Annexe III. Le texte du traité de Paris, octobre 1259
p. 309-312
Texte intégral
1Texte de la ratification anglaise conservée aux Archives nationales, AN, J 629/8, aujourd’hui au musée des Archives nationales : AE III/3, éd. : LTC 3, no 4554. Les marques de paragraphes sont les nôtres. Le texte du traité sur parchemin ne forme qu’un seul bloc rectangulaire.
⁂
2[Intitulacio, notification et annonce du dispositif] Henris, par la grace de Dieu rois d’Angleterre, sires d’Illande et dux de Aquitaine. Nous faisons à savoir à touz ceaus qui sunt et qui à venir sunt, que nous, par la volenté de Dieu, ovec nostre chier cousin, le noble roi Loeys de France, avons pais faite et affermée en ceste maniere.
3[Dispositif]
4§ 1.C’est à savoir que il done à nous, et à noz hoirs, et à noz successors toute la droiture que il avoit et tenoit en ces trois eveschiés et es citez, c’est à dire de Limoges, de Caorz et de Pierregort, en fiez et en demaines, sauf l’omage de ses freres, se il aucune chose i tiennent dont il soient si honme, et sauves les choses que il ne puet metre hors de sa main par letres de lui ou de ses ancessors, les queles choses il doit porchacier en bone foi, vers ceus qui ces choses tiennent, que nous les aions dedenz la Touz Sainz en un an, ou faire nous eschange couvenable, à l’esgart de prodes homes qui soient nonmez d’une part et d’autre, le plus couvenable au profit des deus parties.
5§ 2. Et encore li devant diz rois de France nous dorra la value de la terre de Agenois en deniers chascun an, selonc qu’elle sera prisiée à droite value de terre de prodes homes nomez d’une part et d’autre, et sera faite la paie à Paris, au Temple, chascun an, à la quinzainne de l’Ascension la moitié, et à la quinzainne de la Touz Sainz l’autre. Et, s’il avenoit que celle terre eschaist de la contesse Jehane de Poitiers au roi de France ou à ses hoirs, il seroit tenuz ou ses hoirs de rendre la nos ou à noz hoirs, et, rendue la terre, il seroit quite de la ferme. Et, se ele venoit à autres que au roi de France ou à ses hoirs, il nous dorroit le fié de Agenois ovec la ferme devant dite. Et, s’elle venoit en demaine à nous, li rois de France ne seroit pas tenuz de rendre celle ferme. Et, se il estoit esgardé par la court le roi de France que, pour la terre de Agenois avoir, deussiens metre ou rendre aucuns deniers par raison de gagiere, li rois de France rendroit ces deniers, ou nouz tendrions et aurions la ferme tant que nos eussiens eu ce que nos aurions mis pour cele gagiere.
6§ 3. De rechief, il sera enquis en bone foi et de plain, à nostre requeste, par prodes homes d’une part et d’autre à ce elleuz, se la terre, que li cuens de Poitiers tient en Caorsin de par sa fame, fu dou roi d’Engleterre donée ou bailliée ovec la terre de Agenois par mariage ou par gagiere, ou tote ou partie, à sa suer, qui fu mere le conte Raymon de Tholose darreenement mort. Et, s’il estoit trouvé qu’il eust ainsi esté, et celle terre li eschaoit ou à ses hoirs dou decès la contesse de Poitiers, il la donroit à nous ou à noz hoirs, et, se elle eschaoit à autre, et il ert trouvé par celle enqueste tote vois que elle eust einsi esté donée ou baillie, si conme il est dit desus, après le decès la contesse de Poitiers, il donroit le fié à nous et à nos hoirs, sauf l’omage de ses freres, se il aucune chose i tenoient, tant conme il vivroient.
7§ 4. De rechief, après le decès le conte de Poitiers, li rois de France, ou ses hoirs, rois de France, donra à nous et à noz hoirs la terre que li cuens de Poitiers tient ores en Xantonge, outre la riviere de la Charente, en fiés et en demaines, qui soient outre la Charente, s’elle li eschaoit ou à ses hoirs. Et, se elle ne li eschaoit, il porchaceroit en bone maniere, par eschange ou autrement, que nous ou noz hoirs l’aions, ou il nos feroit avenable eschange, à l’esgart de prodes homes qui seront nomez d’une part et d’autre.
8§ 5. Et de ce que il donra à nous et à noz hoirs en fiez et en demaines, nous et nos hoirs li ferons homage lige, et à ses hoirs, rois de France, et ausi de Bordiax, de Baionne et de Gascoingne, et de toute la terre que nous tenons de là la mer d’Engleterre, en fiez et en demaines, et des illes, s’aucunes en i a, que nos teignons, qui soient du roiaume de France, et tendrons de lui conme per de France et dux de Aquitainne. Et de toutes ces choses devant dites li ferons nos servises avenables, jusques à tant que il fust trouvé queus servises les choses devroient, et lors nous serions tenu de fere les, tex conme il seroient trouvé. De l’onmage de la conté de Bigorre, de Armeignac et de Foiensat soit ce que droit en sera. Et li rois de France nous claime quite, se nous ou nostre anceseur li feismes onques tort de tenir son fié sanz li fere homage et sanz lui rendre son servise, et touz arrerages.
9§ 6. De rechief, li rois de France nouz dorra ce que cinc cenz chevaliers devroient couter raisonablement à tenir deus anz, à l’esgart de prodes homes qui seront nomez d’une part et d’autre, et ces deniers sera tenuz à paier à Paris, au Temple, à sis paies par deus anz, c’est à savoir à la quinzaine de la Chandeleur qui vient prochainement la premiere paie, c’est à dire la sisiesme partie, et à la quinzaine de l’Ascension ensuivant l’autre paie, et à la quinzaine de la Touz Sainz l’autre, et ausi des autres paies en l’an ensuivant. Et de ce dorra li rois de France le Temple, ou l’Ospital, ou anbedeus ensemble en plege. Et nos ne devons ces deniers despendre fors que u servise Dieu ou de l’Yglise, ou au profit dou roiaume de Angleterre, et ce par la veue des prodes homes de la terre, esleuz par le roi de Angleterre et par les hauz homes de la terre.
10§ 7. Et par ceste pais faisant avons quité et quittons du tot en tot, nous et nostre dui fil, au roi de France, et à ses ancessors, et à ses hoirs, et à ses successors, et à ses freres, et à leur hoirs, et à lor successors, pour nous, et pour noz hoirs, et pour noz successors, se nous ou nostre ancessor aucune droiture avons ou eusmes onques en choses que li rois de France tiengne ou tensit onques, ou si ancesor, ou si frere, c’est à savoir en la duchée et en tote la terre de Normendie, en la conté et en toute la terre d’Anjou, de Tourainne et dou Mainne, et en la conté et en toute la terre de Poitiers, ou aillors en aucune partie du roiaume de France, ou es illes, s’aucunes en tient li rois de France, ou si frere, ou autres de par eus, et touz arrerages.
11§ 8. Et ausi avons quitté et quittons, nous et nostre dui fil, à touz ceus qui de par le roi de France, ou de par ses ancessors ou de ses freres tiennent aucune chose par don, ou par eschange, ou par vente, ou par achat, ou par ascensement ou en autre senblable maniere, en la duchée et en toute la terre de Normendie, en la conté et en toute la terre d’Anjou, de Touraine et dou Maine, et en la conté et en tote la terre de Poitiers, ou ailleurs en aucune partie dou roiaume de France, ou es illes desus dites, sauf à nous et à noz hoirs nostre droiture es terres dont nos devons fere homage lige au roi de France par ceste pais, si conme il est desus devisé, et sauf ce que nous poissiens demander nostre droiture, se nous la cuidons avoir en Agenois, et avoir la, se la court le roi de France le juge, et ausi de Caorsin.
12§ 9. Et avons pardoné et quitté li uns à l’autre, et pardonons et quittons touz mautalanz de contanz et de guerres, et touz arrerages, et toutes issues qui ont esté eues ou qui porent estre eues en toutes les choses devant dites, et touz domages et toutes mises, qui ont esté fait ou faites de çà ou de là, en guerres ou en autres manieres.
13[1re clause de corroboration] Et, pour ce que ceste pais fermement et establement, sanz nulle enfraignance, soit tenue à touz jorz, li rois de France a fait jurer en s’ame, par ses procureors especiax à ce establiz, et si dui fil ont juré ces choses à tenir, tant conme à chascun apartendra, et à ce tenir ont obligié eus et leur hoirs par leur letres pendanz.
14§ 10. Et nos de ces choses tenir sonmes tenuz de doner seurté au roi de France des chevaliers des terres devant dites, meismes que il nous done, et des viles, selonc ce que il nous requerra. Et la forme de la seurté des homes et des villes pour nous sera telle : il jurrunt qu’il ne donront ne conseil, ne force, ne aide, par quoi nos ne nostre hoir venissen encontre la pes, et, s’il avenoit, que Dex ne vuelle, que nous ou nostre hoir venissen encontre, et ne le vousisson amender, puis que li rois de France, ou si hoir, roi de France, nous en auroient fet requerre, cil qui la seurté auroient faite, dedenz le trois mois que il les en auroient fet requerre, seroient tenu d’estre aidant au roi de France et à ses hoirs contre nous et nos hoirs, jusque à tant que ceste chose fust amendée soufisanment, à l’esgart de la court le roi de France. Et sera renouvelée ceste seurté de dis ans en dis anz, à la requeste du roi de France, ou de ses hoirs, rois de France.
15[Clause de ratification] Et nous ceste pais et ceste composicion, entre nous et le devant dit roi de France afermée, et toutes les devant dites choses et chascune, si conme elles sunt desus contenues, prometons en bone foi pour nous, et pour noz hoirs, et pour nos successors au devant dit roi de France, et à ses hoirs, et à ses successors loiaument et fermement à garder, et que nous encontre ne vendrons, par nous ne par autre, en nulle maniere, et que riens n’avons fait ne ne ferons, par quoi les devant dites choses, toutes ou aucune, en tout ou en partie, aient mains de fermeté.
16[Clause de corroboration anglaise] Et, pour ce que ceste pais fermement et establement, sanz nulle enfraignance, soit tenue à touz jourz, nous à ce oblijons nous et noz hoirs, et avons fait jurer en nostre ame par noz procureors en nostre presence ceste pais, si conme ele est desus devisée et escrite, à tenir en bone foi, tant conme à nous apartendra, et que nous ne vendrons encontre ne par nous, ne par autre. Et, en tesmoignage de toutes ces choses, nous avons fait au roi de France ces letres pendanz, seelées de nostre seel. Et ceste pais, et toutes les choses qui sont desus contenues, par nostre conmandement especial, ont juré Eddward et Eadmont, nostre fil, en nostre presence, à garder et à tenir fermement, et que il encontre ne vendront par els ne par autre. Ce fu doné à Londres, le lundi prochain devant la feste Saint Luc l’evangeliste, l’an de le incarnacion Nostre Seigneur mille CC cinquante nuevisme, el mois de octouvre.
Le texte seul est utilisable sous licence Creative Commons - Attribution - Pas d'Utilisation Commerciale - Pas de Modification 4.0 International - CC BY-NC-ND 4.0. Les autres éléments (illustrations, fichiers annexes importés) sont « Tous droits réservés », sauf mention contraire.
Un constructeur de la France du xxe siècle
La Société Auxiliaire d'Entreprises (SAE) et la naissance de la grande entreprise française de bâtiment (1924-1974)
Pierre Jambard
2008
Ouvriers bretons
Conflits d'usines, conflits identitaires en Bretagne dans les années 1968
Vincent Porhel
2008
L'intrusion balnéaire
Les populations littorales bretonnes et vendéennes face au tourisme (1800-1945)
Johan Vincent
2008
L'individu dans la famille à Rome au ive siècle
D'après l'œuvre d'Ambroise de Milan
Dominique Lhuillier-Martinetti
2008
L'éveil politique de la Savoie
Conflits ordinaires et rivalités nouvelles (1848-1853)
Sylvain Milbach
2008
L'évangélisation des Indiens du Mexique
Impact et réalité de la conquête spirituelle (xvie siècle)
Éric Roulet
2008
Les miroirs du silence
L'éducation des jeunes sourds dans l'Ouest, 1800-1934
Patrick Bourgalais
2008
