Versión clásicaVersión móvil
OpenEdition Books

Contes e cants

 | 
Claire Torreilles
, 
Marie-Jeanne Verny

Damàs Arbaud, Chants populaires de la Provence, questions sus una òbra

Jean-Yves Royer

Texto completo

1- Quauquei datas per memoria:

11814: Naissença a Manòsea de Damàs Arbaud.

21837: Après d'estudis de medecina a Montpelhier, es recebut mètge a 23 ans.

31843: Cònsol de Manòsca a 29 ans.

41852: Conselhier generau dei Basses-Aups.

51862, Chants populaires de la Provence I, Aix, Makaire.

61864, Chants populaires de la Provence II, Aix, Makaire.

71876: Mòrt a Manòsca dins l'ostau ont èra naissut, e que sempre l'i avia viscut.

2- Es que Damàs Arbaud es lo promier en Provença a faire aqueu trabalh de collectatge?

8Non. En mai de peças publicadas d'un biais isolat, l'òm conoisse Chants populaires de la Provence / Reveïes deis Magnaneiris, Vendumieiris, Oouliveiris, / acampas, espelis, adoubas, ame accoumpagnament de Clavecin/ per/ Castil-Blaze/ Paris – Cavaïoun, 1845. Maugrat aqueu títol, entre lei 12 cançons d'aqueste recuelh, l'i a soncament tres peças popularas mai ò mens adobadas (La Semana, Leis Souyes à taloun) ò refachas (Son, son), les autres estent de composicions personalas de Josèp Blaze, dich Castil-Blaze, 1784-1857.

9Sabèm qu'un autre grand musicologue cavalhonés, inventor de l'ernomusicologia, Josèp d'Ortiga (Joseph d'Ortigue, 1802-1866), faguet de collectatges. Aquestei semblan perduts, mai vaudriá lo còp de cercar (dins lo fons Calvet d'Avinhon per començar, qu'an de papiers sieus).

3- De qué representan les Chants populaires de la Provence rapòrt a l'ensems de son òbra?

10Damàs Arbaud, en mai d'un elegit locau, èra un arqueològue e un medievista. Parlarai just de sei doas òbras principalas:

111847, Etudes historiques sur la ville de Manosque au Moyen Age, Digne, Guichard.

121868, La voie romaine entre Sisteron et Apt, Paris, Dumoulin.

13Son obratge sus Manòsca es un libre gròs que l'i publica a la fin una tiera de documents inedichs, en latin e en occitan. Per aquestei, la qualitat de son edicion es superiora a ce que seràn, per de documents équivalents, les publicacions d'un Pau Meyer, ò aquelei de la majoritat des universitaris actuaus... Per ce qu'es dau traçat de la via romana que prepausa en 1868, es estat confirmat per les arqueològues d'ara. De son ponch de vista, ses collectatges son pas d'isolar d'aquelei recèrcas: «Et de fait notre œuvre est moins une œuvre littéraire qu'un travail archéologique.» (I, II.)

4- Perqué aquela entrepresa?

14Lo 13 de setembre de 1852, Fortoul, Conselhier generau dei Basses-Aups vengut Ministre de l'Instruccion publica, signa un decret ordonent la constitucion d'un recuelh generau des poësias popularas «composées dans toutes les langues qui sont aujourd'hui parlées en France.» Lo trabalh d'Arbaud, que l'i responde, es dedicat «A la mémoire d'Hyppolite Fortoul.» (Mòrt en 1856.)

5- Ont a collectat?

15Damàs Arbaud a gis laissat d'indicacions sus lei luecs onte faguet ses collectatges. Me sembla pasmens possible de n'establir la zona en partent de quauques ponchs ben establits.

▪ Lo fantasme manosquin: de que l'i a darrier la còla?

16Manòsca es una vila de la vau de Durença, bastida au pè de Leberon. Un Manosquin en cèrca d'autenticitat provençala, quand aura agut fach lo torn de ce que sa vila e ses alentorns li auràn semondut, aura jamai l'idèa, se vòu anar pus luenh, de seguir lo fieu de Durença vèrs la Provença bassa. Es de l'autre costat de Leberon, dins lo país naut, qu'entreprendrà sa quista. La causa es ben conoissuda per l'òbra de Giono: sa Provença mitica l'anet pas quèrre dau costat de Peiraverd ò de Santa-Túllia, mai au Comptador ò darrier les còlas de Lura. Podèm pensar qu'Arbaud deguet faire parier. Apondrai que, uei encara, l'arribada en Forcauqueirés, subretot venent dau sud ò de l'oest, dona lo sentiment d'intrar dins un país preservat.

▪Lo cosin forcauqueirenc:

17Damàs aviá un cosin (fiu de german), Francés Arbaud, de tres ans pus jove qu'eu, qu'èra professor au pichon-seminari de Forcauquier. Aquò li donava au nord de Leberon un ponch de casuda e un mejan de contactes.

▪ Lei recèrcas arqueologicas:

18Tre 1833, Damàs escriviá au bibliotecari dau Musèu de Marselha, tocant una inscripcion romana e una mosaïca trobada a Daufin:

Le propriétaire l'ayant recouverte de terre pour prévenir les dégradations, je ne l'ai pas toute vue. Mais le morceau qu'il eut la bonté de me découvrir me suffira pour vous donner des détails. (...) je n'ai pas eu le temps, dans cette excursion, d'explorer tout le terrain, mais je dois y aller encore sous quelques jours et si on a trouvé quelque objet important je m'empresserai de vous en informer. (Bulletin de la Société Scientifique et Littéraire des Basses-Alpes, t. IV, 1889-90, p. 403.)

19Notarem que Daufin se tròba a 8 qm au sud de Forcauquier. Sei recèrcas arqueologicas aguèron lèu per tòca principala d'establir lo traçat de la Domiciana entre Sisteron e Ate, e d'en promier entre Alaunium (Nòsta-Dòna des Angis, au pè de Lurs (12 qm a l'est de Forcauquier) e Catuiaca (au pè de Ceirèsta, a 23 qm au sud-oest de Forcauquier). Sabèm qu'aguet per contacte locau dins l'afaire l'abat Millou, curat de Lurs. Un escambi de letras aquí dessús se rapòrta ai Bòns-Enfants, entre Lurs e Peirarua (5 qm a l'est de Forcauquier). La letra de Damàs, farcida d'umor, es en provençau e versificada. L'abat li respònde parier, d'autant mai facilament qu'es (ò serà) autor de cantics occitans e francés (sei novès son encara conoissuts localament). Donarai en apondon lo tèxte d'Arbaud, document interessant gaire conoissut.

▪ Un testimòni fotografic:

20La soleta fotografia qu'avèm de Damàs Arbaud lo mòstra au pè de la torre de Porchieras, pròchi Mana, comuna de Sant-Michèu (5 qm au sud-oest de Forcauquier). Aquela torre (que pas luenh se l'i es trobat una inscripcion romana) èra la proprietat de Leon de Berluc-Perussis (que l'i es ara ensebelit). Personalitat locala importanta, istorian e escrivan d'òc (sa correspondéncia ambé Mistral es estada publicada), teorician dau regionalisme (un mot qu'a inventat), Berluc es adonc un autre contacte d'Arbaud en Forcauqueirés, ont es conoissut de totes. Seriá pas que coma introductor dau batatge a vapor dins lo canton, ò laureat de Concors d'agricultura... Es de remarcar que Berlue pren plaça, coma Arbaud, dins una tièra d'erudits bas-aupencs (Arnaud, Honnorat, Masse...) que conoisson les tèxtes medievaus de la region: lei sabon legir, e mai prononciar. Un exemple: lo Forcauqueirenc Camilha Arnaud publica en 1861 un roman intitulat Bertrand Chicholet ou Manosque en MCCCLVII. Escriu pagina 31: «notre héros, disons-nous, se nommait Bertrand Chicholet.» Aquí fai una nòta que ditz: «Prononcez tchi-tchoulet. En provençal, l'o qui n'est pas final sonne presque toujours comme ou.» E sabèm l'importància de la batèsta ortografica que menet Arbaud còntra la grafia felibrenca tre 1864.

▪ La lenga de Damàs Arbaud:

21Dins lo tèxte de ses cançons, la lenga a clarament per basa lo parlar dau país de Forcauquier. L'article les (completament desconoissut au sud de Leberon, mai sistematic en forcauqueirenc dins de posicions donadas) n'es la pròva mai vesedoira.

22D'aquelei cinc ponchs, ne'n tiro la conclusion que la zòna principala, e mai referenciala, de collectatge de Damàs Arbaud fuguet lo país de Forcauquier.

6- Quntei fuguèron ses informators?

23Les collectatges d'Arbaud son, d'un biais majoritari, òbra sieuna. O ditz clarament:

Que de fois nous nous sommes assis au coin du foyer l'hiver, à côté du rouet de bonnes femmes dont il fallait d'abord vaincre la méfiance soupçonneuse avant de les décider à redire les couplets de leur jeune âge; que de fois nous avons suivi un vieux pâtre pour recueillir au vol le refrain dont il trompait son ennui ! (I, III.)

24Mai es ben tot ce que podem sacher de ses informators. En defòra d'aquò, quand utilisa de peças collectadas per d'autrei (representan a pauc près lo quart dau totau de ce que publica), aquelei son citats. Mai aquestei nos dison pas mai de cu tènon ses cançons...

7- Es que son recuelh es representatiu de la cançon populara provençala dins son temps, ò es que se tracta d'una antologia personala?

25D'aqueles cançons, Arbaud n'aviá una vision estetica:

Sœurs des fleurs de la montagne, comme elles elles ont des couleurs heurtées, une saveur parfois amère, un parfum quelque peu sauvage qui ne conviennent pas toujours aux délicats, mais qui ne rebutent pas les forts. (I, XXIV)

26Dins l'ensems de ce qu'entendet, nos ditz clarament que faguet de chausidas. Per exemple:

Nous avons choisi parmi ces chansons badines celles qui nous ont présenté les caractères les plus tranchés de la poésie populaire, (...) (I, XXXIX)

27D'autres còps, lei rasons de sa chausida nos escapan. Ben malaisat, per exemple, d'imaginar que non ague entendut de cançons encara tant presentas dins la memoria populara coma Adieu, paure Carnavàs, La cançon dei messònjas, ò Ai un fraire escarra-mochet, attestada en Provença nauta per una fuelha estampada a Dinha en 1857. Lei jutjava tròp grossieras? Mai dona Lei bofets... Podèm remarcar parier que recampet pas ni mai un solet vertadier cant de l'enfança: les quauquei rondas de son recuelh, lei deu a Letuaire... Clarament, compauset une antologia segon son èime, e son jutjament sus ce que s'ameritava d'èsser publicat.

8- Es que ses cants son bruts de collectatge, ò elaborats?

28Aquí pereu, Arbaud ditz ce qu'a fach:

Les chants de nos pères (...) ce n'est pas un mince labeur que d'en recueillir les débris épars. (...) Et puis ces fragments ramassés sans suite il fallait les dépouiller de la rouille qui les couvrait, les relier l'un à l'autre, assigner à chacun sa place. (I,III)
(...) on comprendra combien de variantes plus ou moins heureuses il a fallu comparer, sur combien d'interpolations parasites il a fallu souffler, avant d'arriver au texte primitif (...)(I, IV)

29Adonc les causas son ben claras: les cançons talas coma Arbaud les edita son pas de versions brutas de ce qu'a reculhit: son restauradas, reconstituidas, en partent dei diferentei versions recampadas. Per cu a fach pereu de collectatge, e mai de restauracions de cançons a la demanda de cantaires que volián pas se satisfaire dei versions reculhidas, a regardar de pròchi lei resultas de son trabalh, aqueste apareisse remirable. L'impression que dona es que posquet recampar pron de versions de cada cançon per, fin finala, se limitar mai que mai a un trabalh de classament e de montatge. S'es pas lo cas, es qu'aviá vertadierament l'engèni de sentir e de comprendre nòsta poësia populara. Ses cançons sembla que son estadas reculhidas dins la forma que nos son donadas. Impression encara renfortida per les traucs qu'Arbaud a laissats sensa les tapar... Solet, bensai, l'estonament de trobar aquí tant de cançons tant bèlas dins un estat tant ben conservat podriá far se pausar de questions au collector d'encuei. Mai se diriá benlèu qu'a l'epòca d'Arbaud, èra encara corrent de sacher de cançons ansin...

30Una autra pròva dau trabalh d'elaboracion menat per Arbaud nos es donat par sa lenga, qu'es a la letra impossibla. Ai dich qu'Arbaud aviá pres coma basa de sa lenga lo parlar dau Forcauqueirés. Pasmens, ses tèxtes son pas per aquò simplament notats ò transcrichs dins aqueu parlar. Sa lenga presenta, tota a'n un còp, de formas mai nordicas, mai tanben d'autres pus meridionalas. Tornem prendre lo cas de l'article les (e pereu les autres articles e pronoms: des, mes, tes, aqueles, nòstes, etc.), soleta forma emplegada per Arbaud. Lo país de Forcauquier a les davant p, c, t e vocala, lei dins tota autra posicion. Diam aicí les pichòts, les cabras, les teules, les autrei, les enfants... mai lei barris, lei dròlles, lei fremas, etc. Per trobar les en tota posicion, fau passar la còla de Lura. Mai ailà aqueu les s'acompanha alora de formas nòrd-occitanas: les chabras, les chamiás... Autrament dich, la lenga d'Arbaud ont avètz, dins un solet tèxte, ses blancs talouns e ai'no camiso es una lenga impossibla, que se rescòntra enluec.

31A mon vejaire, aquí tanben Arbaud faguet una chausida estetica. Lo manten de les au nòrd de Leberon li a semblat un conservatisme que s'ameritava, justament, d'èsser conservat, e dins son idèa restaurar au besonh. Ara es pas impossible qu'Arbaud aguèsse pensat que faliá notar lo -s finau sistematicament, e considerar sa vocalisacion coma un fach de paraula que l'escritura aviá pas de registrar. Oblidem pas la citacion que fai d'Honnorat: «écrivez bien, et prononcez comme vous voudrez.» (II, XXXVI.) Mai d'aquò n'a ren dich.

9- Lo problèma de la musica

32Manifestament Arbaud aviá pas la competéncia necita per notar lei melodias qu'entendiá. Escriu:

Dans cette partie délicate de notre œuvre nous n'avons jamais perdu de vue les instructions si claires et si précises rédigées par le comité du ministère de l'instruction publique (NDE: «Ecrivez l'air tel que vous l'entendez chanter, et ne changez rien !»); nous avons recommandé aux personnes qui ont bien voulu prêter leur concours intelligent de s'y conformer ponctuellement (...)

33Aquí precisa en nòta:

Nous sommes heureux de pouvoir témoigner notre reconnaissance à M. Gérard, artiste aussi distingué que modeste, qui a noté plusieurs des airs que nous publions. Les personnes qui se sont occupées de chants populaires comprendront combien il a fallu de patience, de tact et de goût pour retrouver la mélodie originale sous les fioritures dont la couvrent souvent l'ignorance ou le mauvais goût des chanteurs. (I, XXXVI-XXXVIII)

34Autrament dich, son d'autres personas, e principalament un nomat Gérard, que se son cargadas d'aqueles trancripcions. Mai concretament, coma aquò se passava? Es qu'Arbaud apreniá l'èr des cançons reculhidas, e que lo tornava puei cantar a un musician que lo notava? Es que tornava veire son informator amb un musician per aquò far? Aquelei doas solucions son tant pauc evidentas l'una coma l'autra. Ò es qu'Arbaud notava la musica a pauc près, per de dire de la retrobar eu après e la cantar a un musician mai sabent dins l'escritura? Lo mistèri aquí demòra.

35D'unei remarcas tocant lei notacions s'atròban dins lo promier volume (mai n'i a gis dins lo segond). Podrián benlèu permetre de se sarrar de la realitat, mai son pas totjorn de bon interpretar. S'aquela tocant La mau marideio (I, 148) es una correccion que s'impausa («A l'avant-dernière mesure le fa doit être dièze»), rèsta que l'òm saup pas de eu vèn la deca. En nòta de la musica de la fin de L'auceou en gabiolo, Arbaud escriu: «Les deux dernières notes doivent être deux sol.» (I, 153.) Aquí l'evidéncia es pas tant granda: aquela finala ni mai convèn pas ais cantaires d'ara, que ne'n fan generalament un sòl, la. Per Avèm un bèu castèu, (I, 212) Arbaud ditz: «Il faut lire à l'avant-dernière mesure: sol, si, la, sol.» Ce que nos fai retrobar la musica conoissuda de la version francesa d'aquela cançon, mentre que la notacion marcada, si, re, dò, si, li dona un biais pron diferent, mai que se tèn. De que fau pensar de tot aquò? L'òm pòt notar qu'aquelei rectificacions tòcan totei la finala des cançons. Mai après? Un musicologue bensai ne'n diriá mai?

36Remarcarem enfin qu'aquelei melodias, Arbaud li apliquet un trabalh de restauracion parier coma per les paraulas. E aquí encara, la resulta es remirabla, e l'evidéncia d'aqueles èrs fariá jamai imaginar que resultèsson d'un tau trabalh, o sacheriam pas.

10- De que demòra encuei des Chants populaires de la Provence?

37Un mot d'abòrd de ce que sa vila a retengut de son autor, qu'es ailà:

(...) l'un des plus grands réalisateurs dans l'histoire de Manosque. Médecin, écrivain, poète et musicien, photographe, Manosque lui doit une grande partie de sa prospérité actuelle par le fait qu'il fut celui qui lutta et obtint que la route nationale № 96 passe par Manosque, rive droite de la Durance depuis le pont de Mirabeau. Il inaugura le premier pont (suspendu) sur la Durance en 1847.
On lui doit des écoles, l'abattoir où l'on retrouve des belles pierres taillées provenant de la démolition du palais du Terreau, la double montée sur la place du Terreau, le rassemblement et la mise en ordre des archives de la ville, le projet de construction de l'aile de la Chanté à l'Hôpital, de nombreuses réalisations et aussi l'air et les paroles de ses chansons et son histoire de Manosque.
On peut considérer Domase Arbaud comme le Manosquin à placer en tête de tous les hommes ayant contribué à faire de sa ville natale ce qu'elle est et ce qu'elle est apte à devenir. (MOLINIER Privat-Jean, 1979, Manosque de toujours, Manosque, p. 228.)

38La frasa consacrada a l'òbra que nos ocupa aicí – que son títol exacte es pas citat – mòstra ben que son autor a pas la mendra idèa de ce que pòt èsser, e a pas cercat ni mai de o sacher... Es pas aquí que caup per eu lo meriti d'Arbaud.

11- De que rèsta d'aqueles cançons dins la memòria populara?

39Des 86 cançons donadas per Arbaud, un collectatge de l'associacion Cantar, fach a l'entorn des armadas 2000 dins la zòna prospectada per eu a permés de ne'n retrobar 6... Sus aqueu ponch, remandarem a la publicacion que n'avèm facha (Tradition orale en haute Provence: chansons, Les Alpes de Lumière, 2001). Mai fau subretot se demandar de que ne'n restaría per nautrei sensa Arbaud...

12- De que fuguet la posteritat de l'òbra d'Arbaud?

40Sabèm coma fuguet aculhida per lo Felibritge tre la publicacion dau promier volume: lo prefaci dau segond nos o ditz pron, e l'i tornarem pas. Permete de comprendre per part que l'essenciau dau movement provençalista aguèsse virat l'esquina a la remirabla òbra arbaudenca. Mai per part soncament. leu siáu totjorn estonat de veire, encara encuei, coma la majoritat dei felibres e felibrejants se desinteressan totalement des tradicions popularas provençalas, e aquò dins totei lei domènis. Causa per lo mens paradoxala quant avètz per devisa Mantendrai !... Mai aquò per elei, sembla se limitar a se mascarar en santons per cantar la Copa Santa, ambé les tamborinadas assortidas.

41Aquí dessús laissarai la paraula au Majorau Joan-Luc Domenge qu'es eu, per excepcion, un collector consequent de nòsta oralitat. Escriu dins son prefaci de la dardera reedicion d'Arbaud:

Il fallut attendre les années 1970 et le mouvement de renouveau de la «chanson occitane» pour voir enfin exploiter les trésors musicaux contenu dans Les chants populaires de la Provence. Ce répertoire avait été précédemment presque ignoré du mouvement folkloriste.

42De notar qu'aquela nòva edicion (Cantar lou País / Tac Motifs Editions, Grasse, 1999, 2000) es la tresena en trenta ans après aquela de Jeanne LAFFITTE (Marseille, 1971) e Chantemerle (Nyons, 1972). E qu'una branca originala dau moviment folclorista cantava ela Damàs Arbaud: Lo Calen de Marselha de Jòrgi Reboul, que deviá ne'n sortir l'occitanisme provençau.

43Les annadas setanta an passat, e l'interès per l'òbra d'Arbaud a fach que de crèisser: les cançons que nos a sauvadas, jamai se cantèron tant coma encuei. Fau les aguer entendudas interpretar per Renat Sette ò lo Còr de la Plana, Joan-Maria Carlòtti ò L'Atelier Damase (entre una dogena d'autres), per s'avisar de tot ce qu'an encara a nos dire.

13- Coma cantar Arbaud?

44Lei biais d'interpretar aqueu repertòri son fòrça variais, e ne'n dirai quauquei mots per acabar.

45Pron cantaires lo cantan tau coma es, a capella. De còps, marcan lo ritme d'un picament de mans, ò apondon un acompanhament simple, de guitarra per exemple. D'autres li an mes d'armonisacions vocalas, e ne'n fan de polifonias, generalament inspiradas per les tradicions italicas (còrsa, sarda...) D'autres enfin li donan d'acompanhaments musicaus variats. Ben entendut un même grop pòt utilisar totes aquelei biais segon les cançons.

46Per les paraulas, avèm pereu aquí de solucions diferentas. L'interpretacion literala es la solucion mai emplegada, mai pas unica. Rescòntra pasmens quauquei limitas. Per exemple, coma cantar un coblet alterat, qu'Arbaud n'a remplaçat ce que mancava per de ponchs? Faire un silenci? Suprimir lo coblet? Imaginar lei mots que fan fauta? L'i a pereu lei francismes, nombrós dins Arbaud. De son temps podían èsser sentits coma valorisants, ò indiferents. Per un public actuau de cancon occitana, van puslèu èstre entenduts coma patesejaires, e lo meme repetat vai donar l'efiech contrari... L'alteracion dei rimas pòt pereu entrepachar un cantaire, que li agradarà puslèu de retrobar una versificacion regulara onte se sentirà mai a l'aise. D'autres au contrari l'i tastaràn lei rugas d'un temps. Aquí, cadun fai coma se o sente.

47Apondrai qu'avèm tanben encuei la possibilitat de contuniar lei restauracions entrepresas per Arbaud ambé ses pròpris metòdes. Despuei 1864, d'en pertot en país d'òc (alevat practicament en Provença) se son multiplicats collectatges e publicacions de cançons que son de variantas, mai ò mens pròchas, de peças donadas per Arbaud. La comparason de totes aquelei versions pòt permetre de tapar de traucs, ò de corregir de francismes sensa tombar dins l'artifici. Aquelei restauracions nòvas son mens arbitràrias que l'òm creiriá benlèu. L'i a d'armadas d'aquò, faguèro a la demanda d'un cantaire una «restauracion» de la romança de Maria-Madalena. A un moment de l'istòria, trobavo que mancavan dos coblets. Les compausèro. Quauques ans puei, tombèro sus un novèla version d'aquela cançon, que l'aviáu pas dau temps de mon trabalh. Lei dos coblets l'i èron, mot per mot... (Per donar un exemple concret, trobaretz en apondon l'exemple d'una d'aquelei restauracions, qu'ai facha per Renat Sette, de La Passion de Jèsus-Crist. En mai dau texte d'Arbaud, ne'n dono una dei versions qu'ai utilisadas per o far.)

48Tot aquò per dire que la matèria laissada per Arbaud a pas encar fenit de revelar totei ses potencialitats. Gràcia a'n aqueu fais qu'a sachut sauvar de l'oblit, e nos lo far passar, l'encantament contunia.

Anexos

APONDON I

A Moussu Millou Curat de Lus

Moussu lou curat,

Saurez que dilun,

Avant dejunar,

Serem a Aulun;

Se poudez venir

Après vouestro messo,

Ai vouestro proumesso,

Me tarez plaisir

Que lou dejunar

Vous ooucupe pas,

Pourtarai d'eicito

De vin e d'artoun;

Quauque pastissoun

Digne d'un armito,

Em'un jouine gau

Que vous fara gaud,

Car sous la soutano

De tout capelan,

Paraulo proufano:

S'escounde'n groumand.

Après la ripailho

Vers les Bouens Enfans

Cercarem la drayo

Dou pople rouman,

Pople maufatan

Qu'avant lou messio

A mes en dourio

Nouestres segnes grands;

Et ses acqueducs,

Et ses mots en us,

Marius Tacitus,

Censor, Silvanus,

Flavius Vopiscus,

Eme Nemausus,

Bacchus et Venus,

Fayoou gounflagus,

La Brilhano et Lurs,

Cholera-morbus

Moustre de grimoire.,

Carogno d'histoiro,

Ounte ma memoiro

Pouet plus trouvar l'us !

Pereou, mordicus,

Ou n'aurai les joyos

Ou ben, boueno voyo,

Ma parto garoyo

Reimara pas plus.

S'acot vous agrado

Serai ben countent,

Dounc dilun que vent,

Dins la marinado,

Serem au couvent.

La bello joumado !

En battent l'estrado

Que de talounados

Que nautres direm !

Oh ! Coumo rirem !

Coumo charrarem !

Aquelo pensado

Me tent tout ravoy,

Pereou, tron d'un goy !

Per talo regado

Au mens anès pas

Tirar pèd arriers.

Benestre vous sie,

Moussu lou curat.

Damase ARBAUD

Manosco, lou beou jour de Sant Crespin 186...

***

La respònsa de l'abat, força lònga, comença ansin:

A Moussu Damasa Arbaud

Que bandit !

Mai qu'espasa !

Qu ourié di,

Dias, Damasa,

Qu'am'un tèms

De la sorta

Que per orta

Rèn li tèn:

Pluia e vènt,

Pluia ruda,

Aura druda,

Venguessias,

Fouel que sias,

Sus la draia

E lei champ

De bataia

Deis ancian (...)

(Athénée de Forcalquier et Félibrige des Alpes, 1882, Félibrée de Lurs, Forcalquier, Masson, p. 39-42.)

***

Apondon II

La Passien de Jesus-Crist (Arbaud, II, 1-4)

La -passion de Jésus-Christ que fait tant bon entendre;

entendez-la, petits et grands, toutes gens d'ordonnanço

Nouestro-Dam'a pourtat noou mes Jesus Diou dans son ventre;

de Pandecoust'à Charendas l'y aguet grand esperanço;

a Charendas Jesus neisset dins la réjouissance.

Nautres eriam toutes parduts, aro siam en salvanço.

Quand Jesus-Christ aguet grandit faguet grand penitanço.

Jésus a junat cranto jours sans prendre soustenanço;

quand les cranto jours sount passats Jesus prend soustenanço,

prend un mouceou de pan beinet per sa desparjunanço.

Jesus es anat proumenar dins uno vill'immanso,

a rescountra'n pople de gens, li fan grand reveranço,

de soun capeou, de soun rameou, de touto sa puissanco

En soupant Jesus-Christ a dich: me faran trahissanço;

et sant Peyre li a respoundut: Seignour, ai pas fianço,

les gens que van en devouden van pas per trahissanço.

- N'en sera pas tres jours d'eicrit veiretz l'experianço,

n'en veiretz moun corps estendut sur une crous doulanto,

veiretz ma testo courounad' tout d'espignetos blancos,

veiretz mes dous bras davelats et mes dous peds ensemble,

veiretz moun sang que coulara tout de long d'uno lanço,

veiretz la mero de Jésus ben trist'et ben doulanto,

veiretz la lun'et lou soureou que cournbattran ensemble,

n'en veiretz la terro tremblar et les peiros se fendre,

veiretz la mar que flamiara coum'un tisoun que flambo.

***

Lo passion de Jesu-Cri

C - Version de St. Pantaly d'Ans, Azerat, Latourblanche.

La Passion de Jésus-Christ ey ton tristo é doulénto !

Con lou boun Diou ch'én vaï oou tson, tou pé nu, coum'ün ondze,

n'émmèno dégun coumo chè, ma Chén Dzon é Chén Pierrè.

Con furent o Jérujolem, trobén tou plé dé moundé.

- «Cho-di, Chén Piéré o Chén Dzon: grondo redzouïchéncho!»

- «Ché n'én dichè Notre Chégnour, quey ton de trohichéncho !

Vou n'én veyrey doum'o mieydzour, n'én veyrey l'espérienço:

vous veyrez moun côté percé tout o gron co dé loncho;

vou n'én veyrez moun san rivé tou lou loun dé mou mémbrey;

vou ju mé veyrey ramassé par quatre de mes anges;

vou n'én veyrey téro tramblé jusqu'à la pierre fendre.

Vou n'an veyrey la mer brûlé coum'un tijou quon flombo.»

(Abbé Casse, Abbé Chaminade, 1902, Les vieilles chansons patoises du Périgord, Périgueux., p. 105.)

***

La Passion de Jesus-Crist («Restauration» de Joan-Ives Royer)

La passion de Jèsus-Crist, que fai tant bòn entendre,

escotètz-la, pichòts e grands, se la volètz aprendre.

Nòsta-Dama a portat nòu mes Jèsus Dieu dins son ventre;

quand naisset, grand gaug l'i aguet dins la nuech de decembre.

Jèsus-Crist, quand es vengut grand, peniténcia vòu prendre,

a junat cranta jorns entiers sensa manjar ni beure.

Anet puei a Jerusalèm per pregar dins lo temple;

un grand pòble lòng dau camin venián per lo recebre

e cadun lo voliá seguir e li disiá de mèstre;

mai degun amb eu vouguet pas que sant Joan e sant Pèire.

Arribèron dins un jardin que lo cèu èra negre;

Jèsus-Crist aquí li diguet tot ce qu'anavon vèire.

- Venètz deman après miegjom, ne'n veiretz mon còrs pendre,

veiretz mei dos braç clavelats e mei dos pès ensemble,

veiretz mon sang que raiarà tot de lòng de mei membres,

veiretz la luna e lo soleu que combatràn ensemble,

veiretz la tèrra tremolar e les pèiras se fendre;

les estèlas davalaràn coma fuèlhas en novembre,

e la mar, la veiretz flambar, e retombar en cendres;

e la maire entendrà cridar son enfant dins son ventre.

Autor

istorian FORCALQUIER

© Presses universitaires de la Méditerranée, 2004

Condiciones de uso: http://www.openedition.org/6540