Version classiqueVersion mobile
OpenEdition Books

Contes e cants

 | 
Claire Torreilles
, 
Marie-Jeanne Verny

Jean-François Bladé, un folclorista-contaire

Patricia Heiniger- Casteret

Texte intégral

  • 1 Per mei de detalhs sus la vita e l'òbra de J.-F. Blade, de véder l'introducion hèita per Françoise (...)

1Zephirin Bladé, atau qu'èra lo son petit nom, qu'ei vadut a Leitora en 1827 e que's morirà a Paris, en çò deu hilh, en 1900. L'anar de l'òmi que's pòt, lhèu en purmèr, sentir dens lo detalh d'aqueste cambiament d'identitat, un nom per un aute. Zephirin desapareish totalament, quasi «minjat» per l'autoritat de Jean-François. Bladé ne s'accontenta pas de çò que lo monde li an balhat, que s'estima mei de's causir la soa destinada. D'ua personalitat a despart dens lo monde provenciau gascon — non deisha pas indiferent lo mitant politic locau contre loquau e combatejarà — qu'ei arreconegut per l'aròu sientific nacionau e internacionau avans d'entrar dens lo felibritge en 18761.

2Bladé lo novelista, Bladé l'istorian, Bladé lo folclorista autant de passions que crotzarà e desveloparà dab tota la rigor de qui cau per apitar ua òbra au servici de la Gasconha. Mes au dessus de totas aquestas competéncias aquesidas a costat de mèstes incontestables ne calerà pas desbrombar que, au mei pregond de Biade sauneja un contaire:

  • 2 Des Alpes aux Pyrénées. SD, éd. Flamarion, Paris, pp. IX-X.

Nous étions rassemblés autour des tables d'un café sous de petits lauriers. Le plus aimable des hôtes, Monsieur Jean-François Bladé, qui nous avait si bien reçus à la gare, nous tenait compagnie. Sa face glabre de vieux romain s'animait quand il contait, à notre demande, un de ces anciens contes de l'Agenais, dont il a fait des recueils, ou quand il disait d'une voix mordante quelques anecdotes sur Moussu Jansemin, ou bien encore quand il commentait avec une imagination vive et savante l'inscription funéraire de Donnia Italia qu'il avait lue dans son enfance à Lectoure. Non sum, non euro.2

Los camins de l'ensenhament

  • 3 Léonce Couture, vadut a Cazaubon (Gers) en 1832, mòrt a Toulouse en 1902. Caperan, prefecte deus e (...)
  • 4 De véder F. Pic «Essais de bibliographie de l'œuvre imprimée de Jean-François Bladé», Jean-Françoi (...)
  • 5 Revue d'Aquitaine, 5e année, pp. 197-219, 271-285, 326-332, 376-388, 426-472, et 557-568; 6e année (...)
  • 6 Revue d'Aquitaine, tone 7,1er juillet 1862- 1er Juillet 1863, pp. 5-17,137-144,189-194, et 224-231

3Shens s'encaminar sus los detalhs de la soa formacion que podem notar tres moments qui averàn la loa importéncia dens la vocacion soa. De segur, en purmèr, l'enfança leitoresa forma lo son esperit e qu'ei tostemps presentada, dens las introductions de las òbras, com lo punt purmèr de l'educacion e de la revelacion a ua civilisacion. Luenh de casa e lo cap plen de holia, las annadas parisencas, 1850-55, on, en tot seguir los estudis de dret, que's va essajar a la composicion literara en se har ua plaça dens lo mitan de la «bohèmi literaria» deu barri latin. Aquiu que's liga dab Ch. Baudelaire. L'escritura de novèlas se plaçan ad aquesta temporada. Enfin, tornat a Leitora en 1855, qu'encontra a l'abbat Leonce Couture3, professor au collegi de la vila. Couture qu'ei un «chartista» apassionat per la literatura occitana e gascona en particular de las honts purmèras a las purmèras armadas deu sègle xx e subertot apassionat per l'istòria. Qu'ei eth qui encaminarà Biadé sus la via scientifica deus estudis istorics gascons. La sapiença d'aqueste paleograf e filològ balharà lo metòd rigorós a Biadé de tornar tostemps aus documents originaus e deus contextualisar avans de's lançar dens ua interpretacion. Los articles consacrats a l'istòria de Gasconha son numerós4, uns deus mei coneguts son: Pierre de Lobanner et les quatre chartes de Mont de Marsan en 18605, ont amuisha plan lo costat apocrif d'aquestes escriuts e Dissertation sur les chants heroïques des basques, en 18626, ont hè véder la composicion recenta d'un cant, Altabiscarraco cantua, qui's hasèva lo reclam de la batesta de Roncesvals.

  • 7 Editions Dentu, Paris, 1862, pp. 85-86

4Mes plan avans lo tesic d'istorian e de cercaire rigorós, un aute rebat de la Personalitat de J.-F. Bladé qu'ei d'estar coneishuda. Atau que poderam miélher encaminà'ns sus las faiçons dont a podut concéber la collecta e lo tribalh de folclorista. Dens Histoire anecdotique des cafés et cabarets de Paris7, Alfred Delvau nos perpausa lo portreit d'ua personalitat deu monde artistic parisenc:

Puis Zephirin Bladé - l'antithèse de Mossalis - un jeune homme qui était venu tout exprès de Lectoure (Gers) à Paris pour voir ce que les littérateurs «avaient dans le ventre», je ne sais pas s'il l'a vu, mais il est reparti pour aller se faire nommer substitut quelque part, et c'est dommage. Paris aurait dû le garder. Z. Bladé contait bien. C'était aussi un mime execellent, un grimacier plein de fantaisie, et nous riions tous comme des mouches au soleil lorsqu'il faisait, «à lui tout seul» comme Alexandre Dumas son journal - la procession de village, enfants de chœur, gros chantre, bedeaux, paroissiens et le reste; ou bien le colonel Silex buvant son absinthe et lisant son Moniteur de l'armée. Le spleen le plus granitique se serait liquéfié au contact de cette voix, de ces gestes, de ces roulements d'yeux, de cette gaité [...] Z. Bladé savait en outre une foule de légendes mélancoliques et de chansons patoises pleines de charmes qu'il traduisait en langue vulgaire et dont quelques unes ont été notées par J.J Debillemont.

5Donc, plan avans lo tesic folcloric Bladé qu'ei naturalament un contaire, que s'amuisha com lo ligam vitec d'ua paraula qui passa per los omis e las hemnas.

  • 8 1886, tome 2 p 25.

6Tornat a Leitora aqueth cabau de literatura orala que serà distanciat, per lo mensh, e espiat, tant que se pòt, dab utís scientifics. Bladé que's tròba observator e analista de la cultura soa a dus niveus: familiala au sens estrict e gascona au sens larg. Sovent dens las soas introduccions lo problèma deu sovièr que torna. Que sap hèra de causas, contes e cançons mes que ditz que ne vòu pas deishar parlar la soa memòria. Que sembla de se'n menshidar que s'estima mei de trobar a un quauqu'un qui diserà çò que eth coneish de l'enfança enlà. Tanben dens mantuas notas d'identificacion deu narrator que suslinha qu'eth tanben que coneish lo conte de longa, entenut de tau o tau persona o desempuish l'enfança. En fin deu conte de La nuit des quatre temps8 que'ns ensenha:

Je sais ce conte depuis mon enfance. Mes souvenirs concordent exactement avec ceux de l'abbé Magenties, de Lectoure, qui reproduit le récit de sa grand-mère, Catherine Dubuc, veuve Langlade, femme illettrée, morte à Lectoure en 1855, dans un âge avancé.

  • 9 1186, tome 2, p. 45.

7o, en nota de Le fils du roi d'Espagne9:

Dicté par Marianne Bense. Quand j'étais enfant, ma grand'mère maternelle, Marie Couture, native de Bordeaux, mais dont la famille était originaire du Périgord, m'a souvent récité ce conte, qui n'est pas encore oublié en Gascogne et en Agenais.

8Dens lo son eretatge culturau e simbolic qu'essaja de hicar ua distància scientifica, çò qui ajuda a plaçar los libes sons dens la quista europea de las literaturas popularas.

  • 10 1886, tome 2, p. 64.

9Format a l'istòria per L. Couture qu'ei format a las literaturas oralas per Edelestand Dumeril qui l'aconselha de s'anar léger los darrèrs tribalhs hèits sus las cançons de gestas e de las epopeas. Aquiu que descobreish en medish temps tots los problèmas de relacions e d'interaccions enter l'orau e l'escriut e, causa mei importenta per eth, lo comparatisme qui revela totas las tradicions, las hèn dialogar e las hèn entrar dens un camp scientific. Au niveu de las cançons, Bladé que s'estrèma de las recomendacions Fortoul-Ampère que s'estima mei de tribalhar sol, mes au nivèu deu conte qu'adopta lo metòd de tribalh de l'escòla alemana senhorejada per las figuras deus Grimms. Qu'agusarà donc lo son calam per la reescritura deus contes com de las cançons. De mantuas versions d'un medish devis qu'avem lo conte tipe. Com tots los folcloristas d'aquesta temporada qu'ei animat per lo tesic de trobar los textes originaus d'ua civilisacion qui ei a desaparéisher. A còps que suslinha que tau o tau conte qu'ei recompausat en partir de tau e tau elements dits per ua troperada d'informators. En nòta de L'homme de toutes les couleurs10 que podem léger:

Durant mon enfance j'ai entendu réciter intégralement ce conte par une vieille repasseuse, la veuve Benoit, de Lectoure, qui venait en journée chez ma mère. Deux autres personnes, mortes comme la précédente, Jacques Bonnet métayer à Lacassagne et Pichou carrier à Taner (commune de Lectoure), le savaient aussi tout entier, moins l'épisode des Mains. Un poète agenais mort l'an dernier, M. J. B. Goux, m'a rapporté la même tradition, sauf la partie qui commence au serpent gardeur d'or, et finit à la rencontre du Nain. M. Goux tenait son récit d'une personne originaire d'Auvillars (Tarn et Garonne). Cette lacune était comblée par feu Bemarde Dubarry de Bajonette (Gers). Elle l'est encore mais d'une façon moins complète, Par Isidore Escarnot (Gers). En somme, j'ai restitué ce conte en juxtaposant ses fragments, dispersés dans la mémoire des divers narrateurs.

10Qu'èm aci sus lo modèla deu devis qui's vòu «tipe» enriquesit de totas las variantas.

  • 11 Contes populaires recueillis en Agenais, 1874. Ed. Joseph Baer, Paris, p. III.

11L'univers de J.-F. Bladé qu'ei tanben e sustot ua tèrra e ua cadèna d'omis e de hemnas. Que comença las collectas en partir de la familha e de las vilas de Leitora e d'Agen, un pays ou je compte tant de parents et d'amis...et j'ai profité des foires si populeuses d'Agen pour interroger une trentaine de personnes choisies, à peu prés en nombre égal, dans tous les cantons11. Mes a espiar los informators Bladé qu'a ua tèla de parencièrs e d'amics qui li disen las personas de véder o li hèn passar versions escruitas de contes. Tau com mantuns collectors que tròba los informators dens la troperada de gojas e vailets qui, dens aqueth sègle xixau, hèn víver totas las maisons borgèsas. Los caperans de vilatge ahorteishan la collecta com temoenh o com recruter de temoenh. De mei, la soa foncion de jutge supleent que facilita l'encontra de conturs o cantaires.

  • 12 1967, tome 1, note p. ii.

12Donc, en partir de Leitora e d'Agen ont la soa activitat de folclorista va revelar un pais ric de sabers oraus, que va comparar las purmèras cuelhudas (hèita dens lo despartament deu Gers) a la Gasconha sançèra delimitada per les Landes, le Béarn, la Bigorre, le Comminges, le pays de Rivière Verdun, surtout dans l'Agenais, le Condommois et le Bruilhois12. Mes per çò qui ei de quauques parçans com lo Bearn que suslinha que deisha tribalhar lo son amic Lespy e per çò qui ei deu Vascoat qu'ac deisha a Vinson. Per las Lanas ne ditz nat nom mes qu'insista tostemps sus lo bazadès. De tota mòda, la mudança de la populacion de gojas, vailets e manobrèrs per los tribalhs sasonèrs que mia naturalament, de cap a la vath de Garona e a la vila d'Agen, populacions de las Hautas-Pireneas, un drin de Comenges e deus parçans qui pertòcan Òlt e Garona.

Los avans-díser, libes dens los libes

13Dens la soa cuelhuda de contes et de cantas que nos perpausa dus tipes d'introduccions: las qui son en dubertura deus tres volumes de cantas que son de las mei originaus e la qui ei consacrada a la totalitat deus contes (tres volumes) qu'ei mei classica e mei pausada dens un encastre scientific.

  • 13 Que'ns apeam ací sus la reedición de 1967 deus tres volumes de las Poesies populaires de la Gascog (...)
  • 14 1967, tome 1, p.vi.
  • 15 1967, tome 1, p. v.

14Per çò qui ei deus avans díser a las poesias popularas13, l'escritura que'ns e pausa de cap a tres personas: un observator apelhat d'utís comparatistas, un temoenh autobiograf e un novelista. Quan e's plaça deu costat de l'observator scientific, que hica l'encastra de la collecta dens la «soa» Gasconha, en estremar lo Bearn e lo Vascoat. Un còp los textes amassats, ordenats e causits se pausan dus problèmas tecnics ligats a la lenga d'aquestas poesias: quin arreglar los punts ortografics e las arreviradas? Qu'ei L. Couture qui s'encargarà de ramener à l'orthographe provençale de la bonne époque14 tots los textes cuelhuts. D'un aute costat, las arreviradas pausan mantuns problemas ligats directament a la poetica, en tot voler demorar au mei proche de la paraula gascona los vers frances que carrincan mantuns còps, mes que s'i manten dans l'intérêt de la sincérité15. Los títols ne son pas de la soa invencion, qu'arrespecta l'usatge deus noms o, en seguint la tradicion de tot cantaire, que son los purmèrs vers qui hèn lo títol. Nòtas que completan la compreneson de quauques termis e cada «poesia» qu'ei accompanhada d'un apareilh comparatista en mei deu nom de l'informator.

15Com observator Bladé que'ns e balha tablèus ont tot cant e pòt estar recontextualisat. A còps, que balha detalhs sus las sonoritats, las tecnicas de cantas o de dansas mes shens quasiment notar las musicas. Los tablèus se destrian a l'entorn de las pateticas orasons a l'entrada de l'ivern, deus crits de sepelidas, deu maridatge e de tot lo seguissi deu rite nupciau, deus bals dab los lòcs, lo calendari, los musicians, los instruments, las danças, lo partatge deus sexes e las pelejas. Tot qu'ei presentat dens una societat gascona estangada en 1850, avans la «colonisacion» de l'accordeon e de las danças «modernas» com la polkà, la masurkà e tots los quadrilles.

16Dens cadun d'aquestes tableus ua frasa, quasi identica, que torna sovent:

  • 16 1967, tome 1, p. viii.
  • 17 1967, tome 1, p.xiii.

que de fois ne les ai-je pas entendues et récitées, dans les métairies de la Gascogne, ces antiques prières dont je garderai le souvenir jusqu'à la mor16, J'ai souvent entendu ces lamentations durant mon enfance...17

  • 18 1967, tome 2, pp.vii-xii.
  • 19 1967, tome 2, p. viii.

17mes qu'essaja de guardar ua certa exterioritat. La distància hicada enter los sovièrs, los temoenhs e l'observator que serà estremada dens la partida consacrada au carnaval18. Ad aqueste moment, que's bota en scèna e que vedem lo mainat Bladé participar a un calhavari deus grans e nos balhar un descriptiu de l'interior hèra detalhat. D'un punt de vista moderne que podem díser qu'ací qu'èm de cap a una observacion directa, participativa e recompausada, com tot bon etnològ e deu har. Eth, mainat, qu'ei au centre de tot, lo calhavari que s'amuisha com un lòc d'aprentissatge, un rite de passatge d'ont ne sortira assabentat a las tradicions. D'un punt de vista simbolic, qu'ei la soa mairolèra qui lo va iniciar a las tradicions de carnaval e lo lançar directament dens tot lo bolegadís deu calhavari, elle était jalouse de me former aux coutumes des ancêtres19. Per çò qui ei deu descriptiu deu maridatge, la soa plaça de magistrat que l'a devut hicar mantuns còps au miei de tot lo rituau.

  • 20 1967, tome 1, p. xxvii.
  • 21 1967, tome 1, pp.xxviii-xxix.
  • 22 1967, tome 1, p.xxx.

18Deu sovièr de mainat estant, a còps, l'observator, lo collecter desapareish per deishar la plaça a un cant oniric. Tau com dens un conte, un element qu'ajuda au passatge de l'aute costat deu miralh, un son, un truc de campana a detz òras deu ser dens lo casau de leitora, dus vers d'ua cançon mainadenca, un tableu de sepelida o de maridatge e n'èm pas mei en Gasconha. Totas las traditions greco-latinas que's tròban concentradas dens Leitora e sos entorns. Per la psalmodia de las orasons, se hè véder ua Gasconha màger e saunejada, las hialairas son parcas, los lors devis son los d'Esòpe e dens l'encantament de la melopea se conta los bolandistes, Jacques de Voragine, los ascètas de Thebaïde e Nitrie, lo saunei de Joachim de Flore, Pierre de Lancre e las posoeras, Arnaut de Moles e la catedrala d'Aush e tOt aquò s'acaba sus la simplicitat e lo misticisme deu pòple gascon. Los auròsts hen participar Gasconha a la civilisacion mediteranenca deus rites de sepelida. Dens les joies rustiques deu maridatge las gojatas gasconas prenon ua dimencion biblica e antica de Ruth a las matronas de Roma la vielha. E enfin, a nueit caduda, dens lo casau de Leitora se passeja, Donnia Italia20, hantauma shens votz de la civilisacion romana en terra gascona. Portreit d'ua gojata remplaçada, l'estiu seguent, per ua auta gojata qui a era tota sola concentra l'epopèa gascona. Epopèa d'ua civilisacion e d'ua istòria. Serena21 atau qu'ei lo son nom, hilha de linhatge aragonés qu'a lo saber totau deus contes e de las cantas. Que simbolisa la Gasconha independenta qui espia tostemps cap au sud, mes qui non a pas jamei podut realisar lo son saunei. Adonc, Serena que's morirà joenòta mes de la soa votz demorerà lo reclam E la mair-bona de Bladé, era medisha, balharà l'òrdi a l'arrèr-hilh de transméter aquestas paraulas: Toi, garde la mémoire de la pauvre morte. Parle pour elle. Fais que tout ne soit pas perdu, de ce qui fut la vie, l'espérance et la joie des aïeux.22

  • 23 Catherine Sustrac, jeune fille illettrée de Sainte-Eugénie, commune du canton de Beauville, Madame (...)
  • 24 Que renviam lo legedor au tablèu plan conegut deu mainat entomejat per las hialaras en començament (...)

19Tot qu'ei organisat per plaçar las hemnas com las revelatritz de la civilisacion gascona. Tre la publicacion deus contes de l'agenes, los informators son tres hemnas23 e au començament deus contes quei un aròu de hemnas qui nos amuisha l'entrada dens la literatura orala24. La mair-bona hè lo ligam dens la soa posicion de Parca, que hiala la lan o lo lin e qu'encamina lo mainat sus la via de la paraula rituala.

Collector / contaire, contaire / collector

  • 25 Que nos apeam ací sus l'edicion originau Contes populaires de la Gascogne, 1886. Ed. Maisonneuve e (...)

20Dens lo prefaci consacrat aus contes25, qu'ei mei metodic. Que da un torn dens totas las publicacions miadas en Gasconha e en França sus la mestior. Plan segur qu'a coma mira màger las recercas alemanas. Un còp hèit lo tribalh classic de criticas deus davancèrs e de plaçar la soa publicacion dens lo briu de la recerca scientifica europea, que'ns e mia a l'encontra deus racontes e deus devisaires. En scribe pieux et intègre que nòta los contes e qu'us espia víver tras los contaires. Que s'arremarca de plan que non i a pas de temps precis per enténer los contes, qu'aquestes devis pòden estar ligats a l'educacion deus mainats com a ua velhada de tribalh collectiu; que suslinha l'interaccion enter un geste repetitiu e lo ritme deu raconte. Simbiòsi còs e votz, a cada còp medisha e totun unica, qui plaça lo raconte sus la via de las variacions. Ne s'i endralha pas mes qu'a lo sentit de la causa orala movedissa. çò qui vaderà un punt de l'analisi contemporaneu deus racontes, n'ei pas a l'òrdi deu dia deus folcloristas tesicats per ua quista de «version unica originau».

21Se i a un model de «texte orau» de cercar, i a tanben un model de contaire tipe e ací J.-F. Biade que'ns apita lo portreit canonic deu bon devisaire, portreit qui's torna trobar ençò de tots lo folcloristas: que's deu, plan segur, d'estar iletrat e d'estar ua hemna. Mes, passats aquestes qualificatius, lo bon folclorista se deu de trobar lo qui pòrta «l'estile gran», estile particular, estacat a l'oralitat qui pren d'autes camins que las tecnicas literaras. Qu'ei pr'amor d'aquò que l'illetrat ei convocat ací, los «petits letrats» e, sordeish, los regents qu'averén tostemps la temptacion de tocar au texte originau:

  • 26 1886, pp. xxx-xxxi.

Ma longue pratique me permet d'affirmer, au moins pour mon domaine, qu'en règle très générale, les narrations les plus faibles, les plus altérées, proviennent des demi-lettrés, notamment des instituteurs primaires qui en savent trop pour rester naïfs et pas assez pour le devenir. J'aurais pourtant à signaler quelques exceptions. Mais cela n'empêche pas que c'est parmi ceux qui ne savent pas lire qu'il faut chercher les vrais témoins; car ceux-là ne comptent pas sur ce que Montaigne appelle «une mémoire de papier»26.

  • 27 1886, p.xxxi.

22La seguida de l'afirmacion s'estaca a plan destriar los elements qui permetan de s'assegurar de la descoberta d'un «vertadèr» contaire ils marchent droit au but par la voie la plus brève27. Sus aqueste punt Joan-Francès Bladé qu'es tròba sus las medisha pensadas qu'un autre gran folclorista breton François-Marie Luzel:

  • 28 Nicole Belmont, Poétique du conte. Essais sur le conte de tradition orale, 1999, éd. Gallimard, Pa (...)

Nos conteurs populaires, le plus souvent ont deux manières, la première, sobre, brève, en allant droit au but. C'est la meilleure surtout pour le collecteur de contes et autres traditions orales. Dans leur seconde manière au contraire, ils donnent essor à leur imagination, à la folle du logis comme disait Montaigne, se livrent à de nombreuses digressions, mettent en scène des personnes connues, quelques fois leurs auditeurs même, et prennent pour débiter leurs histoires et leurs fables le double de temps que demanderait une narration simple et suivie.28

23Ací se pausa lo problèma de la recepcion deu conte qui ei tot purmèr acte de comunicacion. Mes lo folclorista cerca un tipe precís d'estile e lo public, l'auditòri familiau o locau, en demanda un aute. Luzel e Bladé en tot sentir aquesta variacion qui bota lo collector dens ua plaça particulara, que van préner en consideracion sonqu'ua faiçon de har e estremar las autas possibiltats de díser. E qu'ei «l'estile gran», brac e précis, atau definit, qui sera l'unica mira de tots los folcloristas. Aquesta causida qu'ei d'ua utilitat reala, qu'ei aisidèra per la presa de notas pendents las dictadas. Que soslinha los esquemàs narratius de cada conte, qu'endralha los informators sonque sus versions bracas e qu'autorisa ua recomposicion literària deu collecter. Mes lo grop deus contaires qu'ei trebatent e los collectors ne'us maseran pas tostemps dens aqueth acte de comunicacion. Que pòt i aver ua corruda a la captacion de l'auditòri qui contrapassa lo collector e ont s'afirma ua classificacion autoctòn deus contes:

  • 29 1886, pp. xlv-xlvi.

J'ai reconnu très souvent qu'ils cherchent à se surpasser devant l'auditoire, quand le premier se tait, un second puis un troisième, etc., continuent volontiers par des narrations de même ordre. Si par exemple, tel conteur débute par un «récit de Vengeance» ou de «Chatiment», soyez à peu près certain que, sur ce thème, les rivaux ne manqueront pas29.

  • 30 Marie-Louise Teneze et Gorges Delarue, Nanette Lévesque conteuse et chanteuse du pays des sources (...)
  • 31 Félix Arnaudin, Contes populaires de la Grande-Lande. 1994, éd. Confluences / Parc Naturel Régiona (...)

24Mes dens tota aquesta quista de la paraula antica se pot encontrar, o se deu encontrar, l'informator excepcionau. Victor Smith qu'encontrarà a Nanette Lévesque30, Felix Arnaudin a Mariane de Marioulan31 e Joan-Frances Bladé que troberà ençò deu vielh Cazau las qualitats de l'interlocutor perfeit. Com sovent, un ligam particular se pot apitar enter las duas personas, lo collector qu'arriba au moment de qui cau tà cuélher la paraula seculara deu darrèr temoenh d'un monde acabat. Lo folclorista qu'a donc la carga de sauvar un élément de la cultura d'ua civilisacion orala e l'informator que'ns apareish com destacat de ligam sociau de cap a un interlocutor unic qui ei lo sol a compréner, enqüèra, las paraulas d'un còp èra, donc que li balha tot lo son saber. J-F Bladé que's va encaminar sus la medisha via, mes pas tot a feit de la medisha faiçon, eth lo jutge deus autes, que sera jutjat per Cazau lo vielh enigmatic de la casqueta de loira. Aquesta inversion d'espiada ne s'encontra guaire devath de la pluma deus folcloristas:

  • 32 1886, pp. xxxiv-xxxv.

C'était un vieillard assez replet à la face terreuse, et couturé de mille rides, avec de petits yeux ternes et voilés, vêtu selon la saison de bure grise ou de droguet bleu, en tout temps coiffé d'une vénérable casquette de loutre. [...] Durant la belle saison, nous nous rencontrions, chaque soir au tournant de la route qui débouche de l'Esplanade, et domine le vaste paysage, fermé, tout au loin, par la ligne vague et bleue de Pyrénées. Une fois assuré que nous étions tous les deux bien seuls, Cazaux rajeunissait de trente ans. Son regard s'éclairait. De sa voix lente et grave, il dictait, avec d'amples et sobres gestes, se taisant quelquefois pour se recueillir, ou promener autour de nous un regard soupçonneux. Moi, j'écrivais rapidement, sauf à corriger plus tard les textes, sous le contrôle souvent tyrannique de mon narrateur. Je tiens néanmoins pour certain que Cazaux s'est tu sur bien des choses et qu'il est mort sans me juger digne de noter la moitié de ce qu'il savait.32

  • 33 La question que's pòt enqüèra sentir dens articles deu colloque de Leitora consacrat à J.-F. Blade(...)

25Lo sapient contrarotlat per l'illetrat. Bladé qu'escriu tostemps a la dictada, plan conscient de portar a l'escritura un gran estile orau, mes ací que'ns e precisa que tornerà adobar los textes mei tard. Aquèth adobament, qui ei lo gran tribalh scientific deus purmèrs folcloristas, que serà emplegat contre Bladé per los sons destractors. La causa qu'ei sabuda, que serà donc acusat d'aver escriut eth medish los contes e de non pas aver encontrat las personas don e parla33. Trop plan adobats que son aquestes contes, simples e complets, centrats dens lo nord deu Gers, los eròis que'n pòrtan l'identitat. Aquestes eròis de l'anar antic que van tostemps, de tres en tres, miat per lo hat, complir la loa destinada. Si Bladé qu'estó lèu acusat d'escriver faus, qu'ei per'mor que, a despart de díser d'anar véder los sons informators, n'a pas guardat o n'a pas amuishat las huelhas o los casernets sus los quaus avèva notat los contes dictats.

  • 34 Que renviam los legedors a la tèsi de Vivian Labrie, La tradition du conte populaire au Canada fra (...)

26En tot demorar sus aquestas ideas màger, partatjadas per tots que'ns èm sovent pausada la question de saber si Bladé ne seré pas estat un contaire purmèr que d'estar un folclorista. Los quauques elements dont avem presentat en debuta d'aqueste escriut nos amuisha un actor, un contaire, qui a tota pausa de la soa vira, coneish l'art de la paraula e sap plan retiéner l'atencion deu public. Passat a l'escriut, los Contes de Gasconha saben plan gahar l'atencion deu legedor. Acì n'ei pas lo perpaus, mes las darèras recercas hèitas sus los contaires, las faiçons dont an de memorisar, de har prabar, de díser e tornar diser los contes, nos botan de pè dens un monde creatiu ont n'èm pas luenh de la creacion literara, de la maduracion de l'òbra dens lo cors deu creator34.

Ua collecta de Bladé?

27Donc, a maugrat de las afirmacions deus uns e deus autes, un detzenat d'armadas i a, en tot cercar dens I'Armanhac negre entresenhas sus un caperan felibre-folclorista, qu'avoi l'escadença de trobar letras de J.-F. Bladé e quauquas huèlhas ont èran, mau escriutas, causas qui podèvan semblar a elements de contes. Aquestas notas, com totas las notas presas a la corruda qu'èran de mau léger, dab abreviacions, mots barrats, pècas, las heulhas ralhadas en lo centre, mes l'escritura qu'èra la medisha que la de las letras. Qu'èri donc de cap a quauquarren qui podèva paréisher com un element de la collecta de J.-F Bladé. Efectivament, un còp las nòtas esclaridas qu'èri donc de cap a 13 contes e 1 randolada e mei precisament 13 esquemas de contes, shens titols, e un abracat de randolada, La Tricoto . Aquesta cuelhuda que vienèva d'ua familha, la mair e las duas hilhas: Antoinette Sant, vaduda Cousturian, 55 ans; Marie Sant, 23 ans e Victorine Sant, 19 ans totas de Sarrant dens lo Gers. Aquestes contes son en françés, n'i a sonque la randolada qui ei en occitan. De mei, Bladé nota qu'aquestas hemnas que s'an arrecebuda l'instrucion primària. Tot aquò se torna trobar dens l'edicion Maisonneuve en 1886. Tot qu'ei identic a despart de la randolada qui ei en francès e de l'edat de Victorine qui pren un an de mei, 20 ans. De notar tanben que sus los 13 contes, sonque 9 seràn editats, ua causida qu'estoc donc hèita dont ne coneishem pas los critèris de seleccion.

28Luenh de presentar tots los textes, qu'ei interessent de véder lo tribalh d'adaptacion literara que pot har Bladè a l'entorn d'un conte e de la randolada.

  • 35 1886, Tome II, pp. 11-19.
  • 36 P. Delarue, M.-L. Teneze, Le conte populaire français. Ed. Maisonneuve et Larose, Paris, 1977, tom (...)

29Lo conte causit qu'ei Les trois pommes d'oranges35, lo T. 408 de la classification internacionau. Dens las notas, en fin de publicacion, J. F Bladé que'ns e balha endicas sus las soas honts: duas gojatas Marie Sant de Sarrant e Pauline Lacaze de Panassac. Que sabem donc que M. Sant a 23 ans e qu'ei pourvue de l'instruction primaire, de P. Lacaze ne sabem pas arren sonque qu'a ua version bessona deu conte dab un motiu mei, lo de l'espròva de las moscas. Duas informatritz, dus racontes quasi identics e a la fin ua plan beròja version gascona d'un deus contes los meis coneguts de l'espaci mediterranenc dont los traçs escriuts los mei vielhs se tròban dens lo Pentameron (V, 9)36.

  • 37 Vivian Labrie, 1978.
  • 38 Dus autes detains a medisha fonccion mes de temporadas diferentas qu'ei l'anonca de la decision de (...)

30Per çò qui ei deu texte editat ne lo podem comparar sonque a las nòtas presas pendent la dictada de M. Sant. Nòtas de mau compréner pr'amor d'ua escritura esquèra, d'ua escritura rapida pendent ua ausida e d'un rendut en estil telegrafic. Mes per delà aquestas dificultats çò que relhèva J.F Bladé, qu'ei l'esquemà deu conte, la soa estructura, l'essenciau, l'amna en partir deu quau tot contaire comença lo son tribalh de memorisacion e de recompausicion37. En vint linhas tot que i ei: la hilha deu rei, la presentacion deu problèma, los tres hrairs, los tres camins, la vielha ajudaire, lo eròi e las soas espròvas, la resolucion deu problema e lo maridatge. En tot s'estangar sus aquestas linhas qu'ei interessent de notar la purmèra frasa: Un roi avait une fille qui mourait de la poitrine, nat traç de reina, nada qualificacion de la hilha mes présencia d'un element contextualisant, la tuberculòsa, maladia centrau de tot lo sègle xix. Plan segur, dens la version escriuta lo rei qu'a ua reina e la hilha, tostemps belle comme le jour, que cad malauda d'ua malaudia desconegua a l'edat de 18 ans, ací qu'èm hòra de tot temps, hòra de tot lòc. Tots los elements importents son qualificats per plan ahortir lo drame qui's jòga dens l'istòria, l'edat o la mena de temporalitat qu'ei entà plaçar l'analisa deu raconte dens ua logica qui's comprend a la resolucion deu problèma. Dens la version de M. Sant que sabem que i a ua familha de tres gojats praubes, dus de maishants un de bon. Dens la version de Bladé qu'èm de cap a ua veusa prauba qui a tres gojats, los dus purmèrs que son fainéants, ivrognes, joueurs, ils ne valent même pas la corde pour les pendre e lo darrèr qu'ei sage, laborieux et avisé. Si lo casau de las iranjas de M. Sant ei tot simplament «beròi», Bladé que'ns ne balha l'imatge de l'Eden e la vielha encontrada au ras de la hont que serà qualificada de «vielha com un camin». Si la prison ei presenta en çò de M. Sant, qu'ei lo borrèu qui arcuelh los dus purmèrs hrairs, dus elements de duas temporadas diferentas qui an la medisha foncion: estremar definitivament los elements negatius38. Çò que J.-F Bladé suberdesvelòpa que son los dialògs, las demandas deus tres hrairs hèitas a la mair, los escambis enter la vielha e lo eròi, enter lo rei e lo eròi e las frasas ditas per la prncessa a cada còp que minja ua poma d'iranja. Ací lo novelista-contaire qu'arpasta pregondament lo raconte de M Sant per nos balhar la soa version d'òmi de letras sensible a l'art de la literatura orala.

31Uei lo dia, l'observacion deus dus textes que'ns e plaça cap a duas versions d'un medish conte hèit per dus contaires diferents ont cadun ditz la soa cultura e la soas referéncias. Los pretz-hèits de Marie e de Jean-François que son disparièrs. L'ua que hica lo raconte dens la temporada que coneish e que lo ditz per har plaser, l'aute qu'ei virat cap a la recomposicion d'ua Gasconha mitica on tot deu estar d'ua estetica perfeita e plaçat dens un contexte deus mei vieilhs o deus mei antics. Si Gasconha n'a pas conegut ua destinada independenta, J.-F. Bladé que hè jogar aus contes l'istòria d'un reiaume perdut e d'ua civilisacion de las mei ricas.

  • 39 1886, tome III, pp. 240-242.

32Per çò qui ei de la randolada qu'èm de cap a un aute tipe de problèma, qu'ei Antoinette Sant née Cousturian, la mair, qui la balha a Bladé. Lo purmèr problèma qu'ei d'òrdi linguistic, ua randolada jòga sus l'accumulacion e las sonoritats deus mots, costejant lo viralenga que pòt dificilament passar d'un registre a un aute. Versificada, hèita sus un mòde de jòc ont animaus, òmis, objectes e elements sont ligats dens ua cadena d'ajuda per resòuver un problèma, qu'entra dens l'educacion deus mainats e mei precisament dens l'ensenhament de la lenga e dens lo desvelopament de la memòria. Antoinette que ditz lo son texte en occitan mes Bladé lo publicarà en francès accompanhat de nòtas qui suslinhan los jòcs musicaus ligats a la versificacion gascona: La tricoco o Tricote39 qu'ei lo titol d'aquesta randolada. La huèlha de collecta que'ns e balha lo texte tot sancèr, lo noste folclorista gascon jogarà deus abracats sonqu'a la fin, moment ont la cadena se torna har, ací los iniciaus son en plaça deus noms. Bona tecnica per escriver au mei viste ua paraula desligada qui precisament jòga sus la rapiditat de l'elocucion. Lo texte purmèr ei occitan. Bladé que l'escriu tau com l'enten e quan passa a la publicacion, qu'ei Léonce Couture qui torna tribalhar la lenga. Deu tribalh aqueste que'n podem sentir tota la portada dens las nòtas on los vers gascons son aperat a l'ajuda d'ua arrevirada flaca, tanlèu los purmèrs vers que podem véder ua distorcion enter çò qu'a entenut Bladé e çò qui ei editat: La Tricoto auèuo uo agneroto - s'en angaue au blat de la Trie aquò's çò d'entenut; Tricoto. - Auèui uo aoeilloto. - S'en angouc au blat de la Tricoto.. aquò's çò d'editat en nòta. Per ua logica editoriala qu'avem ací un cambiament de subjecte, que passam de la tresau a la purmèra persona çò qui mia a un cabiament de temps, de l'imperfeit se'n angava au preterit se'n angoc. De la medisha faiçon que podem notar qu'ua causida ei hèita enter los dus noms de l'animau dont ei question, anheròta o auelhòta. Aquò's lo hèit de Bladé o de Couture? Si demoram a çò de dit dens las introduccions de las cantas e deus contes que nos encaminam deu costat deu filològ Couture. E aquestas causidas e serén pensadas per deishar veder sonque un parlar centrau deu Gers o Couture e's deisheré miar per lo son parlar armanhaquès? De mei, quin ei la part de Bladé, ac accepta tot? Mauaisit de balhar ua reponsa e dens tota la soa òbra, n'avèm sonqu'aquestes dus vers per nos pausar questions !

33Jean-François Bladé qu'ei un sapient en mestièr de folclore e d'istòria gascona. L'un e l'aute temas que's completan, que's pòden encontrar, a còps. çò qui sembla gavidar la soa energia qu'ei lo sentir, l'analisia, la vision d'ua Gasconha eretèra de l'ensenhament greco-latin, virada cap a un sud qui afirma ua civilisacion qui passa los Pirenèus e qui la liga aus reiaumes arago-navarès. Dens lo monde scientific deu segle xix e uei enqüèra, Los contes de gasconha qu'an ua plaça a despart, un quauquarren los destacan de las autas collectas de Luzel, Cosquin e autes, un quauquaren qui, mei que los tèmas, marca 0l'escritura de cadun d'aquestes contes. Aquesta escritura simpla, qui sembla paraulas de la vita vitanta e qui enloba los contaires de uei lo dia. La formacion deu novelista e's deisheré ací véder o ei tot simplament la passion creatritz deu contaire en plea concepcion deu son repertòri?

Annexes

ANNEXE

Un roi avait une fille qui mourait de la poitrine. Médecin dit elle guérira, si elle mange 3 oranges. Publie que celui qui les portera (il n'y en avait pas au pays) l'épousera. – Famille, 3 enfants pauvres. 2 mauvais sujets. Dernier sage. – Le 1er part avec panier pour pays d'oranges. – Dans un beau jardin en coupe 3. – Revient. Près de fontaine trouve vieille. Que portes tu? –3 crapauds. – 3 crapauds suit – arrive. – 3 crapauds mis en prison. – 2e part. Fontaine vieille, 3 serpents. Mis en prison. – 3e part. 3 oranges vieille et fontaine, porte moi de l'eau. Le fait. Que portes–tu? 3 oranges pour la fille du roi. Bien riche pour moi, mais au roi qq. chose. Tu l'auras. On te fera épreuves. 300 lapins à garder. Avec ce sifflet et ce fouet ils rentreront tous. Le roi t'en demandera un. Donne–le à condition de mettre anneau au doigt de la princesse (guérie) Il la serrera à meunier. –On te la donnera. Arrive, princesse mange oranges et guérit. Lapins, fouet et sifflet. Anneau. Epouse la princesse.

Marie Sant

La tricoto

La Tricoto auèuo uo agneroto – s'en angaue au blat de la Trie . – La Trie me beuelom pas rende mon agneroto, que n'au l'auoussi baillat coco. – m'en bau enta ma masraitre querre coco. – Me boulant pas bailla coco, que nou li auoussi baillat hiu. – M'en bau enta la hauo querre hiu. – La hauo me boulant pas bailla hiu, que nou li auoussi baillat pèt. – M'en bau ent'au ludet, querre pèt. – lou ludet mes boulant pas bailla pèt, que nou l'auoussi baillat lèt, – M'en bau enta la baco querre leit. – La baco me boulant pas bailla leit que nou l'auoussi baillat heu – M'en bau ent'au prat querre heu. – Lou prat me boul.pas bailla heu que nou l'an baillat daillo. –M'en bau ent'au haure querre daillo – Lou haure ma boulant pas la daillo que nou l'auoussi baillat sagin. – M'en bau ent'au pourcatè q. sagin. –Lou p. nou me boulant pas ba. sagin que. n. l. b. aglan. – M'en bau ent. casse querre aglan.. – Lou c. me b. p. b. agl. que n. l. b. bent ou plouje. –M'en b. a Toulouse q. bent ou plouje. Bent ou p. au casse. – Le casse aglan a jou. — Jo ag. au p. — Lou p. sag. a jou. — j. sag. au h. — lo h. à. a jou. – j. d. au prat. – L. p. h. a jou. j. h. a lab. – la b. l. a jou. – jou l. a.b. – Le b. p. a j. – jou p. a la h.– La h. h. a j. – j. h. a ma m.– m. m. c. a j. j. c. a la Tricoto, m'a rendut mon agneroto.

Antoinette Cousturian, épouse Sant, de Sarrant, lettrée, âgée de 55 ans

Notes

1 Per mei de detalhs sus la vita e l'òbra de J.-F. Blade, de véder l'introducion hèita per Françoise Morvan dens Jean-François Blade, Contes de Gascogne. 2004, éd. Ouest-France, Rennes, 301 p. e los actes deu colloque Jean-François Bladé (1827-1900), CELO, 1985, éd. CIDO, Béziers, 231 p.

2 Des Alpes aux Pyrénées. SD, éd. Flamarion, Paris, pp. IX-X.

3 Léonce Couture, vadut a Cazaubon (Gers) en 1832, mòrt a Toulouse en 1902. Caperan, prefecte deus estudis au collètgi de Leitora (1861), professor de las umanitats au petit seminari d'Aush (1863) arquivista de la villa (1867-1871), missionnari diocesan (1863-1866), secretali deu comitat d'istòria e d'acqueologia de la provincia d'Aush, professor de filosofia au petit seminari (1866-1879) arquivista interimari deu Gers (1871-1874), professor de lenga romana a l'Institut catolic de Tolosa (1880), decan d'aqueste l'Instiut en 1886, president de la Société historique de Gascogne, e director deu Bulletin d'histoire et archéologie (1862), Majorau deu felibritge en 1876, Membre de l'Acadèmia deus jòcs floraus.

4 De véder F. Pic «Essais de bibliographie de l'œuvre imprimée de Jean-François Bladé», Jean-François Bladé (1827-1900), Actes du colloque de Ledoure, ed. C. E. L. O., Béziers, 1985, pp. 174-190.

5 Revue d'Aquitaine, 5e année, pp. 197-219, 271-285, 326-332, 376-388, 426-472, et 557-568; 6e année, pp. 71-77 et 113-123.

6 Revue d'Aquitaine, tone 7,1er juillet 1862- 1er Juillet 1863, pp. 5-17,137-144,189-194, et 224-231.

7 Editions Dentu, Paris, 1862, pp. 85-86

8 1886, tome 2 p 25.

9 1186, tome 2, p. 45.

10 1886, tome 2, p. 64.

11 Contes populaires recueillis en Agenais, 1874. Ed. Joseph Baer, Paris, p. III.

12 1967, tome 1, note p. ii.

13 Que'ns apeam ací sus la reedición de 1967 deus tres volumes de las Poesies populaires de la Gascogne, éd. Maisonneuve et Larose, Paris

14 1967, tome 1, p.vi.

15 1967, tome 1, p. v.

16 1967, tome 1, p. viii.

17 1967, tome 1, p.xiii.

18 1967, tome 2, pp.vii-xii.

19 1967, tome 2, p. viii.

20 1967, tome 1, p. xxvii.

21 1967, tome 1, pp.xxviii-xxix.

22 1967, tome 1, p.xxx.

23 Catherine Sustrac, jeune fille illettrée de Sainte-Eugénie, commune du canton de Beauville, Madame Lacroix, née Pinèdre, ma belle-mère, native de Notre-Dame de Bon-Encontre (canton d'Agen) et Marianne Bense, vieille femme illettrée, veuve d'un marinier du Passage d'Agen... Contes Populaires recueillis en Agenais, éd. Joseph Baer, Paris, 1874, p. iii.

24 Que renviam lo legedor au tablèu plan conegut deu mainat entomejat per las hialaras en començament de l'avans-díser aus contes, 1886, pp. iii-iv.

25 Que nos apeam ací sus l'edicion originau Contes populaires de la Gascogne, 1886. Ed. Maisonneuve et Frères et Ch. Leclerc, Paris, tres tòmes.

26 1886, pp. xxx-xxxi.

27 1886, p.xxxi.

28 Nicole Belmont, Poétique du conte. Essais sur le conte de tradition orale, 1999, éd. Gallimard, Paris, p. 69.

29 1886, pp. xlv-xlvi.

30 Marie-Louise Teneze et Gorges Delarue, Nanette Lévesque conteuse et chanteuse du pays des sources de la Loire. 2000, éd. Gallimard, Paris, 734 p.

31 Félix Arnaudin, Contes populaires de la Grande-Lande. 1994, éd. Confluences / Parc Naturel Régional des Landes de Gascogne, 645 p.

32 1886, pp. xxxiv-xxxv.

33 La question que's pòt enqüèra sentir dens articles deu colloque de Leitora consacrat à J.-F. Blade, CELO, Béziers, 1985.

34 Que renviam los legedors a la tèsi de Vivian Labrie, La tradition du conte populaire au Canada français: circonstances de la circulation et fonctionnement de la mémorisation. 1978, Université de Paris V, 662 p. Elements d'aquesta tési son analisats dens lo libe de Nicole Belmont, Poétique du conte, 1999. De véder tanben testimoniatges interessents dens las revistas consacradas aus contes e aus contaires de uei com Dire. Revue du conte et de l'oralité o La grande oreille.

35 1886, Tome II, pp. 11-19.

36 P. Delarue, M.-L. Teneze, Le conte populaire français. Ed. Maisonneuve et Larose, Paris, 1977, tome II, pp.59-67.

37 Vivian Labrie, 1978.

38 Dus autes detains a medisha fonccion mes de temporadas diferentas qu'ei l'anonca de la decision deu rei de's maridar la hilha a qui portera las tres pomas d'iranjas. Per M. Sant la causa qu'ei publicada com son publicadas las anonças municipaus a la mairia. Per Bladé, qui estrema lo conte dens ua Gasconha vielha, l'anonca qu'ei cridada tres còp per dia per lo tabar de vila.

39 1886, tome III, pp. 240-242.

Auteur

Universitat de Pau

© Presses universitaires de la Méditerranée, 2004

Conditions d’utilisation : http://www.openedition.org/6540