Car elle (la sagesse) est un reflet de la lumière éternelle,
Un miroir sans tache de l’activité de Dieu,
Une image de sa bonté.
(Livre de la Sagesse, 7, 26.)
Car nous voyons, à présent, dans un miroir, en énigme, mais alors ce sera face à face. À présent, je connais d’une manière partielle ; mais alors je connaîtrai comme je suis connu.
(Paul, I Cor., 13, 12.)
Et nous tous qui, le visage découvert, réfléchissons comme en un miroir la gloire du Seigneur, nous sommes transformés en cette même image, allant de gloire en gloire, comme de par le Seigneur, qui est Esprit.
(Paul, II Cor., 3, 18.)
Tu vois maintenant la grandeur et largeur
De l’éternelle valeur, après qu’elle a créé
Tant de miroirs où elle se morcèle,
En restant une en soi, comme avant.
(Dante, Paradis, xxix, 143-145, trad. J. Risset, GF-Flammarion, 1990.)
Riens ne se puet de lui (Dieu) garder,
Ja tant ne savra regarder,
Car la chose n’iert si lontaingne
Que dieus devant soi ne la taingne
Aussi com s’ele fust presente :
Demeurt. x. ou. xx. ou. xxx.,
Voire. v. c. voire. c. mile,
Soit a faire a champ ou a vile,
Soit honeste ou desavenant,
Si la voit dieus de maintenant
Aussi com s’el fust avenue,
Et de touz jors avenue,
Et de touz jors l’a il vëue
Par demoustrance veritable
A son miroer pardurable,
Que nus fors lui ne set polir,
Sanz riens a franc voloir tolir.
Cist miroers, c’est il meïsmes,
De cui commencement preïsmes.
En cest beau miroer poli
Qu’il tient et tint touz jors o li,
Ou tout voit quanqu’il avendra
Et touz jors present le tendra,
Voit il ou les ames iront
Qui loialment le serviront,
Et de ceuls aussi qui n’ont cure
De loiauté ne de droiture ;
Et leur promet a ses idees,
Des oevres qu’il avront ouvrees,
Sauvement ou damnacion :
C’est la predestinacion,
C’est la prescience divine
Qui tout sait et riens devine […]
(Jean de Meun, Le Roman de la Rose, éd. A. Strubel,
Lettres Gothiques, 1992, v. 17459-17490.)
Car quant aigue est clere et rasise
on s’i puet mirer et veoir
tout ainsi qu’en. i. mirëoir.
Et mirëoirs, je vous afie,
Pourvëance nous senefie,
Qui garde les vertus de l’onme.
Et qui pourvëance a droit nonme,
Il l’apele, selonc scïence,
Le mirëoirs de conscïense,
Car si c’on puet el mirëoir
Le cors mirer pour mieus sëoir
Et acesmer la mescëance,
Ainsi puet on en porvëance
La conscïense el cuer mirer
Et pourvëoir et remirer
En quel point on use sa vie,
Soit en savoir ou en folie.
(Baudoin de Condé, Le Conte du dragon, v. 388-404, Panunzio, p. 23.)
Je t’ai ja dit qu’ell’a semblant
Par congruité afferant
A son createur qui la fist,
Du quel sainte escripture dit
Qu’il est mirour sans tache
Ou creatures leur face
Pueent bien toutes regarder ;
Pour laquel chose dois penser
Que l’ame faite a son semblant
Aucunement com respondant
Com mirouour doit estre a lui,
Affin qu’il ne soit chose qui
En li sa semblance mirer
Ne puist et bien considerer ;
Pour la quelle capacité
N’est il mie necessité
Que de rien l’ame plus grant soit
Car petit mirouour recoit
Plus grans semblances que il n’est. »
(Guillaume de Digulleville, Pèlerinage de l’Âme, éd. J. -J. Stürzinger, Roxburghe Club,
Londres, 1895, v. 6979-6997. Il s’agit du passage avec l’Ourse Doctrine.)
Outre passay, en cloistre alay Et la une dame trouvay Qui entre ses mains un escrin - Tout ce sembloit de parchemin – Tenoit, et le aloit portant (f° 94 v° ) Entour le cloistre et tournoiant, Et la sivoit tout environ En l’air volant un blanc coulon. A li voul parler.Je li dis : « Dame, dis je, moult sui pensis De cel escrin qu’alés portant Et de ce coulon vous sivant. » La sousceleriere parle : « N’y pense, dist elle, que bien, Quar d’autre chose n’i a rien. Je sui la souscelleriere De ci et la pitanciere. A mengier je donne a l’ame Et la repais, que n’afame. Le cuer pais, non pas la pance De ma tres doulce viande Que m’a baillié la merciere De ci ens maistre cloistr (i) ere
|
Que se tu veulx te mousterray Et a li parler te feray. » Si parle le pelerin : « Bien le voeil », dis. Lors me mena En un destour et me moustra Celle merciere que disoit. Je la vi et moult belle estoit. Et tenoit grant establie De diverse mercerie Et entre ce qui y estoit Mains mirouours il y avoit Qui a primier moult me pleurent Et moult gracieus me furent. Et la dame gracieuse Me fu, et soupeçonneuse Pour ce que mipartie estoit D’une clarté qui la n’estoit Esgaument du costé destre Sans rien toucher au senestre. La teste estoit enluminée Et l’autre n’estoit adessée Mais demouroit bien umbragé Et en corps et en visage.
|
A li je voul tantost parler. « A vous voulsisse marchander, Dis je, se sceüsse vostre nom, Vostre loy et condition. » Si parle la merciere : « Je sui, dist elle, nourrice De tous ceulx qui fuient vice Et saches que il n’est cloistre Se dedens li ne m’encloistre Que il ne soit mains vaillable Et assés mains honnourable. De bonne gent sui amée Et sui dite et appelée Par droit non Agyographe Qui sui sans roigne et sans crase Qui par foiries et par festes Gis toujours en piaulx de bestes. » Si parle le pelerin : « Et pourquoy es mipartie ? Dis je, ne le cele mie. D’une part enluminée Es si a point et parée Que point ne s’en sent l’autre part Et si ne voy point de quel part Telle clarté puet descendre. Si voeil bien ceci entendre. » Si parle la merciere : « Pas ne fu, dist elle, née Com tu en une journée. U vieil temps la part umbrage Quant estoit en tapinage Jhesus, le soleil, fu née, Mais la part enluminée Fu née quant de la nue Fu la clarté descendue Du soleil qu’enlumine Tout par la grace divine Et ceste partie clere N’est pas de li si avere Qu’en l’autre ne resortisse Et ne li en departisse. (f° 95) Moult seroit voir plus umbrage L’autre part de mon visage Que n’est, se il n’avoit resort De la clere part et aport
|
Et pour ce sans discretion As dit que limitation Est de la clere partie Si que l’autre n’en a mie. Moult fust noir le vieil testament, Tenebreus, s’enluminement N’eüst du nouvel qu’enlumine Luisant et clere doctrine. C’est pourquoy sui mipartie Que briefment te senefie. Autre chose ay cy a faire Qui moult plus est necessaire. » Si parle le pelerin : « Or me dites, dis je, quel chose, Et je vous promet la rose La premiere que je verray En may prochain et trouveray. » Si parle la merciere : « Certes ci endroit n’ay mie Dist elle, mis m’establie Sans cause : il y a oignemens Ou prennent assouagemens Gens malades, desconfortés, Desesperés et mesportés, Plains d’ennui et de tristece Et que turbation blece. Pignes y a, et estrilles, Sades houes et faucilles Pour vielx pechiés enracinés Estre du tout exterminés. De telx oustis y a assés Qui sont fais afin que cassés Et extirpés soient pechiés En quel lieu qu’il soient fichiés. Des mirouours ay a plenté Pour tous ceulx qui ont volenté De eulx mirer diversement En verité ou faussement Quar les uns se veulent mirer Vrayement pour eulx atirer Et estranger leur laidures. Li autres leurs mespresures Veulent que soient mirées Faussement et regardées, Que le mirouour les die
|
Belles, et ne le sont mie. Des uns et des autres assés En mon pennier sont amassés. Se chose y a qui te plaise, Prenre la pues a ton aise. » Si parle le pelerin : Bien vi quanqu’elle me disoit Et que bien grant proufit gesoit En li et en s’acointance. Si li priay qu’eüst souffrance Jusqu’à tant qu’eüsse veü Ce qui m’aroit le mielx pleü. Elle l’otroia bonnement Et quant j’o fait reverchement De toute la mercerie, Aux mirouours m’estudie Fu, pour moy dedens regarder. Le premier me prist a farder Et a mon visage paindre Et dessus tel biaulté faindre Que point si belle n’avoie Eü, si com bien savoie. Joie en eü soudainement Mais tost dis :« Ce miroour ment ». Sa fausseté m’eüst deceü Se ne me fusse cogneü « A ton bon los n’afiert mie De porter tel mercerie. » Si parle la merciere : « Se, dist elle, le disoie Vray ou bon, je mentiroie. Tel le moustre tant seulement Com il est, et enseignement De li donner je sui preste Quant on m’en fera requeste. Aussi sui je des denrées Toutes qu’ay ci aportées. Nullui je ne voeil decevoir Mais les decevances de voir Je voeil moustrer appertement. Et si sces que communement Des mirouours les bons faiseurs De manieres en font pluseurs. (f° 95 v° ) Li uns veult de (s) meillieurs bien fais Et li autre des contrefais
|
Qui font beslonc le visage Ou gros poil du poil folage, Qui au dessoubz tournent le front Et mettent le menton amont Et autres de plusieurs guises Dont pluseurs font grans cointises Si que ne te voeilles pas plaindre Se ci ay voulu ataindre Pluseurs de pluseurs manieres Demoustrans diverses chieres. » Si parle le pelerin : « De ce mirouour, dis je, le nom Me voeilles dire, et le renon, Comment de li on doit user Et se point on y doit muser. » Si parle la merciere : « Grant proufit, dist elle, feroit Et grant los et honneur seroit A tous s’il estoit cogneü Et de bon euil aperceü Que en tel guise on y musast Et que si bien on en usast Que on n’en fust point deceü Pour chose qu’on y eüst veü. Parole d’Adulation Est appellé par son droit non, Parlement de Flaterie Engendré de Menterie. Jadis tu le veïs porter, Se tu t’en veulx bien recorder, A la vieille qui chevauchoit Orgueil qui le soufflet tenoit. Aucuns l’appellent Placebo Pour ce que scet bien faire escho En redisant ce qu’ot dire A celui qui est son sire. Jamais ne le contrediroit De ce que dire li orroit Comment que fust contre raison Laquel chose est deception Quar cil qui s’est ainsi miré En tel echo qu’il a trouvé Pense pour le tesmoignage Qu’ait bien dit et que soit sage Et veult ce qu’a dit maintenir
|
Pensant que mal n’en puist venir. Mais pour ce qu’il est autrement, Mauvaise fin la chose prent Et est le signeur deceü Pour le voir qu’on ly a teü Et qu’on li a dit fausseté Pour li servir. i. pou a gré. Encor decoit il autrement Son seigneur et plus soutilment : « Certes, dit il, vous estes biaux, Gratieus, fors, puissans, isniaux, Liberaulx et de tous amés, Sages, discres et redoubtés. Nullui vous ne devés doubter Pour rien qu’on vous puist raporter. Créés moy de quanque vous di Je sui certes moult vostre ami. » Or est moult fol un tel sire Qui ou mirouour se mire Et croit que il die voir, Qui mi elx scet et mielx doit savoir Comment li est et quielx il est Mesmement quant bien scet que n’est Liberal ne fort ne isniaulx Ne si gracieus ne si biaulx Com on li dit, ne si doubté Mesmement quant ce esprouvé Il a, et de ses anemis Tous les jours se voit assaillis. N’est pas sage qui a autrui Mielx se veult croire que a lui Se tres loial il ne le sent Et rien ne die faussement. Le mirouour aussi faulx est Qui afferme ce qui pas n’est Et decoit ceulx qui s’attendent A son raport et entendent. Es maisons de ces grans segneurs En trouveroit on bien pluseurs Quar s’i mirent mains volentiers Dont il ne leur fust pas mestiers. Mielx vaulsist que les ostassent Ou que point ne s’i mirassent Quar sus le pueple et sus leur gent Eüssent meilleur gouvernement. (f° 96)
|
Mielx assés se cogneüssent Et leur faultes perceüssent Et fussent assés mielx amés Et chier tenus et honnourés. Or sont par echo deceüs Et en sont mains subjes perdus Quar moult en ont d’oppressions Et de grans tribulacions Que ne cuident pas les seigneurs Pour ce que leur dient f(l)ateurs : « Tout est vostre, prenés tout ! Un vilain ne puet estre roupt Pour chose qu’entour li pregniés. Puis qu’il a et mains et piés, Assés de l’autre gaignera. Honni soit qui l’espergnera ! » Ainsi leur seigneur maudire Font, et tel fois est occire Ou li livrer aus anemis Ou faire gaster son païs Pour tel le mirouour te vent : Ce il t’est bon, si y entent. » Si parle le pelerin. Ce mirouour tantost Et onques puis ne m’i miray. Un autre pris a regarder Et dedens je me voul mirer Mais si lait m’i vi et hideus Que tout confus et tout honteus En son panier le regetay Et tout confus me retournay. Si parle la merciere : « Qu’est ce ? dist elle, je voy bien Et apercoit a ton maintien Qu’au mirouour de Conscience Ou est humaine experience De monstrer sans menterie Sans echo de flaterie, Quel face on a et quel visage, Quel on est, a quel ymage On est pourtrait et figuré, Et en quoy on est des fourmé T’es tourné et n’en as cure, Qui deüsses ta laidure Amender selon son raport
|
De quoy certes tu as grant tort. » Si parle la sousceleriere : Lors dist la souscelleriere « Point ne plaist a la merciere Que de li ne t’es autrement Acointié et plus sagement Mais apres t’en acointeray Et ta grant amie en feray Se tu te veulx acoustumer De moy hanter et frequenter Et de toy saouler des mes
|
Que tous les jours nouviaulx et fres De prenre sui coustumiere Par devers ceste merciere Qui a non Sainte Escripture Les quielx je porte a grant cure En vaissel fait de parchemi (n) Pour ce que n’espande en chemin. Gardée ne si bien ne si bel Ne puet estre en autre vaissel Et saches que j’ay non Lecon Et Estude par mon droit non. » |
(Transcription par F. Pomel d’un extrait du Pèlerinage de Vie humaine, Guillaume de Digulleville, 2e rédaction [inédite] d’après BnF ms. fr. 3772. Il s’agit d’un passage à la fin du récit, lorsque le pélerin est parvenu sur la nef de Religion. Je tiens à remercier vivement Michel Rousse qui m’a aidée à déchiffrer certains passages et à améliorer cette transcription, où subsistent certaines interrogations.)