Desktop versionMobile Version

Les inventaires après décès de la ville de Dijon à la fin du Moyen Âge (1390-1459). Tome I (1390-1408)

 | 
Guilhem Ferrand

1405

74. Feu Jehannin le Vaicherot d’Argilley Dijon 1405, 26 février (n. st.)425

Volltext

  • 425 A.D. Côte-d’Or B II 356/1, C 12 – 4, n° 2.

1Inventoire des biens meubles demores du deces de feu Jehannin le Vaicherot d’Argilley demorant a Diion fait par moy Jehan Poissenot clerc jure de la court de la maierie de Diion commis ad ce de honorable discrete personne et saige maistre Richard, etc., a la requeste de Jehannot Gueniot procureur et en nom de procureur de la ville de Diion, en la presence dudit procureur, Jehan du Frasnoy potier d’estain, Thomas Polain sergent et Perrenot le Cornuet, lesquelx biens ont este prisiez par Perrenot le Cornuet ayant en ce cognoissance en la maniere qui s’ensuit. Et lequel inventoire a este commencie a fere le XXVIe jour de fevrier l’an mil CCCC et quatre

Ou cellier

2Primo II poinsonsa plains de vin et une quehue, en laquelle a environ ung muy et demi de vin, tout prisie par ledit Perrenot : IX frans ;

3Item une pinte, ung pintat et ung cheval a vendre vin de morte matiere pesant environ V livres, la livre prisiee XII deniers ; pour ce : III gros ;

4Item une forme a seoir sus, II maillos, une couchote et ung petit antonneur prisiez : II gros.

Ou chas

5Primo une table de chaigne de deux pieces, II trateaulx, III formes a seoir sur, ung petit ban a maingier sur, ung viez peti<t>eb table, II ratelierz de bois, 1 viez meschant arche de chaigne despeciciec, une soillote de sapin et ung meschant soillotd, une saliere de bois a mectre sele, 1 sofflotb, une petite eschielle, ung cereyb, 1 miaschantc pale de bois, deux selles a seoir sur, tout prisie : XV gros ;

6Item une paelle grasse de fer prisiee : demi franc ;

7Item III pos de coyvre blansf dont les deux sontg assez bons et l’autre est viez et despeciez prisiez : ung franc ;

8Item ung viez chauderon, II petites paelles blanches rondes dont l’une est senz orles, II viez trappes, une escrameure a quehue de fer, une meschant petite casse grasse a quehue prisiez : IX gros ;

9Item deux marteaulx a macons qui sont en gaiges pour III florins, lesquelx sont prisiez : VI gros ;

10Item une haiche a chappuis prisiee : III gros ; [fol. 1v]

11Item ung cromaille, une damoiselle de fer, IIII hastes, II grans et deux petites, une grille, une loichefroye, une chievre, ung trepierh, ung chandellier de fer a mectre lampe, une piece de fer pesant environ VIII livres, 1 viez ferrot, une viez trappe de fer a quehue, 1 marteaul de fer prisiez : II florins ;

12Item une bassole d’arain prisiee : VI blans ;

13Item VII pintes rondes, III pintes ronsi, 1 aiguere ronde, V plas, ung grant et quatre petis, XVj escuellesk pesans environ XLVIII livres, la livre prisiee IIII blans ; vaillent : IIII frans ;

14Item ung pintat de morte matiere a mesure et une escuelle fendue prez de demie prisiez : III blans ;

15Item une chaige a poussins prisiee : 1 gros ;

16Item une chievre a vin de coyvre prisiee : 1 blanc ;

17Item une XIIne de verres, 1 viez beruchon et 1 peneyb prisiez : II solz ;

18Item une torneure, 1 tamis viezl prisiez : II blans ;

19Item ung pot de sextier de terre et ung petit antonneur prisiez : II blans ;

20Item II andains, 1 ratoure, ung viez goix, une forses prisiez : IIII gros ;

21Item une palote de fer que l’on dit estre en gage pour : II blans ;

22Item une viez lampe de coyvre, ensemble le copot, prisiee : II gros ;

23Item ung viez badelaire et une longue viez daigue prisiez : II gros ;

24Item sept haneps de brueres a clom d’argent, dontn l’un est senz clo, prisiez : VI gros ;

25Item une botoille d’oille en laquelle a environ III pintas d’oille de noix prisiee : X blans ;

26Item une pinte de terre plaine de saincb : IIII blans ;

27Item ung autre petit potot de coyvre prisie : II gros ;

28Item trois pains de sup pesans environ XXX livres prisiez : 1 franc ;

29Itemo ung cuveaul a bureterp et 1 petit tonot prisiez : III gros ;

30Item environ livre et demie de lurement dont il en y a une broiche decope prisiee : 1 blans ;

31Item environ VI livres de chandoille prisiees : III gros ; [fol. 2]

32Item ung pot a oille prisie : 1 gros.

a. Rayé : de vin.- b. Lecture incertaine.- c. Sic.- d. Rayé : prisiez.- e. Rayé : et une viez ; suit le mot lanterne ; il n’est pas rayé, mais ne s’intègre plus à la structure de l’article.- f. Le mot semble rayé.- g. Rayé : bo… - h. Rayé : qui n’a que deux pies prisiez.- i. Rayé : dont l’un est senz couvaicle.- j. Rayé : bonnes.- k. Rayé : et une meschant.- l. Rayé : ung viez.- m. Rayé : de fer.- n. Rayé : les deux ne sont.- o. Rayé : environ.- p. Rayé : prisie.

Anmerkungen

425 A.D. Côte-d’Or B II 356/1, C 12 – 4, n° 2.

Der Text und andere Elemente (Illustrationen, importierte Anhänge) stehen unter OpenEdition Books License, sofern nicht anders angegeben.

Suche in OpenEdition Search

Sie werden weitergeleitet zur OpenEdition Search