinc daz was des tôdes spil:

pfeterære und grôze mangen.

diu mûre was behangen

10750 mit grôzen blochen sinwel;

diu wâren an der wer sô snel:

swen iemen an den graben gie,

und man diu bloch vallen lie,

sô hurten si die vînde wider

10755 in den tiefen graben nider;

dâ von den lîp vil manger vlôs

des hant vil werlîch ende kôs.

aht porte giengen in die stat:

zwô warten ûf des meres stat,

10760 die sehs her ûz an daz velt.

man vant dâ strîtes widergelt

swiez der man geruochte,

als ez sîn ellen suochte.

her Gâwein, der des heres pflac

10765 nam vride unz an den andern tac

von dem her und ûz der stat,

des man dâ beidenthalben bat;

von dem grabẹn an diu gezelt

was ein alsô breitez velt

10770 daz si vor schüzzen wâren vrì.

nu hœret wie gẹordent sî

daz gesæze, ob ir welt.

her Gâwein, der wîse helt,

hêt geschaffet zuo dem mer

10775 Rîâl den künic von dem her

gegẹn der portẹ diu dâ ûz gie;

tûsent rîter er im lie.

dô lâgen dem næhsten tor

zwêne rîche künịge vor:

10780 Zaradech und Panschavar;

den lie man tûsent rîter dar,

die ir gebotes nâmen war.

Dô lâgen gegẹn der dritten

porte, vil nâch enmitten,

10785 der künic Îwein und Êrec;

der hende kunden wîten wec

houwen durch die rîterschaft;

si hêten kunst unde kraft;

den wâren tûsent rîter bî.

10790 nu hærẹt wer vor der vierden sî:

her Gwîgâlois, der künic hêr,

wan dâ vant man strîtes mêr

dannẹ vor deheinem andern tor;

dâ was her Gâwein mit im vor

10795 und tûsent rîter ûz erkorn.

ein küniginne wol geborn

vor der vünften porte lac;

der geselleschefte pflac

vrouwe Marîne und grâve Adân;

10800 der gebot wârn undertân

ouch tûsent rîter unverzaget.

vrouwẹ Êlamîe hiez diu maget;

der was diu milte an geborn;

diu hêt ouch in ir hant gesworn.

10805 angenomen milte schierẹ zergêt.

seht wie daz mülrat gestêt

swennẹ ez niht snelles wazzers hât!

dem gelîche ich milter liute rât

als der dem herrẹn entwîchet,

10810 diu erge wider slîchet

aber zuo dem herzen.

dâ beginnẹt diu milte smerzen,

wan si dâ niht wesen sol;

der wehsel gevellẹt mir niht wol!

10815 ditz mære ist hie mit undersniten

und durch die [] warheit geriten

den alten und den niuwen siten.

Vor der sehsten porte lac

der sich strîtes ouch bewac:

10820 der truhsæze von Roimunt;

dem was wol strîtes vuore kunt.

bî im lac der grâvẹ Môrâl,

Ursîn und Ambigâl;

die hêten tûsent rîter dâ.

10825 her Gâwein der teilte sâ

die sarjande underz her,

iegelîchen mit sîner wer:

ûf sehs helfande

zwei hundert sarjande.

10830 die wurfen unde schuzzen

daz die zäher vluzzen

bluotic durch daz îsengwant.

iegelicher schar ein helfant;

die kundẹn entwîchen unde stên,

10835 mit strîte gegẹn den vînden gên:

sus wâren si gelêret.

ein gezelt daz was gehêret

dâ vrouwẹ Lârîe inne saz,

daz nie dehein gezelt baz

10840 von pfelle wart gezieret,

mit golde geparrieret.

dar ûffe stuont ein guldîn tier

von edelem gesteine fier.

dar obe vlouc ein liehter van;

10845 dâ was daz selbe tier an

mit vil lûterm golde

gebildet als si wolde.

von ledẹr ein huot hienc dâ bî

der daz gezelt machet vrî

10850 des regens, sô der nider gôz.

gegẹn der sunnen stuont ez blôz.

vil grôziu rîcheit dạrunder was:

mit pfelle von Kaukasas

vil bette wârn gedecket wol;

10855 diu sâzen edler vrouwen vol.

daz selbe gezelt was sô wît

daz ich wæn deheinez sît

iemen wîter kunde gespehen.

man mohtẹ dâ rîche vürsten sehen

10860 rîten wider unde vür,

iegelîch rîter nâch sîner kür,

dâ er sînen vriunt gesprach

und ouch die künigîn gesach;

dar nâch si riten wider în

10865 dâ iegelîcher solde sîn.

si hêten alle spîse genuoc.

einen markẹt man bî in ûf sluoc;

dâ vant man michel rîcheit

von aller hante spîse bereit

10870 und swaz man koufen wolde

von gewande und von golde,

nâch des mannes muote.

dem here schuof man huote:

hundert rîtẹr ie von der schar,

10875 die daz her behuoten gar

vor den vîndẹn unz an den tac.

vil süezes schalles man dâ pflac

mit hollerblâsen ûf der wer.

umbe und umbe unz an daz mer

10880 huoten si mit vlîze

unz daz des tages wîze

ôstern durch diu wolken dranc.

von glocken hôrtẹ man mangen klanc

in der stat, wan diu was wît.

10885 dô dûhte ouch des die ûzern zît

daz si sich bereiten

gegẹn den arbeiten.

ir îsenhosen schuohtens an;

dar nâch vuor ein iegelîch man

10890 der kristen was und dens gezam

dâ ẹr eine messe vernam.

die vürsten und her Gâwein

des âbendẹs wâren wordẹn enein

wen si ze sturme solden gên,

10895 mit strîte gegẹn den vînden stên.

der rîter ors wâren bereit,

ûf iegelîchẹz zwô decke geleit

von îsen und von pfelle.

Êrec und sîn geselle

10900 die pflâgen einer banier lieht.

ouch sol ich vergezzen nieht

ichn sagiu wie diu geprüevet sî:

ein rôter pfellẹ von Ârâbî,

darinne ein rat, von Ninivê

10905 eins pfelles grüene alsam ein klê;

der pflâgẹn die helde mit ir kraft

durch ḍẹs küniges geselleschaft,

zuo dem si wâren komen dar.

dô wartẹ vrouwẹn Êlamîen schar,

10910 der edeln küniginne,

mit mänlîchem sinne

einer banier diu was blâ;

mit rîcher koste was aldâ

von golde ein krône drin gesniten;

10915 mit der stolze helde riten.

dem truhsæzen von Roimunt

und sînen [gẹ]sellen tet man kunt

ze warten einer banier

diu was swarz; darinne ein tier

10920 gesniten enmitten vlouc,

mit dem goldẹ van Azagouc

gezieret und gemeistert dar.

sus lac der vrouwẹn Lârîen schar

gegẹn einer porte bî dem mer.

10925 dô wârens beidenthalp ze wer,

daz ûzer und daz inner her.

Die porte [n] wurden ûf getân.

ûz iegelîcher vlouc ein van;

vünf hundert rîter volgten nâch;

10930 den was gegẹn den vînden gâch.

si hêten alle geneigẹt ir sper;

man dorftẹ niht ruofen ‘herâ! her! ’

wan si kêrten gegẹn der schar

dâ si der herte nâmen war.

10935 die schilte druhten sị an sich.

mit speren wart dâ manic stich

gevrumt durch daz îsengwant,

daz sîn daz herzẹ dạrunder enpfant.

die ûzern wâren gegẹn in komen

10940 und hêten alle ir ors genomen

ze beiden sîten mit den sporn.

die helde treip der grimme zorn

zem strîte und mänlîchiu gier.

durch helm und durch herseni [e] r

10945 mit jost dâ manger wart erslagen.

man sach die trunzûne ragen

durch die schilte alniuwe.

sine brâchen niht ir triuwe;

beidenthalb was widerboten.

10950 man sach vil mangen helm roten

von bluote der ê lûter was.

die ringe riren als ein glas

von stichen und von starken slegen.

dâ lac vil manic werder degen

10955 gehurt und geslagen nider,

dem niemen mohte gehelfen wider.

dịẹ innern entwichen vür diu tor;

dâ huop sich solich strîten vor

daz daz bluot nider gôz

10960 und durch die wâfenröcke vlôz.

mit slegẹn den andern niemen trouc.

daz viur ûz den helmen vlouc,

gemischẹt mit bluote daz was rôt.

sicherheit dâ niemen bôt;

10965 dâ was dehein gevaterschaft:

ez schiet niwan des tôdes kraft

mit vil vîntlîchen slegen.

allenthalben bî den wegen

sach man die wunden töunde ligen

10970 die des bluotes wârn ersigen,

und vil mangen tôten

der sêre was verschrôten.

mit diu hêt sich der sturm erhaben;

die sarjande an den graben

10975 mit antwerke giengen;

dar ûf si enpfiengen

diu bloch, sô man diu vallen lie.

daz geschoz als diu snîe gie

und die würfe underz her.

10980 dô mischten sich ir beider wer

über den grabẹn unz an daz mer.

Die helfande volgẹten mit

dem her nâch ir gelêrtem sit

gegẹn den vînden ûf den graben.

10985 diu wîchûs wâren dạrûf erhaben

gelîch hôch der mûre.

vil herte nâchgebûre

wâren in die sarjande.

ir manheit verswande

10990 geschozzes unde steine vil.

sus spilten si des tôdes spil

vil nâch unz an mitten tac.

vil manic helt dâ bî in lac

ûzen unde innen tôt,

10995 vil orse erslagẹn; von bluote rôt

wart vil manic îsengwant.

von den helden dâ verswant

mit manger rîchen jost der walt.

dâ wart vil manger abe gevalt

11000 der sînen lîp zehant verlôs.

vrouwe Marîne ir erkôs

einen grâven von Turkîe.

er und sîn kumpanîe

tâten guote rîterschaft.

11005 diu maget schiet in mit ir kraft

von allen sînen [gẹ]sellen;

si beschutte in âne vellen

und nam sîne sicherheit;

in ir gezelt er dô reit.

11010 diu maget nam ein starkez sper;

von rabîne reit si her

ir ors gegẹn den vînden wider;

einen vürsten stach si nider;

den zugen ir gesellen hin.

11015 dâ huop sich vlust und gewin;

diu maget tetz dâ harte guot.

si truoc mänlîchen muot

und vil reinen magetuom.

sị erwarp dâ rîterlîchen ruom

11020 mit sper und ouch mit schilte.

dar zuo was si milte;

diu ịst der êren krône.

sus lebt diu maget schône

mit vil ganzer werdicheit,

11025 unz si ein scharfez sper versneit.

daz treip ein helt mit joste dar,

der herzoge Galopêar;

von Kriechen was er geborn;

ûf die brust hêt ers erkorn

11030 und valtẹ die maget tôte nider.

dô er wolde wenden wider,

dô erreit in der grâve Adân;

mit einem sper von Angran

stach er den helt und rach die maget.

11035 ir gelîche nie wart betaget

diu sô sêrẹ würde geklaget.

Êrec und her îwein,

an ir getât dâ wol schein

daz si wâren manhaft;

11040 si tâten solhe rîterschaft

dâ von ich wol sprechen mac.

die wilẹ ḥer Gwîgâlois dâ lac

vor der stat mit sînem her.

man vant dâ rîterlîche wer

11045 ze rosse und ouch ze vuoze;

daz was ir unmuoze.

sehs wochen alle tage

hôrten si dâ niuwe klage:

‘dort lît der wunt! der hie erslagen! ’

11050 man sach sich wider eịn ander tragen

als ein vride gegeben wart.

diu swert wâren ungespart,

diu hôrtẹ man verre klingen,

durch liehte helme dringen.

11055 eins morgens vruo Lîôn ûz reit;

zer jostẹ durch sîne manheit

vordert er herṛẹn Gâwein dar;

in dûhte des er hêt in gar

gewalticlîche in sîner hant.

11060 Lîôn der truoc den serpant

mit golde wol gezieret.

der kom gewalopieret

vür den graben ûf daz velt.

her Gâwein rûmtẹ ouch sîn gezelt;

11065 durch sînen sun vuort er daz rat

gegẹn dem helde vür die stat.

von rabîne sị beide riten

ze jost; nâch rîterlîchen siten

verstâchen si zwei starkiu sper.

11070 ein ander vürste gâhte her

von der stat: Salîn er hiez;

sîn manheit in niht ruowen liez.

ûf den herren Gâwein seiget er;

durch den schilt mit sînem sper

11075 stach er im eine wunden grôz.

daz bluot dô durch die ringe vlôz;

iedoch zoumt er Lîônen dan.

dô huop sich ûz der stat sân

ze helfe im gar des vürsten kraft;

11080 dô mischte sich diu rîterschaft.

Zaradech und Panschavar

die îlten mit ir rote dar

und valten mangen rîter nider,

der sît niht kom ze [r] joste wider.

11085 Rîâl, der künic von Jeraphîn,

er und die gesellen sîn

puniertẹn under der vînde schar.

dâ wurdẹn die helme missevar,

diu swert von bluote erblichen.

11090 mit slegen und mit stichen

kêrten sị gegẹn der herte.

daz inner her sich werte

mit sô mänlîcher kraft

daz manic swert unde schaft

11095 zebrochen ûf dem velde lac.

vliehens dâ niemen pflac.

diu sunne erlûhte dô den tac.

Her Gwîgâlois punierte dô;

des manic herze wart unvrô.

11100 mit im her Îwein und Êrec;

die machten wît vil engen wec

mit stichen und mit starken slegen.

dâ viel vil manic werder degen

von den wîganden;

11105 den walt si verswanden

an der schumpfentiure

mit maniger jostiure.

der strît wart dâ harte grôz;

daz bluot ûf dem velde vlôz

11110 von wunden und von tôten

die sêre wârn verschrôten.

vil schœner rossẹ lac dâ erslagen;

dar ûz sach man die schefte ragen

und manger hande zeine,

11115 grôz unde kleine.

her Gwîgâlois die poinder brach;

einen herzogẹn von Särvîe er stach

mit orse betalle nider;

sus hiuw er vür unde wider.

11120 vil mangen tôten valt er

beidiu mit swerte und mit sper,

unz er den herren Gâwein vant;

der hêt erslagẹn mit sîner hant

Lîônen an der stunde.

11125 ze vliehen dô begunde

gegẹn der stat daz inner her;

dâ wart enschumpfiert ir wer.

der truhsæze von Roimunt

und sîne gesellen an der stunt

11130 vil mangen rîter viengen.

die sarjande giengen

mit den vînden in die stat.

dâ mohte ein man wol werden sat

strîtes, swer des gerte.

11135 die helde man dâ werte

beidiu mit schüzzen und mit slegen.

Zaradech, ein werder degen,

der junge künịċ von Asîâ,

wart mit eime schuzze dâ

11140 gevellet tôter in daz wal.

von vlühte huop sich grôzer schal.

die geste drungen durch diu tor

mit den die dâ wâren vor.

die strâze wurden enge.

11145 des tôdes gedrenge

huop sich mit den swerten dâ.

des künịges vanen sach man sâ

mit gewalte vüeren durch die stat;

dạrinne von rôtem goldẹ daz rat

11150 vlouc gegẹn den lüften.

dô liezen si ir güften.

die geste gewunnen oberhant.

golt, silber und gewant

und dịẹ aller grœsten rîcheit

11155 dâ von ie wart geseit,

die nâmen die vînde dâ.

her Gwîgâlois beriet sich sâ

daz man die burgær lieze leben,

ob si sich wolden im ergeben

11160 mit ir dienste in sînen gẹwalt.

gar diu stat, jung [e] und alt,

swuoren im dô hulde.

dô liez er die schulde

und swaz im leides was getân.

11165 er gap in einen houbetman

der des landes wielte

und im die stat behielte.

dar zuo wolder gîsel haben

daz widẹr in immer würde erhaben

11170 deheiner slahte sicherheit;

daz muose vestẹn ir aller eit.

der vridẹ dem her dô wart geseit.

Namûr daz was ein herzentuom;

vil mangen rîterlîchen ruom

11175 hêt er erworben der sîn pflac,

der tôter in dem wal gelac.

daz herzentuom und die stat,

als es diu vrouwẹ Lârîe bat,

lêch er dem grâven Môrâl

11180 mit dem zepter âne twâl.

sîn stætẹ diu was niht niuwe;

er hêt ouch sîne triuwe

an sîner vrouwẹn behalten ie;

des man in dô geniezen lie.

11185 drîzic tûsent marc von golde

die burgær dô ze solde

gâben dem künịge ir herren.

sine wolden im niht verren

ir getriuwẹlîch dienest und ir habe;

11190 dâ teilte er den vürsten abe,

dem derz nemen wolde.

die sarjande mit solde

man nâch ir willen werte,

als sîn der man ie gerte.

11195 die gevangen [be] schatzte ein ieglîch man

ders ûz dem wal brâhte dan

als er hôhest mohte.

swaz den wunden tohte

die den künic hôrten an,

11200 daz wart ze gemache in getân.

her Gâwein dô gebunden wart

und manịc rîter von hôher art,

der rîterlîch was worden wunt.

der künic hiez dô an der stunt

11205 die tôten alle samt begraben,

die wunden binden unde laben.

Lîôn dô schône bestatet wart,

durch daz er was von hôher art,

swie ẹr in doch leide hêt getân.

11210 den künịc Âmîren truoc man dan

mit klägelîchem sêre

dâ vrouwe Lîamêre

besigelt in eiṇẹm sarke lac.

der was lieht alsam der tac

11215 von golde und von gesteine;

dar inne lac diu reine.

der sarc der was niuwe;

Lîôn durch ir triuwe

hêt si bestatet schône.

11220 ein guldîniu krône

was gehangen über ḍẹn sarc, —

diu koste mêr dan tûsent marc, —

durch daz si was ein künigîn.

in den sarc zuo ir dar în

11225 legt man dô ir gesellen.

mit vil liehten pfellen

wurden si bewunden.

an den selben stunden

satzte man dạrîn ein lûter glas;

11230 mit balsam daz gevüllet was.

dâ bî was vrouwẹ Lârîe,

des wunsches âmîe.

si klagt vil sêre ir beider tôt.

den burgærn si daz gebôt

11235 daz sị ein kapellen mûrten dar

und daz diu würdẹ von marmel gar.

daz gelobten si und liezenz wâr.

Her Gwîgâlois der künic hêr,

des landes marke besatzt er

11240 und gebôt in allen bî der wide

guot gerihte und stæten vride.

sus kêrte er dan mit sîner schar.

der werde künic Panschafar

von Asîâ nam urloup sân;

11245 sînen tôten bruoder vuorte er dan.

alsô stuont des heldes muot:

ern woldẹ deheiner slahte guot;

daz was iedoch dem künịge leit.

mit grôzer klage er danne reit.

11250 der ẹz von im nemen wolde,

mit gesteine und mit golde

vulte man in die schilte.

her Gwîgâlois was milte

bescheidenlîch widẹr alle diet.

11255 ân gâbe niemen von im schiet.

vrouwẹ Êlamîe diu künigîn

diune woldẹ niht lenger bî im sîn;

si nam urloup von im dâ.

den vürsten allen dancte er sâ

11260 mit worten und mit guote,

nâch iegelîches muote.

Rîâl und die gesellen sîn

kêrten gegen Jeraphîn.

si vuorten guotes michel kraft

11265 und vil gevangner rîterschaft.

Darêl, Gamêr und Arîûn

die kêrten gegen Belakûn.

der grâve Adân nam urloup dô;

des herzẹ vor leide was unvrô:

11270 des twanc in vil strengiu nôt

umḅ der vrouwẹn Marînen tôt

diu an dem strîte was gelegen.

si vuortẹ mit im der werde degen,

er und sîn kumpanîe,

11275 gegẹn dem lande z’Alarîe.

drî grâven vuortens mit in hin

gevangen; dạran lac grôz gewin.

sus kêrten dan die geste;

iegelîcher an sînẹ veste

11280 brâhte grôze rîcheit;

daz was den burgæren leit.

der künic die vürsten sande

gegen sînem lande

mit dem her ze Korntîn.

11285 dô vuorter die gesellen sîn,

Êrec und den herrẹn Îwein,

Lanzelet und herṛẹn Gâwein,

und hundert rîter wol geborn,

der manheit was ûz erkorn.

11290 daz was dô sîn gesinde.

zweinzic wol geborner kinde

vuorter und diu künigin

in daz lant ze Britanje hin.

sus vuorens âne swære.

11295 dô brâhte in leidiu mære

ûf dem wege ein garzûn.

des roc was gel unde brûn

in ein ander geparrieret;

sîn houbet was gezieret

11300 mit einem schapel bluomîn;

ouch truoc er in den henden sîn

einen stap von helfenbeine.

der knappẹ lief vreuden eine,

ich wæn diu was im kleine.

11305 Als er die knappen komen sach,

der garzûn trûriclîche sprach

‘ei, guote knappen, tuot mir kunt

âne zorn, wider mînẹṇ munt,

wes sî ditz gesinde.’

11310 dô sprach einez der kinde

‘daz sol iu unversaget sîn:

des küniges von Korntîn,

her Gwîgâlois ist er genant.’

dô sprach der garzûn zehant

11315 ‘herre, zuo dem bringet mich;

mit iuwer helfe sô hân ich

mînen louf wol bewendet;

ich bin zuo im gesendet.’

der juncherre sprach ‘daz sî getân.’

11320 ze sînem herren vuorter ịn sân.

der garzûn durch die rîter dranc;

an des künịges zoum er spranc.

her Gwîgâlois sprach wider in

‘juncherre, wâ welt ir hin?’

11325 er sprach ‘herre, niwan her.’

bî der rede erkandẹ er

sîner muoter garzûn.

der geburt was er ein Britûn.

er sprach ‘du solt mir willekomen sîn!

11330 nu sagẹ mir von der muoter mîn,

wie sich der reine lîp gehabe;

ich weiz wol si tet sich abe

ir vreude, dô si mich verlôs.

ir herze ist ganzer triuwen flôs.’

11335 der garzûn weinende sprach,

daz ir aller vreude brach

‘owê leider, jâ ịst si tôt!

daz vuocte ir jâmer und diu nôt

die si nâch iuwerm lîbe leit;

11340 diu swære ir abe ḍạz herze sneit.

si schiet mit solhen riuwen hin

daz ich des gewis bin

daz got die sêle im habe erkorn.

ir schœnen lîp hât si verlorn,

11345 daz wizzet, von den beiden:

daz ein was daz scheiden

daz von ir tet ir lieber man,

nâch des minne ir herze bran;

daz ander daz si iuch verlôs.

11350 von disem leide si erkôs

den tôt mit jæmerlîcher klage.

ẹz ist hiute an ḍẹm drîzigesten tage

daz bestatet wart diu reine

undẹr einem edeln steine

11355 in der stat ze Riodach;

mit mînen ougen ich daz sach.

daz vingerlîn sande si her;

daz was ir jungestiu ger

daz ich iu daz bræhte

11360 und man dâ bî gedæhte

muoterlîcher triuwe

und senlîcher riuwe.’

daz vingerlîn enpfie sîn hant;

daran er geschriben vant

11365 ‘owê, geselle und ouch mîn kint!

von iu mîn varwe ist worden blint,

mîn rôtez golt gar überzint.’

Von disem mære gestœret wart

ir aller vreude an der vart.

11370 her Gwîgâlois zẹ herṛẹn Gâwein sprach

‘ditz leit ist alles leides dach

daz uns got noch ie erbôt;

unser beider lîp ist an ir tôt:

si was mîn muoter und iuwẹr wîp.

11375 ist rehtiu konschaft ein lîp,

diu ist mit stæte iu an ir tôt.’

von dirre klage wurden rôt

ir ougen und ir herze sêr.

‘waz mac ich nu sprechen mêr’

11380 sô sprach her Gâwein der degen,

‘wan daz mîn vreude sî gelegen

mit ir hiute vür disen tac

der ich mit hôhem muote ie pflac.

ichn wil konlîcher ê

11385 mit stæte gepflegen nimmer mê,

noch rîterschaft, michn twinges nôt.

owê dir, unbescheiden tôt!

du nimest mangen schœnen lîp

und læst vil wundernaltiu wîp

11390 leben gar über ir zil.

du gîst der werlte jâmers vil!’

sus riten si mit grôzer klage

und kômen an dem zwelften tage

in die stat ze Nantasan.

11395 dâ was vil manic werder man

bî Artûs, dem künịge hêr.

dô si gehôrten rehte wer

dâ kæmẹ, des wurdens alle vrô.

ûf ir ors si sâzen dô

11400 und enpfiengen si mit rîterspil.

man sach dâ kurzewîle vil

von rîtern und von vrouwen,

die gerne wolden schouwen

die küniginne von Korntîn.

11405 Artûs und daz wîp sîn,

mit in diu mässenîe gar,

dîe kômen ûf daz velt dar

zenpfâhen die geselleschaft

mit williges herzen kraft.

11410 deiswâr, daz was billîch,

dar kâmen vünf vürsten rîch,

gesellẹn der tavelrunder,

und aller schœne ein wunder:

diu künigîn Lârîe,

11415 des wunsches amîe.

si wurden wol enpfangen.

dô daz was ergangen,

durch die stat si dô riten

mit vil rîterlîchen siten

11420 und kômen vür des künịges hûs.

der vil getriuwe Artûs,

sîn wîp, vrou Ginovêre,

und ander vrouwen mêre

die kômen ûf den helfant,

11425 dâ man den wunsch von rîcheit vant

und die küniginne.

ir schœne was der minne

geleite und ir krône;

den jâmer si ze lône

11430 gap mit süezen blicken;

si kunde wol verstricken

die sinne dem herzen

mit êwiclîchem smerzen.

der künic Artûs si enpfie,

11435 dar nâch vrou Ginovêre gie

mit manger vrouwen wol getân.

die künigîn si kuste sân

und enpfie vil minneclîche

ir juncvrouwẹn alle gelîche.

11440 dâ wart vil manic kus getân

von den vrouwen wol getân;

si giengen mit ein ander dan.

Diu künịgîn vrouwẹn Lârîen nam,

als ez ir êren wol gezam,

11445 und der künic Artûs.

si leiten si in ir hûs

mit vrœlichem schalle.

die edeln rîter alle

enpfiengen vrouwẹn Lârîen,

11450 des wunsches âmîen.

alle die si gesâhen

des prîses si ir jâhen

an schœne unde an sælicheit

und daz ir lîbe wærẹ bereit

11455 der wunsch an wîplîchem zil;

sus wart si geprîset vil

von der mässenîe.

diu künigîn Lârîe

gie dô mit der wirtîn.

11460 ir kamergwant truoc man în

und entladete den helfant.

künic Artûs nam bî der hant

den jungen künic von Korntîn;

in und den vater sîn

11465 vuort er mit vreuden ûf den sal,

dâ daz gesinde über al

si vil williclîche enpfie.

der grâve Hojir dô gie;

er und sîne amîe,

11470 mit rehter kurtôsîe

enpfiengen si den werden degen.

swie sîn prîs wære gelegen

von des heldes manheit,

im was iedoch sîn dienst bereit.

11475 sîns gelückes wâren sị alle vrô.

alrêrst gevrieschen si dô

daz sîn vater was her Gâwein,

des zuht ie âne wandel schein.

der helt beleip mit vreuden dâ

11480 siben tage, und gerte sâ

urloubes, er und sîn gespil:

si hêten ze tuonne vil

dâ heime in ir lande.

daz was in allen ande,

11485 rîtern unde vrouwen.

doch muosen si schouwen

daz der helt danne schiet,

als im sîn unmuoze riet.

der helt urloubes gerte;

11490 des in ungerne gewerte

sîn nevẹ, der künic Artûs.

er sprach ‘daz ir ûz mînem hûs

nû ze disen zîten

sô gâhes müezet rîten,

11495 daz ist mir inniclîche leit;

mîn dienest ist iu bereit,

dar zuo mîn helfe und mîn rât,

swenne ir mich daz wizzen lât,

wand ir mîn næhster mâge sît.

11500 neve, ir sult vür dise zît

triuwen an mich warten

âne valsches scharten.’

her Gwîgâlois sprach âne spot

‘herre, daz vergelte iu got!

11505 der rede ist mir von iu ze vil;

nu wizzet daz ich immer wil

iu dienstes wesen undertân

die wîle und ich den lîp hân.’

urloup nam der helt dâ

11510 zem künịge und ouch anderswâ,

und vrouwẹ Lârîe, sîn gespil.

die buten dienstes harte vil

den vrouwen und der rîterschaft.

her Gâwein und sîn [gẹ]selleschaft

11515 die konduwierten si von dan,

und manic ander werder man,

der ich niht genennen kan.

Dô kêrte der helt gegẹn Korntîn;

her Gâwein, der vater sîn

11520 reit mit im besunder.

er sprach ‘got hât sîn wunder

und sîn genâde an iu getân.

ir sult im wesen undertân

und minnẹt in herzelîche.

11525 der sinne sît ir rîche,

des guotes und der êren;

daz sult ir allez kêren

swâ ir mugẹt nâch sîṇẹm gebot.

swer herzelîche minnet got,

11530 der ist behalten hie und dort.

sun, nu merket disiu wort

und behalt diu âne missetât, —

daz ist mînes herzen rât: —

sît bescheidẹn an allen dingen

11535 und lât niht verdringen

die jugent iuwer sinne;

der iuch mit triuwen minne

an den sult ir iuch lâzen

und bœses schimpfes mâzen;

11540 vernemet armer liute klage

und büezẹt ir kumber alle tage;

sît gewizzen unde guot;

den vînden traget hôhen muot,

den vriunden sît geselliclîch

11545 und miltẹ: sô werdẹt ir lobes rîch;

bietet den gesten êre

nâch iuwẹr gewizzen lêre;

sît dem gehülfic unde guot

der iuwern willen gerne tuot.

11550 disem râte volget nâch:

lât iuwern zorn niht wesen gâch;

tragt scham ob allen iuwern siten.

ich wil iuch manen unde biten

daz ir gedenkẹt der vrouwen mîn,

11555 bî der ich wil mit jâmer sîn,

der reinen Flôrîen.

sold ieman wâfen schrîen

über gotes gwalt, daz tæte ouch ich,

wand er hât beroubet mich

11560 mîner hœhsten wunne;

si was ein breḥẹndiu sunne

enmitten in mîṇẹm herzen.

owê des grôzen smerzen

den ich nu ewiclîche trage

11565 mit tôtlîcher jâmers klage!’

vor leide sị beide weinden;

mit triuwen si bescheinden

daz si in beiden liep was.

‘munt von wîbe nie gelas, ’

11570 sprach her Gwîgâlois der degen,

‘diu gänzlîcher kunde pflegen

wîplîcher güete;

ir herze in tugent blüete

alsô der süezen rôsen bluot

11575 des morgens gegẹn der sunnen tuot.’

sus truogen si des jâmers last;

diu vreude was ir herzen gast.

ganziu triuwe ir beider pflac

unz an ir ende mangen tac.

11580 sînen vater er mit vlîze bat

swen im der reise würde stat,

daz er kœme in sîn lant;

daz lopte her Gâwein zehant.

ein ander si dô kusten;

11585 si truogẹn under ir brusten

triuwe âne wenken,

die valsch niht mohte beschrenken.

sîne liebe tohter kuste er dô;

der herze wart vor leide unvrô

11590 daz si sich muosen scheiden.

den gelieben beiden

gap der helt vil süezen segen

und bat ir got aller pflegen.

sus nâmen si dô urloup dâ;

11595 mit jâmer si sich schieden sâ.

her Gâwein und des künịges man

die kêrten gegen Nantasan,

her Gwîgâlois gegẹn Korntîn.

vrouwe Lârîẹ diu künigîn

11600 weinde unde was unvrô.

her Gwîgâlois si trôste dô;

mit schimpflîchem mære

benam er ir die swære.

si was untriuwen lære.

11605 Sus kômen si ze Korntîn.

der künic und diu künigîn

besâzen dâ ir eigen lant,

dâ man sît immer mêre vant

vreude nâch des herzen gir.

11610 ezn liege dịụ âventiure mir,

sît si dâ wurden sedelhaft,

vrouwen unde rîterschaft

vant man dâ zallen zîten vil.

die burc nant man der vreuden zil.

11615 ein wîtiu stat dâ vor lac

wüeste vil mangen tac;

die besatzter unde bûwet sị wol.

daz lant wart allez vreuden vol

von des heldes sælicheit.

11620 got sîn dienest was bereit

mit lûterm herzen; alle tage

vernam er armer liute klage

und buozte in ir kumbers nôt,

als im diu mâze ie danne gebôt.

11625 mit vreuden lebten si ir jâr.

vrouwe Lârîẹ von im gebar

und von gotes stiure

einen sun, des âventiure

mir ze wilde wære,

11630 ze krump und ze swære,

von sô wunderlîcher [gẹ]schiht

daz ichz mit mînem getiht

nimmer triuwe errecken.

er muoz die sinne endecken

11635 swer si ze rehte tihten wil;

daz mære ist hôher sinne ein zil.

der selbe sun wart genant,

sîn nam wîten erkant,

Lifort Gâwânides.

11640 sîn âventiure giht des

daz rîters tât zer werlte nie

gesteic mit wârheit hœher ie.

er kundẹ mit rîcher jost diu sper

hurticlîchẹ nâch rîters ger

11645 in dem poinder brechen,

durch herte schilte stechen.

sîn gernder prîs nâch êren ranc.

âvoy, wie dicke im sît gelanc

an mangem herten strîte!

11650 er sluoc wunden wîte

durch helme und durch härsenier.

der helt wart mänlîch unde fier.

disẹ âventiure nem sich an

ein sô künstiger man

11655 der wildiu wort künne zamen.

vremdiu mære und vremde namen

hât diu âventiure.

ich gibim daz ze stiure

swer si gerne tihten wil,

11660 daz ich in wîse ûf ir zil

dâ si geschriben hât ein man

der ir im wol ze tihten gan,

von der wälsche in diutsche zungen

mich hât von ir gedrungen

11665 mîn krankiu kunst und mîn sin;

von ir ich sus gescheiden bin.

swie kranker kunst ich doch sî,

ich belîbẹ der âventiure bî.

diuhte mîn werc die wîsen guot

11670 und vünde ich ein sô ringen muot

der mich dâ zuo beriete,

mîn zunge si verschriete

und begunde sị wider lîmen

mit ganzen niuwen rîmen.

11675 als ich wæne, des envinde ich niht.

owê der jæmerlîchen [gẹ]schiht

daz diu werlt niht vreuden hât!

ir hœhstez lebẹn mit grimme stât;

daz ist rîters orden!

11680 ich bin wol innen worden

daz der werlte vreude sinket

und ir êre hinket;

daz prüevet in diu gîticheit,

diu bœsen muot und erge treit.

11685 owê! daz ist mîn herzeleit.

Ich wil daz mærẹ volenden hie,

als michz ein knappe wizzen lie

der mirs ze tihten gunde.

niwan eines von sîṇẹm munde

11690 enpfie ich dịẹ âventiure;

dâ von was mir tiure

daz mære an mangen enden.

mînen sin wil ich wenden

an ein ander, und wizzet daz

11695 diu wirt von mir erriten baz.

her Gwîgâlois und sîn wîp

rîcheit und êren pflac ir lîp

ân alle missewende

schône unz an ir ende.

11700 ir reinez lebẹn verdiente hie

daz gotes gnâde sị dort enpfie

dâ tûsent jâr sint ein tac.

dẹheinẹs herzen sin gemezzen mac

der vreude niht gelîche

11705 diu ist in himelrîche;

dar uns noch got gesende

ûz disem ellende!

hie hât daz buoch ein ende.


Le texte seul est utilisable sous licence Licence OpenEdition Books. Les autres éléments (illustrations, fichiers annexes importés) sont « Tous droits réservés », sauf mention contraire.