1. Cuenta la estoria otrosý que su hermano, el rey don Fernando de [León]

1Cuenta la estoria otrosý que su hermano, el rey don Fernando de [León], salyó muy buen rey synon que traýa1 lisonjeros. Estonçe mezclaron con él al conde don Ponçe e a otros omes buenos. E estonce tollyóles la tierra. E el conde don Ponçe, desque se vio desapoderado, vínose para el rey don Sancho e mostróle cómmo le tirava la tierra su hermano el rey don Fernando, syn merezimiento, la qual le diera el enperador. E el rey don Sancho ouo grand ^125r°a pesar d’ello, e sacó su hueste e fuese para Sant Fagund. E tomó en vm escrito lo que tomara a cada vno e al conde don Ponçe esso mismo. Desý rogó a sus ricos omes que diesen a cada vno de lo que d’él tenían e diesen aquellos omes buenos en qué se mantouiesen. E estonçe diéronle todos fasta veynte mill marauidís que les dio él2.

2E el rey don Fernando supo que su hermano el rey don Sancho era en Sant Safagund con su hueste. Temióse d’él e ouo su consejo sobr’ello, e consejáronlo que se veniese para él e que feziese quanto le él mandase e lo que quesiese, commo a su hermano mayor. E estonce vínose para él con muy poca gente. E estando el rey don Sancho para se asentar a la mesa, entró el rey don Fernando sin sospecha, que non sabía d’él parte. E quando el rey don Sancho vio venir a su hermano de aquella guisa, reçebiólo muy bien e asentólo cabe sý. E el rey don Fernando venía non muy bien vestido e la cabeça por lauar, e posóle (sic)3 muncho por ello e fízole luego entrar en el baño e lauar la cabeça, e diéronle luego muy buenos par de paños. E estídole el rey esperando fasta que salió e fue afeytado. E desý salió, e asentáronse a la mesa e comieron. E desque ouieron comido, fuéronse para vna cámara e preguntóle el rey don Sancho quál era la razón por que asý viniera tan arrebatadamente. E el rey don Fernando le dixo que venía a él commo a su hermano mayor e mejor, e que le fezieran entender que le querían entrar por la tierra e que lo rogaua que lo non quesiese fazer, ca él presto e aparejado estaua para fazer d’ella lo que él mandase. E estonçe dixo el rey don Sancho:

 —Non plega ^125r°b a Dios, my hermano, que la tierra que vos mi padre dio quiera yo para mí, nin que el fijo de mi padre, commo vós sodes, faga omenaje a ome del mundo. Mas en aquello que nuestro padre nos dexó, vós a los vuestros vasallos e yo a los míos somos tenudos de los fazer muncho bien e muncha merçed, ca con la ayuda d’ellos cobraron nuestros anteçesores la tierra e quebrantaron los moros. E  por ende vos ruego que tornedes la tierra al conde don Ponçe e a los otros omes buenos a quien la tollistes, e non querades creer a alisonjeros malos e que uos consejaron mal; ca non es vuestra pro nin vuestra onrra, ca lealmente seruieron a vuestro4 padre, e demás son ya ençima de su tienpo e non es guisado que anden desterrados ençima de su tiempo por malos consejeros. E por ende, por guardar vuestra fazienda vine yo acá, ca non por otro mal que yo en el mi corazón tenga. E vós faziendo esto, luego de aquí me torno.

3E estonçe el rey don Fernando fizo quanto el rey don Sancho le mandó e touo por bien. E partieron amos muy pagados e amigos e alegres.

2. Cuenta la estoria que estando el rey don Sancho en Toledo

4Cuenta la estoria que estando el rey don Sancho en Toledo, llegó mandado como venía grand hueste de moros sobre Calatraua. E teníanla estonçe los freyres del Temple. E ovieron miedo que la non podrían manparar, e affrontáronle que veniese reçebir el castillo e la villa de Calatraua, ca non podríam [defender]. E el rey, viendo la afruenta que le façían, ^125v°a quísola dar <a> alguno que la touiese, mas non falló ninguno que la quesiese.

5E estonçe era en Toledo don Remondo, abat de Fitero, e era con él vn monje que auía nonbre Diego Velásquez, omne fijodalgo e de sangre, e era cauallero muncho onrrado5, e era natural de Burueua. E quando vio al rey estar en aquel cuydado qué faría de Calatraua, consejó al abat de Fitero que la pidiese al rey. E el abat non lo touo por recabdo, mas tanto lo afincó el monje que lo ovo de fazer. E leuantóse el abat, e pedió al rey a Calatraua. E algunos ouo ý que lo touieron por de mal seso. E el rey otorgógela. E luego el abat con su monje fuéronse para el arçobispo6, e díxole cómmo le diera el rey a Calatraba. E el arçobispo agradeçiólo a Dios e diole el rey sus ayudas. E el arçobispo mandó predicar por todas las tierras que fuesen perdonados de sus peccados quantos fuesen acorrer a Calatraua, quantos fuesen o enbiasen. Estonçe mouióse muy grand gente e fueron para Calatrava, e diérongela7, e fue con él Diego Velásquez, el monje. E plogo a Dios que non venieron los moros de aquella uez, de que auían grand miedo. E estonçe munchos de los caualleros que allá fueron tomaron abat más atenplado qual conuenía a caualleros e fincaron ý por defensores. E dende adelante ovieron munchas lides con moros, e con la ayuda de Dios fueron sienpre bienandantes.

6E el abbat tornóse para su monesterio e tomó todos los ganados e las riquezas del monesterio [de Fitero] e fuese para Calatraua con grand poder de christianos, e non dexó en Fitero sinon los que non ^125v°b eran para seruir. E segunt cuenta la estoria, diz que fueron los <que> venieron con el abbat bien veynte e mill8 omes, e éste fue el primero abbat que fue en Fitero. E después que morió, fue enterrado en Çiruelas, çerca de Toledo, e allý faze Dios munchos miraglos por él. E Diego Vásquez biuió después grande tienpo, faziendo muncho bien por sus armas. E después fue cansado9, morió en el monesterio de Oroniel10 e fue ý soterrado.

7Pues que el rey don Sancho ouo dada a Calatraua, segund que auedes oýdo, diole el mar de la muerte en Toledo e morió ý. E fue enterrado çerca su padre en la yglesia mayor; a cabo de vn año finó, que vn año reynó e más non, e por esto le llamaron don Sancho el Deseado.